It-Tieni Ktieb taʼ Samwel 22:1-51
22 U David qal lil Ġeħova l-kliem taʼ din l-għanja dakinhar li Ġeħova ħelsu minn id l-għedewwa kollha tiegħu u minn id Sawl.
2 Hu qal:
“Ġeħova hu l-blata u l-fortizza tiegħi u Dak li jsalvani.
3 L-Alla tiegħi hu l-blata tiegħi, li fih nistkenn,It-tarka u l-qarn* tiegħi taʼ salvazzjoni,* il-post taʼ protezzjoni tiegħi,*U l-post fejn nistaʼ naħrab, is-salvatur tiegħi; int li ssalvani mill-vjolenza.
4 Jien ngħajjat lil Ġeħova għall-għajnuna, il-wieħed li jistħoqqlu tifħir,U se niġi salvat mill-għedewwa tiegħi.
5 Ġejt imdawwar bil-mewġ tal-mewt;Dulluvju taʼ nies li mhuma tajbin għal xejn werwruni.
6 Il-ħbula tal-Qabar* daru miegħi;Ġejt wiċċ imb wiċċ man-nases tal-mewt.
7 Meta kont imdejjaq għajjatt lil Ġeħova,Lill-Alla tiegħi bqajt ngħajjat.
Imbagħad mit-tempju tiegħu semaʼ leħni,U l-għajta tiegħi għall-għajnuna waslet f’widnejh.
8 L-art bdiet tiċċaqlaq u titriegħed ’il quddiem u lura;Is-sema theżżetU ċċaqalqet ’il quddiem u lura għax kien irrabjat.
9 Telaʼ duħħan minn imnieħru,U nar li jeqred ħareġ minn ħalqu;Ġamar jaqbad ħareġ minnu.
10 Hu baxxa s-sema hekk kif niżel,U kien hemm dalma kbira taħt saqajh.
11 Hu ġie jtir riekeb fuq kerubin.
Kien jidher fuq il-ġwienaħ t’anġlu.*
12 Imbagħad għamel id-dlam madwaru bħala kenn,B’ilmijiet mudlama u sħab oħxon.
13 Mid-dija taʼ quddiemu beda jaqbad ġamar tan-nar.
14 Imbagħad Ġeħova beda jriegħed mis-sema,L-Iktar Għoli semmaʼ leħnu.
15 Spara l-vleġeġ tiegħu u xerred l-għedewwa;Faqqaʼ s-sajjetti, u tefagħhom f’konfużjoni.
16 Qiegħ il-baħar beda jidher;Il-pedamenti tal-art inkixfu biċ-ċanfira taʼ Ġeħova,B’nifs qawwi minn imnieħru.
17 Tani jdejh mill-għoli;Qabadni u tellagħni minn ilmijiet fondi.
18 Ħelisni mill-għadu b’saħħtu tiegħi,Minn dawk li jobogħduni, li kienu iktar b’saħħithom minni.
19 Huma sfidawni f’jum id-dwejjaq tiegħi,Imma Ġeħova kien jappoġġani.
20 Hu ħadni f’post taʼ sigurtà;*Ħelisni għax kien kuntent bija.
21 Ġeħova jippremjani għax kont ġust;Hu jippremjani skont l-innoċenza* taʼ jdejja.
22 Għax jien nagħmel dak li jrid Ġeħova,Ma tlaqtx lill-Alla tiegħi, u allura m’aġixxejtx ħażin.
23 Il-ġudizzji kollha tiegħu qegħdin quddiemi;M’iniex se nwarrab mil-liġijiet tiegħu.
24 Se nibqaʼ bla ħtija quddiemu,U se nitbiegħed mill-iżball.
25 Jalla Ġeħova jippremjani għax aġixxejt b’ġustizzja,Jippremjani skont l-innoċenza tiegħi quddiemu.
26 Maʼ xi ħadd leali, int taġixxi b’lealtà;Maʼ min hu bla ħtija, timxi bla ħtija;
27 Maʼ min hu sinċier, int tkun sinċier,Imma maʼ min iqarraq, int tuża l-għaqal.*
28 Għax int issalva lill-umli,Imma għajnejk huma kontra s-suppervi, u int tumiljahom.
29 Għax int tagħtini d-dawl,* Ġeħova;Ġeħova, int iddawwal id-dlam tiegħi.
30 Bl-għajnuna tiegħek nistaʼ niħodha kontra grupp taʼ ħallelin armati;Bil-qawwa tiegħek nistaʼ nitlaʼ maʼ sur.
31 It-triq tal-Alla l-veru hi perfetta;Dak li jgħid Ġeħova hu pur.*
Hu tarka għal dawk kollha li jistkennu fih.
32 Għax min hu Alla ħlief Ġeħova?
U min hu blata ħlief l-Alla tagħna?
33 L-Alla l-veru hu l-fortizza b’saħħitha tiegħi,U se jagħmel triqti perfetta.
34 Jagħmilli saqajja bħal taʼ ċerva;Hu jqegħedni fuq postijiet għoljin.
35 Qed jittrennjani għall-gwerra;Idejja jistgħu jgħawġu qaws tar-ram.
36 Int tagħtini t-tarka tiegħek taʼ salvazzjoni,U l-umiltà tiegħek tigglorifikani.
37 Int twessaʼ l-passaġġ għal saqajjaSabiex ma naqax.
38 Jien se niġri wara l-għedewwa tiegħi u nġibhom fix-xejn;Ma niġix lura qabel jinqerdu għalkollox.
39 U se neqridhom għalkollox u ngħaffiġhom, sabiex ma jqumux;Huma se jaqgħu taħt saqajja.
40 Int se tagħtini s-saħħa għall-battalja;Se tixħet taħti lill-għedewwa tiegħi.
41 Int se ġġiegħel lill-għedewwa tiegħi jaħarbu minni;*Se neqred* lil dawk li jobogħduni.
42 Huma jgħajtu għall-għajnuna, imma m’hemmx min isalvahom;Saħansitra jgħajtu lil Ġeħova, imma ma jwiġibhomx.
43 Jien se nitħanhom bħat-trab fin tal-art;Infarrakhom u ngħaffiġhom bħal tajn fit-toroq.
44 Int se teħlisni min-nies tiegħi li moħħhom biex isibu xi ħtija fija.
Se tipproteġini biex inkun il-kap tal-popli;Poplu li ma kontx naf se jaqdini.
45 Il-barranin se jiġu għandi b’rashom baxxuta;Dak li jisimgħu dwari jġegħelhom jobduni.*
46 Il-barranin se jaqtgħu qalbhom;Huma joħorġu jitriegħdu mill-fortizzi tagħhom.
47 Ġeħova hu ħaj! Ħa jkun imfaħħar il-Blata tiegħi!
Ħa jkun onorat l-Alla tiegħi, il-blata li ssalvani.
48 L-Alla l-veru jagħmel vendetta għalija;Hu jagħtini l-popli f’idejja;
49 Hu jeħlisni mill-għedewwa tiegħi.
Int terfagħni fl-għoli ħalli dawk li jattakkawni ma jilħqunix;Issalvani mir-raġel vjolenti.
50 Huwa għalhekk li se nirringrazzjak fost il-popli Ġeħova,U lil ismek infaħħru bil-kant:*
51 Hu qed jeħlisni b’modi tal-għaġeb;*Juri mħabba u lealtà* miegħi, il-magħżul* tiegħu,Miegħi u ma’ dawk li jiġu minni għal dejjem.”
Noti taʼ taħt
^ Jew “u l-wieħed b’saħħtu li jsalvani.”
^ Jew “il-post fl-għoli tiegħi taʼ sigurtà.”
^ Jew “taʼ Xeol,” jiġifieri l-qabar komuni tan-nies. Ara Termini tal-Bibbja Spjegati.
^ Jew “il-ġwienaħ tar-riħ.”
^ Jew “f’post spazjuż.”
^ Letteralment “l-indafa.”
^ Jew forsi “taġixxi t’iblah.”
^ Letteralment “il-lampa tiegħi.”
^ Jew “irfinut bin-nar.”
^ Jew “iġġiegħel lill-għedewwa tiegħi jagħtuni daharhom.”
^ Letteralment “insikket.”
^ Letteralment “Malli jisimgħu b’widnejhom, jobduni.”
^ Jew “indoqqlu l-mużika.”
^ Jew “jagħti rebħiet kbar lir-re.”
^ Jew “imħabba leali.” Ara Termini tal-Bibbja Spjegati.
^ Letteralment “il-midluk.” Ara Termini tal-Bibbja Spjegati.
