L-Aħbar Tajba Skont Mattew 7:1-29
7 “Tibqgħux tiġġudikaw biex ma tiġux iġġudikati.
2 Għax kif tiġġudika int, Alla se jiġġudika lilek, u bil-mod kif tittratta lil oħrajn int, se jittrattaw lilek.*
3 Allura għala tinnota t-tibna f’għajn ħuk,* u ma tarax it-travu li għandek f’għajnek?
4 Jew kif tistaʼ tgħid lil ħuk, ‘Ħallini nneħħilek it-tibna minn għajnek,’ meta int għandek travu f’għajnek?
5 Ja ipokrita! L-ewwel neħħi t-travu minn għajnek, u mbagħad tkun tistaʼ tneħħi t-tibna minn għajn ħuk.
6 “Tagħtux dak li hu qaddis lill-klieb u titfgħux il-perli tagħkom ħdejn il-ħnieżer, ħalli ma jgħaffġuhomx taħt saqajhom, iduru għalikom, u jattakkawkom.
7 “Ibqgħu itolbu u tirċievu; ibqgħu fittxu u ssibu; u ibqgħu ħabbtu fuq il-bieb u jinfetħilkom.
8 Għax kull min jitlob, jirċievi; kull min ifittex, isib; u kull min iħabbat fuq il-bieb, jinfetaħlu.
9 Infatti, jekk ibnek jitolbok ħobża, sejjer int tagħtih ġebla?
10 Jew jekk jitolbok ħuta, sejjer int tagħtih serp?
11 Għalhekk, jekk intom, għalkemm tagħmlu affarijiet ħżiena,* tafu tagħtu affarijiet tajbin lit-tfal tagħkom, mela żgur li Missierkom li hu fis-sema se jagħti affarijiet tajbin lil dawk li jitolbuh!
12 “Mela ttrattaw lil oħrajn bħalma tixtiequ li oħrajn jittrattawkom.* Fil-fatt, hekk jgħallmu l-Liġi taʼ Mosè u l-kitbiet tal-profeti.
13 “Għaddu mill-bieb id-dejjaq, għax it-triq u l-bieb li huma wesgħin iwasslu għall-qerda u ħafna jgħaddu minn hemm.
14 Mentri l-bieb u t-triq li huma dojoq iwasslu għall-ħajja, u ftit isibu din it-triq.
15 “Oqogħdu attenti mill-profeti foloz li minn barra jidhru bħal nagħaġ, imma fir-realtà huma bħal ilpup li jridu jqattgħukom biċċiet.
16 Mill-frott* tagħhom tagħrfuhom. In-nies qatt ma jaqtgħu l-għeneb jew it-tin mix-xewk, hux vera?
17 Bl-istess mod, kull siġra tajba tagħmel frott tajjeb, imma kull siġra ħażina tagħmel frott ħażin.
18 Siġra tajba ma tistax tagħmel frott ħażin, u siġra ħażina ma tistax tagħmel frott tajjeb.
19 Kull siġra li ma tagħmilx frott tajjeb jaqtgħuha u jitfgħuha fin-nar.
20 Mela mill-frott tagħhom se tagħrfuhom.
21 “Mhux kull min jgħidli, ‘Mulej, Mulej,’ se jidħol fis-Saltna t’Alla,* imma dawk biss li jagħmlu dak li jrid Missieri li hu fis-sema.
22 Dakinhar ħafna jgħiduli, ‘Mulej, Mulej, mhux f’ismek ipprofetizzajna, keċċejna d-demonji, u għamilna ħafna mirakli?’
23 Imma jien ngħidilhom: ‘Ma nafkomx! Itilqu minn quddiemi, għax intom tagħmlu dak li hu ħażin.’
24 “Għalhekk, kull min jagħmel dak li qed ngħallem, ikun bħal raġel bil-għaqal li bena d-dar fuq blat fis-sod.
25 Imbagħad għamlet ħafna xita li għerrqet kulm’hemm u qam riħ qawwi, imma d-dar ma waqgħetx għax kienet mibnija fis-sod.
26 Mill-banda l-oħra, kull min ma jagħmilx dak li qed ngħallem, ikun bħal raġel iblah li bena d-dar fuq ir-ramel.
27 Imbagħad għamlet ħafna xita li għerrqet kulm’hemm u qam riħ qawwi, u d-dar waqgħet u ma kien fadal xejn minnha.”
28 Meta Ġesù għallem dawn l-affarijiet, in-nies baqgħu mbellhin għall-mod kif jgħallem,
29 għax hu għallimhom bħal wieħed li għandu l-awtorità biex jagħmel dan, u mhux bħall-iskribi tagħhom.
Noti taʼ taħt
^ Jew “bil-kejl li tkejjel, se jkejluk.”
^ Jiġifieri xi ħadd ieħor li jqim lil Alla.
^ Letteralment “għalkemm ħżiena.”
^ Letteralment “kulma tridu li l-bnedmin jagħmlulkom, intom tridu tagħmluh lilhom.”
^ Milli jidher dan jirreferi għax-xogħol tagħhom.
^ Letteralment “fis-Saltna tas-smewwiet.” Jew “fil-Gvern (fit-Tmexxija) t’Alla.” Ara Termini tal-Bibbja Spjegati.
