Ittra lil Filemon 1:1-25
1 Jien Pawlu, li qiegħed il-ħabs għax naqdi lil Kristu Ġesù, u ħuna Timotju qed nibagħtu din l-ittra lilek Filemon, ħaddiem magħna u għażiż għalina,
2 u lil oħtna Appja, lil Arkippu suldat taʼ Kristu flimkien magħna, u lill-kongregazzjoni li tiltaqaʼ d-dar tiegħek:
3 Jalla Alla Missierna u l-Mulej Ġesù Kristu jurukom qalb tajba kbira u jgħinukom ikollkom il-paċi.
4 Jien dejjem nirringrazzja lil Alla meta nsemmik fit-talb tiegħi,
5 hekk kif inkompli nismaʼ dwar il-fidi tiegħek fil-Mulej Ġesù u dwar l-imħabba li għandek għalih u għall-qaddisin kollha.
6 Jien nitlob li l-fidi li għandek bħal tagħna twasslek biex tirrealizza li l-barkiet kollha li għandna ġejjin permezz taʼ Kristu.
7 Jien fraħt u ġejt inkuraġġit ħafna meta smajt bl-imħabba tiegħek, ħija, għax il-qaddisin ħassewhom inkuraġġiti minħabba fik.
8 Għalkemm għandi l-libertà kollha bħala appostlu taʼ Kristu li nikkmandak tagħmel dak li hu xieraq,
9 nippreferi li ninkuraġġik tagħmel dan minħabba l-imħabba li għandek, għax jien, Pawlu, xjaħt u qiegħed il-ħabs minħabba Kristu Ġesù.
10 Nitolbok pjaċir għat-tifel tiegħi Oneżimu, għax sirt bħal missier għalih waqt li jien qiegħed il-ħabs.*
11 Qabel ma kienx utli għalik, imma issa hu utli għalik u għalija.
12 Jien inħobbu ħafna u se nibagħtu lura għandek.
13 Nixtieq inżommu miegħi biex ikun jistaʼ jgħinni, bħalma tixtieq tgħinni int, waqt li jien qiegħed il-ħabs minħabba l-aħbar tajba.
14 Imma ma rrid nagħmel xejn jekk ma taqbilx miegħi, ħalli ma taċċettax għax tħossok obbligat, imma għax tixtieq tagħmel hekk mill-qalb.
15 Veru li telqek għal ftit,* imma dan forsi ġara biex ikun miegħek għal dejjem,
16 mhux biss bħala lsir kif kien qabel, imma iktar minn hekk, bħala ħu maħbub. Jien inħobbu ħafna, u int se tħobbu iktar bħala lsir u ħu Kristjan.
17 Għalhekk, jekk tqisni bħala ħabib, ilqgħu mill-qalb bħallikieku qed tilqaʼ lili.
18 Iktar minn hekk, jekk għamillek xi ħaġa ħażina jew għandu jagħtik, inħallsek jien.
19 Jien, Pawlu, qed nikteb din l-ittra u nwiegħdek li se nħallsek lura dak li għandu jagħtik. Imma tinsiex li int għandek id-dejn miegħi wkoll.
20 Iva ħija, peress li aħna qaddejja tal-Mulej, jalla tgħinni nħossni inkuraġġit bħala appostlu taʼ Kristu.
21 Qed niktiblek għax ċert li se tagħmel dak li tlabtek u naf li se tagħmel ħafna iktar minn hekk.
22 Apparti minn hekk, ippreparali fejn noqgħod, għax qed nittama li permezz tat-talb tagħkom niġi meħlus u nkun nistaʼ niġi ħdejkom.
23 Iselli għalik Epafra, li bħali qiegħed il-ħabs minħabba Kristu Ġesù.
24 Sellew għalik ukoll Marku, Aristarku, Dema, u Luqa, li jaħdmu miegħi.
25 Jalla l-Mulej Ġesù Kristu jurikom qalb tajba hekk kif turu attitudni tajba.
