ईयोब ३२:१-२२
३२ त्या तीन माणसांनी ईयोबला पुढे काहीच उत्तर दिलं नाही, कारण ईयोबला आपण नीतिमान असल्याची पूर्ण खातरी होती.*+
२ पण रामच्या घराण्यातल्या बरखेल बूजीचा+ मुलगा अलीहू याला खूप राग आला. देवाऐवजी ईयोब स्वतःला निर्दोष ठरवण्याचा प्रयत्न करत असल्यामुळे तो ईयोबवर संतापला.+
३ तसंच, ईयोबच्या तीन मित्रांनी त्याला योग्य उत्तर देण्याऐवजी, देवाला दुष्ट म्हटल्यामुळे तो त्यांच्यावरही चिडला.+
४ पण ते वयाने मोठे असल्यामुळे, ईयोबला उत्तर देण्याची आपल्याला कधी संधी मिळते, याची तो वाट पाहत होता.+
५ त्या तिघांजवळ बोलायला काहीही नाही, हे पाहून अलीहूचा राग भडकला.
६ म्हणून बरखेल बूजीचा मुलगा अलीहू याने बोलायला सुरुवात केली. तो म्हणाला:
“मी लहान* आहेआणि तुम्ही वयाने मोठे आहात.+
तुमच्याबद्दल आदर असल्यामुळे मी गप्प बसलो,+आणि मला जे कळतं ते सांगायचं मी धैर्य केलं नाही.
७ मी विचार केला, ‘मोठ्या माणसांना* बोलू द्यावं.
ज्यांनी जास्त दिवस पाहिलेत त्यांना बुद्धीच्या गोष्टी सांगू द्याव्या.’
८ पण माणसाला समजबुद्धी ही देवाच्या पवित्र शक्तीमुळे;*
सर्वशक्तिमान देवाच्या श्वासामुळेच मिळते.+
९ फक्त वयामुळे* माणसाला शहाणपण* येत नाही,आणि योग्य काय ते फक्त म्हाताऱ्या माणसांनाच समजतं, असं नाही.+
१० म्हणून म्हणतो, ‘माझं ऐका,म्हणजे मला जे कळतं ते मीही तुम्हाला सांगीन.’
११ तुमचं बोलणं संपेपर्यंत मी थांबलो;+तुम्ही उत्तरं शोधत होता
आणि वादविवाद करत होता, तेव्हा मी ऐकत होतो.+
१२ तुमचं बोलणं मी लक्ष देऊन ऐकलं,पण ईयोबला खोटं ठरवणं;*
किंवा त्याचा तर्क खोडून काढणं एकालाही जमलं नाही.
१३ म्हणून, ‘आम्हीच बुद्धिमान आहोत,आणि माणूस नाही, तर देवच ईयोबला ताडन करतोय’ असं म्हणू नका.
१४ तो काही माझ्याविरुद्ध बोलला नाही;त्यामुळे मी त्याला तुमच्यासारखी उत्तरं देणार नाही.
१५ ही माणसं कावरीबावरी झाली आहेत, काय बोलावं हे त्यांना सुचत नाही;आता त्यांच्याजवळ द्यायला उत्तरच नाही.
१६ मी वाट पाहतोय, पण ते काही बोलतच नाहीत;ते नुसतेच गप्प उभे आहेत.
१७ म्हणून आता मी उत्तर देईन;मला जे कळतं ते मीही सांगीन.
१८ मला खूप काही बोलायचंय;पवित्र शक्ती मला बोलायला भाग पाडत आहे.
१९ आता मला बोलल्याशिवाय राहवत नाही,*मी गप्प बसलो, तर माझं हृदय फाटेल.*+
२० मला बोलू द्या; तरच मला चैन पडेल!
मी आपलं तोंड उघडून उत्तर देईन.
२१ मी कोणाचीही बाजू घेणार नाही;+माणसांची खोटी प्रशंसा करणार नाही,*
२२ कारण खोटी प्रशंसा करणं मला जमतच नाही;आणि जर मी केली, तर माझा निर्माणकर्ता लगेच माझा नाश करेल.
तळटीपा
^ किंवा “कारण ईयोब स्वतःच्या दृष्टीने नीतिमान होता.”
^ शब्दशः “दिवसांत लहान.”
^ शब्दशः “दिवसांना.”
^ शब्दार्थसूची पाहा.
^ किंवा “पुष्कळ दिवस पाहिल्यामुळे.”
^ किंवा “बुद्धी.”
^ किंवा “ईयोबची चूक दाखवणं.”
^ किंवा “माझ्या आतड्या घट्ट बंद केलेल्या द्राक्षारसाच्या बुधलीसारख्या आहेत.”
^ किंवा “माझ्या आतड्या फुटायला आलेल्या द्राक्षारसाच्या नवीन बुधल्यांसारख्या आहेत.”
^ किंवा “मानाची पदवी देणार नाही.”