शास्ते १:१-३६
१ यहोशवाच्या मृत्यूनंतर+ इस्राएली लोकांनी यहोवाला* विचारलं:+ “कनानी लोकांशी लढाई करण्यासाठी आमच्यापैकी सगळ्यात आधी कोणी जावं?”
२ त्यावर यहोवा म्हणाला: “यहूदाचे वंशज जातील.+ मी हा देश त्यांच्या हाती देत आहे.”*
३ तेव्हा यहूदाचे वंशज आपल्या भावांना, म्हणजे शिमोनच्या वंशजांना म्हणाले: “कनानी लोकांशी लढाई करण्यासाठी आमच्यासोबत आम्हाला दिलेल्या* प्रदेशात चला.+ नंतर आम्हीसुद्धा तुमच्यासोबत तुमच्या प्रदेशात येऊ.” त्यामुळे, शिमोनचे वंशज त्यांच्यासोबत गेले.
४ यहूदाचे वंशज लढायला गेले, तेव्हा यहोवाने कनानी आणि परिज्जी लोकांना त्यांच्या हाती दिलं;+ त्यांनी बेजेक इथे १०,००० माणसांना हरवलं.
५ कनानी+ आणि परिज्जी+ लोकांना हरवताना त्यांना बेजेकमध्ये अदोनी-बेजेक सापडला, आणि ते त्याच्याशी लढले.
६ पण, त्याने त्यांच्यापासून पळ काढला. तेव्हा त्यांनी त्याचा पाठलाग करून त्याला पकडलं, आणि त्याच्या हातापायांचे अंगठे कापून टाकले.
७ तेव्हा अदोनी-बेजेक म्हणाला: “मी ७० राजांच्या हातापायांचे अंगठे कापून टाकले होते, आणि ते माझ्या मेजावरून पडलेलं अन्न उचलून खायचे. मी त्यांच्यासोबत जे केलं, तेच देवाने माझ्यासोबत केलंय.” त्यानंतर, त्यांनी त्याला यरुशलेममध्ये+ आणलं, आणि तिथे त्याचा मृत्यू झाला.
८ मग, यहूदाच्या वंशजांनी यरुशलेमवरही+ हल्ला केला आणि त्यावर कब्जा मिळवला; त्यांनी तिथल्या लोकांना तलवारीने मारून टाकलं आणि शहराला आग लावली.
९ त्यानंतर, यहूदाचे वंशज डोंगराळ प्रदेशात राहणाऱ्या, तसंच नेगेब आणि शेफीला+ इथे राहणाऱ्या कनानी लोकांशी लढायला गेले.
१० यहूदाचे वंशज हेब्रोन इथल्या कनानी लोकांशी लढायला गेले (हेब्रोनचं पूर्वीचं नाव किर्याथ-अर्बा असं होतं); तिथे त्यांनी शेशय, अहीमान आणि तलमय यांना मारून टाकलं.+
११ तिथून ते दबीरमध्ये राहणाऱ्या लोकांशी लढायला गेले.+ (दबीरचं पूर्वीचं नाव किर्याथ-सेफर असं होतं.)+
१२ मग कालेब+ म्हणाला: “जो कोणी किर्याथ-सेफरवर हल्ला करून त्यावर कब्जा मिळवेल त्याचं लग्न मी माझ्या मुलीसोबत, अखसासोबत लावून देईन.”+
१३ तेव्हा, अथनिएलने+ किर्याथ-सेफरवर कब्जा मिळवला; तो कालेबचा लहान भाऊ कनाज याचा मुलगा होता.+ मग, कालेबने आपली मुलगी अखसा हिचं अथनिएलसोबत लग्न लावून दिलं.
१४ आपल्या नवऱ्याच्या घरी जात असताना तिने नवऱ्याकडे असा आग्रह धरला, की अथनिएलने तिच्या वडिलांकडून जमीन मागून घ्यावी. ती गाढवावरून उतरली,* तेव्हा कालेबने तिला विचारलं: “तुला काय हवंय?”
१५ ती त्याला म्हणाली: “मला एक आशीर्वाद द्या. तुम्ही मला दक्षिणेकडे* जमिनीचा एक तुकडा दिलाय; आता मला गुल्लोथ-माईमसुद्धा* द्या.” म्हणून मग कालेबने तिला वरचं गुल्लोथ आणि खालचं गुल्लोथ दिलं.
१६ मोशेचा सासरा+ एक केनी माणूस होता.+ त्याचे वंशज यहूदाच्या लोकांसोबत खजुराच्या झाडांच्या शहरातून*+ आले होते; ते अरादच्या+ दक्षिणेकडे असलेल्या यहूदाच्या ओसाड रानात गेले आणि तिथल्या लोकांमध्ये राहू लागले.+
१७ मग, यहूदाचे वंशज आपल्या भावांसोबत, म्हणजे शिमोनच्या वंशजांसोबत सफातमध्ये गेले. तिथल्या कनानी लोकांवर हल्ला करून त्यांनी त्या शहराचा पूर्णपणे नाश केला;+ त्यामुळे त्यांनी त्या शहराचं नाव हर्मा* असं ठेवलं.+
१८ नंतर यहूदाच्या वंशजांनी गाझा,+ अष्कलोन+ व एक्रोन+ या शहरांवर आणि त्यांच्या प्रदेशांवर कब्जा केला.
१९ यहोवा यहूदाच्या वंशजांसोबत होता; आणि त्यांनी डोंगराळ प्रदेश ताब्यात घेतला. पण, सपाट प्रदेशात राहणाऱ्या लोकांना मात्र ते हाकलून देऊ शकले नाहीत. कारण, त्यांच्याकडे युद्धाचे लोखंडी रथ असून त्यांच्या चाकांना लांब सुऱ्या होत्या.+
२० मोशेने दिलेल्या वचनाप्रमाणे कालेबला हेब्रोन देण्यात आलं;+ त्याने तिथून अनाकच्या तीन मुलांना हाकलून लावलं.+
२१ पण, बन्यामीनच्या वंशजांनी यरुशलेममध्ये राहणाऱ्या यबूसी लोकांना घालवून दिलं नाही. त्यामुळे, आजपर्यंत यबूसी लोक यरुशलेममध्ये बन्यामीनच्या वंशजांसोबत राहत आहेत.+
२२ यादरम्यान, योसेफचे वंशज+ बेथेल शहरावर हल्ला करायला गेले; आणि यहोवा त्यांच्यासोबत होता.+
२३ त्यांनी काही गुप्तहेरांना बेथेल शहर हेरण्यासाठी पाठवलं. (त्या शहराचं पूर्वीचं नाव लूज होतं.)+
२४ त्या गुप्तहेरांना शहरातून एक माणूस बाहेर येताना दिसला, तेव्हा ते त्याला म्हणाले: “कृपा करून आम्हाला शहरात घुसण्याचा मार्ग दाखव, आणि आम्ही तुझ्यावर दया करू.”*
२५ तेव्हा त्याने त्यांना शहरात घुसण्याचा मार्ग दाखवला, आणि त्यांनी शहरातल्या लोकांना तलवारीने मारून टाकलं. पण, त्या माणसाला आणि त्याच्या कुटुंबाला मात्र त्यांनी सोडून दिलं.+
२६ तो माणूस हित्ती लोकांच्या प्रदेशात गेला. तिथे त्याने एक शहर बांधलं आणि त्याला लूज हे नाव दिलं; आजही ते शहर त्याच नावाने ओळखलं जातं.
२७ मनश्शेच्या वंशजांनी बेथ-शान, तानख,+ दोर, इब्लाम आणि मगिद्दो ही शहरं आणि त्यांच्या आसपासची नगरं+ ताब्यात घेतली नाहीत; कारण, कनानी लोक तिथून निघून जायला तयार नव्हते.
२८ इस्राएली लोक शक्तिशाली झाले तेव्हा त्यांनी कनानी लोकांना आपले गुलाम बनवलं;+ पण, त्यांनी त्यांना पूर्णपणे घालवून दिलं नाही.+
२९ तसंच, एफ्राईमच्या वंशजांनीसुद्धा गेजेरमध्ये राहणाऱ्या कनानी लोकांना घालवून दिलं नाही; म्हणून कनानी लोक गेजेरमध्ये एफ्राईमच्या वंशजांमध्ये राहिले.+
३० जबुलूनच्या वंशजांनी कित्रोन आणि नहलोल+ इथे राहणाऱ्या कनानी लोकांना घालवून दिलं नाही. ते लोक त्यांच्यातच राहिले आणि जबुलूनच्या वंशजांनी त्यांना आपले गुलाम बनवलं.+
३१ आशेरच्या वंशजांनी अक्को, सीदोन,+ अहलाब, अकजीब,+ हेल्बा, अफीक+ आणि रहोब+ इथे राहणाऱ्या लोकांना घालवून दिलं नाही.
३२ म्हणून, आशेरचे वंशज त्या देशातल्या कनानी लोकांमध्येच राहिले, कारण त्यांनी कनानी लोकांना घालवून दिलं नाही.
३३ नफतालीच्या वंशजांनी बेथ-शेमेश आणि बेथ-अनाथ+ इथे राहणाऱ्या कनानी लोकांना घालवून दिलं नाही; ते त्या देशातल्या कनानी लोकांमध्येच राहिले.+ आणि त्यांनी बेथ-शेमेश आणि बेथ-अनाथमधल्या लोकांना आपले गुलाम बनवलं.
३४ अमोरी लोकांनी दानच्या वंशजांना खाली सपाट प्रदेशात येऊ दिलं नाही; त्यामुळे त्यांना डोंगराळ प्रदेशातच राहावं लागलं.+
३५ अमोरी लोक हेरेस डोंगर, अयालोन+ आणि शालबीमचा+ प्रदेश सोडायला तयार नव्हते. पण योसेफचे वंशज शक्तिशाली झाले, तेव्हा त्यांनी अमोरी लोकांना आपले गुलाम बनवलं.
३६ अमोरी लोकांच्या प्रदेशाची सीमा अक्राब्बीमच्या+ चढापासून आणि सेलापासून वर जात होती.
तळटीपा
^ शब्दार्थसूची पाहा.
^ किंवा “दिला आहे.”
^ शब्दशः “माझ्या हिश्शाच्या.”
^ किंवा कदाचित, “लक्ष वेधून घेण्यासाठी गाढवावर बसलेली असताना तिने टाळी वाजवली.”
^ किंवा “नेगेबकडे.”
^ म्हणजे, “पाण्याचे झरे.”
^ म्हणजे, यरीहो शहरातून.
^ शब्दशः “नाशाच्या लायक ठरवणं.”
^ शब्दशः “एकनिष्ठ प्रेम दाखवू.”