Lezzjoni Nru. 15

Ngħinu Lil Oħrajn Jagħmlu R-​Rieda T’Alla

Għala għandek tgħid lil oħrajn dwar dak li qiegħed titgħallem? (1)

Maʼ min tistaʼ taqsam l-​aħbar tajba? (2)

X’effett jistaʼ jkollha l-​kondotta tiegħek fuq ħaddieħor? (2)

Meta tistaʼ xxandar flimkien mal-​kongregazzjoni lokali? (3)

1. S’issa, int tgħallimt ħafna affarijiet tajbin mill-​Bibbja. Dan l-​għarfien għandu jwasslek biex tikkultiva personalità Kristjana. (Efesin 4:22-24) Għarfien bħal dan huwa essenzjali sabiex tikseb ħajja eterna. (Ġwann 17:3) Madankollu, oħrajn ukoll jeħtieġ jisimgħu l-​aħbar tajba biex huma wkoll jistgħu jiġu salvati. Il-​Kristjani veri kollha jridu jagħtu xiehda lil ħaddieħor. Huwa kmand t’Alla.—Rumani 10:10; 1 Korintin 9:16; 1 Timotju 4:16.

2. Tistaʼ tibda billi taqsam maʼ dawk qrib tiegħek l-​affarijiet tajbin li qiegħed titgħallem. Għidhom lil tal-​familja, lill-​ħbieb, lil sħabek taʼ l-​iskola, u lil sħabek tax-​xogħol. Kun qalbek tajba u paċenzjuż waqt li tagħmel dan. (2 Timotju 2:24, 25) Ftakar li n-​nies spiss jaraw il-​kondotta taʼ dak li jkun iktar milli jisimgħu dak li jgħid. Għalhekk il-​kondotta tajba tiegħek tistaʼ tattira lil oħrajn biex jagħtu kas il-​messaġġ li tgħidilhom.—Mattew 5:16; 1 Pietru 3:1, 2, 16.

3. Maż-​żmien, tistaʼ tikkwalifika biex tibda tippriedka mal-​kongregazzjoni lokali tax-​Xhieda taʼ Jehovah. Dan huwa pass importanti fil-​progress tiegħek. (Mattew 24:14) X’ferħ ikun dak jekk tkun kapaċi tgħin lil xi ħadd ieħor isir qaddej taʼ Jehovah u jikseb ħajja eterna!—1 Tessalonikin 2:19, 20.