Salm 51:1-19
Lid-direttur. Għanja taʼ David, meta l-profeta Natan iffaċċjah wara li David kellu x’jaqsam maʼ Bat-seba.
51 Ħenn għalija, Alla tiegħi, għax int turi mħabba u lealtà.*
Ħassar id-dnubiet tiegħi għax int turi ħniena kbira.
2 Aħsilni sew mill-iżball tiegħi,U naddafni mid-dnub li għamilt.
3 Għax jien naf sew li dnibt,U d-dnub tiegħi qiegħed fuq moħħi* l-ħin kollu.
4 L-ewwel nett, jien kontrik* dnibt;Jien għamilt dak li hu ħażin f’għajnejk;Għalhekk, għandek raġun tikkundannani,U l-ġudizzju tiegħek hu ġust.
5 Jien twilidt ħati tad-dnub,U f’żaqq ommi kont diġà midneb.*
6 Int tieħu pjaċir b’xi ħadd onest;Urini kif nistaʼ nkun għaqli.
7 Naddafni mid-dnub tiegħi biż-żuf,* ħalli nkun nadif;Aħsilni, ħalli nkun iktar abjad mis-silġ.
8 Jalla tgħinni nerġaʼ nkun ferħan,Minkejja li farraktli l-għadam.
9 Tibqax tħares lejn id-dnubiet* tiegħi,U ħassarli l-iżbalji kollha li għamilt.
10 Alla tiegħi, għinni biex ikolli xewqat tajbin,*U ibdel il-mod taʼ kif naħseb, ħalli nkun leali lejk.
11 Tkeċċinix minn quddiemek;U tneħħix minn fuqi l-ispirtu qaddis tiegħek.
12 Erġaʼ agħtini l-ferħ li ħassejt meta salvajtni;Għinni nkun lest li nobdik.
13 Jien se ngħallem il-prinċipji tiegħek lil dawk li jidinbu,Ħalli b’hekk jerġgħu lura għandek.
14 Alla tiegħi, int il-wieħed li ssalvani.
Aħfirli għax jien ħati taʼ qtil,Ħalli b’hekk inxandar bil-ferħ il-ġustizzja tiegħek.
15 Ġeħova, agħtini s-saħħa biex nitkellem,Ħalli nkun nistaʼ nfaħħrek.
16 Kieku int ridt sagrifiċċji, kont noffrihom;Int ma tiħux pjaċir b’offerta sħiħa tal-ħruq.
17 Is-sagrifiċċji li int tieħu gost bihom huma l-attitudni taʼ ndiema;Alla tiegħi, int ma tirrifjutax* qalb maqsuma u umli.
18 Agħmel dak li hu tajjeb għal Sijon;Ibni s-swar taʼ Ġerusalemm.
19 Imbagħad int se tieħu pjaċir bis-sagrifiċċji tan-nies sewwa,Bis-sagrifiċċji tal-ħruq u l-offerti sħaħ;Imbagħad il-barrin se jiġu offruti fuq l-artal tiegħek.
Noti taʼ taħt
^ Jew “imħabba leali.” Ara Termini tal-Bibbja Spjegati.
^ Letteralment “quddiemi.”
^ Letteralment “Kontrik u kontrik biss.”
^ Jew “U ili nagħmel id-dnub mindu wellditni ommi.”
^ Jew “Aħbi wiċċek mid-dnubiet.”
^ Letteralment “oħloq fija qalb pura.”
^ Jew “ma tobgħodx.”
