Ġenesi 42:1-38
42 U Ġakobb ra li kien hemm iċ-ċereali fl-Eġittu.+ Imbagħad qal lil uliedu: “Għala qed tħarsu lejn xulxin?”
2 U żied: “Ara! Smajt li hemm iċ-ċereali fl-Eġittu.+ Inżlu hemmhekk u ixtrulna minn hemmhekk, sabiex nibqgħu ħajjin u ma mmutux.”
3 Għaldaqstant, għaxra minn ħut+ Ġużeppi niżlu jixtru l-qmuħ mill-Eġittu.
4 Imma Ġakobb ma bagħatx lil Benjamin,+ ħu Ġużeppi, maʼ ħutu l-oħrajn, għax qal: “Li ma jmurx jiġrilu xi aċċident u jmut.”+
5 U wlied Israel ġew flimkien maʼ l-oħrajn li kienu ġejjin jixtru, għaliex kien hemm il-ġuħ fl-art taʼ Kangħan.+
6 U Ġużeppi kien ir-raġel fil-poter fil-pajjiż.+ Kien hu li kien qed ibigħ iċ-ċereali lin-nies kollha taʼ l-art.+ Għaldaqstant, ħut Ġużeppi ġew u mielu quddiemu b’wiċċhom lejn l-art.+
7 Meta ra lil ħutu, Ġużeppi mill-ewwel għarafhom, imma hu għamel xi ħaġa biex ma jintgħarafx minnhom.+ Għalhekk, kellimhom iebes u qalilhom: “Minfejn ġejtu?” u huma wiġbuh: “Mill-art taʼ Kangħan biex nixtru l-ikel.”+
8 B’hekk, Ġużeppi għaraf lil ħutu, imma huma m’għarfuhx.
9 Minnufih Ġużeppi ftakar fil-ħolm li kien ħolom dwarhom,+ u ssokta jgħidilhom: “Intom spiji! Ġejtu biex titkixxfu d-dgħjufijiet taʼ din l-art!”+
10 Qalulu: “Le, sidi,+ imma l-qaddejja tiegħek+ ġew jixtru l-ikel.
11 Aħna lkoll ulied bniedem wieħed. Aħna nies retti. Il-qaddejja tiegħek m’humiex spiji.”+
12 Imma hu qalilhom: “Mhux veru! Għaliex intom ġejtu titkixxfu d-dgħjufijiet taʼ l-art!”+
13 Huma wiġbuh: “Il-qaddejja tiegħek qegħdin tnax aħwa.+ Aħna m’aħniex ħlief ulied bniedem wieħed+ fl-art taʼ Kangħan; u ż-żgħir illum qiegħed maʼ missierna,+ filwaqt li l-ieħor m’għadux magħna.”+
14 Madankollu, Ġużeppi qalilhom: “Bħalma għedtilkom jien, ‘Intom spiji!’
15 Din se tkun il-prova tagħkom. Daqskemm hu ħaj il-Fargħun, ma toħorġux minn hawn jekk ħukom iż-żgħir ma jiġix hawnhekk.+
16 Ibagħtu lil wieħed minnkom iġib lil ħukom waqt li intom tibqgħu marbutin, biex kliemkom jiġi provat jekk intomx tgħidu l-verità.+ U jekk le, allura, daqskemm hu ħaj il-Fargħun, intom spiji.”
17 U żammhom ilkoll flimkien arrestati għal tlett ijiem.
18 Imbagħad fit-tielet jum Ġużeppi qalilhom: “Agħmlu dan u tibqgħu ħajjin. Jien nibżaʼ+ mill-Alla l-veru.
19 Jekk intom retti, ħa jinżamm wieħed minn ħutkom marbut fid-dar fejn qed tinżammu arrestati,+ u l-kumplament tistgħu tmorru u tieħdu ċ-ċereali minħabba l-ġuħ li hemm fi djarkom.+
20 Imbagħad iġġibuli lil ħukom iż-żgħir, sabiex kliemkom jinstab li hu taʼ min jafdah; u ma tmutux.”+ U hekk għamlu.
21 U bdew jgħidu lil xulxin: “Bla dubju aħna ħatjin rigward ħuna,+ għax rajna kemm kellu ruħu mnikkta meta talabna bil-ħniena biex nagħdruh, imma ma tajniehx widen. Huwa għalhekk li dan in-niket ġie fuqna.”+
22 Imbagħad Ruben wiġibhom u qalilhom: “M’għedtilkomx jien, ‘Tidinbux kontra t-tifel,’ imma intom ma tajtux widen?+ U issa ara, demmu qed jintalab lura.”+
23 Imma huma ma kinux jafu li Ġużeppi setaʼ jifhem, għax kien hemm interpretu bejniethom.
24 U hu tbiegħed minnhom u beda jibki.+ Imbagħad mar lura ħdejhom u kellimhom u ħa lil Simegħon+ minn fosthom u rabtu quddiem għajnejhom.+
25 Wara dan, Ġużeppi ta l-kmand, u bdew jimlewlhom ir-reċipjenti tagħhom bil-qmuħ. Ukoll, kellhom iroddu l-flus taʼ l-irġiel fl-ixkora+ taʼ kull wieħed minnhom u jagħtuhom provvisti għall-vjaġġ.+ Għaldaqstant, hekk għamlulhom.
26 U għabbew iċ-ċereali tagħhom fuq il-ħmir tagħhom u telqu minn hemmhekk.
27 Meta wieħed minnhom fetaħ l-ixkora tiegħu biex jagħlef lill-ħmar tiegħu fil-post fejn waqfu biex jgħaddu l-lejl,+ ra li l-flus tiegħu kienu f’wiċċ l-ixkora tiegħu.+
28 U qal lil ħutu: “Flusi traddewli lura u issa qegħdin fl-ixkora tiegħi!” Imbagħad qalbhom waqfet, u daru lejn xulxin+ jirtogħdu u jgħidu: “X’inhu dan li għamlilna Alla?”+
29 Sa fl-aħħar waslu għand missierhom Ġakobb fl-art taʼ Kangħan u rrakkontawlu kulma kien ġralhom, u qalulu:
30 “Ir-raġel li hu s-sid tal-pajjiż kellimna iebes,+ għax ħasibna spiji li morna nitkixxfu l-pajjiż.+
31 Imma aħna għednielu, ‘Aħna nies retti.+ M’aħniex spiji.
32 Aħna qegħdin tnax aħwa,+ ulied missierna.+ Wieħed m’għadux magħna,+ u ż-żgħir illum qiegħed maʼ missierna fl-art taʼ Kangħan.’+
33 Imma r-raġel li hu s-sid tal-pajjiż qalilna,+ ‘B’dan se nkun naf li intom retti:+ Ħa jibqaʼ miegħi wieħed minn ħutkom.+ Imbagħad ħudu xi ħaġa għall-ġuħ li hemm fi djarkom u morru.+
34 U ġibuli lil ħukom iż-żgħir biex inkun naf li m’intomx spiji imma li intom retti. Lil ħukom nagħtihulkom lura, u intom tkunu tistgħu tinnegozjaw fil-pajjiż.’”+
35 U ġara li, meta kienu qed ibattlu l-ixkejjer tagħhom, kull wieħed sab il-borża tal-flus fl-ixkora tiegħu stess. U huma, kif ukoll missierhom, raw il-boroż tal-flus tagħhom, u bdew jibżgħu.
36 Imbagħad missierhom Ġakobb qalilhom: “Ċaħħadtuni minn uliedi!+ Ġużeppi m’għadux magħna u Simegħon m’għadux magħna,+ u lil Benjamin se tiħduhuli! Kelli ngħaddi minn dan kollu!”
37 Imma Ruben qal lil missieru: “Oqtolli liż-żewġ uliedi jekk ma nġibhulekx lura.+ Agħtihuli u nieħu ħsiebu jien, u żgur inġibhulek lura.”+
38 Madankollu, hu qallu: “Ibni ma jinżilx magħkom, għaliex ħuh miet u hu baqaʼ waħdu.+ Jekk jiġrilu xi aċċident u jmut fit-triq li sejrin fiha, imbagħad żgur li fi xjuħiti bl-għali titfgħuni fil-Qabar.”*+
Noti taʼ taħt
^ Bl-Ebrajk, “Xeol.”
