1-3. (a) Ġesù b’liema mod ħalla lill-​appostli tiegħu, u din għala ma kinitx tislima taʼ swied il-​qalb? (b) Għala jeħtieġ li nitgħallmu dwar il-​ħajja li Ġesù għex mindu mar lura fis-​sema?

ĦDAX-​IL raġel jinsabu weqfin flimkien fuq muntanja. Bi mħabba kbira u b’ammirazzjoni, huma qed iħarsu lejn persuna oħra. Surtu hija waħda taʼ bniedem, iżda fil-​fatt dan hu Ġesù rxoxtat, li għal darb’oħra huwa l-​iktar setgħan fost l-​ulied spirti taʼ Ġeħova. Ġesù ġabar lill-​appostli tiegħu biex jiltaqgħu miegħu hawn fuq il-​Muntanja taż-​Żebbuġ għall-​aħħar darba.

² Din l-​għolja, parti minn sensiela t’għoljiet tal-​ġebel tal-​ġir fuq in-​naħa tal-​lvant taʼ Ġerusalemm u separata mill-​belt permezz tal-​Wied taʼ Kidron, żgur li ġġib bosta memorji f’moħħ Ġesù. Fuq dawn l-​għoljiet insibu l-​belt taʼ Betanja, fejn Ġesù rxoxta lil Lazzru. Proprju ftit ġimgħat ilu, Ġesù rħielha lejn Ġerusalemm, riekeb b’mod trijonfali minn Betfaġe li kienet tinsab fil-​qrib. Il-​Muntanja taż-​Żebbuġ x’aktarx ukoll hi l-​post fejn kien hemm il-​ġnien tal-​Ġetsemani, fejn Ġesù qatta’ s-​sigħat agonizzanti qabel l-​arrest tiegħu. Issa proprju fuq din l-​għolja, Ġesù jħejji ruħu biex iħalli warajh lill-​iktar ħbieb intimi u lis-​segwaċi tiegħu. Hu jlissen kliem sabiħ qabel jitlaq. Imbagħad hu jibda jinqata’ mill-​art! L-​appostli jibqgħu msammrin fil-​post, iċċassati lejn Sidhom l-​għażiż hu u tiela’ s-​sema. Fl-​aħħar tgħattih sħaba, u b’hekk ma jarawhx iktar.—Atti 1:6-​12.

³ Tqisha int din ix-​xena bħala li għandha tmiem ħelu imma kemxejn taʼ niket, tislima taʼ swied il-​qalb? Le, m’hijiex. Fil-​fatt, bħalma żewġ anġli issa jfakkru lill-​appostli, l-​istorja taʼ Ġesù ċertament li ma tintemmx hawn. (Atti  1:10, 11) B’ħafna modi, it-​tlugħ tiegħu fis-​sema huwa biss il-​bidu. Il-​Kelma t’Alla ma tħalliniex fl-​għama rigward x’sar minn Ġesù wara dan. Huwa importanti li nitgħallmu dwar il-​ħajja li Ġesù għex mindu ħalla l-​art. Għala? Ftakar fil-​kliem li Ġesù qal lil Pietru: “Ibqa’ miexi warajja.” (Ġwanni 21:19, 22) Jeħtieġ li aħna lkoll nobdu dan il-​kmand, mhux sempliċement bħala għażla tal-​mument iżda bħala mod taʼ ħajja. Sabiex nagħmlu hekk, għandna bżonn nifhmu x’qed jagħmel Sidna bħalissa u l-​inkarigi li rċieva fis-​sema.

4. Il-​Bibbja kif irrivelat bil-​quddiem x’kellu jiġri fis-​sema wara li Ġesù jmur lura hemm?

⁴ L-​Iskrittura ma tgħid xejn dwar il-​wasla taʼ Ġesù fis-​sema, il-​mod kif ġie milqugħ, u dwar il-​fatt li reġa’ ngħaqad bil-​ferħ maʼ Missieru. Madankollu, il-​Bibbja rrivelat bil-​quddiem x’kellu jiġri fis-​sema eżatt wara li Ġesù jmur lura hemm. Għal iktar minn 15-​il seklu, il-​Lhud kienu jixhdu regolarment għal ċerimonja qaddisa. Darba fis-​sena, il-​qassis il-​kbir kien jidħol fl-​Iktar Qaddis tat-​tempju biex iroxx id-​demm tas-​sagrifiċċji taʼ Jum l-​Espjazzjoni quddiem l-​arka tal-​patt. Dakinhar, il-​qassis il-​kbir kien jiffigura bil-​quddiem lill-​Messija. Ġesù wettaq it-​tifsir profetiku taʼ din iċ-​ċerimonja darba għal dejjem wara li mar lura s-​sema. Hu daħal fil-​preżenza maestuża taʼ Ġeħova fis-​sema—l-​iktar post qaddis fl-​univers—u ppreżenta l-​valur tas-​sagrifiċċju tiegħu tal-​fidwa lil Missieru. (Ebrej 9:11, 12, 24) Ġeħova aċċettah?

5, 6. (a) X’evidenza għandna li Ġeħova kien aċċetta s-​sagrifiċċju tal-​fidwa taʼ Kristu? (b) Min jibbenefika mill-​fidwa, u kif?

⁵ It-​tweġiba nsibuha billi nikkunsidraw x’ġara ftit jiem wara t-​tlugħ taʼ Ġesù fis-​sema. Grupp żgħir taʼ madwar 120 Kristjan inġabru f’Ġerusalemm f’kamra taʼ fuq meta f’daqqa waħda ħoss bħal kurrent taʼ riħ qawwi mela l-​post. Ilsna donnhom tan-​nar dehru fuq rashom, huma mtlew  bl-​ispirtu qaddis, u bdew jitkellmu b’diversi lingwi. (Atti 2:1-​4) Din il-​ġrajja kienet tfisser it-​twelid taʼ ġens ġdid, Israel spiritwali, li kien “ir-​razza magħżula” ġdida t’Alla u “s-​saċerdozju rjali” li jwettaq ir-​rieda divina fuq l-​art. (1 Pietru 2:9) B’mod ċar, Alla Ġeħova kien aċċetta u approva s-​sagrifiċċju tal-​fidwa taʼ Kristu. Dan it-​tferrigħ taʼ l-​ispirtu qaddis kien fost l-​ewwel barkiet li saru possibbli permezz tal-​fidwa.

⁶ Sa minn dakinhar, il-​fidwa taʼ Kristu kienet taʼ benefiċċju għas-​segwaċi tiegħu madwar id-​dinja kollha. Sew jekk aħna fost il-​“merħla żgħira” midluka li se taħkem maʼ Kristu fis-​sema, u sew jekk aħna fost “in-​nagħaġ oħrajn” li se jgħixu taħt il-​ħakma tiegħu fuq l-​art, aħna nibbenefikaw mis-​sagrifiċċju tiegħu. (Luqa 12:32; Ġwanni 10:16) Huwa l-​bażi tat-​tama tagħna u tal-​maħfra taʼ dnubietna. Sakemm inkomplu ‘neżerċitaw fidi’ f’din il-​fidwa, billi nsegwu lil Ġesù jum wara jum, aħna jista’ jkollna kuxjenza nadifa u tama ċerta taʼ futur mill-​isbaħ.—Ġwanni 3:16.

7. Ġesù liema awtorità ngħata wara li mar lura s-​sema, u kif tista’ tappoġġah?

⁷ Ġesù x’għamel fis-​sema mindu mar lura hemm? Hu għandu awtorità kbira ħafna. (Mattew 28:18) Tabilħaqq, Ġeħova ħatru biex jaħkem lill-​kongregazzjoni Kristjana, inkarigu li wettaq bi mħabba u ġustizzja. (Kolossin 1:13) Bħalma kien imbassar, Ġesù pprovda rġiel responsabbli biex jieħdu ħsieb il-​bżonnijiet tal-​merħla tiegħu. (Efesin 4:8) Per eżempju, hu għażel lil Pawlu biex ikun “appostlu tal-​ġnus,” billi bagħtu jxerred l-​aħbar tajba f’artijiet imbegħdin. (Rumani 11:13; 1 Timotju 2:7) Lejn tmiem l-​ewwel seklu, Ġesù indirizza messaġġi taʼ tifħir, pariri, u dixxiplina lil seba’ kongregazzjonijiet fil-​provinċja Rumana taʼ l-​Asja. (Rivelazzjoni, kapitli 2-​3) Tirrikonoxxi int lil Ġesù bħala l-​Kap tal-​kongregazzjoni Kristjana? (Efesin 5:23) Sabiex tkompli ssegwih, trid tinkuraġġixxi spirtu t’ubbidjenza u kooperazzjoni fil-​kongregazzjoni lokali tiegħek.

8, 9. Ġesù liema awtorità ngħata fl-​1914, u dan x’għandu jfisser għalina fid-​deċiżjonijiet li nieħdu?

 ⁸ Ġesù ngħata saħansitra iktar awtorità fl-​1914. F’dik is-​sena hu nħatar bħala Sultan tas-​Saltna Messjanika taʼ Ġeħova. Meta bdiet il-​ħakma taʼ Ġesù, “faqqgħet gwerra fis-​sema.” Ir-​riżultat? Satana u d-​demonji tiegħu twaddbu fuq l-​art, u b’hekk ngħata bidu għal żmien taʼ gwaj. Il-​gwerer, il-​kriminalità, il-​biża’, il-​mard, it-​terremoti, u l-​ġuħ li kotru maʼ kullimkien u li nikktu lill-​umanità llum ifakkruna li Ġesù qed jaħkem fis-​sema proprju bħalissa. Satana għadu “l-​ħakkiem taʼ din id-​dinja” għal “żmien qasir.” (Rivelazzjoni 12:7-​12; Ġwanni 12:31; Mattew 24:3-​7; Luqa 21:11) Madankollu, Ġesù qed jagħti l-​opportunità lin-​nies madwar id-​dinja kollha biex jaċċettaw il-​ħakma Tiegħu.

⁹ Huwa vitali li nżommu man-​naħa tas-​Sultan Messjaniku. Fid-​deċiżjonijiet kollha li nieħdu kuljum, għandna naraw li jkollna l-​approvazzjoni tiegħu, mhux dik taʼ din id-​dinja korrotta. Hekk kif dan is-​“Sultan tas-​slaten u Sid tas-​sidien” jgħarbel lill-​bnedmin, il-​qalb ġusta tiegħu tixgħel bir-​rabja u tfur bil-​ferħ. (Rivelazzjoni 19:16) Għala?

10. X’inhi d-​dispożizzjoni naturali taʼ Ġesù, iżda x’jimla lil Sidna b’rabja ġusta?

¹⁰ Bħal Missieru, Sidna huwa ferħan minnu nnifsu. (1 Timotju 1:11) Meta kien fuq l-​art, Ġesù qatt ma kien iħobb jikkritika u lanqas kien bniedem li diffiċli biex togħġbu. Madankollu, qed jiġru ħafna affarijiet fid-​dinja llum li bir-​raġun jimlewh b’rabja ġusta. Ċertament li hu rrabjat għal dawk l-​organizzazzjonijiet reliġjużi kollha li jistqarru b’mod falz li qegħdin jirrappreżentawh. Hu bassar saħansitra dan: “Mhux kulmin jgħidli, ‘Mulej, Mulej,’ jidħol fis-​saltna tas-​smewwiet, imma min jagħmel ir-​rieda taʼ  Missieri li hu fis-​smewwiet. Ħafna jgħiduli f’dak il-​jum, ‘Mulej, Mulej, mhux f’ismek . . . wettaqna ħafna għemejjel setgħanin?’ Imbagħad nistqarrilhom: Jien qatt ma kont nafkom! Itilqu minn quddiemi, intom li tiksru l-​liġi.”—Mattew 7:21-​23.

11-13. Għala xi wħud għandhom mnejn jitħawdu minħabba l-​kliem iebes li bih Ġesù indirizza lil dawk li wettqu “ħafna għemejjel setgħanin” f’ismu, iżda għala hu rrabjat? Spjega.

¹¹ Ħafna llum li jistqarru li huma Kristjani għandhom mnejn isibu li dan il-​kliem iħawwadhom. Ġesù għala indirizza kliem iebes bħal dan lil nies li wettqu “ħafna għemejjel setgħanin” f’ismu? Il-​knejjes tal-​Kristjaneżmu ffinanzjaw diversi karitajiet, għenu lill-​foqra, bnew sptarijiet u skejjel, u wettqu bosta xogħlijiet oħrajn. Biex naraw għala ħaqqhom ir-​rabja taʼ Ġesù, ikkunsidra tixbiha waħda.

¹² Missier u omm għandhom bżonn jagħmlu vjaġġ. Ma jistgħux jieħdu lil uliedhom magħhom, u għalhekk jinkarigaw lil waħda mara biex tieħu ħsiebhom. L-​istruzzjonijiet li tawha huma sempliċi: “Ħu ħsieb it-​tfal tagħna. Itmagħhom, ara li jkunu nodfa, u żommhom ’il bogħod mill-​periklu.” Iżda, meta l-​ġenituri jiġu lura, jibqgħu xxokkjati meta jaraw li wliedhom kienu qed imutu bil-​ġuħ. It-​tfal huma maħmuġin, morda, u mdejqin. Qed jibku biex jiġbdu l-​attenzjoni taʼ dik li kienet qed tieħu ħsiebhom, iżda l-​għajta tagħhom qed tiġi injorata. Għala? Hi qiegħda fl-​għoli fuq sellum tnaddaf it-​twieqi. Mimlijin qilla, il-​ġenituri jitolbu spjegazzjoni. Hi twieġeb: “Ħarsu lejn dak kollu li għamilt! M’humiex nodfa t-​twieqi? Għamilt xi tiswijiet fid-​dar ukoll, dan kollu għalikom!” Iħossuhom aħjar il-​ġenituri? Dażgur li le! Huma qatt ma talbuha tagħmel dawn ix-​xogħlijiet; huma riduha biss li tieħu ħsieb uliedhom. Il-​fatt li hi m’aċċettatx li tobdi l-​istruzzjonijiet inkorlahom bil-​kbir.

¹³ Il-​Kristjaneżmu aġixxa bħal din il-​persuna li kellha tieħu  ħsieb it-​tfal. Ġesù ħalla istruzzjonijiet mar-​rappreżentanti tiegħu biex jitimgħu lin-​nies spiritwalment billi jgħallmuhom il-​verità tal-​Kelma t’Alla u jgħinuhom ikunu spiritwalment nodfa. (Ġwanni 21:15-​17) Madankollu, il-​Kristjaneżmu naqas bl-​ikrah li jobdi d-​direzzjoni tiegħu. Dan ħalla lin-​nies imġewħin spiritwalment, imħawdin b’tagħlim falz u bla għarfien dwar veritajiet bażiċi tal-​Bibbja. (Isaija 65:13; Għamos 8:11) Anki t-​tentattivi tiegħu biex itejjeb din id-​dinja, bilkemm jistgħu jiġġustifikaw id-​diżubbidjenza tiegħu minn jeddu. Fil-​fatt, din is-​sistema hija bħal dar li ġiet kundannata għall-​qerda! Il-​Kelma t’Alla tagħmilha ċara li din is-​sistema taʼ Satana dalwaqt se tinqered.—1 Ġwanni 2:15-​17.

14. Liema xogħol qed jagħmel lil Ġesù ferħan illum, u għala?

¹⁴ Mill-​banda l-​oħra, Ġesù żgur li hu ferħan ħafna meta jħares ’l isfel mis-​sema u jara li miljuni taʼ nies qegħdin iwettqu l-​inkarigu taʼ li jagħmlu dixxipli li hu ta lis-​segwaċi tiegħu qabel ma ħalla l-​art. (Mattew 28:19, 20) Xi privileġġ li nferrħu lis-​Sultan Messjaniku! Ejja nkunu determinati li qatt ma naqtgħu qalbna milli ngħinu lill-​“ilsir leali u għaqli.” (Mattew 24:45) Kuntrarju għall-​kleru tal-​Kristjaneżmu, dan il-​grupp żgħir t’aħwa midlukin b’ubbidjenza kien qed imexxi l-​ippridkar u b’lealtà tema’ lin-​nagħaġ taʼ Kristu.

15, 16. (a) Ġesù kif iħossu dwar in-​nuqqas taʼ mħabba li tant hu komuni llum, u kif nafuh dan? (b) Il-​Kristjaneżmu kif ħaqqu r-​rabja taʼ Ġesù?

¹⁵ Aħna nistgħu nkunu ċerti li s-​Sultan jirrabja meta jara n-​nuqqas taʼ mħabba li tant hu komuni fuq l-​art illum. Forsi niftakru kif il-​Fariżej ikkritikaw lil Ġesù talli fejjaq lin-​nies fil-​jum tas-​Sabat. Tant kellhom qalbhom iebsa, u tant kienu stinati, li qagħdu biss fuq l-​interpretazzjoni tagħhom kollha preġudizzju tal-​Liġi Mosajka u fuq il-​liġi orali. Il-​mirakli taʼ Ġesù ġabu benefiċċji bla għadd lin-​nies! Iżda l-​hena,  is-​serħan, u t-​tisħiħ tal-​fidi li ġabu mirakli bħal dawn ma kienu jfissru xejn għal dawn l-​irġiel. Ġesù kif ħassu dwarhom? Hu darba “wriehom li ma ħax pjaċir, peress li kien imnikket għall-​aħħar minħabba l-​ebusija taʼ qlubhom.”—Marku 3:5.

¹⁶ Illum, Ġesù jara ħafna iktar minn hekk biex hu jħossu “mnikket għall-​aħħar.” Il-​mexxejja tal-​Kristjaneżmu huma mogħmijin bid-​devozzjoni tagħhom lejn it-​tradizzjonijiet u d-​duttrini li m’humiex fi qbil maʼ l-​Iskrittura. Iktar minn hekk, huma rrabjati minħabba x-​xogħol taʼ l-​ippridkar taʼ l-​aħbar tajba tas-​Saltna t’Alla. F’ħafna partijiet tad-​dinja, il-​kleru qanqal persekuzzjoni ħarxa kontra dawn il-​Kristjani li sinċerament jipprovaw jippridkaw il-​messaġġ li ppriedka Ġesù. (Ġwanni 16:2; Rivelazzjoni 18:4, 24) Fl-​istess ħin, nies tal-​kleru bħal dawn spiss iħeġġu lis-​segwaċi tagħhom stess biex jiggwerraw u joqtlu lil oħrajn—bħallikieku dan jogħġob lil Ġesù Kristu!

17. Is-​segwaċi veri taʼ Ġesù kif iferrħulu qalbu?

¹⁷ B’kuntrast maʼ dan, is-​segwaċi veri taʼ Ġesù jistinkaw biex juru mħabba lejn il-​proxxmu tagħhom. Huma jippridkaw l-​aħbar tajba maʼ “bnedmin taʼ kull xorta,” eżatt bħalma għamel Ġesù, minkejja l-​oppożizzjoni. (1 Timotju 2:4) U l-​imħabba li juru lejn xulxin hija waħda li tispikka; hija s-​sinjal prinċipali li jidentifikahom. (Ġwanni 13:34, 35) Hekk kif jittrattaw lil sħabhom il-​Kristjani bi mħabba, b’rispett, u b’dinjità, huma verament qed isegwu lil Ġesù—u jferrħu qalb is-​Sultan Messjaniku!

18. Xi jnikket lil Sidna, iżda kif nistgħu nogħġbuh?

¹⁸ Ejja nżommu f’moħħna wkoll li Sidna jitnikket meta s-​segwaċi tiegħu ma jissaportux, billi jħallu mħabbithom għal Ġeħova tibred u jieqfu jaqdu Lilu. (Rivelazzjoni 2:4, 5) Madankollu, Ġesù jieħu pjaċir b’dawk li jissaportu sat-​tmiem. (Mattew 24:13) Mela, ejja nagħmlu kulma nistgħu biex dejjem inżommu f’moħħna l-​kmand taʼ Kristu: “Ibqa’  miexi warajja.” (Ġwanni 21:19) Ejja nikkunsidraw xi ftit mill-​barkiet li s-​Sultan Messjaniku se jitfa’ fuq dawk li jissaportu sat-​tmiem.

19, 20. (a) Meta nsegwu lil Ġesù liema barkiet ikollna issa? (b) Il-​fatt li nsegwu lil Kristu kif jista’ jgħinna nissodisfaw il-​bżonn tagħna għal missier?

¹⁹ Sabiex ingawdu ħajja verament imbierka minn issa jeħtieġ li nsegwu lil Ġesù. Jekk naċċettaw lil Kristu bħala s-​Sid tagħna, billi nsegwu d-​direzzjonijiet tiegħu u nużaw l-​eżempju tiegħu bħala l-​gwida tagħna, aħna se nsibu teżori li n-​nies madwar id-​dinja kollha jfittxu għalxejn. Aħna se niġu mberkin b’xogħol li fil-​ħajja jagħtina skop, familja t’aħwa fit-​twemmin magħqudin f’unità vera taʼ mħabba, kuxjenza nadifa, u paċi tal-​moħħ. Fi ftit kliem, aħna se jkollna ħajja mimlija ferħ u sodisfazzjon. U se ngawdu saħansitra iktar benefiċċji.

²⁰ Permezz taʼ Ġesù, Ġeħova pprovda “Missier Etern” għal dawk li jittamaw li jgħixu għal dejjem fuq l-​art. Ġesù huwa sostitut għal Adam, missier l-​umanità, li ċaħad lid-​dixxendenti tiegħu b’mod tant kiefer. (Isaija 9:6, 7) Jekk naċċettaw lil Ġesù bħala l-​“Missier Etern” billi neżerċitaw fidi fih, se jkollna tama ċerta taʼ ħajja taʼ dejjem. Iktar minn hekk, aħna mbagħad nersqu eqreb lejn Alla Ġeħova. Bħalma diġà rajna, l-​istinkar tagħna biex insegwu l-​eżempju taʼ Ġesù minn jum għal jum huwa l-​aqwa mod possibbli biex nobdu dan il-​kmand divin: “Imitaw lil Alla, bħala wlied maħbubin.”—Efesin 5:1.

21. Is-​segwaċi taʼ Kristu kif jirriflettu d-​dawl f’dinja mudlama?

²¹ Hekk kif nimitaw lil Ġesù u lil Missieru Ġeħova, aħna għandna privileġġ meraviljuż. Aħna nirriflettu dawl jiddi. F’dinja mudlama, fejn biljuni taʼ nies qed jiġu żvijati minn  Satana u jimitaw il-​karatteristiki tiegħu, aħna li nsegwu lil Kristu nxerrdu dija tad-​dawl li jiddi—id-​dawl tal-​veritajiet Skritturali, id-​dawl taʼ kwalitajiet Kristjani mill-​aqwa, id-​dawl taʼ ferħ ġenwin, paċi vera, imħabba reali. Fl-​istess ħin, aħna nersqu eqreb lejn Ġeħova, u dan hu l-​aqwa mira, l-​ogħla skop possibbli, taʼ kwalunkwe ħliqa intelliġenti.

22, 23. (a) Liema barkiet futuri se jiġu għal dawk li lealment ikomplu jsegwu lil Ġesù? (b) X’għandha tkun id-​determinazzjoni tagħna?

²² Aħseb ukoll dwar dak li Ġeħova jrid jagħmel għalik fil-​futur permezz tas-​Sultan Messjaniku tiegħu. Dalwaqt dan is-​Sultan se jqajjem gwerra ġusta kontra s-​sistema mill-​agħar  taʼ Satana. Ir-​rebħa taʼ Ġesù hija żgura! (Rivelazzjoni 19:11-​15) Imbagħad, Kristu se jibda r-​Renju t’Elf Sena tiegħu għal fuq l-​art. Il-​gvern tiegħu tas-​sema se jsawwab il-​benefiċċji tal-​fidwa fuq kull bniedem leali, u jwassal lil dawn għall-​perfezzjoni. Immaġina lilek innifsek f’saħħtek, żagħżugħ u b’saħħtek, taħdem ferħan maʼ familja umana magħquda sabiex tbiddel din l-​art f’ġenna! Fi tmiem il-​ħakma Millennjali tiegħu, Ġesù se jagħti l-​ħakma lura f’idejn Missieru. (1 Korintin 15:24) Jekk tkompli ssegwi lil Kristu lealment, se tikseb barka tant meraviljuża li huwa diffiċli anki biex timmaġinaha—“il-​libertà glorjuża taʼ wlied Alla”! (Rumani 8:21) Iva, aħna se jkollna l-​barkiet kollha li Adam u Eva kellhom u tilfu. Ulied Ġeħova fuq l-​art, se nkunu meħlusin għal dejjem mit-​tebgħa tad-​dnub taʼ Adam. Tabilħaqq, “ma jkunx hemm iżjed mewt.”—Rivelazzjoni 21:4.

²³ Ftakar fil-​ħakkiem żagħżugħ u għani li dwaru tkellimna f’Kapitlu 1. Hu rrifjuta l-​istedina taʼ Ġesù: “Ejja kun segwaċi tiegħi.” (Marku 10:17-​22) Qatt tagħmel dan l-​iżball! Jalla taċċetta l-​istedina taʼ Ġesù b’ferħ u b’entużjażmu. Jalla tkun determinat li tissaporti, li tkompli ssegwi lir-​Ragħaj mill-​Aħjar jum wara jum, sena wara sena, u tgħix biex sa fl-​aħħar tarah iġib l-​iskopijiet kollha taʼ Ġeħova fi twettiq glorjuż!