नहूम १:१-१५
१ हे एल्कोश इथल्या नहूम* याला झालेल्या दृष्टान्ताचं पुस्तक आहे. निनवेविरुद्ध न्यायदंडाची घोषणा:+
२ फक्‍त आपलीच उपासना केली जावी अशी यहोवा* अपेक्षा करतो;+यहोवा आपल्या शत्रूंना शिक्षा देतो.
तो त्यांची वाईट कृत्यं विसरत नाही आणि त्यांच्यावर आपला क्रोध ओततो.+
यहोवा आपल्या वैऱ्‍यांवर सूड उगवतो.
३ यहोवा लगेच रागवत नाही.+ त्याच्याकडे अफाट शक्‍ती आहे,+पण यहोवा अपराध्यांना योग्य शिक्षा दिल्याशिवाय राहणार नाही.+
तो विनाश करणाऱ्‍या वाऱ्‍यात आणि वादळात चालतो.
आणि ढग त्याच्या पायाची धूळ आहेत.+
४ तो समुद्राला दम देतो+ आणि त्याला सुकवतो;तो सगळ्या नद्या कोरड्या करतो.+
बाशान आणि कर्मेल सुकून जातात.+
आणि लबानोनची फुलं कोमेजतात.
५ त्याच्यामुळे पर्वत थरथरतात,आणि टेकड्या विरघळतात.+
त्याच्या चेहऱ्‍यामुळे पृथ्वीचा थरकाप होईल,जग आणि त्यात राहणाऱ्‍या सर्वांचा थरकाप उडेल.+
६ त्याच्या संतापासमोर कोण उभा राहू शकतो?+
आणि त्याच्या भयानक क्रोधापुढे कोण टिकू शकतो?+
त्याचा राग आगीसारखा ओतला जाईल,आणि त्याच्यामुळे खडकांचे तुकडे होतील.
७ यहोवा चांगला आहे,+ संकटाच्या दिवशी तो आश्रयाचं ठिकाण होतो.+
त्याच्यात शरण घेणाऱ्‍यांची तो काळजी घेतो.*+
८ वाहून नेणाऱ्‍या पुराने तो तिच्या* ठिकाणाचा सर्वनाश करेल,आणि काळोख त्याच्या शत्रूंचा पाठलाग करेल.
९ यहोवाविरुद्ध तू काय कट रचणार?
तो तुझा असा सर्वनाश करेल,की त्याला दुसऱ्‍यांदा संकट आणावं लागणार नाही.+
१० ते काट्यांसारखे गुंतलेले आहेत;ते मद्याच्या नशेत असलेल्यांसारखे आहेत.
पण ते सुक्या गवतासारखे भस्म होतील.
११ यहोवाविरुद्ध दुष्ट योजना करणारा,आणि बिनकामाचा सल्ला देणारा तुझ्यातून येईल.
१२ यहोवा म्हणतो:
“ते खूप ताकदवान आणि असंख्य असले,तरी त्यांना कापून टाकलं जाईल आणि ते नाहीसे होतील. *
मी तुला* शिक्षा केली आहे, पण यापुढे मी तुला शिक्षा करणार नाही.
१३ आता मी तुझ्यावर असलेलं त्याचं जू* तोडून टाकीन,+आणि तुझ्या बेड्यांचे दोन तुकडे करीन.
१४ यहोवाने तुझ्याबद्दल* अशी आज्ञा दिली आहे,‘कोणीही तुझं नाव पुढे चालवणार नाही.
तुझ्या देवांच्या मंदिरातल्या* कोरीव आणि धातूच्या मूर्तींचा* मी नाश करीन.
तू घृणास्पद आहेस, म्हणून मी तुझ्यासाठी एक कबर बनवीन.’
१५ पाहा, आनंदाचा संदेश सांगणारा,शांतीची घोषणा करणारा+ डोंगरांवरून येत आहे,हे यहूदा, आपले सण साजरे कर,+ आपले नवस फेड,कारण दुष्ट लोक पुन्हा तुझ्यावर हल्ला करणार नाहीत.
त्यांचा पूर्णपणे नाश केला जाईल.”
तळटीपा
^ म्हणजे, “सांत्वन देणारा.”
^ शब्दार्थसूची पाहा.
^ किंवा “लक्षात ठेवतो.” शब्दशः “ओळखतो.”
^ म्हणजे, निनवे.
^ किंवा कदाचित, “तो त्यांच्या मधून जाईल.”
^ म्हणजे, यहूदा.
^ शब्दार्थसूची पाहा.
^ म्हणजे, अश्‍शूर.
^ किंवा “घरातल्या.”
^ किंवा “ओतीव मूर्तींचा.”
