1, 2. Għala huwa impossibbli li navviċinaw lil Ġeħova waħedna, u Ġesù Kristu x’għamel għalina f’dan ir-​rigward?

ĠIELI ntlift? Għandek mnejn tiftakar f’xi darba meta kont qed tivvjaġġa biex iżżur lil xi ħabib jew qarib u ma stajtx issib it-​triq. Hekk kif kont għaddej minn triq mhix familjari, waqaft int biex tistaqsi lil xi ħadd għad-​direzzjoni? Immaġina kif kont tħossok kieku minflok sempliċement jgħidlek minfejn għandek tgħaddi, individwu qalbu tajba jgħidlek: “Segwi lili. Se nieħdok jien.” Min jaf kemm isserraħ moħħok!

² Jista’ jingħad li Ġesù Kristu jagħmel xi ħaġa simili għalina. Mingħajr għajnuna huwa impossibbli li navviċinaw lil Alla. Minħabba li wirtet id-​dnub u l-​imperfezzjoni, id-​dinja taʼ l-​umanità hija mitlufa, ‘imbiegħda mill-​ħajja li ġejja minn Alla.’ (Efesin 4:17, 18) Għandna bżonn l-​għajnuna biex insibu d-​direzzjoni. Ġesù, ix-​Xempju tagħna li għandu qalbu tajba, ma joffrix biss pariri u direzzjonijiet; jagħmel iktar minn hekk. Bħalma rajna f’Kapitlu 1, Ġesù jistidinna, billi jgħid: “Ejja kun segwaċi tiegħi.” (Marku 10:21) Madankollu, jagħtina wkoll raġuni konvinċenti biex naċċettaw din l-​istedina. F’okkażjoni minnhom, Ġesù qal: “Jien it-​triq, il-​verità, u l-​ħajja. Ħadd ma jiġi għand il-​Missier ħlief permezz tiegħi.” (Ġwanni 14:6) Ejja niddiskutu xi raġunijiet għala nistgħu navviċinaw lill-​Missier permezz taʼ l-​Iben biss. Imbagħad b’dawn ir-​raġunijiet f’moħħna, se nikkunsidraw kif Ġesù tabilħaqq hu “t-​triq, il-​verità, u l-​ħajja.”

3. Għala navviċinaw lil Alla permezz taʼ Ġesù?

³ L-​ewwel u qabel kollox, aħna nistgħu navviċinaw lil Alla permezz taʼ Ġesù għaliex Ġeħova għażel li jagħti lil Ibnu l-​iktar irwol importanti. * Il-​Missier għamlu l-​persunaġġ prinċipali fit-​twettiq taʼ l-​iskopijiet kollha Tiegħu. (2 Korintin 1:20; Kolossin 1:18-​20) Sabiex nifhmu l-​irwol vitali taʼ l-​Iben, irridu nikkunsidraw dak li ġara fil-​ġnien taʼ l-​Għeden, fejn l-​ewwel koppja umana ngħaqdet maʼ Satana fl-​irvell kontra Ġeħova.—Ġenesi 2:16, 17; 3:1-​6.

4. Ir-​ribelljoni fl-​Għeden qajmet liema kwistjoni, u Ġeħova xi ddeċieda li jagħmel biex jirranġa l-​kwistjoni?

⁴ Ir-​ribelljoni fl-​Għeden qajmet kwistjoni taʼ importanza universali: Jaħkem Alla Ġeħova fuq il-​ħolqien tiegħu b’mod xieraq? Sabiex jirranġa din il-​kwistjoni vitali, Ġeħova ddetermina li iben spirtu perfett kellu jinżel fuq l-​art. Il-​missjoni li dan l-​iben kellu jwettaq kienet taʼ l-​akbar importanza—kellu joffri ħajtu biex jivvindika s-​sovranità taʼ Ġeħova u biex iservi bħala fidwa ħalli jsalva lill-​umanità. Billi jibqa’ leali sal-​mewt, l-​iben magħżul kien se jagħmilha possibbli li jitranġaw il-​problemi kollha li qamu minħabba r-​ribelljoni taʼ Satana. (Ebrej 2:14, 15; 1 Ġwanni 3:8) Imma Ġeħova kellu miljuni fuq miljuni taʼ wlied spirti perfetti. (Danjel 7:9, 10) Liema wieħed għażel biex iwettaq dan l-​inkarigu importanti ħafna? Ġeħova għażel lill-​“Iben uniġenitu tiegħu,” dak li iktar tard sar magħruf bħala Ġesù Kristu.—Ġwanni 3:16.

5, 6. Ġeħova kif wera li kellu fiduċja f’Ibnu, u din il-​fiduċja fuq xiex kienet ibbażata?

⁵ Għandna għalxiex nistagħġbu bl-​għażla taʼ Ġeħova?  Dażgur li le! Il-​Missier kellu fiduċja sħiħa fl-​Iben uniġenitu tiegħu. Sekli qabel il-​wasla taʼ Ibnu fuq l-​art, Ġeħova bassar li dan l-​Iben kien se jibqa’ leali minkejja li kien se jġarrab ħafna tbatijiet differenti. (Isaija 53:3-​7, 10-​12; Atti 8:32-​35) Ikkunsidra xi jfisser dan. L-​Iben, bħall-​ħlejjaq intelliġenti kollha, kellu l-​libertà taʼ l-​għażla, kapaċi jagħżel triqtu stess. Madankollu, Ġeħova tant kellu fiduċja fih li bassar il-​fedeltà taʼ Ibnu. Fuq xiex kienet ibbażata din il-​fiduċja? F’kelma waħda, għarfien. Ġeħova jaf lil Ibnu b’mod intimu u jaf kemm Ibnu jixtieq jogħġbu. (Ġwanni 8:29; 14:31) L-​Iben iħobb lil Missieru, u mill-​banda l-​oħra, Ġeħova jħobb lil Ibnu. (Ġwanni 3:35) L-​imħabba li l-​Missier u l-​Iben għandhom għal xulxin tifforma bejniethom rabta li tgħaqqad u fiduċja dejjiema.—Kolossin 3:14.

⁶ Mhix ħaġa taʼ l-​iskantament li nistgħu navviċinaw lil Alla permezz taʼ Ġesù biss meta nqisu l-​irwol importanti taʼ l-​Iben, il-​fiduċja li l-​Missier għandu fih, u l-​imħabba li tgħaqqad lill-​Missier u lill-​Iben flimkien. Madankollu, hemm raġuni oħra għala l-​Iben biss jista’ jwassalna għand il-​Missier.

7, 8. Ġesù għala seta’ jgħid b’mod korrett li ħadd ma jaf lill-​Missier għalkollox “ħlief l-​Iben”?

⁷ Irridu nilħqu ċerti ħtiġijiet biex inkunu nistgħu navviċinaw lil Ġeħova. (Salm 15:1-​5) Min jaf aħjar mill-​Iben x’hemm bżonn biex nilħqu l-​livelli t’Alla u biex ikollna l-​approvazzjoni Tiegħu? Ġesù qal: “Kollox ngħatali minn Missieri, u ħadd ma jaf għalkollox lill-​Iben ħlief il-​Missier, u lanqas ħadd ma jaf għalkollox lill-​Missier ħlief l-​Iben u kulmin l-​Iben lest li jirrivelahulu.” (Mattew 11:27) Ejja naraw għala Ġesù seta’ jgħid, b’mod korrett u mingħajr  esaġerazzjoni, li ħadd ma jaf lill-​Missier għalkollox “ħlief l-​Iben.”

⁸ Bħala “l-​ewwel imwieled mill-​ħolqien kollu,” l-​Iben għandu intimità unika maʼ Ġeħova. (Kolossin 1:15) Immaġina r-​relazzjoni mill-​qrib li żviluppat bejn il-​Missier u l-​Iben matul perijodu taʼ żmien bla qjies meta huma biss kienu jeżistu—mill-​bidu tal-​ħolqien sakemm inħolqu ħlejjaq spirti oħrajn. (Ġwanni 1:3; Kolossin 1:16, 17) Aħseb ftit dwar l-​opportunità prezzjuża li kellu l-​Iben meta kien maʼ Missieru, billi tgħallem kif jaħsibha Missieru u dwar ir-​rieda, il-​livelli, u t-​triqat Tiegħu. Bl-​ebda mod m’hi esaġerazzjoni jekk wieħed jgħid li Ġesù jaf lill-​Missier aħjar minn kwalunkwe persuna oħra. Din ir-​relazzjoni mill-​qrib żgur għamlet lil Ġesù kapaċi jirrivela lil Missieru b’modi li ħadd iktar ma seta’.

9, 10. (a) Ġesù kif irrivelah lil Missieru? (b) Sabiex ikollna l-​approvazzjoni taʼ Ġeħova, xi rridu nagħmlu?

⁹ It-​tagħlim taʼ Ġesù wera kemm hu kien konxju taʼ kif jaħseb u jħoss Ġeħova u taʼ dak li Hu jirrikjedi mill-​aduraturi Tiegħu. * Ġesù rrivela lil Missieru saħansitra b’mod profond ieħor. Ġesù qal: “Min ra lili ra wkoll lill-​Missier.” (Ġwanni 14:9) Ġesù imita lil Missieru b’mod perfett f’dak kollu li qal u għamel. Għalhekk, meta naqraw fil-​Bibbja dwar Ġesù—il-​kliem qawwi u ħelu li uża fit-​tagħlim tiegħu, il-​mogħdrija li qanqlitu biex ifejjaq lil oħrajn, u l-​empatija li qanqlitu biex jibki—aħna nistgħu nimmaġinaw lil Ġeħova jgħid u jagħmel dawn l-​istess affarijiet. (Mattew 7:28, 29; Marku 1:40-​42; Ġwanni 11:32-​36) It-​triqat u r-​rieda tal-​Missier jintwerew b’mod perfett fil-​kliem u fl-​azzjonijiet taʼ l-​Iben. (Ġwanni 5:19; 8:28; 12:49, 50) B’hekk, sabiex ikollna l-​approvazzjoni taʼ Ġeħova, irridu nagħtu widen  għat-​tagħlim taʼ Ġesù u nsegwu l-​eżempju tiegħu.—Ġwanni 14:23.

¹⁰ Ladarba Ġesù jaf lil Ġeħova b’mod intimu u jimitah b’mod perfett, ma nistagħġbux li Ġeħova ddetermina li l-​Iben hu l-​mezz li bih nistgħu navviċinaw lill-​Missier. B’dan il-​pedament, jiġifieri, bil-​fehma għala nistgħu navviċinaw lil Ġeħova permezz taʼ Ġesù biss, ejja issa niddiskutu t-​tifsir tal-​kliem taʼ Ġesù: “Jien it-​triq, il-​verità, u l-​ħajja. Ħadd ma jiġi għand il-​Missier ħlief permezz tiegħi.”—Ġwanni 14:6.

11. (a) Għala nistgħu nidħlu f’relazzjoni approvata m’Alla permezz taʼ Ġesù biss? (b) Il-​kliem imniżżel fi Ġwanni 14:6 kif jenfasizza l-​pożizzjoni unika taʼ Ġesù? (Ara n-​nota taʼ taħt.)

¹¹ Diġà tgħallimna li l-​uniku mod kif navviċinaw lil Alla hu permezz taʼ Ġesù. Ikkunsidra, b’mod iktar speċifiku, xi jfisser dan għalina. Ġesù hu “t-​triq” fis-​sens li permezz tiegħu biss nistgħu nidħlu f’relazzjoni approvata m’Alla. Dan għala huwa minnu? Minħabba li baqa’ leali sal-​mewt, Ġesù ta ħajtu bħala sagrifiċċju taʼ fidwa. (Mattew 20:28) Mingħajr dan il-​provvediment tal-​fidwa, ikun impossibbli għalina biex navviċinaw lil Alla. Id-​dnub joħloq tfixkil bejn il-​bnedmin u Alla, għaliex Ġeħova hu qaddis, u għalhekk qatt ma jista’ japprova d-​dnub. (Isaija 6:3; 59:2) Imma s-​sagrifiċċju taʼ Ġesù neħħa dan it-​tfixkil; ipprovda t-​tpattija xierqa għad-​dnub. (Ebrej 10:12; 1 Ġwanni 1:7) Jekk naċċettaw il-​provvediment t’Alla permezz taʼ Kristu u npoġġu fidi fih, jista’ jkollna l-​approvazzjoni taʼ Ġeħova. Jidher ċar li m’hemmx mod ieħor kif ‘nitħabbu m’Alla.’ *—Rumani 5:6-​11.

12. Ġesù b’liema modi hu “t-​triq”?

 ¹² Ġesù hu “t-​triq” b’konnessjoni mat-​talb. Permezz taʼ Ġesù biss nistgħu mmorru għand Ġeħova bit-​talb bl-​assiguranza li l-​petizzjonijiet tagħna mill-​qalb se jinstemgħu b’mod favorevoli. (1 Ġwanni 5:13, 14) Ġesù nnifsu qal: “Jekk titolbu xi ħaġa lill-​Missier f’ismi, jagħtihielkom. . . . Itolbu u taqilgħu, biex il-​ferħ tagħkom jintgħamel sħiħ.” (Ġwanni 16:23, 24) Bix-​xieraq, f’isem Ġesù, nistgħu navviċinaw lil Ġeħova bit-​talb u nsejħulu “Missierna.” (Mattew 6:9) Ġesù hu “t-​triq” b’mod ieħor—bl-​eżempju tiegħu. Bħalma ssemma qabel, Ġesù imita lil Missieru b’mod perfett. B’hekk, l-​eżempju taʼ Ġesù jurina kif ngħixu b’tali mod li nogħġbu lil Ġeħova. Għalhekk, sabiex navviċinaw lil Ġeħova, irridu nimxu wara l-​passi taʼ Ġesù.—1 Pietru 2:21.

13, 14. (a) Ġesù kif wera l-​verità permezz taʼ kliemu? (b) Sabiex Ġesù jkun “il-​verità,” x’kellu jagħmel, u għala?

¹³ Ġesù dejjem tkellem il-​verità dwar il-​kelma profetika taʼ Missieru. (Ġwanni 8:40, 45, 46) Ebda qerq ma qatt instab f’fomm Ġesù. (1 Pietru 2:22) Saħansitra anki l-​opponenti tiegħu għarfu li hu għallem “it-​triq t’Alla fi qbil mal-​verità.” (Marku 12:13, 14) Madankollu, meta Ġesù qal “jien . . . il-​verità,” ma kienx sempliċement qed jirreferi għall-​fatt li hu għamel il-​verità magħrufa permezz tal-​kliem, l-​ippridkar, u t-​tagħlim tiegħu. Huwa meħtieġ iktar—ħafna iktar—mill-​kliem.

¹⁴ Ftakar li sekli qabel, Ġeħova kien ispira lill-​kittieba tal-​Bibbja biex iniżżlu bil-​miktub ħafna profeziji dwar il-​Messija, jew Kristu. Dawn il-​profeziji bassru dettalji dwar il-​ħajja, il-​ministeru, u l-​mewt tiegħu. Barra minn hekk, il-​Liġi Mosajka kien fiha dellijiet profetiċi li ppontaw lejn il-​Messija. (Ebrej 10:1) Kien Ġesù se juri l-​fedeltà tiegħu sal-​ mewt, u b’hekk iwettaq l-​affarijiet kollha profetizzati dwaru? F’dak il-​waqt biss Ġeħova kien se jiġi vindikat bħala l-​Alla tal-​profezija vera. Ġesù kellu din ir-​responsabbiltà kbira fuq spallejh. Bil-​mod taʼ kif għex—kull kelma li qal u kull għemil li wettaq—Ġesù ta prova li d-​dellijiet profetiċi kienu tabilħaqq veri. (2 Korintin 1:20) B’hekk, Ġesù kien “il-​verità.” Kien “il-​verità” fis-​sens li l-​kelma profetika taʼ Ġeħova twettqet bil-​wasla taʼ Ġesù.—Ġwanni 1:17; Kolossin 2:16, 17.

15. Xi jfisser li neżerċitaw fidi fl-​Iben, u dan għal xiex jista’ jwassal?

¹⁵ Ġesù huwa “l-​ħajja,” għaliex huwa biss permezz tiegħu li nistgħu nirċievu l-​ħajja—jiġifieri, “il-​ħajja vera.” (1 Timotju 6:19) Il-​Bibbja tgħid: “Min jeżerċita l-​fidi fl-​Iben għandu l-​ħajja taʼ dejjem; min ma jobdix lill-​Iben ma jarax il-​ħajja, imma l-​korla t’Alla tibqa’ fuqu.” (Ġwanni 3:36) Xi jfisser li teżerċita fidi fl-​Iben t’Alla? Ifisser li aħna nkunu konvinti li mingħajru ma nistgħux niksbu l-​ħajja. Iktar minn hekk, ifisser li nuru l-​fidi tagħna b’għemejjel, inkomplu nitgħallmu minn Ġesù, u nagħmlu l-​almu tagħna biex insegwu t-​tagħlim u l-​eżempju tiegħu. (Ġakbu 2:26) B’hekk, jekk neżerċitaw fidi fl-​Iben t’Alla se niksbu l-​ħajja taʼ dejjem—ħajja immortali bħala spirti fis-​sema għal “merħla żgħira” taʼ Kristjani midlukin bl-​ispirtu, u ħajja umana perfetta f’ġenna taʼ l-​art għal “folla kbira” taʼ “nagħaġ oħrajn.”—Luqa 12:32; 23:43; Rivelazzjoni 7:9-​17; Ġwanni 10:16.

16, 17. (a) Ġesù kif se juri li hu “l-​ħajja” saħansitra għal dawk li mietu? (b) Liema fiduċja jista’ jkollna?

¹⁶ Xi ngħidu għal dawk li diġà mietu? Ġesù hu “l-​ħajja” għalihom ukoll. Ftit qabel ma rxoxta mill-​mewt lill-​ħabib tiegħu Lazzru, Ġesù qal lil Marta, oħt Lazzru: “Jien l-​irxoxt u l-​ħajja. Min jeżerċita l-​fidi fija, avolja jmut, se jieħu  l-​ħajja.” (Ġwanni 11:25) Ġeħova fada lil Ibnu bl-​“imfietaħ tal-​mewt u tal-​Qabar,” billi tah il-​qawwa li jirxoxta lin-​nies. (Rivelazzjoni 1:17, 18) B’dawn l-​imfietaħ, Ġesù glorifikat se jiftaħ il-​bibien tal-​Qabar, u b’hekk jeħles lil dawk kollha li qed jinżammu fih.—Ġwanni 5:28, 29.

¹⁷ “Jien it-​triq, il-​verità, u l-​ħajja”—b’din l-​istqarrija sempliċi, Ġesù ġabar fil-​qosor il-​mira tal-​ħajja u l-​ministeru tiegħu fuq l-​art. Dan il-​kliem hu mimli tifsir għalina llum. Ftakar li Ġesù kompla din l-​istqarrija billi qal: “Ħadd ma jiġi għand il-​Missier ħlief permezz tiegħi.” (Ġwanni 14:6) Il-​kliem taʼ Ġesù għadu japplika llum daqskemm kien meta qalu. Għalhekk, jista’ jkollna fiduċja sħiħa li jekk insegwu lil Ġesù, qatt ma se nintilfu. Hu, u hu biss, se jurina t-​triq li twassal “għand il-​Missier.”

18. X’jinvolvi li nkunu segwaċi veri taʼ Ġesù?

¹⁸ Meta tqis l-​irwol vitali taʼ Ġesù u l-​għarfien intimu li għandu tal-​Missier, għandna raġuni tajba biex insegwu lill-​Iben. Bħalma rajna fil-​kapitlu taʼ qabel, li nkunu segwaċi veri taʼ Ġesù jinvolvi azzjonijiet, mhux biss kliem jew sentimenti. Sabiex insegwu lil Kristu rridu nimitaw it-​tagħlim u l-​eżempju tiegħu. (Ġwanni 13:15) L-​għajnuna għall-​istudju li qed taqra issa tista’ tgħinek tagħmel dan.

19, 20. Din l-​għajnuna għall-​istudju x’fiha li jista’ jgħinek fl-​isforzi tiegħek biex issegwi lil Kristu?

¹⁹ Fil-​kapitli li ġejjin, se nistudjaw bir-​reqqa l-​ħajja u l-​ministeru taʼ Ġesù. Dawn il-​kapitli huma mqassmin fi tliet sezzjonijiet. L-​ewwel, se nagħtu ħarsa ġenerali lejn il-​kwalitajiet tiegħu u l-​mod kif kien jagħmel l-​affarijiet. It-​tieni, se neżaminaw l-​eżempju żeluż tiegħu fl-​ippridkar u fit-​tagħlim. It-​tielet, se nikkunsidraw kif wera l-​imħabba tiegħu. Minn Kapitlu 3 ’l quddiem insibu kaxxa tat-​tagħlim intitolata  “Int Kif Tista’ Ssegwi lil Ġesù?” L-​iskritturi u l-​mistoqsijiet misjubin fiha huma magħmulin b’tali mod li jgħinuna nimmeditaw fuq kif nistgħu nimitaw lil Ġesù bil-​kliem u bl-​għemil.

²⁰ Bl-​għajnuna t’Alla Ġeħova, int m’għandekx għalfejn tħossok mitluf, imbiegħed minnu minħabba li writt id-​dnub. Minkejja li swielu ħafna, Ġeħova bi mħabba bagħat lil Ibnu biex jurina t-​triq ħalli nidħlu f’relazzjoni approvata m’Alla. (1 Ġwanni 4:9, 10) Jalla tħossok imqanqal, iva, imħeġġeġ, biex twieġeb għal din l-​imħabba kbira billi taċċetta u taġixxi fi qbil maʼ l-​istedina taʼ Ġesù: “Kun segwaċi tiegħi.”—Ġwanni 1:43.