ईयोब १६:१-२२
१६ मग ईयोबने उत्तर दिलं:
२ “मी पूर्वीही अशा भरपूर गोष्टी ऐकल्या आहेत.
तुमचं सांत्वन मला त्रासदायक वाटतं!+
३ तुमच्या या पोकळ शब्दांना* अंत आहे का?
तुम्ही कशामुळे माझ्याशी असं बोलत आहात?
४ मीसुद्धा तुमच्यासारखाच बोलू शकतो.
तुम्ही माझ्या जागी असता,तर मीही डोकं हलवून,+तुमच्याविरुद्ध लांबलचक भाषणं देऊ शकलो असतो.
५ पण नाही, त्याऐवजी मी माझ्या शब्दांनी तुम्हाला धीर दिला असता,म्हणजे माझ्या ओठांच्या सांत्वनाने तुमचं दुःख हलकं झालं असतं.+
६ मी बोललो, तरी माझा त्रास कमी होत नाही,+आणि मी बोलायचा थांबलो, तरी माझ्या वेदना कुठे कमी होतात?
७ आता तर त्याने मला अगदी हैराण करून सोडलंय;+त्याने माझं घरदार* उद्ध्वस्त केलंय.
८ तू मला ताब्यात घेतलं आहेस; माझी अवस्थाच साक्ष देते,माझं अशक्त शरीर माझ्याविरुद्ध साक्ष देतं.
९ त्याच्या क्रोधामुळे माझ्या चिंधड्या झाल्या आहेत;त्याच्या मनात माझ्याबद्दल वैर आहे.+
तो माझ्यावर दातओठ खातो.
माझा शत्रू क्रूर नजरेने माझ्याकडे पाहतो.+
१० लोक आपले जबडे उघडून मला गिळायला पाहतात.+
ते माझ्या थोबाडीत मारून माझा अपमान करतात.
ते जमाव करून माझ्याविरुद्ध येतात.+
११ देव मला पोरांच्या हाती देतो,तो मला दुष्टांच्या ताब्यात देतो.+
१२ मी सुखात होतो, पण त्याने माझा चुराडा केला;+त्याने माझं मानगूट धरून मला चिरडून टाकलं;त्याने मला निशाण बनवलंय.
१३ त्याच्या तिरंदाजांनी मला घेरलंय.+
तो दयामाया न दाखवता माझ्या शरीरात खोलवर घाव करतो;+तो माझं पित्त जमिनीवर ओततो.
१४ जागोजागी पडलेल्या भिंतीसारखी त्याने माझी अवस्था केली आहे;तो योद्ध्यासारखा माझ्यावर धावून येतो.
१५ मी गोणपाट शिवून माझं अंग झाकलं आहे,+मी माझा सन्मान* धुळीत गाडला आहे.+
१६ रडून रडून माझं तोंड लाल झालं आहे,+माझ्या पापण्यांवर अंधाराची छाया* पडली आहे;
१७ खरंतर, मी कधीच कोणाचं काही नुकसान केलं नाही,आणि माझी प्रार्थना शुद्ध आहे.
१८ हे पृथ्वी, माझं रक्त झाकू नकोस!+
माझ्या आक्रोशाला विश्रांतीचं ठिकाण न मिळो!
१९ या क्षणी माझा साक्षीदार;माझ्या बाजूने साक्ष देणारा स्वर्गात आहे.
२० माझे साथीदार माझी थट्टा करतात,+पण माझे डोळे देवासमोर अश्रू गाळतात.*+
२१ दोन माणसांत न्याय केला जातो,तसा कोणीतरी माझ्यात आणि देवात न्याय करावा.+
२२ कारण आता थोडीच वर्षं उरली आहेत,मग मी निघून जाईन आणि कधीही परत येणार नाही.+
तळटीपा
^ किंवा “दमदाटीला.”
^ किंवा “माझ्यासोबत जमणाऱ्यांना.”
^ किंवा “शक्ती.” शब्दशः “शिंग.”
^ किंवा “मृत्यूची सावली.”
^ किंवा कदाचित, “जागरण झालेल्या डोळ्यांनी पाहतात.”