1-4. (a) Ġesù kif jgħallem lil waħda mara Samaritana bis-​sengħa, u b’liema riżultat? (b) L-​appostli tiegħu kif jirreaġixxu?

ILHOM mexjin sigħat sħaħ. Ġesù u l-​appostli tiegħu qed jivvjaġġaw lejn it-​tramuntana, mexjin mil-​Lhudija lejn il-​Galilija. L-​iqsar rotta—vjaġġ taʼ madwar tlett ijiem—tgħaddihom mis-​Samarija. Hekk kif ix-​xemx tkun fl-​eqqel tagħha, huma javviċinaw belt żgħira jisimha Sikar, fejn jieqfu għal ftit mistrieħ.

² Sakemm l-​appostli tiegħu jmorru jixtru l-​ikel, Ġesù jistrieħ ħdejn bir ’il barra mill-​belt. Waħda mara tersaq viċin biex ittella’ l-​ilma. Ġesù jista’ jiddeċiedi li ma jagħtix kasha. Hu “għajjien mill-​vjaġġ.” (Ġwanni 4:6) Kien ikun raġunevoli kieku sempliċement għalaq għajnejh u ħalla lil din il-​mara Samaritana tiġi u titlaq mingħajr ma jagħti kas. Bħalma rajna f’Kapitlu 4 taʼ dan il-​ktieb, il-​mara x’aktarx tistenna li kwalunkwe Lhudi se jittrattaha b’disprezz. Madankollu, Ġesù jaqbad ikellimha.

³ Jibda b’tixbiha meħuda mill-​ħajja taʼ kuljum taʼ din il-​mara—tabilħaqq, waħda li għandha x’taqsam maʼ dak li qed tagħmel f’dan il-​mument stess. Qiegħda hawn biex ittella’ l-​ilma; Ġesù jitkellem dwar ilma li jagħti l-​ħajja u li jista’ jissodisfa l-​għatx spiritwali tagħha. Diversi drabi, hi tqajjem punti li jistgħu jwasslu għal argumenti. * Ġesù  b’tattika jevita dawn il-​kwistjonijiet u jibqa’ jitkellem dwar is-​suġġett li għandu f’moħħu. Hu jiffoka fuq kwistjonijiet spiritwali—il-​qima pura u Alla Ġeħova. Il-​kliem tiegħu ma jeffettwax lil din il-​mara biss, għax hi tirrakkontah lin-​nies tal-​belt, u huma wkoll jixtiequ jisimgħu lil Ġesù.—Ġwanni 4:3-​42.

⁴ X’ħin jirritornaw, l-​appostli kif iħossuhom dwar ix-​xiehda rimarkevoli li Ġesù qed jagħti hawnhekk? M’hemm ebda indikazzjoni t’entużjażmu min-​naħa tagħhom. Huma mbellhin li Ġesù saħansitra qed ikellem lil din il-​mara, u milli jidher ma jgħidulha xejn. Wara li titlaq, huma jibqgħu jħeġġu lil Ġesù biex jiekol l-​ikel li ġabu. Madankollu, Ġesù jgħidilhom: “Għandi ikel x’niekol li ma tafux bih.” Imħawdin, għall-​ewwel jieħdu kliemu b’mod letterali. Imbagħad jispjega: “L-​ikel tiegħi hu li nagħmel ir-​rieda taʼ dak li bagħatni u li ntemm xogħlu.” (Ġwanni 4:32, 34) Ġesù b’hekk jgħallimhom li x-​xogħol prinċipali tiegħu fil-​ħajja huwa iktar importanti għalih milli jiekol. Hu jrid li huma jħossuhom bl-​istess mod dwar dan. X’inhu dan ix-​xogħol?

5. X’kien ix-​xogħol li Ġesù ddedika ħajtu għalih, u x’se nikkunsidraw f’dan il-​kapitlu?

⁵ Ġesù darba qal: ‘Irrid inxandar l-​aħbar tajba tas-​saltna t’Alla, għax għal dan intbgħatt.’ (Luqa 4:43) Iva, Ġesù ntbagħat biex jippriedka u jgħallem l-​aħbar tajba tas-​Saltna t’Alla. * Is-​segwaċi taʼ Ġesù llum għandhom l-​istess xogħol x’jagħmlu. Għalhekk, huwa vitali li nikkunsidraw għala Ġesù ppriedka, dak li ppriedka, u x’attitudni kellu lejn l-​inkarigu tiegħu.

6, 7. Ġesù kif ried lil “kulmin jgħallem fil-​pubbliku” jħossu dwar li jaqsam l-​aħbar tajba m’oħrajn? Agħti tixbiha.

⁶ Ejja nikkunsidraw kif Ġesù ħassu dwar il-​veritajiet li għallem; imbagħad se niddiskutu l-​attitudni tiegħu lejn in-​nies li għallem. Ġesù uża tixbiha ħajja biex juri kif ħassu dwar li jaqsam m’oħrajn il-​veritajiet li Ġeħova kien għallmu. Hu qal: “Kulmin jgħallem fil-​pubbliku, meta jitgħallem dwar is-​saltna tas-​smewwiet, hu bħal raġel, sid taʼ dar, li joħroġ mit-​teżor maħżun tiegħu affarijiet ġodda u qodma.” (Mattew 13:52) Sid id-​dar f’din it-​tixbiha għala joħroġ affarijiet mit-​teżor maħżun tiegħu?

⁷ Sid id-​dar m’huwiex sempliċement qed jiffanfra bil-​ġid tiegħu, kif darba għamel is-​Sultan Ħeżekija tal-​qedem—b’konsegwenzi taʼ wġigħ. (2 Slaten 20:13-​20) Xi jqanqal lil sid id-​dar? Ikkunsidra tixbiha: Int tmur iżżur għalliem favorit tiegħek f’daru. Hu jiftaħ kexxun taʼ l-​iskrivanija u joħroġ żewġ ittri—waħda sfaret biż-​żmien u l-​oħra iktar ġdida. Huma ittri li hu rċieva mingħand missieru—waħda minnhom għaxriet taʼ snin ilu meta l-​għalliem kien għadu tifel, l-​oħra m’ilhiex daqshekk. Għajnejh ileqqu bil-​ferħ hekk kif jgħidlek kemm jgħożż dawn l-​ittri u kif il-​pariri li fihom biddlulu ħajtu u jistgħu jkunu t’għajnuna għalik. Jidher ċar li l-​għalliem jgħożż dawn l-​ittri u għandhom post għażiż f’qalbu. (Luqa 6:45) Hu ma jurikx dawn l-​ittri biex jiftaħar jew biex jiggwadanja b’xi mod, imma biex int tibbenefika u tara kemm huma taʼ valur.

8. Għala għandna raġuni valida biex inħossu li l-​veritajiet li nitgħallmu mill-​Kelma t’Alla huma teżori?

⁸ L-​Għalliem il-​Kbir, Ġesù, kellu motivi simili meta qasam il-​veritajiet t’Alla m’oħrajn. Għalih, dawn il-​veritajiet kienu teżor imprezzabbli. Hu ħabbhom, u kien ħerqan li jaqsamhom m’oħrajn. Hu ried li s-​segwaċi kollha tiegħu, “kulmin jgħallem fil-​pubbliku,” iħossuhom b’dan il-​mod. Hekk inħossuna?  Aħna għandna raġuni valida biex inħobbu kull verità li nitgħallmu mill-​Kelma t’Alla. Ngħożżu kliem prezzjuż taʼ verità kemm jekk hu twemmin li ilna ngħożżuh u kemm jekk hu rfinar ġdid. Billi nitkellmu b’entużjażmu mill-​qalb u nżommu l-​imħabba tagħna għal dak li Ġeħova għallimna, aħna nkunu qed nuru din l-​imħabba, kif għamel Ġesù.

9. (a) Ġesù kif ħassu dwar in-​nies li għallem? (b) Kif nistgħu nimitaw l-​attitudni taʼ Ġesù lejn in-​nies?

⁹ Ġesù ħabb ukoll lin-​nies li għallem, kif se niddiskutu f’iktar dettall fit-​Tielet Sezzjoni. Kien profetizzat li l-​Messija kellu “jiddispjaċih għall-​batut u għall-​fqir.” (Salm 72:13) Tabilħaqq, Ġesù interessah min-​nies. Hu kien interessat mill-​ħsibijiet u l-​attitudnijiet li influwenzawhom; hu kien konċernat dwar it-​tagħbijiet li taqqluhom u l-​ostakli li fixkluhom milli jaqbdu qabda soda mal-​verità. (Mattew 11:28; 16:13; 23:13, 15) Per eżempju, ftakar fil-​mara Samaritana. Bla dubju kienet impressjonata ħafna li Ġesù wera interess fiha. Id-​dehen tiegħu dwar is-​sitwazzjoni persunali tagħha qanqalha biex taċċettah bħala profeta u biex tgħid lil oħrajn dwaru. (Ġwanni 4:16-​19, 39) M’għandniex xi ngħidu, is-​segwaċi taʼ Ġesù llum ma jistgħux jaqraw il-​qalb tan-​nies li lilhom jippridkaw. Madankollu, nistgħu nuru interess fin-​nies, bħalma għamel Ġesù; nistgħu nuru li jinteressana minnhom; u nistgħu nadattaw kliemna biex nissodisfaw l-​interessi, l-​isfidi, u l-​bżonnijiet partikulari tagħhom.

10, 11. (a) Xi ppriedka Ġesù? (b) Għala kien hemm il-​bżonn għas-​Saltna t’Alla?

¹⁰ Xi ppriedka Ġesù? Li kieku kellek tfittex it-​tweġiba billi teżamina t-​tagħlim taʼ ħafna knejjes li jistqarru li jirrappreżentawh, għandek mnejn kont tikkonkludi li hu applika  prinċipji Kristjani għal problemi soċjali. Jew forsi kont tieħu l-​impressjoni li hu appoġġa riforma politika jew li s-​salvazzjoni persunali kienet l-​iktar ħaġa importanti. Madankollu, bħalma nnotajna qabel, Ġesù b’mod ċar qal: “Irrid inxandar l-​aħbar tajba tas-​saltna t’Alla.” Dan x’kien jinvolvi eżattament?

¹¹ Ftakar, Ġesù kien preżenti fis-​sema meta Satana sfida għall-​ewwel darba d-​dritt tas-​sovranità taʼ Ġeħova. Min jaf kemm ħassu mweġġa’ Ġesù li jara lil Missieru tant ġust jiġi malafamat u akkużat li kien Ħakkiem inġust u li ma jagħtix affarijiet tajbin lill-​ħlejjaq Tiegħu! Min jaf kemm ħassu mweġġa’ l-​Iben t’Alla meta Adam u Eva, il-​ġenituri futuri taʼ l-​umanità, taw kas il-​malafama taʼ Satana! L-​Iben ra li l-​familja umana kienet infettata bid-​dnub u l-​mewt minħabba din ir-​ribelljoni. (Rumani 5:12) Però, min jaf kemm ħassu ferħan meta sema’ li xi darba Missieru kellu jirranġa l-​affarijiet!

12, 13. Is-​Saltna t’Alla se tirranġa liema inġustizzji, u Ġesù kif ta importanza lis-​Saltna fil-​ministeru tiegħu?

¹² X’kienet l-​iktar ħaġa importanti li kellha tiġi rranġata? L-​isem qaddis taʼ Ġeħova kellu jitqaddes, jitnaddaf minn kull traċċa taʼ tmaqdir li Satana u dawk kollha li ngħaqdu miegħu ġabu fuqu. Id-​dritt tas-​sovranità taʼ Ġeħova, il-​mod tiegħu kif jaħkem, kellu jiġi vindikat. Aħjar minn kwalunkwe bniedem ieħor, Ġesù fehem dawn il-​kwistjonijiet vitali. Fit-​talba mudell, hu għallem lis-​segwaċi tiegħu biex l-​ewwel jitolbu għat-​taqdis taʼ isem Missieru, imbagħad biex tiġi s-​Saltna taʼ Missieru, u mbagħad biex tintgħamel ir-​rieda t’Alla fuq l-​art. (Mattew 6:9, 10) Is-​Saltna t’Alla, bi Kristu Ġesù bħala l-​Ħakkiem tagħha, dalwaqt se teħles l-​art mis-​sistema korrotta taʼ Satana u tikkonferma l-​ħakma ġusta taʼ Ġeħova darba għal dejjem.—Danjel 2:44.

 ¹³ Din is-​Saltna kienet it-​tema tal-​ministeru taʼ Ġesù. Il-​kliem kollu tiegħu u l-​azzjonijiet kollha tiegħu għenu biex jiċċaraw x’inhi s-​Saltna u kif se twettaq l-​iskop taʼ Ġeħova. Ġesù ma ħalla xejn itellfu mill-​iskop tiegħu li jippriedka l-​aħbar tajba tas-​Saltna t’Alla. Fi żmienu, kien hemm kwistjonijiet soċjali importanti, inġustizzji bla għadd, però hu kien iffokat fuq il-​messaġġ u x-​xogħol tiegħu. Il-​fatt li baqa’ ffokat ifisser li Ġesù ma kienx flessibbli fil-​ħarsa tiegħu, mhux sensibbli u ripetittiv fil-​metodu tiegħu? ’Il bogħod minn hekk!

14, 15. (a) Ġesù kif wera li kien “xi ħadd akbar minn Salamun”? (b) Kif nistgħu nimitaw lil Ġesù f’dak li nippridkaw?

¹⁴ Bħalma se naraw f’din is-​sezzjoni, Ġesù għamel it-​tagħlim tiegħu interessanti u varjat. Hu tkellem bl-​iskop li jilħaq qalb in-​nies. Forsi niftakru fis-​sultan għaref Salamun, li fittex kliem pjaċevoli, kliem korrett u veru, biex iwassal il-​ħsibijiet li Ġeħova ispirah jikteb. (Ekkleżjasti 12:10) Ġeħova ta lil dan ir-​raġel imperfett “qalb mimlija dehen,” li għenitu jitkellem dwar ħafna affarijiet, minn għasafar sa ħut, siġar, u annimali. In-​nies ġew mill-​bogħod biex jisimgħu lil Salamun jitkellem. (1 Slaten 4:29-​34) Però, Ġesù kien “xi ħadd akbar minn Salamun.” (Mattew 12:42) Hu kien ħafna iktar għaref, b’“qalb mimlija [ħafna iktar] dehen.” Meta kien jgħallem lin-​nies, Ġesù kien juża l-​għarfien superjuri tiegħu tal-​Kelma t’Alla kif ukoll taʼ l-​għasafar, l-​annimali, il-​ħut, l-​agrikultura, it-​temp, il-​ġrajjiet kurrenti, l-​istorja, u l-​kundizzjonijiet soċjali. Fl-​istess ħin, Ġesù qatt ma ffanfra bl-​għarfien li kellu sabiex jimpressjona lil oħrajn. Hu żamm il-​messaġġ tiegħu sempliċi u ċar. Mhux taʼ b’xejn li n-​nies tgħaxxqu jisimgħuh jitkellem!—Marku 12:37; Luqa 19:48.

¹⁵ Il-​Kristjani llum jipprovaw isegwu l-​eżempju taʼ Ġesù. Aħna m’għandniex l-​għerf u l-​għarfien profond tiegħu,  imma lkoll kemm aħna għandna ammont t’għarfien u esperjenza li nistgħu nużaw meta naqsmu m’oħrajn il-​veritajiet tal-​Kelma t’Alla. Per eżempju, il-​ġenituri jistgħu jużaw l-​esperjenza tagħhom tat-​trobbija tat-​tfal biex jagħtu tixbiha dwar l-​imħabba taʼ Ġeħova għal uliedu. Oħrajn jistgħu jużaw eżempji jew tixbihat meħudin mix-​xogħol sekulari, l-​iskola, jew l-​għarfien tagħhom dwar in-​nies u ġrajjiet kurrenti. Fl-​istess ħin, aħna attenti li nżommu l-​attenzjoni fuq il-​messaġġ li nagħtu—l-​aħbar tajba tas-​Saltna t’Alla.—1 Timotju 4:16.

16, 17. (a) Liema attitudni kellu Ġesù lejn il-​ministeru tiegħu? (b) Ġesù kif wera li l-​ministeru tiegħu kien l-​iktar ħaġa importanti f’ħajtu?

¹⁶ Ġesù ħass li l-​ministeru tiegħu kien teżor prezzjuż. Hu tgħaxxaq jgħin lin-​nies jaraw lil Missieru tas-​sema bħalma Hu tassew u mhux bħala xi ħadd misterjuż minħabba d-​duttrini u t-​tradizzjonijiet li għamlu l-​bnedmin. Ġesù kien iħobb jgħin lin-​nies jiksbu relazzjoni approvata maʼ Ġeħova u t-​tama taʼ ħajja taʼ dejjem. Hu kien jitgħaxxaq iġib il-​faraġ u l-​ferħ taʼ l-​aħbar tajba lin-​nies. Kif wera li kellu dawn is-​sentimenti? Ikkunsidra tliet modi.

¹⁷ L-​ewwel, Ġesù għamel il-​ministeru l-​iktar ħaġa importanti f’ħajtu. Li jitkellem dwar is-​Saltna kien il-​karriera, ix-​xogħol taʼ ħajtu, l-​interess ewlieni tiegħu. Huwa għalhekk, bħalma semmejna f’Kapitlu 5, li Ġesù b’mod għaqli żamm ħajtu sempliċi. Hekk kif ta pariri lil oħrajn, hu żamm għajnejh iffokati fuq l-​iktar ħaġa importanti. Hu m’aljenax ruħu b’ħafna affarijiet li kien ikollu jħallas għalihom, jieħu ħsieb, u jsewwi jew ibiddel maż-​żmien. Hu għex ħajja sempliċi sabiex xejn ma jaljenah bla bżonn mill-​ministeru tiegħu.—Mattew 6:22; 8:20.

18. Ġesù b’liema modi wettaq il-​ministeru tiegħu b’ruħu u b’ġismu?

 ¹⁸ It-​tieni, Ġesù wettaq il-​ministeru tiegħu b’ruħu u b’ġismu. Hu ddedika enerġija kbira għalih, letteralment mexa mijiet taʼ kilometri fil-​Palestina, ifittex nies maʼ min jista’ jaqsam l-​aħbar tajba. Hu kellimhom fi djarhom, fil-​pjazez, fis-​swieq, u fil-​beraħ. Hu kellimhom anki meta kellu bżonn il-​mistrieħ, l-​ikel, l-​ilma, jew ftit ħin għall-​kwiet mal-​ħbieb intimi tiegħu. Anki meta kien qed imut, hu kompla jaqsam m’oħrajn l-​aħbar tajba tas-​Saltna t’Alla!—Luqa 23:39-​43.

19, 20. Ġesù kif ta tixbiha dwar l-​urġenza tax-​xogħol taʼ l-​ippridkar?

¹⁹ It-​tielet, Ġesù ttratta l-​ministeru bħala xi ħaġa urġenti. Ftakar fil-​konversazzjoni tiegħu mal-​mara Samaritana ħdejn il-​bir ’il barra minn Sikar. L-​appostli taʼ Ġesù milli jidher ma rawx f’din is-​sitwazzjoni bżonn urġenti biex jaqsmu m’oħrajn l-​aħbar tajba. Ġesù qalilhom: “Ma tgħidux li għad baqa’ erba’ xhur għall-​ħsad? Ara! Ngħidilkom: Erfgħu għajnejkom u ħarsu lejn l-​għelieqi, kif inhuma bojod għall-​ħsad.”—Ġwanni 4:35.

²⁰ Ġesù ġab din it-​tixbiha mill-​istaġun kurrenti. Milli jidher kien ix-​xahar taʼ Ċislev (Novembru/Diċembru). Il-​ħsad tax-​xgħir kien fadallu erba’ xhur, madwar iż-​żmien tal-​Qbiż, fl-​14 taʼ Nisan. Għalhekk, il-​bdiewa ma ħassewx urġenza għall-​ħsad f’dak il-​waqt. Kien fadallu ħafna żmien. Imma xi ngħidu dwar il-​ħsad tan-​nies? Iva, ħafna kienu lesti li jisimgħu, li jitgħallmu, li jsiru dixxipli taʼ Kristu u li jiksbu t-​tama meraviljuża li Ġeħova poġġa quddiemhom. Kien bħallikieku Ġesù seta’ jħares lejn dawk l-​għelieqi figurattivi u jara li kienu bojod bil-​qamħ misjur jixxejjer maż-​żiffa, u b’hekk juru li huma lesti għall-​ħsad. * Iż-​żmien kien wasal, u x-​xogħol kien urġenti! B’konsegwenza t’hekk,  meta n-​nies minn belt waħda riedu jżommu lil Ġesù magħhom, hu wieġeb: “Irrid inxandar l-​aħbar tajba tas-​saltna t’Alla lil bliet oħrajn ukoll, għax għal dan intbgħatt.”—Luqa 4:43.

21. Kif nistgħu nimitaw lil Ġesù?

²¹ Fit-​tliet modi li għadna kif iddiskutejna, nistgħu nimitaw lil Ġesù. Nistgħu nagħmlu l-​ministeru Kristjan l-​iktar ħaġa importanti f’ħajjitna. Għalkemm forsi għandna obbligi fil-​familja jew sekulari, nistgħu nuru li l-​ministeru tagħna jiġi l-​ewwel billi jkollna sehem żeluż u regulari fih, bħalma kellu Ġesù. (Mattew 6:33; 1 Timotju 5:8) Nistgħu nwettqu l-​ministeru b’ruħna u b’ġisimna, nagħtu mill-​ħin, l-​enerġija, u r-​riżorsi tagħna b’mod ġeneruż biex nappoġġawh. (Luqa 13:24) U nistgħu dejjem inżommu f’moħħna li x-​xogħol tagħna hu urġenti. (2 Timotju 4:2) Irridu naħtfu kull opportunità biex nippridkaw!

22. X’se jiġi kunsidrat fil-​kapitlu li jmiss?

²² Ġesù wera wkoll li ra l-​importanza tax-​xogħol billi aċċerta ruħu li kien se jitkompla wara mewtu. Hu inkariga lis-​segwaċi tiegħu biex ikomplu fix-​xogħol taʼ l-​ippridkar u t-​tagħlim. Dan l-​inkarigu se jkun is-​suġġett tal-​kapitlu li jmiss.