यशया ८:१-२२
८ यहोवा मला म्हणाला: “एक मोठी पाटी घे+ आणि त्यावर एका साध्या लेखणीने ‘महेर-शालाल-हाश-बज’* असं लिही.
२ आणि तू हे लिहिलंस याची साक्ष म्हणून दोन विश्‍वासू साक्षीदारांकडून, म्हणजे उरीया+ याजक आणि यवरेख्याचा मुलगा जखऱ्‍या यांच्याकडून लेखी पुरावा घे.”
३ मग मी, संदेष्टी असलेल्या माझ्या बायकोसोबत संबंध ठेवले. ती गरोदर राहिली आणि तिला एक मुलगा झाला.+ तेव्हा यहोवा मला म्हणाला: “त्याचं नाव महेर-शालाल-हाश-बज असं ठेव.
४ कारण तो मुलगा ‘आईबाबा’ असं बोलायला शिकेल, त्याआधीच दिमिष्कची धनसंपत्ती आणि शोमरोनची लूट अश्‍शूरच्या राजापुढे नेली जाईल.”+
५ यहोवा पुढे मला म्हणाला:
६ “या लोकांनी संथ वाहणाऱ्‍या शिलोहचं* पाणी नाकारलंय,+आणि रसीन व रमाल्याह यांच्यामुळे ते आनंदी आहेत.+
७ म्हणून पाहा!
यहोवा महानदीचा* जोरदार आणि प्रचंड प्रवाह,म्हणजे अश्‍शूरचा राजा+ आणि त्याची सगळी ताकद त्यांच्याविरुद्ध आणेल.
नदीपात्राचं पाणी वर चढत जाऊन काठांवरून ओसंडून वाहतं तसा तो येईल,
८ आणि यहूदामध्ये शिरेल.
तो पुराच्या पाण्यासारखा वाहील आणि गळ्यापर्यंत पोहोचेल;+हे इम्मानुएल!*+ तो आपले पंख पसरून तुझा संपूर्ण देश झाकून टाकेल.”
९ राष्ट्रांनो, त्यांना हात लावून तर पाहा! तुमचाच चुराडा होईल.
पृथ्वीवर असलेल्या दूरदूरच्या देशांनो, ऐका!
तुम्ही करा युद्धाची तयारी, पण तुमचे तुकडे-तुकडे होतील!+
तुम्ही करा लढाईची तयारी, पण तुमचे तुकडे-तुकडे केले जातील!
१० तुम्हाला काय योजना आखायची ती आखा, पण ती निष्फळ होईल!
तुम्हाला काय बोलायचं ते बोला, पण तसं मुळीच घडणार नाही.
कारण देव आमच्यासोबत आहे!*+
११ यहोवाचा मजबूत हात माझ्यावर होता. आणि मी या लोकांसारखं वागू नये, म्हणून त्याने मला असं बजावून सांगितलं:
१२ “हे लोक ज्याला कटकारस्थान म्हणतात, त्याला तुम्ही कटकारस्थान म्हणू नका!
ते ज्या गोष्टीला घाबरतात, तिला तुम्ही घाबरू नका; तिला भिऊ नका.
१३ तर, सैन्यांचा देव यहोवा यालाच तुम्ही पवित्र माना,+त्याचीच भीती बाळगा,आणि फक्‍त त्याचाच धाक बाळगा.”+
१४ तो तुमच्यासाठी एक पवित्र ठिकाण होईल.
पण तो इस्राएलच्या दोन्ही घराण्यांसाठी,ठेच लागण्याचा दगड आणि अडखळण्याचा खडकही होईल.+
यरुशलेमच्या रहिवाशांसाठी,तो एक सापळा आणि जाळं होईल.
१५ अनेक जण अडखळून पडतील आणि जखमी होतील;ते सापळ्यात अडकून पकडले जातील.
१६ संदेश लिहिलेली गुंडाळी बांधून ठेव;आणि माझ्या शिष्यांमध्ये नियम* मोहर लावून बंद कर!
१७ ज्याने याकोबच्या घराण्यापासून आपलं तोंड फिरवलंय,+ त्या यहोवाची मी आतुरतेने वाट पाहीन;+ आणि त्याच्यावर मी आपली आशा ठेवीन.
१८ पाहा! मी, आणि यहोवाने मला दिलेली मुलं,+ आम्ही इस्राएलसाठी चिन्हं+ आणि चमत्कार आहोत; आम्ही सीयोन डोंगरावर राहणाऱ्‍या सैन्यांच्या देवाकडून, यहोवाकडून इस्राएलसाठी चिन्हं आणि चमत्कार आहोत.
१९ आणि जर ते तुम्हाला म्हणाले: “पुटपुटणाऱ्‍या आणि चिवचिवाट करणाऱ्‍या ज्योतिष्यांकडे किंवा भूतविद्या करणाऱ्‍यांकडे मार्गदर्शन मागा,” तर तसं करणं योग्य राहील का? लोकांनी आपल्या देवाकडे मार्गदर्शन मागू नये का? जिवंत माणसांसाठी त्यांनी मेलेल्यांकडे मार्गदर्शन का मागावं?+
२० याउलट, मार्गदर्शनासाठी त्यांनी नियमशास्त्राकडे आणि देवाने सांगितलेल्या गोष्टींकडे वळलं पाहिजे.
ते जेव्हा देवाच्या वचनाप्रमाणे बोलत नाहीत, तेव्हा त्यांच्याकडे प्रकाश नसतो.+
२१ प्रत्येक जण दुःखी आणि उपाशी होऊन देशभर भटकेल;+ आणि भुकेमुळे व रागामुळे तो आपल्या राजाची निंदा करेल आणि वर पाहून आपल्या देवाला शिव्याशाप देईल.
२२ मग तो पृथ्वीवर पाहील, तेव्हा त्याला सगळीकडे फक्‍त दुःख व अंधार; निराशा व संकट आणि उदासीनता व काळोखच दिसेल.
तळटीपा
^ याचा अर्थ, “लोक शत्रू राष्ट्राला लुटण्यासाठी लवकरच येतील,” असा होतो.
^ शिलोह हा पाण्याचा पाट होता.
^ म्हणजे, फरात नदी.
^ किंवा “शिक्षण.”
