लूकने सांगितलेला संदेश १:१-८०

प्ले

थियफिलला उद्देशून (१-४)
गब्रीएल स्वर्गदूत बाप्तिस्मा देणाऱ्‍या योहानच्या जन्माची भविष्यवाणी करतो (५-२५)
गब्रीएल स्वर्गदूत येशूच्या जन्माची भविष्यवाणी करतो (२६-३८)
मरीया अलीशिबाला भेटायला जाते (३९-४५)
मरीया यहोवाची स्तुती करते (४६-५६)
योहानचा जन्म आणि त्याला नाव दिलं जातं (५७-६६)
जखऱ्‍याची भविष्यवाणी (६७-८०)

१ हे आदरणीय थियफील,+ आपल्याला ज्यांची पक्की खातरी आहे, त्या गोष्टींचा वृत्तान्त लिहून काढायचं काम बऱ्‍याच जणांनी हाती घेतलं आहे.+ ^२ आणि जे सुरुवातीपासून या गोष्टींचे प्रत्यक्ष साक्षीदार होते+ आणि देवाच्या वचनाचे सेवक होते+ त्यांनी आपल्यापर्यंत पोहोचवलेल्या गोष्टींप्रमाणेच तो वृत्तान्त आहे. ^३ त्यामुळे, मीसुद्धा या सगळ्या गोष्टी तुम्हाला व्यवस्थित क्रमाने लिहायचं ठरवलं. कारण मी त्यांचा सुरुवातीपासून अचूकपणे शोध केला आहे. ^४ ज्या गोष्टी तुम्हाला तोंडी शिकवण्यात आल्या त्या खऱ्‍या आहेत, याची तुम्हाला पूर्णपणे खातरी पटावी म्हणून मी असं केलं.+ ^५ यहूदीयाचा राजा, हेरोद* याच्या काळात+ अबीयाच्या याजक-गटात+ जखऱ्‍या नावाचा एक याजक होता. त्याच्या बायकोचं नाव अलीशिबा होतं आणि ती अहरोनच्या वंशातली होती. ^६ ते दोघं यहोवाच्या* नजरेत नीतिमान होते आणि त्याच्या सगळ्या आज्ञांचं आणि कायद्यांचं काटेकोरपणे पालन करायचे. ^७ पण त्यांना मूलबाळ नव्हतं, कारण अलीशिबा वांझ होती. शिवाय, त्या दोघांचंही वय झालं होतं. ^८ एकदा असं झालं, की जखऱ्‍या देवासमोर याजक म्हणून सेवा करत होता. कारण मंदिरात काम करायची त्याच्या याजक-गटाची+ पाळी होती. ^९ याजकांच्या ठरलेल्या रिवाजाप्रमाणे* त्याची निवड करण्यात आली, तेव्हा तो धूप जाळण्यासाठी+ यहोवाच्या* मंदिरातल्या पवित्र स्थानात+ गेला. ^१० धूप जाळण्याच्या वेळी सगळे लोक बाहेर प्रार्थना करत होते. ^११ इतक्यात, यहोवाचा* दूत जखऱ्‍यासमोर प्रकट झाला. तो धूपवेदीच्या उजव्या बाजूला उभा होता. ^१२ त्याला पाहून जखऱ्‍या चकित झाला आणि खूप घाबरला. ^१३ पण स्वर्गदूत त्याला म्हणाला: “जखऱ्‍या घाबरू नकोस. कारण तुझी याचना देवाने ऐकली आहे. तुझी बायको अलीशिबा हिच्यापासून तुला एक मुलगा होईल. तू त्याचं नाव योहान ठेव.+ ^१४ तुला खूप आनंद होईल आणि त्याच्या जन्मामुळे पुष्कळ लोक हर्ष करतील.+ ^१५ कारण यहोवाच्या* नजरेत तो महान होईल.+ पण त्याने कधीच द्राक्षारस किंवा मद्य पिऊ नये.+ तो जन्माच्या आधीपासूनच* पवित्र शक्‍तीने* भरलेला असेल.+ ^१६ तो इस्राएलच्या मुलांपैकी बऱ्‍याच जणांना त्यांचा देव यहोवा* याच्याकडे पुन्हा वळवेल.+ ^१७ तसंच, तो एलीयाप्रमाणे पवित्र शक्‍तीने* आणि सामर्थ्याने देवापुढे चालेल.+ तो वडिलांची मनं मुलांकडे आणि आज्ञा न मानणाऱ्‍या लोकांना नीतिमानांच्या व्यावहारिक बुद्धीकडे वळवेल.+ अशा प्रकारे, तो यहोवासाठी* योग्य अशी प्रजा तयार करेल.”+ ^१८ तेव्हा जखऱ्‍या स्वर्गदूताला म्हणाला: “पण, असं नक्की घडेल हे कशावरून? कारण मी तर म्हातारा झालोय आणि माझ्या बायकोचंही वय झालंय.” ^१९ स्वर्गदूत त्याला म्हणाला: “मी देवाजवळ उभा राहणारा+ गब्रीएल आहे.+ मला तुझ्याशी बोलण्यासाठी आणि तुला ही आनंदाची बातमी देण्यासाठी पाठवण्यात आलंय. ^२० पण, या गोष्टी घडेपर्यंत तू मुकाच राहशील आणि तुला बोलता येणार नाही. कारण ठरवलेल्या वेळी पूर्ण होणार असलेल्या माझ्या शब्दांवर तू विश्‍वास ठेवला नाहीस.” ^२१ इकडे, लोक अजूनही जखऱ्‍याची वाट पाहत होते आणि पवित्र स्थानात त्याला इतका वेळ का लागला, याचं त्यांना आश्‍चर्य वाटत होतं. ^२२ तो बाहेर आला तेव्हा त्याला त्यांच्याशी बोलता येईना. त्यामुळे, पवित्र स्थानात त्याला नक्कीच काहीतरी अद्‌भुत दृष्टान्त दिसला असावा हे त्यांनी ओळखलं. पण, अजूनही तो मुका असल्यामुळे तो त्यांना खाणाखुणा करत राहिला. ^२३ शेवटी, मंदिरातल्या त्याच्या पवित्र सेवेचे* दिवस संपल्यावर तो आपल्या घरी परत गेला. ^२४ मग काही दिवसांनी त्याची बायको अलीशिबा गरोदर राहिली आणि पाच महिन्यांपर्यंत ती घराबाहेर पडली नाही. ती म्हणाली: ^२५ “यहोवाने* माझ्यासाठी हे घडवून आणलंय. लोकांमध्ये झालेला माझा अपमान दूर करण्यासाठी त्याने माझ्याकडे लक्ष दिलंय.”+ ^२६ तिच्या सहाव्या महिन्यात देवाने गब्रीएल स्वर्गदूताला+ गालीलमधल्या नासरेथ नावाच्या शहरात एका कुमारीकडे पाठवलं. ^२७ त्या कुमारीचं+ नाव मरीया होतं. दावीदच्या घराण्यातल्या योसेफ नावाच्या एका माणसाशी तिचं लग्न ठरलं होतं.+ ^२८ स्वर्गदूत तिच्याकडे येऊन म्हणाला: “हे आशीर्वादित कुमारी! तुला शांती असो. यहोवा* तुझ्यासोबत आहे.” ^२९ पण, ते ऐकून ती मोठ्या गोंधळात पडली आणि स्वर्गदूताच्या या शब्दांचा काय अर्थ असेल याचा विचार करू लागली. ^३० तेव्हा, स्वर्गदूत तिला म्हणाला: “मरीया घाबरू नकोस, कारण देवाने तुझ्यावर कृपा केली आहे. ^३१ तू गर्भवती होशील आणि एका मुलाला जन्म देशील.+ तू त्याचं नाव येशू ठेव.+ ^३२ तो महान होईल+ आणि त्याला सर्वोच्च देवाचा मुलगा म्हणतील.+ यहोवा* त्याला त्याच्या पित्याचं म्हणजे दावीदचं राजासन देईल.+ ^३३ तो राजा म्हणून याकोबच्या घराण्यावर सदासर्वकाळ राज्य करेल आणि त्याच्या राज्याचा कधीच अंत होणार नाही.”+ ^३४ पण, मरीया स्वर्गदूताला म्हणाली: “हे कसं शक्य आहे? कारण मी अजून कुमारी आहे.”*+ ^३५ तेव्हा स्वर्गदूत तिला म्हणाला: “पवित्र शक्‍ती* तुझ्यावर येईल+ आणि सर्वोच्च देवाचं सामर्थ्य तुझ्यावर छाया करेल. म्हणूनच, जो जन्माला येईल त्याला पवित्र+ आणि देवाचा मुलगा+ असं म्हटलं जाईल. ^३६ पाहा! तुझ्या नात्यातल्या अलीशिबालाही म्हातारपणी मुलाचा गर्भ राहिलाय. तिला वांझ म्हटलं जायचं, पण हा तिचा सहावा महिना आहे. ^३७ कारण देवाला कोणतीही गोष्ट* अशक्य नाही.”+ ^३८ तेव्हा मरीया म्हणाली: “पाहा! मी यहोवाची* दासी आहे! तुम्ही सांगितल्याप्रमाणेच माझ्या बाबतीत घडो.” मग, स्वर्गदूत तिथून निघून गेला. ^३९ त्या दिवसांत, मरीया घाईघाईने डोंगराळ प्रदेशातल्या यहूदाच्या एका शहरात जायला निघाली. ^४० तिने जखऱ्‍याच्या घरी जाऊन अलीशिबाला नमस्कार केला. ^४१ अलीशिबाने मरीयाचा नमस्कार ऐकताच तिच्या पोटातल्या बाळाने उडी मारली आणि अलीशिबा पवित्र शक्‍तीने भरून गेली. ^४२ ती मोठ्याने म्हणाली: “स्त्रियांमध्ये तू आशीर्वादित आहेस आणि तुझ्या पोटचं फळसुद्धा आशीर्वादित आहे! ^४३ माझ्या प्रभूची आई मला भेटायला आली, हा माझ्यासाठी किती मोठा सन्मान आहे! ^४४ कारण पाहा! तुझा नमस्कार माझ्या कानांवर पडताच माझ्या पोटातल्या बाळाने आनंदाने उडी मारली. ^४५ तू विश्‍वास ठेवलास म्हणून तू आशीर्वादित आहेस! कारण यहोवाने* तुला जे काही सांगितलं ते सगळं पूर्ण होईल.” ^४६ तेव्हा मरीया म्हणाली: “मी* यहोवाचा* जयजयकार करते.+ ^४७ तारण करणाऱ्‍या माझ्या देवामुळे, माझ्या मनाला खूप आनंद झालाय.+ ^४८ कारण त्याने आपल्या या गरीब दासीकडे लक्ष दिलं.+ पाहा! यापुढे सगळ्या पिढ्या मला आशीर्वादित म्हणतील,+ ^४९ कारण सामर्थ्यशाली देवाने माझ्यासाठी महान गोष्टी केल्या आहेत. त्याचं नाव पवित्र आहे.+ ^५० जे त्याची भीती बाळगतात त्यांच्यावर तो पिढ्या न्‌ पिढ्या दया करतो.+ ^५१ त्याने आपल्या हाताने आपला पराक्रम दाखवलाय. गर्विष्ठ लोकांची त्याने पांगापांग केली आहे.+ ^५२ त्याने शक्‍तिशाली अधिकाऱ्‍यांना राजासनांवरून उतरवलंय+ आणि दीनदुबळ्यांना उंचावलंय.+ ^५३ त्याने उपाशी असलेल्यांना चांगल्या गोष्टी देऊन तृप्त केलंय+ आणि श्रीमंतांना रिकाम्या हाती पाठवून दिलंय. ^५४ आपली दया सदासर्वकाळ आठवणीत ठेवून, तो आपला सेवक इस्राएल याच्या मदतीला आलाय.+ ^५५ आमच्या वाडवडिलांना, म्हणजे अब्राहामला आणि त्याच्या संततीला* वचन दिल्याप्रमाणे त्याने केलंय.”+ ^५६ मरीया जवळपास तीन महिने अलीशिबाकडे राहून आपल्या घरी परत गेली. ^५७ अलीशिबाचे दिवस भरल्यानंतर तिने एका मुलाला जन्म दिला. ^५८ यहोवाने* तिच्यावर किती दया केली आहे, याबद्दल तिच्या शेजाऱ्‍यांनी आणि नातेवाइकांनी ऐकलं, तेव्हा तेही तिच्या आनंदात सहभागी झाले.+ ^५९ मग, आठव्या दिवशी ते मुलाची सुंता करण्यासाठी आले+ आणि त्याचा पिता, जखऱ्‍या याच्या नावावरून ते त्याचं नाव ठेवणार होते. ^६० पण त्याची आई म्हणाली: “नाही! त्याचं नाव योहान असेल.” ^६१ तेव्हा ते तिला म्हणाले: “तुमच्या नातेवाइकांमध्ये कोणाचंही हे नाव नाही.” ^६२ मग, मुलाचं नाव काय ठेवावं हे त्यांनी खाणाखुणा करून त्याच्या वडिलांना विचारलं. ^६३ तेव्हा त्याने एक पाटी मागितली आणि तिच्यावर लिहिलं: “याचं नाव योहान आहे.”+ तेव्हा त्या सगळ्यांना खूप आश्‍चर्य वाटलं. ^६४ त्याच क्षणी, त्याचं तोंड उघडलं आणि त्याची जीभ मोकळी झाली. तेव्हा तो बोलू लागला+ आणि देवाची स्तुती करू लागला. ^६५ यामुळे जवळपास राहणाऱ्‍या सगळ्या लोकांमध्ये भीती पसरली आणि यहूदीयाच्या संपूर्ण डोंगराळ प्रदेशात या गोष्टींबद्दल चर्चा होऊ लागली. ^६६ आणि जितक्यांनी हे ऐकलं त्यांनी या गोष्टी मनात जपून ठेवल्या आणि ते विचार करू लागले: “हा मुलगा मोठा होऊन कोण बनेल?” कारण यहोवाचा* हात खरोखरच त्याच्यावर होता. ^६७ मग त्याचा पिता जखऱ्‍या पवित्र शक्‍तीने भरून गेला आणि त्याने अशी भविष्यवाणी केली: ^६८ “इस्राएलचा देव यहोवा,* याची स्तुती असो!+ कारण त्याने आपल्या लोकांकडे लक्ष वळवून त्यांची सुटका केली आहे.+ ^६९ त्याचा सेवक दावीद+ याच्या घराण्यात त्याने आमच्यासाठी तारणाचं शिंग* उभारलंय.+ ^७० त्याने प्राचीन काळातल्या आपल्या पवित्र संदेष्ट्यांच्या तोंडून सांगितल्याप्रमाणे केलंय.+ ^७१ त्याने सांगितलं होतं, की तो आमच्या शत्रूंपासून आणि आमचा द्वेष करणाऱ्‍या सगळ्यांच्या हातून आम्हाला सोडवेल.+ ^७२ आणि आमच्या वाडवडिलांवर दया करून तो आपला पवित्र करार,+ ^७३ म्हणजे आमचा पूर्वज, अब्राहाम याला शपथ घेऊन दिलेलं वचन आठवेल.+ ^७४ त्याप्रमाणे, आमच्या शत्रूंपासून सोडवल्यानंतर तो आम्हाला निर्भयपणे त्याची पवित्र सेवा, ^७५ एकनिष्ठपणे आणि नीतीने सर्वकाळ करत राहण्याचा बहुमान देईल. ^७६ पण माझ्या मुला, तुला सर्वोच्च देवाचा संदेष्टा म्हणतील. कारण तू यहोवाच्या* पुढे चालून त्याचे मार्ग तयार करशील+ ^७७ आणि त्याच्या लोकांना तारणाचा संदेश सांगशील. त्यांच्या पापांच्या क्षमेद्वारे,+ ^७८ आपल्या देवाच्या कोमल दयेमुळे त्यांना हे तारण मिळेल. याच दयेमुळे स्वर्गातून पहाटेचा प्रकाश उजाडताना आपण पाहू. ^७९ आणि तो अंधारात आणि मृत्यूच्या छायेत बसलेल्यांना उजेड देईल+ आणि आपल्या पावलांना शांतीचा मार्ग दाखवेल.” ^८० मग तो लहान मुलगा वाढत गेला आणि देवाच्या शक्‍तीने सामर्थ्यशाली झाला. आणि उघडपणे इस्राएली लोकांसमोर यायची वेळ येईपर्यंत तो ओसाड रानातच राहिला.