याकोब याचं पत्र ५:१-२०
५ अरे श्रीमंत लोकांनो, तुमच्यावर येणाऱ्‍या संकटांमुळे रडा आणि आक्रोश करा.+
२ तुमच्या मौल्यवान वस्तू कुजल्या आहेत आणि तुमच्या कपड्यांना कसर लागली आहे.+
३ तुमचं सोनं आणि तुमची चांदी गंजून गेली आहे. त्यांना लागलेला गंज तुमच्याविरुद्ध साक्ष देईल आणि तुमच्या शरीराला झिजवून टाकेल. खरंतर तुम्ही शेवटच्या दिवसांसाठी आग साठवली आहे.+
४ पाहा! तुमच्या शेतांत कापणी करणाऱ्‍यांची तुम्ही अडवून ठेवलेली मजुरी दुःखाने ओरडत आहे, आणि त्या कामगारांचा आक्रोश सैन्यांचा देव यहोवा* याच्या कानी पोहोचला आहे.+
५ या जगात तुम्ही ऐशआरामात राहिला आणि शारीरिक गोष्टी उपभोगण्याच्या मागे लागला. कत्तल करण्याच्या दिवसापर्यंत खाऊनपिऊन धष्टपुष्ट होणाऱ्‍या प्राण्यांसारखे तुम्ही* झाला.+
६ नीतिमानाला दोषी ठरवून तुम्ही त्याला ठार मारलं. तो तुमचा विरोध करत नाही का?
७ तेव्हा माझ्या बांधवांनो, प्रभूच्या उपस्थितीपर्यंत धीर धरा.+ शेतकरी आपल्या शेतातल्या मौल्यवान पिकाची वाट पाहतो; पहिला आणि नंतरचा पाऊस* येईपर्यंत तो धीर धरतो.+
८ तुम्हीसुद्धा धीर धरा;+ आपली मनं खंबीर करा, कारण प्रभूची उपस्थिती जवळ आली आहे.+
९ बांधवांनो, एकमेकांविरुद्ध कुरकुर करू नका,* म्हणजे तुम्हाला दोषी ठरवलं जाणार नाही.+ पाहा! न्यायाधीश दाराजवळ उभा आहे.
१० बांधवांनो, यहोवाच्या* नावाने संदेश देणाऱ्‍या संदेष्ट्यांनी+ संकटं सोसण्याच्या+ आणि धीर धरण्याच्या बाबतीत जे उदाहरण मांडलं ते डोळ्यांसमोर ठेवा.+
११ ज्यांनी धीराने संकटं सोसली ते धन्य!*+ ईयोबच्या धीराबद्दल तुम्ही ऐकलं आहे+ आणि शेवटी यहोवाने* त्याला ज्या प्रकारे आशीर्वादित केलं+ त्यावरून यहोवा* दयाळू आणि खूप कृपाळू आहे हेही तुम्ही पाहिलं आहे.+
१२ माझ्या बांधवांनो, सर्वात मुख्य म्हणजे, स्वर्गाच्या किंवा पृथ्वीच्या नावाने शपथ घ्यायचं किंवा दुसऱ्‍या कशाचीही शपथ घ्यायचं सोडून द्या. तुम्ही दोषी ठरू नये म्हणून तुमचं म्हणणं, “हो” तर हो आणि “नाही” तर नाही असावं.+
१३ तुमच्यामध्ये कोणी दुःख सोसत आहे का? त्याने प्रार्थना करत राहावी.+ तुमच्यामध्ये कोणी आनंदी आहे का? त्याने स्तुतिगीतं गावीत.+
१४ तुमच्यामध्ये कोणी आजारी* आहे का? त्याने मंडळीच्या वडिलांना बोलवावं+ आणि त्यांनी यहोवाच्या* नावाने त्याला तेल लावून त्याच्यासाठी प्रार्थना करावी.+
१५ आणि विश्‍वासाची प्रार्थना त्या माणसाला* बरं करेल आणि यहोवा* त्याला त्याच्या आजारातून उठवेल. शिवाय, त्याने पापं केली असली, तर त्याला क्षमा केली जाईल.
१६ तेव्हा, तुम्ही निरोगी व्हावं म्हणून मनमोकळेपणाने एकमेकांजवळ आपली पापं कबूल करा+ आणि एकमेकांसाठी प्रार्थना करा. नीतिमान माणसाने केलेल्या याचनेत खूप ताकद* असते.+
१७ एलीया हा आपल्यासारख्याच भावना असलेला माणूस होता. पण, पाऊस पडू नये म्हणून त्याने कळकळीने प्रार्थना केली, तेव्हा साडेतीन वर्षं देशात पाऊस पडला नाही.+
१८ मग त्याने पुन्हा प्रार्थना केली आणि पाऊस पडला आणि जमिनीने फळ दिलं.+
१९ माझ्या बांधवांनो, तुमच्यापैकी कोणी सत्यापासून भरकटला आणि दुसऱ्‍याने त्याला पुन्हा मार्गावर आणलं,
२० तर हे लक्षात घ्या, की जो कोणी पापी माणसाला त्याच्या चुकीच्या मार्गापासून परत फिरवतो,+ तो त्याला* मृत्यूपासून वाचवेल आणि पुष्कळ पापांची क्षमा मिळवण्यासाठी* त्याला मदत करेल.+
तळटीपा
^ शब्दशः “तुमची मनं.”
^ पहिला पाऊस ऑक्टोबरमध्ये, तर नंतरचा पाऊस एप्रिलमध्ये व्हायचा.
^ किंवा “कण्हू नका; तक्रार करू नका.” शब्दशः “उसासे टाकू नका.”
^ किंवा “सुखी.”
^ हे देवासोबतचं नातं कमजोर होण्याच्या बाबतीत म्हटलं आहे असं दिसतं.
^ किंवा कदाचित, “थकलेल्या माणसाला.”
^ शब्दशः “केलेली याचना ऐकली जात असल्यामुळे परिणामकारक ठरते.”
^ किंवा “त्याचा जीव.”
^ शब्दशः “पापं झाकण्यासाठी.”
