Ġob 16:1-22
16 Ġob wieġeb:
2 “Diġà smajt ħafna affarijiet bħal dawn.
Minflok tfarrġuni qed iġġegħluni nbati iktar!
3 Se tieqfu tparlaw fil-vojt?
X’ġiegħlek twieġeb b’dan il-mod Elifaż?
4 Anki jien nistaʼ nitkellem bħalkom.
Li kieku kontu fis-sitwazzjoni tiegħi,*Stajt ngħid ħafna affarijiet kontrikom,U nħares lejkom u nxengel rasi.
5 Imma minflok, kont ninkuraġġikom bi kliemi,U l-kliem taʼ faraġ li ngħid iġibilkom serħan.
6 Jekk nitkellem, l-uġigħ tiegħi ma jonqosx,U jekk ma nitkellimx, xorta nibqaʼ muġugħ.
7 Imma Alla ħadli saħħti;Hu qered lil dawk taʼ dari.*
8 Hu qed iġegħelni nbati, u n-nies jistgħu jarawh dan.
Tant jien irqiq li n-nies jaħsbu li jien ħati.
9 Hu jobgħodni u fir-rabja tiegħu qattagħni biċċiet.
Hu jheżżeż snienu għalija.
L-għadu tiegħi jħares lejja b’rabja bil-ħsieb li jweġġagħni.
10 Huma fetħu ħalqhom beraħ biex jibilgħuni,Tawni daqqa taʼ ħarta biex iwaqqgħuni għaċ-ċajt;Inġabru ħafna f’daqqa kontrija.
11 Alla jħallini niġi attakkat minn grupp subien,U jagħtini f’idejn il-ħżiena.
12 Jien ma kelli problemi taʼ xejn, imma f’daqqa waħda rrovinali ħajti;Hu qabadni minn għonqi u farrakni,Imbagħad spara l-vleġeġ tiegħu lejja.
13 L-arċiera tiegħu jduruni;Hu jinfidli l-kliewi u ma jitħassarnix;Hu jitfaʼ mal-art il-likwidu morr li għandi fil-fwied.
14 Hu jagħmilli ferita fuq oħra;Jiġri lejja bħal gwerrier.
15 Jien ħitt id-drapp tal-ixkora flimkien biex ngħatti l-ġilda tiegħi,Tant tlift id-dinjità* li qiegħed bilqiegħda fit-trab.
16 Wiċċi aħmar bil-biki,U taħt għajnejja iswed,*
17 Avolja jien qatt ma weġġajt lil ħadd,U nitlob b’mod sinċier.
18 Jalla l-art ma tgħattix id-demm tiegħi!
Biex b’hekk ikun jistaʼ jgħajjat f’ismi.
19 Dak li jistaʼ jixhed li m’iniex ħati qiegħed fis-sema;Il-wieħed li qiegħed fis-sema jistaʼ jaqbeż għalija.
20 Sħabi qed iwaqqgħuni għaċ-ċajtHekk kif nitlob lil Alla bid-dmugħ f’għajnejja.*
21 Ħa jkun hemm xi ħadd li jirranġa l-affarijiet bejni u bejn Alla,Bħalma wieħed jagħmel bejn tnejn min-nies.
22 Għax ftit snin fadalli ħaj,Imbagħad immur u ma nerġax niġi.
Noti taʼ taħt
^ Jew “kieku ruħkom kienet flok ruħi.”
^ Jew “dawk li jinġabru miegħi.”
^ Jew “saħħa.”
^ Jew “għandi d-dell tal-mewt.”
^ Jew forsi “b’għajnejja għajjenin.”
