Ġożwè 9:1-27
9 U dak li ġara saru jafu bih ir-rejiet kollha li kienu fuq in-naħa tal-Punent tal-Ġordan, dawk fir-reġjun muntanjuż, fis-Sefela, tul il-kosta kollha tal-Baħar il-Kbir,* u quddiem il-Libanu. Dawn kienu r-rejiet tal-Ħittin, tal-Amurrin, tal-Kangħanin, tal-Pereżin, tal-Ħiwwin, u tal-Ġebusin.
2 B’hekk, inġemgħu flimkien b’fehma waħda biex jiggwerraw kontra Ġożwè u Iżrael.
3 Dawk li joqogħdu f’Gibegħon ukoll saru jafu b’dak li Ġożwè kien għamel lil Ġeriko u Għaj.
4 Għalhekk, ħaddmu moħħhom u poġġew provvisti fi xkejjer qodma fuq il-ħmir tagħhom, flimkien maʼ fliexken tal-ġild tal-inbid qodma li kienu nfaqgħu u ssewwew.
5 Huma libsu sandlijiet qodma u mraqqgħin, u ħwejjeġ qodma. Il-ħobż kollu tal-provvisti tagħhom kien niexef u mfarrak.
6 Imbagħad marru għand Ġożwè fil-kampijiet f’Gilgal u qalu lilu u lill-irġiel t’Iżrael: “Aħna ġejna minn pajjiż ’il bogħod. Allura agħmlu patt magħna jekk jogħġobkom.”
7 Imma l-irġiel t’Iżrael qalu lill-Ħiwwin: “Għandu mnejn tgħixu viċin tagħna. Allura, kif nistgħu nagħmlu patt magħkom?”
8 Huma wieġbu lil Ġożwè: “Aħna l-qaddejja* tiegħek.”
Imbagħad Ġożwè qalilhom: “Min intom, u minn fejn ġejjin?”
9 Għal dan qalulu: “Aħna l-qaddejja tiegħek u ġejjin minn pajjiż ’il bogħod ħafna minħabba isem Ġeħova l-Alla tiegħek, għax smajna bil-fama tiegħu u b’kulma għamel fl-Eġittu
10 u b’kulma għamel liż-żewġ rejiet tal-Amurrin li kienu fuq in-naħa l-oħra* tal-Ġordan, lir-Re taʼ Ħesbon u lir-Re Għog tal-Basan li kien jgħix f’Għastarot.
11 Għalhekk, l-anzjani* tagħna u dawk kollha li jgħixu f’pajjiżna qalulna, ‘Ħudu l-provvisti magħkom għall-vjaġġ u morru ltaqgħu magħhom. Għidulhom: “Aħna nkunu l-qaddejja tagħkom. Allura agħmlu patt magħna jekk jogħġobkom.”’
12 Dan il-ħobż li ħadna għall-provvisti tagħna kien għadu sħun meta tlaqna minn djarna biex niġu għandkom. Kif tistgħu taraw, issa nixef u tfarrak.
13 U dawn il-fliexken tal-ġild tal-inbid kienu ġodda meta mlejniehom, imma issa nfaqgħu. U l-ħwejjeġ u s-sandlijiet tagħna qdiemu tant kemm kien twil il-vjaġġ.”
14 Għalhekk, l-irġiel t’Iżrael ħadu ftit mill-provvisti tagħhom biex jeżaminawhom, imma ma staqsewx lil Ġeħova x’għandhom jagħmlu.
15 Allura Ġożwè għamel paċi u patt magħhom biex iħallihom ħajjin, u l-kapijiet tal-ġemgħa ħalfulhom li se jagħmlu dan.
16 Wara tlett ijiem li kienu għamlu patt magħhom, huma semgħu li kienu joqogħdu viċin tagħhom.
17 Imbagħad l-Iżraelin telqu u waslu fil-bliet tagħhom fit-tielet jum. Dawn il-bliet kienu Gibegħon, Kefira, Birot, u Kirjat-ġegħarim.
18 Imma l-Iżraelin m’attakkawhomx, għax il-kapijiet tal-ġemgħa kienu ħalfulhom b’Ġeħova l-Alla t’Iżrael. Allura, il-ġemgħa kollha bdiet tgerger kontra l-kapijiet.
19 Għal dan, il-kapijiet kollha qalu lill-ġemgħa: “Peress li ħlifnielhom b’Ġeħova l-Alla t’Iżrael ma nistgħux nagħmlulhom ħsara.
20 Hekk se nagħmlu: Se nħalluhom ħajjin, biex Alla ma jirrabjax magħna minħabba dak li ħlifnielhom.”
21 U l-kapijiet żiedu: “Ħa jibqgħu ħajjin, imma se jkollhom jiġbru l-injam u jtellgħu l-ilma għall-ġemgħa kollha.” Hekk wegħduhom il-kapijiet.
22 Imbagħad Ġożwè għajtilhom u qalilhom: “Għala qarraqtu bina billi għedtu, ‘Aħna ġejna minn post ’il bogħod ħafna,’ meta fil-fatt tgħixu f’nofsna?
23 Mil-lum intom misħutin, u se tkunu lsiera għal dejjem u se tiġbru l-injam u ttellgħu l-ilma għad-dar tal-Alla tiegħi.”
24 Huma wieġbu lil Ġożwè: “Dan kien għax lilna, il-qaddejja tiegħek, intqalilna b’mod ċar li Ġeħova l-Alla tiegħek kien ikkmanda lil Mosè l-qaddej tiegħu biex jagħtikom l-art kollha u jeqred għalkollox lil dawk kollha li jgħixu fiha. Allura bżajna li se toqtluna, u għalhekk għamilna dan.
25 Issa aħna f’idejk. Agħmlilna kulma taħseb li hu tajjeb u ġust.”
26 U hekk għamlilhom. Ħelishom minn idejn l-Iżraelin u ma qatluhomx.
27 Imma dakinhar, Ġożwè qabbadhom jiġbru l-injam u jtellgħu l-ilma għall-ġemgħa u għall-artal taʼ Ġeħova, fil-post li jagħżel Hu. Huma għadhom jagħmlu dan sal-lum.
