जखऱ्‍या ४:१-१४
४ मग जो स्वर्गदूत माझ्याशी बोलत होता तो परत आला, आणि एखाद्याला झोपेतून उठवावं तसं त्याने मला उठवलं.
२ तो मला म्हणाला: “तुला काय दिसतंय?”
तेव्हा मी म्हणालो: “मला सोन्याचा एक दीपवृक्ष* दिसतोय.+ त्याच्या टोकावर एक वाटी आहे, आणि दीपवृक्षावर सात दिवे+ आहेत. हो, सात दिवे! आणि दीपवृक्षावरच्या या दिव्यांना सात नळ्या आहेत.
३ आणि दीपवृक्षाच्या शेजारी जैतुनाची दोन झाडं+ आहेत; एक झाड वाटीच्या उजवीकडे, तर दुसरं वाटीच्या डावीकडे आहे.”
४ मग माझ्याशी बोलणाऱ्‍या स्वर्गदूताला मी विचारलं: “माझ्या प्रभू, या गोष्टींचा काय अर्थ होतो?”
५ तेव्हा माझ्याशी बोलणारा तो स्वर्गदूत मला म्हणाला: “या गोष्टींचा काय अर्थ होतो हे तुला माहीत नाही का?”
मी म्हणालो: “नाही माझ्या प्रभू, मला माहीत नाही.”
६ त्यावर तो मला म्हणाला: “जरूब्बाबेलसाठी यहोवाचा असा संदेश आहे: ‘“सैन्याच्या बळाने नाही किंवा माणसाच्या ताकदीने नाही,+ तर माझ्या पवित्र शक्‍तीने* हे सगळं घडून येईल,”+ असं सैन्यांचा देव यहोवा म्हणतो.
७ हे मोठ्या पर्वता! तू कोण आहेस? जरूब्बाबेलसमोर+ तू सपाट मैदान होशील!+ आणि “खूप छान! खूप छान” असा जयजयकार होत असताना, तो मंदिराचा वरचा दगड घेऊन येईल.’”
८ नंतर पुन्हा एकदा मला यहोवाकडून असा संदेश मिळाला:
९ “जरूब्बाबेलच्या हातांनी या मंदिराचा पाया घातलाय+ आणि मंदिराचं बांधकामही त्याचेच हात पूर्ण करतील.+ मग तुम्हाला कळेल, की सैन्यांचा देव यहोवा यानेच मला तुमच्याकडे पाठवलंय.
१० लहान गोष्टींच्या दिवसाला* कोणीही तुच्छ लेखू नये!+ कारण जरूब्बाबेलच्या हातात ओळंबा* पाहून त्यांना खूप आनंद होईल. हे सात डोळे म्हणजे संपूर्ण पृथ्वीवर नजर असलेले यहोवाचे डोळे आहेत.”+
११ मग मी त्याला विचारलं: “दीपवृक्षाच्या उजवीकडे आणि डावीकडे असलेल्या दोन जैतुनाच्या झाडांचा काय अर्थ होतो?”+
१२ मी दुसऱ्‍यांदा त्याला विचारलं: “सोन्याच्या दोन नळ्यांतून सोनेरी तेल ओतणाऱ्‍या जैतुनाच्या झाडांच्या त्या दोन फांद्यांचा* काय अर्थ होतो?”
१३ तेव्हा त्याने मला विचारलं: “या गोष्टींचा काय अर्थ होतो हे तुला माहीत नाही का?”
मी म्हणालो: “नाही माझ्या प्रभू, मला माहीत नाही.”
१४ तो म्हणाला: “संपूर्ण पृथ्वीच्या प्रभूजवळ उभे राहणारे हे दोन अभिषिक्‍त आहेत.”+
तळटीपा
^ किंवा “समई.”
^ शब्दार्थसूची पाहा.
^ किंवा “ज्या दिवशी लहान सुरुवात झाली त्या दिवसाला.”
^ भिंत सरळ रेषेत बांधली जात आहे की नाही हे पाहण्याचं साधन. यात एका दोरीला खाली वजन बांधलेलं असतं.
^ म्हणजे, भरपूर फळं लागलेल्या फांद्या.
