Ġenesi 13:1-18
13 Wara dan, Abram telaʼ mill-Eġittu, hu, martu, u kulma kellu, u Lot telaʼ miegħu, lejn in-Negeb.+
2 U Abram kellu ħafna mrieħel, fidda, u deheb.+
3 U telaq min-Negeb, jikkampja f’post wara l-ieħor, biex imur Betel, lejn il-post fejn qabel kellu t-tinda bejn Betel u Għaj,+
4 il-post fejn kien għamel l-artal fil-bidu;+ u Abram hemmhekk sejjaħ* isem Ġeħova.+
5 Issa Lot, li mar m’Abram, ukoll kellu n-nagħaġ, il-baqar, u t-tined.
6 Għalhekk, l-art ma kinitx tesagħhom biex jgħammru lkoll flimkien, għax ġidhom kien kotor u ma setgħux jgħammru lkoll flimkien.+
7 U qamet tilwima bejn ir-rgħajja tal-bhejjem t’Abram u r-rgħajja tal-bhejjem taʼ Lot; u f’dak iż-żmien il-Kangħanin u l-Pereżin kienu qed jgħammru fil-pajjiż.+
8 U Abram qal lil Lot:+ “Jekk jogħġbok, ħa ma jkomplix ikun hemm tilwim bejni u bejnek u bejn ir-rgħajja tiegħi u r-rgħajja tiegħek, għax aħna aħwa.+
9 Mhix l-art kollha għad-dispożizzjoni tiegħek? Jekk jogħġbok, infired minni. Jekk tmur lejn ix-xellug, jien immur lejn il-lemin; imma jekk tmur lejn il-lemin, jien immur lejn ix-xellug.”+
10 Għalhekk, Lot refaʼ għajnejh u ra d-Distrett kollu tal-Ġordan,+ li kollu kien reġjun imsoqqi tajjeb qabel ma Ġeħova qered lil Sodoma u Gomorra, li kien bħall-ġnien taʼ Ġeħova,+ bħall-art taʼ l-Eġittu, sa Sogħar.+
11 Imbagħad Lot għażel għalih id-Distrett kollu tal-Ġordan, u żarma l-kamp u mar lejn il-lvant. Għalhekk, infirdu minn xulxin.
12 Abram għammar fl-art taʼ Kangħan, imma Lot għammar qalb il-bliet tad-Distrett+ u waqqaf it-tinda qrib Sodoma.
13 U n-nies taʼ Sodoma kienu ħżiena u dinbu ħafna kontra Ġeħova.+
14 U Ġeħova qal lil Abram, wara li Lot kien infired minnu: “Erfaʼ għajnejk, jekk jogħġbok, u ħares mill-post fejn qiegħed, lejn it-tramuntana u n-nofsinhar u lejn il-lvant u l-punent,+
15 għax l-art kollha li qed tara, lilek u lil nislek se nagħtiha għal żmien indefinit.+
16 U lil nislek nagħmlu bħat-trab taʼ l-art, sabiex, jekk xi ħadd ikun jistaʼ jgħodd it-trab taʼ l-art, mela nislek ukoll ikun jistaʼ jingħadd.+
17 Qum, aqsam l-art mit-tul u l-wisaʼ tagħha, għax jien lilek se nagħtiha.”+
18 Għalhekk, Abram kompla jgħix fit-tined. Iktar tard mar u beda jgħammar qalb is-siġar il-kbar taʼ Mamre,+ li hemm f’Ħebron;+ u hemmhekk bena artal lil Ġeħova.+
Noti taʼ taħt
^ Jew, “iddikjara (xandar) hemmhekk.”
