१ पेत्र ५:१-१४
५ म्हणून, तुमच्यामध्ये असलेल्या वडिलांना मी, जो तुमच्यासारखाच एक वडील, ख्रिस्ताच्या दुःखांचा प्रत्यक्ष साक्षीदार व भविष्यात प्रकट होणार असलेल्या गौरवाचा भागीदार आहे, असा आर्जव करतो:*
२ तुमच्या हाती सोपवलेल्या देवाच्या कळपाचे पालन करा. देखरेख करणारे* या नात्याने नाइलाजाने नाही, तर देवासमोर स्वखुषीने सेवा करा; तसेच, बेइमानीने कमवलेल्या पैशाच्या लोभाने नाही, तर उत्सुकतेने सेवा करा.
३ जे देवाची संपत्ती आहेत, त्यांच्यावर अधिकार गाजवू नका तर कळपासाठी उदाहरण बना,
४ म्हणजे प्रमुख मेंढपाळ प्रकट झाल्यावर तुम्हाला कधीही नष्ट न होणारा गौरवी मुकुट मिळेल.
५ त्याच प्रकारे तरुणांनो, वडील माणसांच्या* अधीन राहा. पण, तुम्ही सर्वच जण एकमेकांशी नम्रतेने वागत जा,* कारण देव गर्विष्ठांचा विरोध करतो, पण नम्र लोकांवर तो अपार कृपा करतो.
६ म्हणून, देवाच्या सामर्थ्यवान हाताखाली स्वतःला नम्र करा, म्हणजे योग्य वेळी तो तुम्हाला सन्मानित करेल;
७ आणि आपल्या सर्व चिंता* त्याच्यावर टाकून द्या, कारण त्याला तुमची काळजी आहे.
८ सावध असा, जागृत राहा! तुमचा शत्रू, सैतान* हा एखाद्या गर्जणाऱ्‍या सिंहासारखा, कोणाला गिळावे हे शोधत फिरतो.
९ पण तुम्ही विश्‍वासात दृढ राहून त्याचा विरोध करा, कारण तुम्हाला माहीत आहे, की सबंध जगातील तुमचे बांधव* अशाच प्रकारची दुःखे सोसत आहेत.
१० तुम्ही थोड्या काळापर्यंत दुःखे सोसल्यावर, सर्व प्रकारची अपार कृपा करणारा देव स्वतः तुमचे प्रशिक्षण पूर्ण करेल. त्याने तुम्हाला आपल्या सर्वकाळाच्या गौरवात बोलावले आहे, कारण तुम्ही ख्रिस्तासोबत ऐक्यात आहात. तो तुम्हाला दृढ करेल, तुम्हाला बळ देईल व स्थिर उभे राहण्यास साहाय्य करेल.
११ त्यालाच सदासर्वकाळ सामर्थ्य मिळो. आमेन.
१२ मी ज्याला एक विश्‍वासू भाऊ मानतो त्या सिल्वानच्या* हाताने मी थोडक्यात तुम्हाला हे पत्र लिहिले आहे, यासाठी की तुम्हाला प्रोत्साहन द्यावे आणि हीच देवाची खरी अपार कृपा आहे अशी प्रामाणिक साक्ष द्यावी. या अपार कृपेत तुम्ही स्थिर राहा.
१३ जी बाबेलमध्ये आहे आणि तुमच्यासारखीच निवडलेली आहे, ती तुम्हाला नमस्कार सांगते. तसेच माझा मुलगा, मार्क हाही तुम्हाला नमस्कार सांगतो.
१४ एकमेकांना भेटताना प्रेमाचे चुंबन घ्या.
ख्रिस्तासोबत ऐक्यात असलेल्या तुम्हा सर्वांना शांती मिळो.
तळटीपा
^ किंवा “असे प्रोत्साहन देतो.”
^ किंवा “कळपाची काळजीपूर्वक राखण करणारे.”
^ किंवा “वडिलांच्या.”
^ किंवा “नम्रतेचे वस्त्र घाला.”
^ किंवा “काळजी; विवंचना.”
^ शब्दशः “दियाबल.” म्हणजे, निंदा करणारा.
^ किंवा “संपूर्ण बंधुसमाज.”
^ ज्याला सीला असेही म्हणतात.
