होशेय १०:१-१५
१० “इस्राएल फळं देणाऱ्‍या सडक्या* द्राक्षवेलासारखा आहे.+
त्याला जितकी जास्त फळं येतात, तितक्या जास्त वेदी तो बांधतो;+त्याची जमीन जितकं जास्त पीक देते, तितकेच सुंदर पूजेचे खांब तो उभे करतो.+
२ त्यांचं हृदय ढोंगी आहे;आता त्यांना दोषी ठरवलं जाईल.
देव त्यांच्या वेदी मोडून टाकेल आणि त्यांचे खांब उद्ध्‌वस्त करेल.
३ आता ते म्हणतील, ‘आम्हाला राजा नाही,+ कारण आम्ही यहोवाचं भय मानलं नाही.
राजा आमच्यासाठी काय करू शकेल?’
४ ते पोकळ शब्द बोलतात, खोट्या शपथा घेतात+ आणि करार करतात;त्यामुळे त्यांनी केलेला न्याय शेतात उगवणाऱ्‍या विषारी झुडपांसारखा आहे.+
५ शोमरोनच्या रहिवाशांना बेथ-आवेनच्या वासराच्या मूर्तीसाठी भीती वाटेल.+
त्याचे लोक त्या मूर्तीसाठी रडतील,तसंच, परक्या देवांचे जे पुजारी तिच्यामुळे आणि तिच्या वैभवामुळे आनंदी व्हायचे तेही रडतील,कारण तिला त्यांच्यापासून दूर बंदिवासात नेलं जाईल.
६ तिला अश्‍शूरला एका महान राजासाठी भेट म्हणून नेलं जाईल.+
एफ्राईमला लज्जित केलं जाईल,आणि चुकीचा सल्ला पाळल्यामुळे इस्राएलची लाजिरवाणी स्थिती होईल.+
७ फांदी तोडून पाण्यावर टाकावी,तसा शोमरोन आणि त्याच्या राजाचा नक्कीच नाश केला जाईल.*+
८ इस्राएलचं पाप,+ म्हणजे बेथ-आवेनची+ उच्च स्थानं नष्ट केली जातील.+
त्यांच्या वेदींवर काटेरी झुडपं उगवतील.+
लोक पर्वतांना म्हणतील, ‘आम्हाला झाकून टाका!’
आणि टेकड्यांना म्हणतील, ‘आमच्यावर पडा!’+
९ हे इस्राएल, गिबाच्या दिवसांपासून तू पाप केलं आहेस.+
तिथे तुझी वृत्ती बदलली नाही.
गिबामध्ये दुष्ट लोकांना* युद्धाने गाठलं नाही.*
१० मला वाटेल तेव्हा मी त्यांना शिक्षा करीन.
आणि त्यांचे दोन अपराध त्यांच्यावर बांधले जातील*तेव्हा राष्ट्रांना त्यांच्याविरुद्ध एकत्र केलं जाईल.
११ एफ्राईम शिकवलेली गाय* होती; तिला धान्याची मळणी करायला आवडायचं,म्हणून मी तिच्या सुंदर मानेवर ओझं लादलं नाही.
आता मात्र मी एफ्राईमवर स्वाराला बसवीन.*+
यहूदा नांगरणी करेल; याकोब त्याच्यासाठी मातीची ढेकळं फोडेल.
१२ स्वतःसाठी नीतीने बी पेरा आणि एकनिष्ठ प्रेमाची कापणी करा.
यहोवाला शोधण्याची संधी असेपर्यंत+स्वतःसाठी सुपीक जमिनीची नांगरणी करा,+म्हणजे तो येऊन तुम्हाला नीतीचं शिक्षण देईल.+
१३ पण तुम्ही दुष्टतेची नांगरणी केली,आणि अनीतीची कापणी केली.+
तुम्ही लबाडीचं फळ खाल्लं;कारण तुम्ही स्वतःच्या विचारांवरआणि आपल्या योद्ध्यांवर भरवसा ठेवला.
१४ तुमच्या लोकांविरुद्ध युद्धाचा गोंधळ ऐकू येईल;ज्याप्रमाणे आर्बेलच्या घराण्याचा शल्मनने नाश केला,तेव्हा युद्धाच्या दिवशी आईला तिच्या मुलांसोबत जमिनीवर आपटून ठार मारलं गेलं,त्याप्रमाणे तटबंदी असलेली तुमची सगळी शहरं उद्ध्‌वस्त होतील.+
१५ हे बेथेल, तुझ्या भयंकर दुष्टपणामुळे तुझ्यासोबत असंच केलं जाईल.+
पहाटे इस्राएलच्या राजाचा नाश केला जाईल.”*+
तळटीपा
^ किंवा कदाचित, “पसरणाऱ्‍या.”
^ शब्दशः “गप्प केलं जाईल.”
^ शब्दशः “अनीतीच्या पुत्रांना.”
^ किंवा “पूर्णपणे नाश केला नाही.”
^ म्हणजे, मानेवर ठेवलेल्या जुवासारखी ते आपली शिक्षा भोगतील.
^ किंवा “खोगीर टाकीन.”
^ किंवा “कालवड.”
^ शब्दशः “गप्प केलं जाईल.”
