Min Hu Ġesù Kristu?
Lezzjoni Nru. 3
Min Hu Ġesù Kristu?
Ġesù għala hu msejjaħ l-Iben “l-ewwel imwieled” t’Alla? (1)
Għala hu msejjaħ “il-Kelma”? (1)
Ġesù għala ġie fuq l-art bħala bniedem? (2-4)
Għala wettaq il-mirakli? (5)
X’se jagħmel Ġesù fil-futur qarib? (6)
1. Ġesù għex fis-sema bħala persuna spirtu qabel ma ġie fuq l-art. Kien l-ewwel ħolqien t’Alla, u għalhekk hu msejjaħ l-Iben “l-ewwel imwieled” t’Alla. (Kolossin 1:15, NW; Apokalissi 3:14, NW) Ġesù huwa l-uniku Iben li Alla ħalaq waħdu. Jehovah uża lil Ġesù qabel sar bniedem bħala “mgħallem” tiegħu biex joħloq l-affarijiet l-oħrajn kollha fis-sema u fuq l-art. (Proverbji 8:22-31; Kolossin 1:16, 17) Alla wżah ukoll bħala l-kelliemi ewlieni Tiegħu. Dak huwa għala Ġesù hu msejjaħ “il-Verb [“il-Kelma,” Karm Żammit].”—Ġwann 1:1-3; Apokalissi 19:13.
2. Alla bagħat lil Ibnu lejn l-art billi ttrasferixxa l-ħajja tiegħu għal ġol-ġuf taʼ Marija. Mela Ġesù ma kellux missier uman. Għalhekk ma wiret ebda dnub jew imperfezzjoni. Alla bagħat lil Ġesù fid-dinja għal tliet raġunijiet: (1) Biex jgħallimna l-verità dwar Alla (Ġwann 18:37), (2) biex iżomm integrità perfetta, waqt li jipprovdi mudell għalina biex insegwuh (1 Pietru 2:21), u (3) biex jissagrifika ħajtu ħalli jeħlisna mid-dnub u l-mewt. Dan għala kien meħtieġ?—Mattew 20:28.
3. Billi m’obdiex il-kmand t’Alla, l-ewwel bniedem, Adam, ikkommetta dak li l-Bibbja ssejjaħlu “dnub.” Għalhekk Alla kkundannah għall-mewt. (Ġenesi 3:17-19) Ma baqax iktar jilħaq il-livelli t’Alla, u għalhekk ma baqax iktar perfett. Bil-mod il-mod xjieħ u miet. Adam għadda d-dnub lil uliedu kollha. Għalhekk aħna wkoll nixjieħu, nimirdu, u mmutu. Kif tistaʼ l-umanità tiġi salvata?—Rumani 3:23; 5:12.
4. Ġesù kien bniedem perfett eżatt bħal Adam. Kuntrarju għal Adam, iżda, Ġesù kien ubbidjenti lejn Alla b’mod perfett saħansitra taħt l-akbar prova. Hu għalhekk setaʼ jissagrifika l-ħajja umana u perfetta tiegħu biex iħallas għad-dnub t’Adam. Dan huwa dak li l-Bibbja tirreferi għalih bħala l-“prezz tal-fidwa.” Ulied Adam jistgħu b’hekk jiġu meħlusin mill-kundanna għall-mewt. Dawk kollha li jpoġġu l-fidi tagħhom f’Ġesù jistgħu jkollhom dnubiethom maħfurin u jirċievu l-ħajja taʼ dejjem.—1 Timotju 2:5, 6; Ġwann 3:16; Rumani 5:18, 19.
5. Meta kien fuq l-art Ġesù fejjaq lill-morda, temaʼ lil uħud bil-ġuħ, u kkalma l-maltemp. Saħansitra qajjem lill-mejtin. Għala wettaq il-mirakli? (1) Ħass ħniena għal nies li kienu qegħdin isofru, u ried jgħinhom. (2) Il-mirakli tiegħu taw prova li kien l-Iben t’Alla. (3) Urew x’se jagħmel għall-umanità ubbidjenti meta jaħkem bħala Sultan għal fuq l-art.—Mattew 14:14; Mark 2:10-12; Ġwann 5:28, 29.
6. Ġesù miet u ġie rxoxtat minn Alla bħala ħlejqa spirtu, u rritorna lejn is-sema. (1 Pietru 3:18) Minn dak inhar, Alla għamlu Sultan. Ġesù dalwaqt se jneħħi l-ħażen kollu u s-sofferenzi kollha minn fuq din l-art.—Salm 37:9-11; Proverbji 2:21, 22.
[Stampi f’paġna 7]
Il-ministeru taʼ Ġesù inkluda li jgħallem, li jwettaq il-mirakli, u saħansitra li joffri ħajtu għalina
