गीतरत्न ५:१-१६
५ “माझ्या बहिणी, माझ्या वधू,मी आपल्या बागेत आलोय.+
माझा गंधरस आणि माझ्या सुगंधी वनस्पती मी घेतल्या आहेत.+
माझ्या मधाच्या पोळ्यातून मी मध खाल्ला आहे.”+
“प्रेमिकांनो, खा-प्या!
प्रेमरस पिऊन धुंद व्हा!”+
२ “मी झोपलेले आहे, पण माझं मन जागं आहे.+
ऐका! माझा सखा दार ठोठावतोय!
‘माझ्या बहिणी, माझ्या प्राणसखे,माझ्या कबुतरा, माझ्या परमसुंदर सखे, माझ्यासाठी दार उघड.
माझं डोकं दवाने ओलं झालंय,माझे केस रात्रीच्या दवबिंदूंनी भिजले आहेत.’+
३ मी आपली वस्त्रं बदलली आहेत,ती पुन्हा कशी घालू?
मी पाय धुतले आहेत,ते पुन्हा कसे मळवू?
४ माझ्या सख्याने दारातल्या झरोक्यातून हात काढून घेतला;तेव्हा माझं मन त्याच्यासाठी आतुर झालं.
५ माझ्या सख्यासाठी दार उघडायला मी उठले;माझे हात गंधरसाने ओले झाले होते,माझ्या बोटांवरून गंधरसाचं तेल,दाराच्या अडसरावर ओघळलं.
६ मी माझ्या सख्यासाठी दार उघडलं,पण तो तिथे नव्हता, तो निघून गेला होता.
तो गेला हे पाहून माझं मन दुःखाने सैरभैर झालं. *
मी त्याला खूप शोधलं, पण तो सापडला नाही.+
मी हाक मारत राहिले, पण त्याने उत्तर दिलं नाही.
७ शहरात गस्त घालणाऱ्‍या पहारेकऱ्‍यांना मी दिसले.
त्यांनी मला मारलं, मला जखमी केलं.
भिंतीवरच्या पहारेकऱ्‍यांनी माझी ओढणी* ओढून घेतली.
८ यरुशलेमच्या मुलींनो, तुम्हाला शपथ आहे:
जर तुम्हाला माझा सखा दिसला,तर त्याला सांगा, मी त्याच्या प्रेमासाठी तळमळत आहे.”
९ “हे सर्वात सुंदर मुली, आम्हाला सांग,तुझा सख्यात असं काय आहे, जे इतरांमध्ये नाही?
तुझ्या सख्यात असं काय आहे, की तू आम्हाला अशी शपथ घालतेस?”
१० “माझा सखा तेजस्वी आणि देखणा* आहे;तो दहा हजारांमध्ये उठून दिसतो.
११ त्याचं डोकं सगळ्यात उत्तम सोन्यासारखं आहे,त्याचे केस डोमकावळ्यासारखे काळेभोर आहेत;त्याचे कुरळे केस हवेत तरंगणाऱ्‍या खजुराच्या फांद्यांसारखे* आहेत.
१२ त्याचे डोळे झऱ्‍याकाठी बसलेल्या कबुतरांसारखे आहेत;तुडुंब भरलेल्या तळ्यांजवळ*
जणू दुधात डुबक्या मारणाऱ्‍या कबुतरांसारखे ते आहेत.
१३ त्याचे गाल सुगंधी फुलझाडांच्या ताटव्यांसारखे;+सुवासिक वनस्पती लावलेल्या उंचवट्यांसारखे आहेत.
त्याचे ओठ भुईकमळांसारखे आहेत, त्यांतून गंधरस पाझरतो.+
१४ त्याच्या हातांची बोटं चंद्रकांत रत्नं जडवलेल्या, सोन्याच्या नळ्यांसारखी आहेत.
त्याचं शरीर नीलमण्यांनी सजवलेल्या, लखलखत्या हस्तिदंतासारखं आहे.
१५ त्याचे पाय, शुद्ध सोन्याच्या बैठकांवर बसवलेल्या संगमरवरी स्तंभांसारखे आहेत.
त्याचं रूप लबानोनसारखं आहे; तो देवदार वृक्षांसारखा उंचापुरा आहे.+
१६ त्याच्या ओठांच्या* गोडव्याचं मी काय वर्णन करू!
त्याची प्रत्येक गोष्ट मोहक आहे.+
यरुशलेमच्या मुलींनो, असा आहे माझा सखा, माझा प्राणसखा!”
तळटीपा
^ किंवा कदाचित, “तो बोलत होता तेव्हा माझा जीव ठिकाणावर नव्हता.”
^ किंवा “शाल.”
^ शब्दशः “लालबुंद.”
^ किंवा कदाचित, “खजुरांच्या गुच्छांसारखे.”
^ किंवा कदाचित, “कारंज्याच्या काठांवर.”
^ शब्दशः “टाळू.”
