यशया १३:१-२२
१३ आमोजचा मुलगा यशया+ याने एक दृष्टान्त पाहिला; त्यात बाबेलविषयी न्यायाचा संदेश देण्यात आला होता.+ तो असा:
२ “ओसाड डोंगरावर सैन्यासाठी निशाणी म्हणून झेंडा उभारा.+
त्यांना हाक मारून हाताने खुणवा,म्हणजे ते प्रतिष्ठित लोकांच्या दरवाजांतून आत शिरतील.
३ मी ज्यांना नेमलंय त्यांना मी हुकूम दिलाय.+
माझा क्रोध व्यक्‍त करण्यासाठी मी माझ्या योद्ध्यांना बोलावलंय.
यामुळे ते गर्वाने फुगून आनंदित झाले आहेत.
४ ऐका! डोंगरांवरून लोकांचा आवाज ऐकू येतोय;तो आवाज मोठ्या जमावाच्या आवाजासारखा आहे.
ऐका! राज्यांचा गलबला ऐकू येतोय!
एकत्र झालेल्या राष्ट्रांचा गलबला कानी पडतोय!+
सैन्यांचा देव यहोवा युद्धासाठी सैन्य तयार करतोय.+
५ ते दूरच्या देशातून,क्षितिजापासून येत आहेत.+
यहोवा आणि त्याच्या क्रोधाची शस्त्रं,संपूर्ण पृथ्वीचा नाश करायला येत आहेत.+
६ शोक करा! कारण यहोवाचा दिवस जवळ आलाय!
विनाशाचा तो दिवस सर्वशक्‍तिमान देवाकडून असेल.+
७ त्यामुळे सगळ्यांचे हात गळून जातील,आणि भीतीने प्रत्येक माणसाच्या काळजाचं पाणी पाणी होईल.+
८ लोक गोंधळात पडतील.+
प्रसूतीच्या वेळी स्त्रीला वेदना होतात,तशा त्यांना वेदना होतील आणि कळा येतील.
ते भयचकित होऊन एकमेकांकडे पाहतील,आणि त्यांच्या चेहऱ्‍यावर भीती व चिंता असेल.
९ पाहा! यहोवाचा दिवस येतोय!
तो क्रोधाचा आणि जळजळीत रागाचा निर्दयी दिवस असेल.
तो दिवस पापी लोकांचा देशातून समूळ नाश करण्यासाठी,आणि लोकांना दहशत बसेल अशी देशाची अवस्था करण्यासाठी येत आहे.+
१० कारण आकाशातले तारे आणि नक्षत्रं* प्रकाश देणार नाहीत;+सूर्य उगवेल पण काळोखच राहील.
आणि चंद्र प्रकाश पाडणार नाही.
११ मी पृथ्वीवरच्या रहिवाशांकडून त्यांच्या वाईट कामांबद्दल,आणि दुष्टांकडून त्यांच्या अपराधांबद्दल हिशोब घेईन.+
मी अहंकारी लोकांचा गर्व मोडून टाकीन,आणि घमेंडी हुकूमशहांना नमवीन.+
१२ मी माणसांची संख्या शुद्ध सोन्यापेक्षा,+ओफीरच्या सोन्यापेक्षा दुर्मिळ करीन.+
१३ मी, सैन्यांचा देव यहोवा आकाश हादरवून टाकीन,आणि माझ्या जळजळीत क्रोधाच्या दिवशी,मी माझ्या भयंकर रागाने पृथ्वी तिच्या जागेवरून हलवीन.+
१४ प्रत्येकाची अवस्था पाठलाग होणाऱ्‍या सांबरासारखी,*आणि मेंढपाळ नसलेल्या मेंढरासारखी होईल.
प्रत्येक जण आपल्या लोकांकडे, आपल्या देशात पळून जाईल.+
१५ जो कोणी सापडेल त्याला भोसकलं जाईल,आणि जो कोणी पकडला जाईल त्याला तलवारीने मारून टाकलं जाईल.+
१६ त्यांच्या डोळ्यांसमोर त्यांच्या मुलाबाळांना आपटून त्यांचे तुकडे-तुकडे केले जातील.+
त्यांची घरंदारं लुटली जातील,आणि त्यांच्या बायकांची अब्रू घेतली जाईल.
१७ ज्यांच्या नजरेत चांदीला काहीच किंमत नाही,आणि ज्यांना सोन्याचं काहीच आकर्षण नाही,त्या मेदच्या लोकांना मी त्यांच्याविरुद्ध आणीन.+
१८ ते आपल्या धनुष्यांनी तरुण माणसांना मारून टाकतील;+पोटच्या फळाला, मुलाबाळांना ते दयामाया दाखवणार नाहीत.
१९ सर्व राज्यांत वैभवशाली असलेली,+आणि खास्द्यांचं सौंदर्य व भूषण असलेली बाबेल!+
तिची दशा, देवाने उलथवून टाकलेल्या सदोम आणि गमोरा यांसारखी होईल.+
२० तिच्यात पुन्हा कधीही लोकवस्ती होणार नाही,आणि पिढ्या न्‌ पिढ्या तिथे कोणीही राहणार नाही.+
अरबी लोक तिथे तंबू ठोकणार नाहीत,आणि मेंढपाळ आपले कळप तिथे बसवणार नाहीत.
२१ वाळवंटातले जंगली प्राणी तिथे राहतील,तिथल्या लोकांची घरं घुबडांनी भरून जातील,शहामृगांची तिथे वस्ती होईल,+आणि रानबकऱ्‍या* तिथे नाचतील.
२२ तिच्या बुरुजांमधून जनावरांच्या ओरडण्याचा,तिच्या आलिशान महालांमधून कोल्ह्यांच्या ओरडण्याचा आवाज ऐकू येईल.
तिचा काळ जवळ आला आहे, तिचे दिवस आणखी वाढवले जाणार नाहीत.”+
तळटीपा
^ शब्दशः “आणि त्यांचे केसिल,” कदाचित मृगशीर्ष नक्षत्र आणि त्याच्या आजूबाजूची नक्षत्रं.
^ हरणाची एक जात.
^ किंवा कदाचित, “बकऱ्‍यांसारखी दैवतं.”
