Imħallfin 15:1-20
-
Sansun jivvendika ruħu mill-Filistin (1-20)
15 Wara ftit, fi żmien il-ħsad tal-qamħ, Sansun mar iżur lil martu u ħa gidi miegħu. Hu qal: “Nixtieq nidħol ħdejn marti fil-kamra tas-sodda.”* Imma missierha ma ħalliehx jidħol.
2 Missierha qallu: “Jien ħsibt li żgur li tobgħodha. Għalhekk, tajtha lil wieħed minn dawk li qagħdu miegħek bħala l-għarus. Oħtha ż-żgħira mhux iktar ħelwa minnha? Jekk jogħġbok, ħu lilha minflok.”
3 Madankollu, Sansun qal: “Did-darba l-Filistin ma jistgħux jgħidu li t-tort tiegħi meta nagħmlilhom il-ħsara.”
4 Għalhekk, Sansun mar u qabad 300 volpi. Imbagħad qabad xi torċi, rabat il-volpijiet minn denbhom tnejn tnejn b’torċa bejniethom.
5 Imbagħad hu ta n-nar lit-torċi u bagħat lill-volpijiet fl-għelieqi tal-Filistin fejn kien hemm il-qamħ. Hu qabbad kollox bin-nar, mill-qatet tal-qamħ sal-qamħ li kien għadu ma nqatax, kif ukoll l-għelieqi tad-dwieli u taż-żebbuġ.
6 Il-Filistin staqsew: “Min għamel dan?” U qalulhom: “Sansun, ir-raġel taʼ bint it-Timni, għax ħadlu lil martu u taha lil wieħed minn dawk li kienu qagħdu miegħu bħala l-għarus.” Għal dan, il-Filistin telgħu u ħarqu lilha u lil missierha.
7 Imbagħad Sansun qalilhom: “Jekk dan hu l-mod kif taġixxu, mhux se nieqaf sakemm nivvendika ruħi minnkom.”
8 Imbagħad hu qatilhom wieħed wara l-ieħor u l-qatla kienet kbira. Wara hu niżel u mar f’għar* tal-blata t’Għetam.
9 Iktar tard, il-Filistin telgħu u kkampjaw f’Ġuda u qagħdu jiġġerrew ’l hemm u ’l hawn f’Leħi.
10 Imbagħad l-irġiel taʼ Ġuda qalu: “Għala tlajtu kontrina?” u dawk wieġbu: “Tlajna naqbdu* lil Sansun, biex nagħmlulu kif għamlilna.”
11 Għalhekk, niżlu 3,000 raġel taʼ Ġuda lejn l-għar* tal-blata t’Għetam u qalu lil Sansun: “Ma tafx li l-Filistin qed jaħkmu fuqna? Allura għala għamiltilna dan?” Imbagħad hu qalilhom: “Kif għamluli għamiltilhom.”
12 Imma qalulu: “Ġejna biex naqbduk* u nagħtuk f’idejn il-Filistin.” Imbagħad Sansun qalilhom: “Aħilfuli li m’intomx se tattakkawni.”
13 Huma qalulu: “Le, aħna sempliċement se norbtuk u nagħtuk f’idejhom, imma mhux se noqtluk.”
Għalhekk, rabtuh b’żewġt iħbula ġodda u ħarġuh mill-għar.
14 Meta wasal Leħi, il-Filistin għajtu bil-ferħ malli rawh. Imbagħad l-ispirtu taʼ Ġeħova saħħu, u l-ħbula li kienu maʼ jdejh saru bħal ħjut tal-għażel maħruqin bin-nar, u l-irbit tiegħu dab minn maʼ jdejh.
15 Imbagħad sab xedaq taʼ ħmar li ma kienx ilu li miet, qabdu, u bih qatel 1,000 raġel.
16 Imbagħad Sansun qal:
“Bix-xedaq taʼ ħmar tfajthom fi gzuz!
Bix-xedaq taʼ ħmar qtilt 1,000 raġel.”
17 Meta spiċċa jitkellem, hu rema x-xedaq u semma dak il-post Ramat-leħi.*
18 Imbagħad qabdu għatx kbir, u għajjat lil Ġeħova u qallu: “Kont int li tajt din is-salvazzjoni kbira f’id il-qaddej tiegħek. Imma issa sejjer jien immut bil-għatx u nispiċċa f’idejn dawk li mhumiex ċirkonċiżi?”
19 Għalhekk, Alla fetaħ ħofra li kien hemm f’Leħi u ħareġ l-ilma minnha. Meta xorob, hu ħa r-ruħ.* Huwa għalhekk li semma dak il-post Għajn-ħakkore,* li għadu f’Leħi sal-lum.
20 Hu ġġudika lil Iżrael fi żmien il-Filistin għal 20 sena.
Noti taʼ taħt
^ Jew “fil-kamra taʼ ġewwa.”
^ Jew “f’xaqq.”
^ Jew “norbtu.”
^ Jew “ix-xaqq.”
^ Jew “norbtuk.”
^ Ifisser “Post Għoli tax-Xedaq.”
^ Jew “issaħħaħ.”
^ Ifisser “L-Għajn tal-Ilma tal-Wieħed li Għajjat.”
