KAPITLU 10
“Hu Miktub”
“Illum twettqet din l-iskrittura”
1-3. Ġesù jrid lin-nies taʼ Nazaret jaslu għal liema konklużjoni vitali, u liema evidenza jagħti dwar dan?
ĠESÙ għadu kif beda l-ministeru tiegħu. Kristu ġie lura Nazaret, il-post fejn trabba. Il-mira tiegħu hi li jgħin lin-nies jaslu għal konklużjoni vitali: Hu l-Messija li kien imbassar minn ħafna żmien qabel! Liema evidenza jagħti dwar dan?
2 Bla dubju ħafna nies qed jistennew xi miraklu. Huma semgħu dwar l-għemejjel taʼ l-għaġeb li wettaq Ġesù. Madankollu, hu ma jagħtihom ebda sinjal bħal dan. Minflok, hu jmur is-sinagoga, kif inhu mdorri jagħmel. Iqum bil-wieqfa biex jaqra, u jingħatalu r-romblu taʼ Isaija. Huwa romblu twil, x’aktarx imgerbeb madwar żewġ vireg, u b’attenzjoni Ġesù jgerbeb id-dokument minn virga għall-oħra sakemm isib is-silta li qed ifittex. Imbagħad hu jaqra b’leħen għoli dak li issa hu Isaija 61:1-3.—Luqa 4:16-19.
3 L-udjenza żgur hija midħla tas-silta. Hija profezija dwar il-Messija. Għajnejn dawk kollha fis-sinagoga huma fuq Ġesù. Hemm skiet perfett. Imbagħad Ġesù jibda jispjega, x’aktarx fid-dettall: “Illum twettqet din l-iskrittura li għadkom kemm smajtu.” L-udjenza tibqa’ mistagħġba bil-kliem ħelu tiegħu, iżda milli jidher ħafna xorta jridu jaraw xi sinjal spettakolari. Minflok, Ġesù b’kuraġġ juża eżempju Skritturali biex jikxef in-nuqqas taʼ fidi tagħhom. In-nies taʼ Nazaret dalwaqt se jipprovaw joqtluh!—Luqa 4:20-30.
4. Ġesù pprovda liema eżempju fil-ministeru tiegħu, u x’se nikkunsidraw f’dan il-kapitlu?
4 Dakinhar Ġesù pprovda eżempju li hu baqa’ jsegwi matul il-ministeru tiegħu. Hu kien jistrieħ bil-kbir fuq
il-Kelma mnebbħa t’Alla. Huwa minnu li l-mirakli tiegħu kienu taʼ importanza kbira f’li juru li l-ispirtu t’Alla kien miegħu. Iżda, għal Ġesù xejn ma kien iktar importanti mill-Iskrittura Mqaddsa. Ejja neżaminaw l-eżempju li ħalla f’dan ir-rigward. Se nikkunsidraw kif Sidna kkwota mill-Kelma t’Alla, iddefenda l-Kelma t’Alla, u spjega l-Kelma t’Alla.Ikkwota mill-Kelma t’Alla
5. Ġesù x’kien determinat li juri lis-semmiegħa tiegħu, u kif ta prova li kliemu kien veru?
5 Ġesù ried li n-nies ikunu jafu minfejn kien ġej il-messaġġ tiegħu. Hu qal: “Dak li ngħallem m’huwiex tiegħi, imma taʼ dak li bagħatni.” (Ġwanni 7:16) F’okkażjoni oħra, hu qal: “Ma nagħmel xejn minn rajja; imma dan ngħidu skond kif għallimni l-Missier.” (Ġwanni 8:28) Iktar minn hekk, hu qal: “Dak li ngħidilkom ma ngħidux minni nnifsi; imma l-Missier li jibqa’ f’unjoni miegħi qed jagħmel l-għemejjel tiegħu.” (Ġwanni 14:10) Mod wieħed kif Ġesù ta prova li kummenti bħal dawn kienu veri hu billi kkwota l-Kelma miktuba t’Alla għal darba wara l-oħra.
6, 7. (a) Ġesù kemm kien jikkwota mill-Iskrittura Ebrajka, u dan għala hu impressjonanti? (b) It-tagħlim taʼ Ġesù kif inhu differenti mit-tagħlim taʼ l-iskribi?
6 Studju bir-reqqa tal-kliem dokumentat taʼ Ġesù juri li hu kkwota direttament minn iktar minn nofs il-kotba fl-Iskrittura Ebrajka jew irrefera għalihom b’mod indirett. Għall-ewwel, dan jista’ ma jinstemax impressjonanti. Għandek mnejn tistaqsi lilek innifsek għala, fi tliet snin u nofs taʼ tagħlim u ppridkar pubbliku, hu ma kkwotax mill-kotba ispirati kollha li kienu disponibbli. Madankollu, fir-realtà hu x’aktarx li hekk għamel. Ftakar li parti żgħira biss mill-kliem u l-għemejjel taʼ Ġesù huma mniżżlin bil-miktub. (Ġwanni 21:25) Fil-fatt, int probabbilment tista’ taqra b’leħen għoli l-kliem dokumentat kollu taʼ Ġesù fi ftit sigħat biss. Issa, immaġina li qed titkellem dwar Alla u s-Saltna tiegħu għal ftit sigħat biss u tipprova tirreferi għal iktar minn nofs il-kotba taʼ l-Iskrittura Ebrajka! Barra minn hekk, ħafna drabi Ġesù ma kellux rombli miktubin disponibbli. Meta għamel il-Priedka famuża taʼ fuq il-Muntanja, hu għamel bosta referenzi b’mod dirett u indirett għall-Iskrittura Ebrajka—kollha bl-amment!
7 Il-kwotazzjonijiet taʼ Ġesù wrew ir-rispett profond li kellu għall-Kelma t’Alla. Dawk li semgħuh “stagħġbu bil-mod kif għallimhom, għax kien qed jgħallimhom bħal wieħed li għandu l-awtorità, u mhux bħall-iskribi.” (Marku 1:22) Meta l-iskribi kienu jgħallmu, kienu jħobbu jirreferu għall-hekk imsejħa liġi orali, billi jikkwotaw lil rabbini għorrief taʼ l-imgħoddi. Ġesù lanqas darba ma kkwota mil-liġi orali jew lil xi rabbi bħala awtorità. Minflok, hu kien iqis il-Kelma t’Alla bħala l-awtorità finali. Għal darba wara l-oħra, hu qal: “Hu miktub.” Hu spiss kien juża dan il-kliem jew kliem simili ieħor meta kien jgħallem lis-segwaċi tiegħu u jikkoreġi l-ideat żbaljati tagħhom.
8, 9. (a) Ġesù kif appoġġa l-awtorità tal-Kelma t’Alla meta naddaf it-tempju? (b) Il-mexxejja reliġjużi li kienu fit-tempju b’liema mod urew diżrispett kbir lejn il-Kelma t’Alla?
8 Meta Ġesù naddaf it-tempju f’Ġerusalemm, hu qal: “Hu miktub, ‘Dari tissejjaħ dar tat-talb,’ imma intom qed tagħmluha għar tal-ħallelin.” (Mattew 21:12, 13; Isaija 56:7; Ġeremija 7:11) Il-ġurnata taʼ qabel, hu kien wettaq ħafna għemejjel taʼ l-għaġeb hemmhekk. Xi subien żgħar, minħabba li ġew impressjonati bil-kbir b’dak li raw, bdew ifaħħruh. Madankollu, il-mexxejja reliġjużi mgħaddbin staqsew lil Ġesù jekk kienx sema’ x’kienu qed jgħidu dawn it-tfal. Hu wieġeb: “Iva. Qatt ma qrajtuh dan, ‘Minn fomm iċ-ċkejknin u t-trabi tal-ħalib int ipprovdejt it-tifħir’?” (Mattew 21:16; Salm 8:2) Ġesù ried lil dawk l-irġiel ikunu jafu li l-Kelma t’Alla approvat dak kollu li kien qed jiġri hemmhekk.
9 Iktar tard, dawn il-mexxejja reliġjużi nġabru flimkien, Mattew 21:23) Ġesù kien għamilha ċara ferm min kien is-Sors taʼ l-awtorità tiegħu. Hu ma kienx joħloq xi ideat ġodda billi jaqla’ duttrini minn żniedu. Hu kien sempliċement japplika dak li kienet tgħid il-Kelma mnebbħa taʼ Missieru. Mela allura dawn il-qassisin u l-iskribi kienu qed juru diżrispett kbir lejn Ġeħova u l-Kelma tiegħu. Bla dubju kien jistħoqqilhom il-kundanna taʼ Ġesù hekk kif kixef il-ħażen wara l-motivi tagħhom.—Mattew 21:23-46.
resqu quddiem Ġesù, u staqsewh: “Int b’liema awtorità tagħmlu dan?” (10. Kif nistgħu nimitaw lil Ġesù fil-mod kif nużaw il-Kelma t’Alla, u liema għodod għandna li Ġesù ma kellux?
10 Bħal Ġesù, il-Kristjani veri llum jistrieħu fuq il-Kelma t’Alla fil-ministeru. Ix-Xhieda taʼ Ġeħova huma magħrufin mad-dinja kollha għall-ħerqa tagħhom biex jaqsmu m’oħrajn messaġġ mill-Bibbja. Il-pubblikazzjonijiet tagħna huma mimlijin skritturi u siltiet mill-Bibbja. U fil-ministeru tagħna nagħmlu l-istess billi nistinkaw ħalli niftħu l-Iskrittura kulmeta nitkellmu man-nies. (2 Timotju 3:16) Kemm nifirħu meta xi ħadd iħallina naqraw mill-Bibbja u niddiskutu l-valur u t-tifsir tal-Kelma t’Alla! Aħna m’għandniex memorja perfetta bħalma kellu Ġesù, iżda għandna ħafna għodod li Ġesù ma kellux. Flimkien mal-Bibbja sħiħa stampata b’għadd taʼ lingwi li dejjem jiżdied, aħna għandna bosta għodod li jgħinuna nifhmu l-Bibbja u nsibu xi vers li nkunu rridu nfittxu. Ejja nkunu determinati li nkomplu nikkwotaw mill-Bibbja u nidderieġu lin-nies lejha f’kull opportunità!
Iddefenda l-Kelma t’Alla
11. Ġesù għala kellu jiddefendi l-Kelma t’Alla spiss?
11 Ġesù sab li l-Kelma t’Alla spiss kienet tiġi attakkata, iżda dan żgur li ma ssorprendiehx. “Kelmtek hi l-verità,” Ġesù qal lil Missieru fit-talb. (Ġwanni 17:17) U Ġesù kien jaf sew li Satana, “il-ħakkiem tad-dinja,” hu “giddieb u missier il- gidba.” (Ġwanni 8:44; 14:30) Meta ċaħad it-tentazzjonijiet taʼ Satana, Ġesù kkwota mill-Iskrittura tliet darbiet. Satana kkwota vers wieħed mill-ktieb tas-Salmi u bi skop applikah ħażin. Ġesù wieġeb billi ddefenda l-Kelma t’Alla kontra dan l-użu ħażin.—Mattew 4:6, 7.
12-14. (a) Il-mexxejja reliġjużi kif urew diżrispett għal-Liġi Mosajka? (b) Ġesù kif iddefenda l-Kelma t’Alla?
12 Ġesù spiss kien jiddefendi l-Iskrittura Mqaddsa minħabba li tkun ġiet użata, interpretata, u rappreżentata b’mod ħażin. L-għalliema reliġjużi taʼ żmienu rrappreżentaw il-Kelma t’Alla b’mod żbilanċjat. Huma kienu jpoġġu ħafna enfasi fuq li wieħed iħares il-Liġi Mosajka sa l-iċken dettall iżda ftit li xejn kienu jpoġġu enfasi fuq li wieħed japplika l-prinċipji li fuqhom kienu bbażati l-liġijiet. B’hekk, huma inkuraġġew forma superfiċjali taʼ qima, waħda li kienet tiffoka iktar fuq id-dehra taʼ barra milli fuq kwistjonijiet iktar serji—bħalma huma l-ġustizzja, il-ħniena, u l-lealtà. (Mattew 23:23) Ġesù kif iddefenda l-Liġi t’Alla?
13 Fil-Priedka tiegħu taʼ fuq il-Muntanja, Ġesù spiss uża l-frażi “smajtu li ntqal” sabiex jintroduċi xi statut tal-Liġi Mosajka. Imbagħad hu kien jgħid “imma jien ngħidilkom” u wara jispjega xi prinċipju li kien jidħol iktar fid-dettall mill-osservanza superfiċjali tal-Liġi. Kien qed jargumenta kontra l-Liġi? Le, hu kien qed jiddefendiha. Per eżempju, in-nies kienu jafuha sew il-liġi “Toqtolx.” Iżda Ġesù qalilhom li l-mibegħda lejn xi ħadd kienet tmur kontra l-essenza taʼ din il-liġi. B’mod simili, jekk wieħed jikkultiva xewqat romantiċi ħżiena għal persuna li ma tkunx is-sieħeb jew is-sieħba tiegħu jkun qed jikser il-prinċipju li jinsab fil-liġi t’Alla kontra l-adulterju.—Mattew 5:17, 18, 21, 22, 27-39.
14 Fl-aħħarnett, Ġesù qal: “Smajtu li ntqal, ‘Ħobb lill-proxxmu tiegħek u obgħod lill-għadu tiegħek.’ Madankollu, jien ngħidilkom: Komplu ħobbu lill-għedewwa tagħkom u itolbu għal dawk li qed jippersegwitawkom.” Mattew 5:43, 44) Kien il-kmand “obgħod lill-għadu tiegħek” ġej mill-Kelma t’Alla? Le, dan il-kmand kien xi ħaġa li l-mexxejja reliġjużi għallmu minn żniedhom. Huma naqqsu l-importanza tal-Liġi perfetta t’Alla minħabba l-ħsibijiet tal-bniedem. Bi qlubija, Ġesù ddefenda l-Kelma t’Alla kontra l-effetti taʼ ħsara li jġibu magħhom it-tradizzjonijiet tal-bniedem.—Marku 7:9-13.
(15. Ġesù kif iddefenda l-Liġi t’Alla kontra t-tentattivi biex tintgħamel tidher stretta żżejjed, saħansitra ħarxa?
15 Il-mexxejja reliġjużi attakkaw il-Liġi t’Alla wkoll billi għamluha tidher stretta żżejjed, saħansitra ħarxa. Meta d-dixxipli taʼ Ġesù qatgħu ftit sbul tal-qamħ huma u għaddejjin minn ġo għalqa, xi Fariżej stqarrew li huma kienu qed jiksru s-Sabat. Ġesù uża eżempju Skritturali biex jiddefendi l-Kelma t’Alla kontra din il-ħarsa żbilanċjata. Hu rrefera għall-unika silta fl-Iskrittura li ssemmi l-użu tal-ħobż tal-preżenza tat-tempju barra s-santwarju—meta David u l-irġiel bil-ġuħ li kellu miegħu kielu dan il-ħobż. Ġesù wera lil dawn il-Fariżej li huma kienu naqsu li jifhmu għala Ġeħova juri ħniena u mogħdrija.—Marku 2:23-27.
16. Il-mexxejja reliġjużi kif kienu bidlu l-kmand taʼ Mosè rigward id-divorzju, u Ġesù kif wieġeb?
16 Ukoll, il-mexxejja reliġjużi ħolqu modi kif iduru mal-Liġi t’Alla, u b’hekk idgħajfuha. Per eżempju, il-Liġi kienet tippermetti li raġel jiddivorzja lil martu jekk kien isib “xi ħaġa indeċenti” min-naħa tagħha, milli jidher xi problema serja li kienet iġġib għajb fuq il-familja. (Dewteronomju 24:1) Madankollu, sa żmien Ġesù, il-mexxejja reliġjużi użaw din l-eċċezzjoni fil-Liġi bħala skuża biex iħallu lil raġel jiddivorzja lil martu għal kull ħaġa taʼ xejn—saħansitra jekk taħraqlu l-ikel! * Ġesù wera li huma kienu interpretaw ħażin il-kliem imnebbaħ taʼ Mosè. Imbagħad hu rrestawra l-livell oriġinali taʼ Ġeħova għaż-żwieġ, dak tal-monogamija, u b’hekk wera li l-immoralità sesswali biss hija l-bażi xierqa għal divorzju.—Mattew 19:3-12.
17. Il-Kristjani llum kif jistgħu jimitaw lil Ġesù billi jiddefendu l-Kelma t’Alla?
17 Is-segwaċi taʼ Kristu llum iħossuhom imqanqlin bl-istess mod biex jiddefendu l-Iskrittura Sagra meta tiġi attakkata. Meta l-mexxejja reliġjużi jagħtuna x’nifhmu li l-livelli morali tal-Kelma t’Alla huma antikwati, huma fil-fatt ikunu qed jattakkaw il-Bibbja. Il-Bibbja tiġi attakkata wkoll meta r-reliġjonijiet jgħallmu duttrini foloz u jippreżentawhom bħala duttrini tal-Bibbja. Aħna nqisuh bħala privileġġ li niddefendu l-Kelma t’Alla, li hi pura u vera—per eżempju, billi nuru li Alla m’huwiex parti minn Trinità. (Dewteronomju 4:39) Fl-istess ħin, aħna niddefendu l-Kelma t’Alla b’tattika, bi ħlewwa sinċiera, u b’rispett profond.—1 Pietru 3:15.
Spjega l-Kelma t’Alla
18, 19. Liema eżempji juru li Ġesù kellu abbiltà meraviljuża biex jispjega l-Kelma t’Alla?
18 Ġesù kien ħaj fis-sema meta nkitbet l-Iskrittura Ebrajka. Min jaf kemm ħa pjaċir bl-opportunità li jiġi fuq l-art u jieħu sehem f’li jispjega l-Kelma t’Alla! Per eżempju, aħseb f’dik il-ġurnata memorabbli wara l-irxoxt tiegħu meta ltaqa’ maʼ tnejn mid-dixxipli tiegħu fi triqithom lejn Għemmaws. Qabel ma għarfu min kien, huma qalulu kemm kienu mnikktin u konfużi minħabba l-mewt tal-maħbub Sidhom. Hu kif wieġeb? “Beda minn Mosè u l-Profeti kollha jfissrilhom dak li kien hemm miktub fuqu fl-Iskrittura kollha.” Kif ġew effettwati? Iktar tard huma bdew jgħidu lil xulxin: “Ma kinux qlubna mkebbsin fina meta beda jkellimna fit-triq, hu u jispjegalna ċar l-Iskrittura?”—Luqa 24:15-32.
Luqa 24:45) Bla dubju, din l-okkażjoni taʼ ferħ fakkrithom fil-bosta drabi li Ġesù kien għamel xi ħaġa simili għalihom—u għal dawk li riedu jisimgħu. Hu spiss kien jikkwota xi skritturi magħrufin sew u jispjegahom b’tali mod li kien iħalli effett mill-aqwa fuq l-imħuħ tas-semmiegħa tiegħu—fehma ġdida u iktar profonda tal-Kelma t’Alla.
19 Iktar tard dakinhar stess, Ġesù ltaqa’ maʼ l-appostli tiegħu u m’oħrajn. Innota x’għamel għalihom: “Fetħilhom moħħhom biex jifhmu l-Iskrittura.” (20, 21. Ġesù kif spjega l-kliem li Ġeħova qal lil Mosè ħdejn l-għollieqa taqbad bin-nar?
20 F’okkażjoni minnhom, Ġesù kien qed ikellem lil grupp taʼ Sadduċej. Dawn kienu setta tal-Ġudaiżmu assoċjata mas-saċerdozju Lhudi u ma kinux jemmnu fl-irxoxt. Ġesù qalilhom: “Rigward l-irxoxt tal-mejtin, ma qrajtux dak li qalilkom Alla, ‘Jien l-Alla t’Abraham u l-Alla taʼ Iżakk u l-Alla taʼ Ġakobb’? Hu mhux l-Alla tal-mejtin, imma tal-ħajjin.” (Mattew 22:31, 32) Din kienet skrittura li kienu jafu sew, miktuba minn raġel li kien rispettat mis-Sadduċej—Mosè. Iżda taraha int il-qawwa fl-ispjegazzjoni taʼ Ġesù?
21 Mosè kellu din il-konversazzjoni maʼ Ġeħova ħdejn l-għollieqa taqbad bin-nar madwar is-sena 1514 Q.E.K. (Eżodu 3:2, 6) Dak iż-żmien, Abraham kien ilu mejjet 329 sena, Iżakk 224 sena, u Ġakobb 197 sena. Madankollu, Ġeħova xorta qal: “Jien” l-Alla tagħhom. Dawn is-Sadduċej kienu jafu li Ġeħova m’huwiex bħal xi alla pagan tal-mejtin, li jaħkem xi dinja tal-mitoloġija taħt l-art. Le, hu l-Alla “tal-ħajjin,” bħalma qal Ġesù. Allura dan xi jfisser? Il-konklużjoni taʼ Ġesù kienet waħda qawwija: “Kollha ħajjin għalih.” (Luqa 20:38) Il-qaddejja maħbubin taʼ Ġeħova li mietu jinsabu miżmumin fiż-żgur fil-memorja bla limitu u li ma tbatti qatt t’Alla. L-iskop taʼ Ġeħova li jirxoxta lil dawn l-uħud tant hu ċert li jista’ jingħad li huma ħajjin. (Rumani 4:16, 17) M’hijiex din spjegazzjoni meraviljuża tal-Kelma t’Alla? Mhux taʼ b’xejn li “l-folol stagħġbu”!—Mattew 22:33.
22, 23. (a) Kif nistgħu nimitaw lil Ġesù bil-mod kif nispjegaw il-Kelma t’Alla? (b) X’se nikkunsidraw fil-kapitlu li jmiss?
22 Il-Kristjani llum għandhom il-privileġġ li jimitaw il-mod kif Ġesù spjega l-Kelma t’Alla. Tabilħaqq, aħna m’għandniex moħħ perfett. Minkejja dan, aħna spiss nistgħu naqsmu m’oħrajn xi skrittura li jkunu diġà jafuha u nispjegawlhom xi aspetti minnha li forsi qatt ma kienu kkunsidraw qabel. Per eżempju, huma għandhom mnejn ikunu tennew il-kliem “Jitqaddes ismek” u “Tiġi saltnatek” tul ħajjithom kollha mingħajr ma jkunu qatt tgħallmu l-isem t’Alla jew x’inhi s-Saltna tiegħu. (Mattew 6:9, 10, GħBM) X’opportunità meraviljuża jkollna meta xi ħadd iħallina noffru spjegazzjonijiet ċari u sempliċi dwar veritajiet Bibliċi bħal dawn!
23 Il-mezz prinċipali biex nimitaw il-mod kif Ġesù kien jaqsam il-verità m’oħrajn hu billi nikkwotaw mill-Kelma t’Alla, niddefenduha, u nispjegawha. Issa ejja nikkunsidraw xi ftit mill-metodi effettivi li uża Ġesù biex jilħaq qalb is-semmiegħa tiegħu bil-veritajiet Bibliċi.
^ par. 16 L-istorjografu taʼ l-ewwel seklu Ġużeppi Flavju, li hu stess kien Fariżew divorzjat, iktar tard qal li d-divorzju kien permess “għal kwalunkwe raġuni (u l-bnedmin spiss ikollhom minn dawn ir-raġunijiet).”