स्तोत्रं १०८:१-१३
दावीदचं गीत. स्तुतिगीत.
१०८ हे देवा, माझं मन खंबीर आहे,मी संगीत वाजवून अंतःकरणापासून* तुझी स्तुती गाईन.+
२ तंतुवाद्यांनो, जागे व्हा; वीणा,+ तूही ऊठ.
मी पहाटेला जागं करीन.
३ हे यहोवा, मी सर्व लोकांमध्ये तुझी स्तुती करीन;*मी राष्ट्रांमध्ये तुझा महिमा गाईन.
४ कारण तुझं एकनिष्ठ प्रेम आकाशाइतकं उंच आहे.+
तुझा विश्‍वासूपणा आभाळापर्यंत पोहोचला आहे.
५ हे देवा, तुझा सन्मान आकाशापेक्षाही उंच आहे;सबंध पृथ्वीवर तुझा गौरव होवो!+
६ तुझ्या प्रिय लोकांची सुटका व्हावी,म्हणून तुझ्या उजव्या हाताने आम्हाला वाचव आणि माझी प्रार्थना ऐक.+
७ देव त्याच्या पवित्रतेमुळे* बोलला आहे:
“मी आनंदित होऊन शखेम+ वारसा म्हणून देईन,मी सुक्कोथचं खोरं* मोजून देईन.+
८ गिलाद+ माझा आहे आणि मनश्‍शेही माझा आहे,एफ्राईम माझ्या डोक्यावरचा टोप* आहे.+
यहूदा माझा राजदंड आहे.+
९ मवाब माझ्यासाठी पाय धुण्याचं पात्र आहे.+
अदोमवर मी माझा जोडा फेकीन.+
पलेशेथला हरवल्यामुळे मी आनंदाने जल्लोष करीन.”+
१० तटबंदी असलेल्या शहरात मला कोण नेईल?
अदोमपर्यंत मला कोण घेऊन जाईल?+
११ हे देवा, तूच नाही का? पण तू तर आमच्याकडे पाठ फिरवली आहेस.
आता तू आमच्या सैन्यांसोबत लढाईला जात नाहीस.+
१२ आमच्या संकटात आम्हाला साहाय्य कर,+कारण मानवांकडून मिळणारं तारण व्यर्थ आहे.+
१३ देवच आम्हाला ताकद देईल.+
तोच आमच्या शत्रूंना पायांखाली तुडवेल.+
तळटीपा
^ शब्दशः “माझा गौरवसुद्धा.”
^ किंवा “संगीत रचीन.”
^ किंवा कदाचित, “त्याच्या पवित्र ठिकाणात.”
^ किंवा “खालचं मैदान.”
^ शब्दशः “किल्ला.”
