जखऱ्‍या ७:१-१४
७ दारयावेश राजाच्या शासनकाळाच्या चौथ्या वर्षी, किसलेव* महिन्याच्या म्हणजे नवव्या महिन्याच्या चौथ्या दिवशी, जखऱ्‍याला+ यहोवाकडून संदेश मिळाला.
२ यहोवाकडून दयेची भीक मिळावी, म्हणून बेथेलच्या लोकांनी शरेसरला आणि रगेम्मेलेक व त्याच्या माणसांना पाठवलं.
३ त्यांनी त्यांना सैन्यांचा देव यहोवा याच्या संदेष्ट्यांकडे आणि मंदिरातल्या याजकांकडे असं विचारायला पाठवलं: “मी वर्षानुवर्षं शोक आणि उपास करत आलोय, तसा पाचव्या महिन्यात करावा का?”+
४ मग सैन्यांचा देव यहोवा याच्याकडून मला पुन्हा असा संदेश मिळाला:
५ “देशातल्या सगळ्या लोकांना आणि याजकांना असं विचार, की ‘तुम्ही ७० वर्षं,+ पाचव्या आणि सातव्या महिन्यात+ जो उपास आणि शोक केला, तो खरोखर माझ्यासाठीच केला का?
६ तुम्ही खातपीत होता तेव्हा ते स्वतःसाठीच करत नव्हता का?
७ यरुशलेममध्ये आणि तिच्या आसपासच्या नगरांमध्ये जेव्हा लोकवस्ती होती, आणि तिथे शांती होती; तसंच, नेगेबमध्ये आणि शेफीलामध्येही लोकवस्ती होती, तेव्हा यहोवाने त्याच्या पूर्वीच्या संदेष्ट्यांद्वारे ज्या आज्ञा दिल्या होत्या, त्या तुम्ही पाळायला नकोत का?’”+
८ मग जखऱ्‍याला यहोवाकडून पुन्हा असा संदेश मिळाला:
९ “सैन्यांचा देव यहोवा असं म्हणतो: ‘खरेपणाने न्याय करा,+ एकमेकांशी प्रेमाने*+ आणि दयेने वागा.
१० विधवांना किंवा अनाथांना,*+ गरिबांना किंवा विदेशी लोकांना फसवू नका;+ आपल्या मनात एकमेकांचं वाईट करण्याचं कटकारस्थान रचू नका.’+
११ पण त्यांनी त्याच्याकडे लक्ष दिलं नाही.+ त्यांनी त्याच्याकडे पाठ फिरवली आणि आपली अडेल वृत्ती सोडली नाही.+ ऐकू येऊ नये म्हणून त्यांनी आपले कान बंद केले.+
१२ त्यांनी आपलं मन दगडासारखं* कठीण केलं.+ आणि सैन्यांचा देव यहोवा याने पूर्वीच्या संदेष्ट्यांकडून आपल्या पवित्र शक्‍तीद्वारे जे नियम* आणि ज्या गोष्टी त्यांना सांगितल्या होत्या त्या त्यांनी पाळल्या नाहीत.+ म्हणून सैन्यांचा देव यहोवा याचा क्रोध त्यांच्यावर भडकला.”+
१३ “‘मी हाक मारली तेव्हा त्यांनी जसं माझं ऐकलं नाही,+ तसंच त्यांनी हाक मारली तेव्हा मीही त्यांचं ऐकलं नाही,’+ असं सैन्यांचा देव यहोवा म्हणतो.
१४ ‘आणि मी वादळी वाऱ्‍याने त्यांची अशा राष्ट्रांमध्ये पांगापांग केली जी त्यांना माहीत नव्हती.+ आणि त्यांच्यामागे त्यांचा देश ओसाड पडला; त्यातून कोणीही आलं-गेलं नाही.+ कारण ‘सुंदर देशाची’ अशी दशा झाली, की बघणाऱ्‍यांच्या मनात दहशत बसली.’”
तळटीपा
^ किंवा “एकनिष्ठ प्रेमाने.”
^ किंवा “वडील नसलेल्यांना.”
^ इथे वापरलेला हिब्रू शब्द हिऱ्‍याला किंवा त्याच्यासारख्या दुसऱ्‍या एखाद्या कठीण दगडाला सूचित करतो.
^ किंवा “सूचना.”
