एज्रा ३:१-१३
३ इस्राएली लोक* आपापल्या शहरांमध्ये राहू लागल्यावर, सातव्या महिन्याच्या+ सुरुवातीला ते सर्व यरुशलेममध्ये एकमताने जमा झाले.
२ खऱ्‍या देवाचा सेवक मोशे याच्या नियमशास्त्रात लिहिल्याप्रमाणे होमार्पणं देता यावीत,+ म्हणून यहोसादाकचा मुलगा येशूवा,+ त्याच्यासोबतचे याजक, तसंच, शल्तीएलचा+ मुलगा जरूब्बाबेल+ आणि त्याचे भाऊ यांनी मिळून इस्राएलच्या देवाची वेदी बांधली.
३ आजूबाजूच्या देशांतल्या लोकांची भीती असूनही,+ त्यांनी ती वेदी तिच्या मूळ ठिकाणी बांधली. ते दररोज तिच्यावर यहोवाला सकाळची आणि संध्याकाळची होमार्पणं देऊ लागले.+
४ मग नियमशास्त्रात सांगितल्याप्रमाणे, त्यांनी मंडपांचा* सण साजरा केला+ आणि प्रत्येक दिवसासाठी जितकी होमार्पणं सांगितली होती, तितकी त्यांनी दररोज दिली.+
५ यानंतर त्यांनी नियमित होमार्पणं,+ नवचंद्राच्या दिवशी* द्यायची अर्पणं,+ यहोवाच्या सर्व पवित्र सणांच्या वेळी द्यायची अर्पणं,+ शिवाय, लोकांनी यहोवासाठी स्वेच्छेने आणलेली अर्पणंही+ दिली.
६ यहोवाच्या मंदिराचा पाया अजून घालण्यात आला नव्हता, तरीही त्यांनी सातव्या महिन्याच्या पहिल्या दिवसापासूनच+ यहोवासाठी होमार्पणं द्यायला सुरुवात केली.
७ त्यांनी दगड फोडणाऱ्‍यांना+ आणि कारागिरांना+ पैसे दिले. तसंच, पर्शियाचा राजा कोरेश+ याने परवानगी दिल्याप्रमाणे, त्यांनी सीदोनच्या आणि सोरच्या लोकांना लबानोनवरून यापो इथे समुद्रमार्गाने देवदाराची लाकडं आणण्याच्या+ मोबदल्यात, खाण्यापिण्याच्या वस्तू आणि तेल दिलं.
८ जिथे खऱ्‍या देवाचं मंदिर होतं, त्या यरुशलेममध्ये आल्याच्या दुसऱ्‍या वर्षाच्या दुसऱ्‍या महिन्यात, शल्तीएलचा मुलगा जरूब्बाबेल, यहोसादाकचा मुलगा येशूवा, त्यांचे बाकीचे सगळे भाऊ, याजक व लेवी आणि बंदिवासातून यरुशलेमला आलेले सर्व लोक+ यांनी कामाला सुरुवात केली. त्यांनी २० वर्षं आणि त्यापेक्षा जास्त वयाच्या लेव्यांना यहोवाच्या मंदिराच्या कामावर देखरेख करण्यासाठी नेमलं.
९ तेव्हा येशूवा, त्याची मुलं व त्याचे भाऊ, कदमीएल व त्याची मुलं, तसंच यहूदाची मुलं, हे सर्व जण एकत्र येऊन खऱ्‍या देवाच्या मंदिराचं काम करणाऱ्‍यांवर देखरेख करू लागले. त्यांच्यासोबत लेवी वंशातल्या हेनादादची मुलं,+ त्यांची मुलं व त्यांचे भाऊ होते.
१० बांधकाम करणाऱ्‍यांनी जेव्हा यहोवाच्या मंदिराचा पाया घातला,+ तेव्हा याजक आपली खास वस्त्रं घालून आणि हातात कर्णे घेऊन,+ तसंच, लेव्यांपैकी आसाफची मुलं हातात झांजा घेऊन, इस्राएलचा राजा दावीद याने ठरवलेल्या पद्धतीप्रमाणे यहोवाची स्तुती करायला उभी राहिली.+
११ मग, एक गट गाऊ लागला आणि दुसरा त्याला प्रतिसाद देऊ लागला.+ त्यांनी असं म्हणून यहोवाची उपकारस्तुती केली: “तो चांगला आहे, इस्राएलबद्दल त्याचं एकनिष्ठ प्रेम सर्वकाळ टिकून राहतं.”+ तेव्हा सर्व लोकांनी मोठ्या आवाजात यहोवाची स्तुती केली, कारण यहोवाच्या मंदिराचा पाया घालण्यात आला होता.
१२ याजक, लेवी आणि कुळांचे प्रमुख यांच्यापैकी ज्यांनी जुनं मंदिर पाहिलं होतं,+ अशा वृद्धांनी जेव्हा या मंदिराचा पाया घातला जात असताना पाहिलं, तेव्हा ते मोठमोठ्याने रडू लागले. तर, इतर लोक आनंदाने जयजयकार करू लागले.+
१३ लोकांना जयजयकाराच्या आणि रडण्याच्या आवाजांत फरक करता येत नव्हता. कारण लोक इतक्या मोठ्याने ओरडत होते, की त्यांचा आवाज दूरपर्यंत ऐकू येत होता.
तळटीपा
^ शब्दशः “इस्राएलची मुलं.”
^ किंवा “तात्पुरत्या आश्रयांचा.”
^ चंद्राची पहिली कोर दिसते तो दिवस.
