ओबद्या १:१-२१
१ सर्वोच्च प्रभू यहोवाने* ओबद्या* याला अदोमबद्दल एक दृष्टान्त दाखवला.
तो म्हणतो:+
“आम्हाला यहोवाकडून एक बातमी मिळाली आहे,राष्ट्रांकडे एका राजदूताला पाठवण्यात आलं आहे:
‘उठा, आपण अदोमविरुद्ध युद्धाची तयारी करू.’ ”+
२ “पाहा! मी तुला राष्ट्रांमध्ये कवडीमोल केलंय;ते तुला अगदी तुच्छ समजतात.+
३ तुझ्या गर्विष्ठ मनाने तुला फसवलंय,+तू खडकाच्या कपारींमध्ये राहतोस,तू उच्च स्थानांमध्ये राहतोस आणि मनातल्या मनात म्हणतोस,‘मला खाली जमिनीवर कोण आणू शकेल?’
४ जरी तू गरुडासारखं उंचावर घरटं बांधलंस,*किंवा ते ताऱ्यांमध्ये नेऊन ठेवलंस,तरी मी तुला तिथून खाली आणीन,” असं यहोवा म्हणतो.
५ “रात्री तुझ्याकडे चोर किंवा दरोडेखोर आले,तर त्यांना हवं तेवढंच ते लुटून नेणार नाहीत का?
किंवा जर द्राक्षं गोळा करणारे तुझ्याकडे आले,तर तेही काही द्राक्षं सोडून जाणार नाहीत का?+
पण तुझे शत्रू मात्र तुझा अगदी पूर्णपणे नाश करतील!*
६ एसावला कसं शोधून काढण्यात आलंय!
त्याचा लपवलेला खजिना कसा लुटण्यात आलाय!
७ त्यांनी तुला सीमेवर हाकलून दिलंय.
तुझ्या सर्व साथीदारांनी* तुला फसवलंय.
जे तुझ्यासोबत शांतीने राहायचे, त्यांनी तुला मात दिली आहे.
जे तुझ्यासोबत बसून जेवायचे, त्यांनीच तुझ्यासाठी जाळं पसरलं आहे,पण तुला समजत नाही.”
८ यहोवा म्हणतो, “त्या दिवशी,मी अदोमच्या बुद्धिमानांचा नाश करणार नाही का?+
आणि एसावच्या डोंगराळ प्रदेशातून समज नाहीशी करणार नाही का?
९ अरे तेमान,+ तुझे योद्धे भयभीत होतील,+कारण एसावच्या डोंगराळ प्रदेशातल्या प्रत्येकाची कत्तल केली जाईल.+
१० तू आपला भाऊ याकोब याच्याशी क्रूरपणे वागलास,+म्हणून तू लज्जित होशील,+आणि तुझा कायमचा नाश होईल.+
११ ज्या दिवशी परक्यांनी त्याच्या सैन्याला बंदिवासात नेलं,+त्या दिवशी तू नुसता बघत उभा राहिलास.
ज्या दिवशी त्याच्या फाटकात विदेशी शिरले आणि त्यांनी यरुशलेमवर चिठ्ठ्या टाकल्या,+त्या दिवशी तू पण त्यांच्यासारखाच वागलास.
१२ तुझ्या भावावर संकट आलं, त्या दिवशी तू आनंद साजरा करायला नको होतास,+यहूदाच्या लोकांच्या नाशाच्या दिवशी, तू खूश व्हायला नको होतंस,+आणि त्यांच्या दुःखाच्या दिवशी, तू गर्वाने बोलायला नको होतंस.
१३ माझ्या लोकांच्या संकटाच्या दिवशी, तू त्यांच्या फाटकाच्या आत यायला नको होतंस,+त्याच्या विपत्तीच्या दिवशी, तू आनंद साजरा करायला नको होतास,आणि त्याच्या संकटाच्या दिवशी, तू त्याच्या संपत्तीवर हात टाकायला नको होतास.+
१४ तू चौकात उभं राहून, त्याच्या पळून जाणाऱ्या लोकांना ठार मारायला नको होतंस,+आणि संकटाच्या दिवशी त्याच्या वाचलेल्यांना, तू शत्रूंच्या हाती द्यायला नको होतंस.+
१५ कारण सर्व राष्ट्रांच्या विरुद्ध यहोवाचा दिवस येतोय.+
तू जसं केलं आहेस, तसंच तुझ्यासोबत केलं जाईल.+
तू इतरांशी जसा वागलास, तशीच वागणूक तुला मिळेल.
१६ कारण जसा तू माझ्या पवित्र पर्वतावर द्राक्षारस पीत होतास,तशी सर्व राष्ट्रं माझ्या क्रोधाचा द्राक्षारस पीत राहतील.+
ती नक्कीच माझा क्रोध पितील आणि गिळतील,आणि ती राष्ट्रं कधीच अस्तित्वात नव्हती, अशी होतील.
१७ पण जे वाचलेले आहेत, ते सीयोन पर्वतावर असतील,+आणि तो पर्वत पवित्र असेल;+आणि याकोबचं घराणं आपल्या मालकीच्या गोष्टींचा ताबा घेईल.+
१८ याकोबचं घराणं अग्नीसारखं होईल,योसेफचं घराणं ज्वालेसारखं होईल.
तर एसावचं घराणं सुकलेल्या गवतासारखं होईल;ते त्यांना आग लावून भस्म करतील,आणि एसावच्या घराण्यातून कोणीही वाचणार नाही,+कारण यहोवा स्वतः असं बोललाय.
१९ ते नेगेबचा आणि एसावच्या डोंगराळ प्रदेशाचा,+शेफीलाचा* आणि पलिष्ट्यांच्या देशाचा,+एफ्राईमच्या आणि शोमरोनच्या शेतांचा ताबा घेतील+
आणि बन्यामीन गिलादचा ताबा घेईल.
२० कनानी लोकांचा देश थेट सारफथपर्यंत,+या तटबंदीच्या बंदिवानांचा,+ म्हणजे इस्राएली लोकांचा होईल.
यरुशलेमचे बंदिवान, जे सफारदमध्ये होते, ते नेगेबच्या शहरांचा ताबा घेतील.+
२१ एसावच्या डोंगराळ प्रदेशाचा न्याय करण्यासाठी,+वाचवणारे सीयोन पर्वतावर जातील,आणि राज्यपद यहोवाचं होईल.”+
तळटीपा
^ म्हणजे, “यहोवाचा सेवक.”
^ शब्दार्थसूची पाहा.
^ किंवा कदाचित, “उंच उडालास.”
^ किंवा कदाचित, “त्यांनी किती प्रमाणात नाश केला असता?”
^ किंवा “ज्यांनी तुझ्याशी करार केला त्यांनी.”
^ किंवा “टेकड्यांच्या प्रदेशाचा.”