रोमकर यांना पत्र ५:१-२१
५ म्हणून आता आपल्याला विश्‍वासाने नीतिमान ठरवण्यात आलं असल्यामुळे,+ आपल्या प्रभू येशू ख्रिस्ताद्वारे+ आपण देवासोबत शांतीचा संबंध टिकवून ठेवू या.
२ त्याच्याचद्वारे विश्‍वासाने आपल्याला देवासमोर येऊन ती अपार कृपा मिळवणं शक्य झालं आहे, जी आज आपल्यावर आहे.+ म्हणून देवाच्या गौरवाची जी आशा आपल्याला मिळाली आहे, तिच्यामुळे आपण आनंदी होऊ या.
३ आणि इतकंच नाही, तर संकटांत असतानाही आपण आनंदी होऊ या.+ कारण आपल्याला माहीत आहे की संकटामुळे धीर उत्पन्‍न होतो;+
४ आणि धीरामुळे आपल्याला देवाची मान्यता मिळते;+ देवाची मान्यता मिळाल्यामुळे आशा निर्माण होते.+
५ या आशेमुळे पुढे आपली निराशा होणार नाही.+ कारण आपल्याला देण्यात आलेल्या पवित्र शक्‍तीद्वारे,* आपलं हृदय देवाच्या प्रेमाने भरून टाकण्यात आलं आहे.+
६ कारण खरं पाहिलं, तर आपण दुर्बळ असतानाच+ ख्रिस्त नेमलेल्या वेळी पापी लोकांसाठी मरण पावला.
७ एखाद्या नीतिमान माणसासाठी मरणारा क्वचितच कोणी सापडेल; आणि चांगल्या माणसासाठी मरायला कदाचित कोणी तयार होईलही.
८ पण, आपण अजून पापी असतानाच ख्रिस्त आपल्यासाठी मरण पावला. यातूनच देव आपल्यावर असलेलं त्याचं प्रेम दाखवून देतो.+
९ तर मग, आता ख्रिस्ताच्या रक्‍ताद्वारे नीतिमान ठरवण्यात आलं असल्यामुळे,+ आपल्याला देवाच्या क्रोधापासून नक्कीच वाचवलं जाईल!+
१० कारण आपण शत्रू असतानाच देवाच्या मुलाच्या मृत्यूद्वारे आपला देवाशी समेट झाला.+ तर मग आता समेट झाल्यावर आपण नक्कीच अशी खातरी बाळगू शकतो, की ख्रिस्ताच्या जीवनाद्वारे आपल्याला वाचवलं जाईल!*
११ आणि इतकंच नाही, तर ज्याच्याद्वारे आता आपला समेट झाला आहे, त्या आपल्या प्रभू येशू ख्रिस्ताद्वारे, देवासोबत असलेल्या आपल्या नात्यामुळे आपण आनंदी आहोत.+
१२ तर, एका माणसाद्वारे पाप जगात आलं आणि पापाद्वारे मरण आलं+ आणि अशा रितीने सर्व माणसांमध्ये मरण पसरलं, कारण त्या सगळ्यांनी पाप केलं होतं.+
१३ खरंतर नियमशास्त्राआधीच पाप जगात होतं. पण जिथे नियमशास्त्र नाही, तिथे पाप केल्याबद्दल कोणालाही दोषी ठरवलं जात नाही.+
१४ तरीपण, आदामच्या काळापासून मोशेच्या काळापर्यंत मृत्यूने सर्व लोकांवर राजा म्हणून राज्य केलं. त्यांनी आदामसारखं पाप केलं नव्हतं, तरीसुद्धा मृत्यूने त्यांच्यावर राज्य केलं. आदाम तर जो येणार होता त्याच्यासारखा होता.+
१५ पण देवाचं दान त्या अपराधासारखं नाही. कारण एका माणसाच्या अपराधामुळे पुष्कळ लोक मरतात. त्याच प्रकारे, एका माणसाच्या, म्हणजेच येशू ख्रिस्ताच्या अपार कृपेमुळे, पुष्कळ लोकांना+ देवाची अपार कृपा आणि त्याचं मोफत दान भरभरून* मिळतं.+
१६ तसंच, त्या मोफत दानाचे फायदे, एका माणसाने केलेल्या पापाच्या परिणामांसारखे नाहीत.+ कारण एका अपराधामुळे झालेल्या न्यायाने माणसांना दोषी ठरवण्यात आलं,+ पण पुष्कळ अपराधांनंतर मिळालेल्या दानामुळे त्यांना नीतिमान ठरवण्यात आलं.+
१७ कारण एका माणसाच्या अपराधामुळे मृत्यूने राजा म्हणून त्याच्याद्वारे राज्य केलं.+ तर मग, ज्यांना भरपूर प्रमाणात अपार कृपा आणि नीतिमत्त्वाचं मोफत दान मिळतं,+ ते एका माणसाद्वारे, म्हणजेच येशू ख्रिस्ताद्वारे जीवन मिळाल्यामुळे+ राजे म्हणून राज्य करतील,+ अशी आपण नक्कीच खातरी बाळगू शकतो!
१८ त्यामुळे, जसं एका अपराधाद्वारे सर्व प्रकारच्या माणसांना दोषी ठरवण्यात आलं,+ तसंच एका न्यायी कार्यामुळे सर्व प्रकारच्या माणसांना+ जीवनासाठी नीतिमान ठरवण्यात येतं.+
१९ कारण जसं एका माणसाने आज्ञा मोडल्यामुळे पुष्कळ जण पापी ठरले,+ तसंच, एकाच माणसाने आज्ञापालन केल्यामुळे पुष्कळांना नीतिमान ठरवलं जाईल.+
२० नियमशास्त्र यासाठी आलं, की अपराधांमध्ये वाढ व्हावी.+ पण जेव्हा अपराधांमध्ये वाढ झाली, तेव्हा अपार कृपेचा आणखीनच जास्त वर्षाव झाला.
२१ कशासाठी? यासाठी, की जसं पापाने मृत्यूसोबत राजा म्हणून राज्य केलं,+ तसंच अपार कृपेने नीतिमत्त्वामुळे, आपल्या प्रभू येशू ख्रिस्ताद्वारे सर्वकाळाचं जीवन देण्यासाठी राजा म्हणून राज्य करावं.+
