1-3. X’jiġri meta l-​ġenituri jġibu lit-​tfal tagħhom għand Ġesù, u din il-​ġrajja x’turi dwar Ġesù?

ĠESÙ jaf li t-​tmiem tal-​ħajja tiegħu fuq l-​art riesaq b’ħeffa kbira. Fadallu biss ftit ġimgħat, u għad hemm ħafna xogħol xi jsir! Hu qed jippriedka flimkien maʼ l-​appostli tiegħu fil-​Perija, reġjun fuq in-​naħa tal-​lvant tax-​Xmara Ġordan. Huma mexjin lejn in-​nofsinhar, lejn Ġerusalemm, fejn Ġesù se jattendi l-​aħħar Qbiż tiegħu li kien wieħed drammatiku.

² Wara li Ġesù jkollu diskussjoni taħraq maʼ xi mexxejja reliġjużi, tinqala’ kwistjoni żgħira. In-​nies qed iġibu lit-​tfal tagħhom biex jarawh. Milli jidher, l-​età tat-​tfal tvarja, għax Marku jirreferi għalihom bl-​istess kelma li iktar kmieni uża biex jiddeskrivi tifla taʼ 12-​il sena, filwaqt li Luqa juża kelma li tista’ tiġi tradotta bħala “tfal ċkejknin.” (Luqa 18:15; Marku 5:41, 42; 10:13) M’għandniex xi ngħidu, kulfejn ikun hemm it-​tfal, spiss ikun hemm xi ftit storbju u għagħa ferriħija. Id-​dixxipli taʼ Ġesù jċanfru lill-​ġenituri, forsi minħabba li jaħsbu li Sidhom għandu wisq x’jagħmel biex jagħti attenzjoni lit-​tfal. Ġesù x’jagħmel?

³ Meta jara xi jkun għaddej, Ġesù ma jiħux pjaċir. B’min? Bit-​tfal? Bil-​ġenituri? Le—bid-​dixxipli tiegħu! Hu jgħid: “Ħallu t-​tfal żgħar jiġu għandi; tipprovawx twaqqfuhom, għax is-​saltna t’Alla hi taʼ min hu bħalhom. Tassew ngħidilkom, Kulmin ma jilqax is-​saltna t’Alla bħal tifel żgħir żgur ma jidħolx fiha.” Imbagħad Ġesù ‘jħaddan’ it-​tfal miegħu u jberikhom. (Marku 10:13-​16) Il-​lingwaġġ li juża Marku hawnhekk jindika li Ġesù jħaddanhom miegħu b’affezzjoni, forsi saħansitra billi jbennen lil xi trabi waqt li “jżommhom f’dirgħajh,” kif ipoġġiha wieħed traduttur. Biċ-​ċar, Ġesù jħobbhom lit-​tfal.  Però, nitgħallmu xi ħaġa oħra dwaru hawnhekk—wieħed iħossu komdu javviċinah.

4, 5. (a) Kif nistgħu nkunu ċerti li Ġesù kien avviċinabbli? (b) Liema mistoqsijiet se neżaminaw f’dan il-​kapitlu?

⁴ Kieku Ġesù kien xi raġel serju, stramb, jew imkabbar, x’aktarx li dawn it-​tfal ma kinux jinġibdu lejh; lanqas il-​ġenituri tagħhom ma kienu jħossuhom komdi javviċinawh. Hekk kif iġġib ix-​xena quddiem għajnejk, ma tarax int wiċċ il-​ġenituri jixgħel bil-​ferħ meta dan ir-​raġel qalbu tajba juri affezzjoni lejn uliedhom, jgħid li Alla jgħożżhom u jħobbhom, u jberikhom? Tabilħaqq, għalkemm Ġesù kien mgħobbi bl-​iktar responsabbiltajiet kbar, hu xorta kien l-​iktar bniedem avviċinabbli.

⁵ Min iktar ħassu komdu javviċina lil Ġesù? Għala kien daqshekk faċli biex wieħed javviċinah? U kif nistgħu nitgħallmu nkunu bħal Ġesù f’dan ir-​rigward? Ejja naraw.

6-8. Spiss, Ġesù maʼ min kien jissieħeb, u l-​attitudni tiegħu lejhom kif kienet differenti minn dik tal-​mexxejja reliġjużi?

⁶ Hekk kif taqra r-​rakkonti taʼ l-​Evanġelji, għandek mnejn tibqa’ impressjonat bil-​mod kif għadd kbir taʼ nies ma ħasbuhiex darbtejn biex javviċinaw lil Ġesù. Per eżempju, kulmeta naqraw dwar Ġesù spiss naqraw ukoll dwar “folol kbar.” “Marru warajh folol kbar mill-​Galilija.” “Folol kbar inġabru madwaru.” “Resqu lejh folol kbar.” “Folol kbar kienu qed jivvjaġġaw miegħu.” (Mattew 4:25; 13:2; 15:30; Luqa 14:25) Iva, Ġesù spiss kien ikun imdawwar minn għadd kbir taʼ nies.

⁷ Ġeneralment, dawn kienu jkunu nies komuni, dawk li l-​mexxejja reliġjużi b’disprezz kienu jirreferu għalihom bħala “n-​nies tal-​pajjiż.” Il-​Fariżej u l-​qassisin bil-​miftuħ qalu: “Din il-​folla li ma tafx il-​Liġi hi misħuta.” (Ġwanni 7:49) Iktar tard, kitbiet rabbiniċi jikkonfermaw din l-​attitudni. Bosta  mexxejja reliġjużi kienu jqisu lil dawn in-​nies bħala li huma taʼ klassi iktar baxxa, u kienu jirrifjutaw li jieklu magħhom, jixtru mingħandhom, jew jissieħbu magħhom. Fil-​fatt, xi wħud kienu jinsistu li ma kien hemm ebda tama taʼ rxoxt għal uħud bħal dawn li ma kinux jafu l-​liġi orali! Ħafna nies komuni żgur li kienu jevitaw mexxejja bħal dawn minflok ma jitolbuhom l-​għajnuna jew il-​gwida. Iżda Ġesù kien differenti.

⁸ Ġesù kien jissieħeb man-​nies komuni bil-​miftuħ. Hu kien jiekol magħhom, ifejjaqhom, jgħallimhom, u jagħtihom tama. M’għandniex xi ngħidu, Ġesù kien realistiku, billi kien jaf li ħafna minnhom kienu se jiċħdu l-​opportunità li jaqdu lil Ġeħova. (Mattew 7:13, 14) Iżda, hu kellu ħarsa pożittiva lejn kull individwu u f’ħafna nies ra l-​potenzjal li jagħmlu dak li hu tajjeb. X’differenza minn dawk il-​qassisin u l-​Fariżej taʼ qalbhom iebsa! Però, xi ħaġa taʼ l-​iskantament hi li anki l-​qassisin u l-​Fariżej kienu javviċinaw lil Ġesù, u xi wħud minnhom fil-​fatt bidlu triqathom u segwewh. (Atti 6:7; 15:5) Xi wħud min-​nies li kienu għonja u kellhom il-​poter ukoll ħassewhom komdi javviċinaw lil Ġesù.—Marku 10:17, 22.

9. In-​nisa għala ħassewhom komdi javviċinaw lil Ġesù?

⁹ In-​nisa ma kinux jaħsbuha darbtejn biex javviċinaw lil Ġesù. Żgur li spiss ħassew id-​diżapprovazzjoni umiljanti tal-​mexxejja reliġjużi. Ħafna drabi r-​rabbini kienu jiddisprezzaw lil min kien jgħallem lin-​nisa. Fil-​fatt, in-​nisa ma kinux jitħallew jixhdu f’każijiet legali; kienu jitqiesu bħala xhieda li ma tistax tafdahom. Ir-​rabbini saħansitra kienu jgħidu talba li fiha kienu jirringrazzjaw lil Alla li ma kinux nisa! Madankollu, in-​nisa ma rawx din l-​attitudni taʼ disprezz f’Ġesù. Ħafna nisa kienu javviċinawh, ħerqanin biex jitgħallmu. Per eżempju, insibu lil Marija, oħt Lazzru, bil-​qiegħda ħdejn saqajn il-​Mulej, mitlufa tisma’ l-​kliem taʼ Ġesù filwaqt li oħtha Marta kienet imħabbta u konċernata żżejjed bit-​tħejjija taʼ  l-​ikel. Ġesù faħħar lil Marija talli għamlet prijoritajiet xierqa.—Luqa 10:39-​42.

10. Ġesù kif kien differenti mill-​mexxejja reliġjużi fil-​mod kif kien jittratta lill-​morda?

¹⁰ Il-​morda wkoll kienu jfittxu lil Ġesù, għalkemm spiss kienu jiġu trattati bħala wħud maqtugħin mis-​soċjetà mill-​mexxejja reliġjużi. Il-​Liġi Mosajka kienet tgħid li dawk morda bil-​ġdiem kellhom jitpoġġew kwarantina minħabba raġunijiet taʼ saħħa, iżda ma kien hemm ebda bażi għan-​nuqqas taʼ qalb tajba. (Levitiku, kapitlu 13) Madankollu, iktar tard, ir-​regoli rabbiniċi kienu jgħidu li l-​imġiddmin kienu offensivi daqs il-​ħmieġ tal-​bniedem. Xi mexxejja reliġjużi saħansitra kienu jgaraw il-​ġebel lejn l-​imġiddmin biex iżommuhom ’il bogħod! Huwa diffiċli timmaġina kif dawk li kienu jiġu trattati b’dan il-​mod setgħu jrabbu l-​kuraġġ biex javviċinaw lil xi għalliem, iżda l-​imġiddmin kienu javviċinawh lil Ġesù. Wieħed minnhom lissen din l-​espressjoni magħrufa tal-​fidi: “Mulej, jekk trid, tista’ tnaddafni.” (Luqa 5:12) Fil-​kapitlu li jmiss, se niddiskutu t-​tweġiba taʼ Ġesù. Għalissa, biżżejjed ngħidu li ma jistax ikun hemm prova iktar ċara li Ġesù għamel lil oħrajn iħossuhom komdi javviċinawh.

11. Liema eżempju juri li dawk imtaqqlin bil-​ħtija ħassewhom liberi javviċinaw lil Ġesù, u dan għala huwa importanti?

¹¹ Dawk li ħassewhom imtaqqlin bil-​ħtija kienu jħossuhom liberi javviċinaw lil Ġesù. Per eżempju, aħseb dwar meta Ġesù kien qed jiekol fid-​dar taʼ wieħed Fariżew. Daħlet mara li kienet magħrufa bħala midinba u niżlet għarkopptejha ħdejn saqajn Ġesù, tibki minħabba l-​ħtija li kellha. Id-​dmugħ tagħha xarrablu saqajh, u hi użat xagħarha biex tixxottahomlu. Hekk kif dak li kien stieden lil Ġesù resaq lura għax ħassu diżgustat u kkritika lil Ġesù bl-​aħrax talli ħalla lil din il-​mara tersaq viċin, Ġesù b’qalb tajba faħħar lill-​mara taʼ l-​indiema sinċiera li wriet u żguraha li Ġeħova kien  ħafrilha. (Luqa 7:36-​50) Illum, iktar minn qatt qabel, in-​nies li huma mtaqqlin bil-​ħtija għandhom bżonn iħossuhom liberi javviċinaw lil dawk li jistgħu jgħinuhom jerġgħu jitħabbu m’Alla! X’kien li għamel lil Ġesù persuna daqshekk avviċinabbli?

12. Għala ma nistagħġbux li Ġesù kien avviċinabbli?

¹² Ftakar li Ġesù imita perfettament lill-​għażiż Missieru tas-​sema. (Ġwanni 14:9) Il-​Bibbja tfakkarna li Ġeħova “m’huwiex ’il bogħod minn kull wieħed minna.” (Atti 17:27) Ġeħova, “Semmiegħ it-​talb,” jinsab dejjem lest għall-​qaddejja leali tiegħu u għal kulmin irid isibu u jaqdih sinċerament. (Salm 65:2) Immaġina ftit—l-​iktar Persunaġġ setgħan u importanti fl-​univers huwa wkoll l-​iktar wieħed li tista’ tavviċinah! Bħal Missieru, Ġesù jħobbhom lin-​nies. Fil-​kapitli li jmiss, se niddiskutu l-​imħabba tant kbira li Ġesù kellu f’qalbu. Iżda Ġesù kien avviċinabbli prinċipalment minħabba li l-​imħabba tiegħu għan-​nies kienet evidenti. Ejja neżaminaw xi ftit mill-​kwalitajiet taʼ Ġesù li wrew imħabba bħal din.

13. Il-​ġenituri kif jistgħu jimitaw lil Ġesù?

¹³ In-​nies kienu jindunaw faċilment li Ġesù kien jimpurtah personalment minnhom. Dan l-​interess persunali ma telaqx f’daqqa waħda meta Ġesù kien taħt pressjoni. Bħalma diġà rajna, meta dawk il-​ġenituri ħadu lit-​tfal tagħhom għandu, Ġesù baqa’ jkun persuna avviċinabbli saħansitra anki meta kellu x’jagħmel u kien mgħobbi b’responsabbiltajiet kbar. X’eżempju ħalla għall-​ġenituri! It-​trobbija tat-​tfal hija taʼ sfida fid-​dinja taʼ llum. Madankollu, huwa vitali li t-​tfal iħossuhom komdi javviċinaw lill-​ġenituri tagħhom. Jekk int ġenitur, taf li jkun hemm drabi meta jkollok wisq x’tagħmel biex tagħti lil uliedek l-​attenzjoni li jkollhom bżonn. Minkejja dan, tista’ tiżgurahom li se tagħmel il-​ħin għalihom mill-​ iktar fis possibbli? Meta żżomm kelmtek, uliedek se jitgħallmu jgawdu barkiet talli juru paċenzja. Se jitgħallmu wkoll li huma dejjem jistgħu javviċinawk b’xi problema jew tħassib.

14-16. (a) Liema ċirkustanzi wasslu lil Ġesù biex iwettaq l-​ewwel miraklu tiegħu, u għala kien għemil meraviljuż? (b) Il-​miraklu taʼ Ġesù f’Kana x’jurina dwaru, u dan jipprovdi liema lezzjoni għall-​ġenituri?

¹⁴ Ġesù wera lin-​nies li hu kien jimpurtah mit-​tħassib tagħhom. Per eżempju, ikkunsidra l-​ewwel miraklu li wettaq Ġesù. Hu kien preżenti għal festa tat-​tieġ f’Kana, belt fil-​Galilija. Qamet problema imbarazzanti—l-​inbid spiċċa! Marija, omm Ġesù, qalet lil binha x’kien ġara. U Ġesù x’għamel? Hu qal lill-​qaddejja biex jimlew sitt ġarar kbar tal-​ġebel bl-​ilma. Meta taw ftit minnu lill-​kap tal-​festa, ara, kien inbid mill-​aqwa! Kienet din xi maġija, jew riżultat tal-​ħeffa taʼ l-​idejn? Le, l-​ilma ġie “mibdul fi nbid.” (Ġwanni 2:1-​11) Il-​bniedem ilu żmien twil joħlom li jbiddel oġġett f’ieħor. Għal sekli sħaħ, nies li jissejħu alkemisti pprovaw ibiddlu ċ-​ċomb f’deheb. Huma qatt ma rnexxielhom—għalkemm iċ-​ċomb u d-​deheb huma, fil-​fatt, elementi simili b’mod sinifikanti. * Xi ngħidu għall-​ilma u l-​inbid? Kimikament, l-​ilma huwa sempliċi, taħlita taʼ żewġ elementi bażiċi. Mill-​banda l-​oħra, fl-​inbid hemm kważi elf komponent, u ħafna minnhom huma taħlit komplikat! Ġesù għala wettaq għemil daqshekk meraviljuż sempliċement biex isolvi problema żgħira bħan-​nuqqas taʼ nbid f’festa tat-​tieġ?

¹⁵ Il-​problema ma kinitx waħda żgħira għall-​għarajjes. Fil-​Lvant Nofsani tal-​qedem, l-​ospitalità lejn il-​mistidnin kienet taʼ importanza kbira. Kien ikun t’għajb u mistħija  għall-​għarajjes meta l-​inbid fit-​tieġ tagħhom ma kienx iservi. Dan kien jitfa’ dell ikrah fuq il-​ġurnata tat-​tieġ tagħhom u fuq il-​memorji taʼ dan il-​jum fis-​snin taʼ wara. Il-​problema kienet taʼ importanza għalihom u anki għal Ġesù. Għalhekk, hu għamel xi ħaġa dwarha. Tista’ tara għalfejn in-​nies kienu javviċinawh bil-​problemi tagħhom?

¹⁶ Għal darb’oħra, il-​ġenituri jistgħu jitgħallmu lezzjoni siewja hawn. Xi ngħidu jekk uliedek javviċinawk, imtaqqlin b’xi problema? Int għandek mnejn tqis it-​tħassib tagħhom bħala xi ħaġa żgħira. Saħansitra għandek mnejn issib li hi tad-​daħq. Meta mqabbla mal-​problemi tiegħek stess, il-​problemi taʼ wliedek jistgħu tassew jidhru insinifikanti. Iżda ftakar li għat-​tfal ifissru ħafna! Jekk hija importanti għal dawk li tħobb b’tant għożża, m’għandhiex tkun importanti għalik ukoll? Jekk turi lit-​tfal tiegħek li int jimpurtak mill-​problemi tagħhom, int se tkun ġenitur avviċinabbli.

17. Ġesù ħalla liema eżempju rigward il-​fatt li kien ġwejjed, u din il-​kwalità għala hija evidenza taʼ saħħa?

 ¹⁷ Bħalma ddiskutejna f’Kapitlu 3, Ġesù kien ġwejjed u umli. (Mattew 11:29) Il-​ħlewwa hija kwalità sabiħa, prova soda taʼ l-​umiltà fil-​qalb taʼ persuna. Hija parti mill-​frott taʼ l-​ispirtu qaddis t’Alla u hija marbuta maʼ l-​għerf divin. (Galatin 5:22, 23; Ġakbu 3:13) Anki taħt l-​agħar provokazzjoni, Ġesù żamm kontroll fuqu nnifsu. Il-​fatt li kien ġwejjed żgur li ma jfissirx li kien dgħajjef. Wieħed studjuż qal hekk dwar din il-​kwalità: “Fil-​ġentilezza hemm il-​qawwa taʼ l-​azzar.” Tabilħaqq, spiss jeħtieġ li jkollna s-​saħħa biex irrażżnu t-​tempra tagħna u nittrattaw lil oħrajn b’mod ġwejjed. Iżda minħabba li Ġeħova jbierek l-​isforzi tagħna, aħna nistgħu nimitaw lil Ġesù billi nkunu ġwejdin, u dan jagħmilna persuni iktar avviċinabbli.

18. Liema eżempju juri kemm Ġesù kien raġunevoli, u għala taħseb li din il-​kwalità tista’ tagħmel persuna avviċinabbli?

¹⁸ Ġesù kien raġunevoli. Meta Ġesù kien f’Tir, resqet lejh mara għax bintha kienet “maħkuma bl-​ikrah minn demonju.” Bi tliet modi differenti, Ġesù indika li ma kienx se jagħmel dak li riedet hi. L-​ewwel, hu baqa’ sieket; it-​tieni, taha raġuni għala m’għandux jagħmel dak li talbitu; it-​tielet, ta tixbiha li għamlet il-​punt saħansitra iktar ċar. Madankollu, kienet l-​attitudni tiegħu bla sentiment, jew kien hu stinat? Kien qed jimplika li kienet f’riskju minħabba li kienet qed tażżarda tisfida raġel importanti bħal Ġesù? Le, mid-​dehra din il-​mara ħassitha komda. Hi mhux talli talbet l-​għajnuna, iżda talli ppersistiet minkejja li deher li ma kienx lest li jgħinha. Ġesù ra l-​fidi straordinarja li qanqlitha biex tippersisti, u hu fejjaq lil bintha. (Mattew 15:22-​28) Ir-​raġunevolezza taʼ Ġesù, il-​fatt li kien lest li jisma’ u li jċedi meta jkun xieraq, żgur li qanqlet lin-​nies javviċinawh!

19. Kif nistgħu nkunu nafu jekk aħniex verament avviċinabbli?

¹⁹ In-​nies iħobbu jqisu lilhom infushom bħala li huma  avviċinabbli. Per eżempju, xi wħud li għandhom pożizzjoni t’awtorità jħobbu jgħidu li huma dejjem lesti li jikkomunikaw maʼ kulħadd, u li dawk taʼ taħthom huma dejjem liberi li javviċinawhom. Madankollu, il-​Bibbja fiha din it-​twissija qawwija: “Ħafna huma dawk li jxandru l-​qalb tajba tagħhom stess, imma wieħed li juri fedeltà min jista’ jsibu?” (Proverbji 20:6) Faċli ngħidu li aħna avviċinabbli, iżda aħna verament leali f’li nimitaw dan l-​aspett taʼ l-​imħabba taʼ Ġesù? It-​tweġiba għal din il-​mistoqsija ma tinsabx fil-​mod kif inqisu lilna nfusna, iżda fil-​mod kif ħaddieħor iqis lilna. Pawlu qal: “Ħa jkun jaf kulħadd kemm intom raġunevoli.” (Filippin 4:5) Kull wieħed minna jagħmel tajjeb li jistaqsi lilu nnifsu: ‘Kif iqisuni oħrajn? X’reputazzjoni għandi?’

20. (a) Għala huwa importanti li l-​anzjani Kristjani jkunu avviċinabbli? (b) Għala għandna nkunu raġunevoli f’dak li nistennew mill-​anzjani tal-​kongregazzjoni?

²⁰ L-​anzjani Kristjani b’mod partikulari jistinkaw biex ikunu avviċinabbli. Huma jixtiequ bil-​ħerqa li jgħixu fi qbil mad-​deskrizzjoni mniżżla f’​Isaija 32:1, 2: “Kull wieħed ikun bħal post taʼ kenn mir-​riħ u lqugħ mill-​maltempata tax-​xita, bħal nixxigħat taʼ l-​ilma f’art bla ilma, bħad-​dell taʼ blata kbira f’art niexfa.” Anzjan jista’ jipprovdi protezzjoni, serħan, u għajnuna bħal dawn biss jekk jibqa’ jkun avviċinabbli. M’għandniex xi ngħidu, mhux dejjem faċli tagħmel dan, għax l-​anzjani jġorru piż tqil taʼ responsabbiltà  f’dawn iż-​żminijiet diffiċli. Minkejja dan, l-​anzjani jistinkaw biex qatt ma jagħtu l-​impressjoni li għandhom wisq x’jagħmlu biex jieħdu ħsieb il-​bżonnijiet tan-​nagħaġ taʼ Ġeħova. (1 Pietru 5:2) Membri oħrajn tal-​kongregazzjoni jipprovaw ikunu raġunevoli f’dak li jistennew minn irġiel leali bħal dawn, billi juru spirtu t’umiltà u kooperazzjoni.—Ebrej 13:17.

21. Il-​ġenituri kif jistgħu jkunu dejjem hemm għal uliedhom, u x’se nikkunsidraw fil-​kapitlu li jmiss?

²¹ Il-​ġenituri jistinkaw biex ikunu dejjem hemm għal uliedhom. Din hija kwistjoni serja! Huma jridu lil uliedhom ikunu jafu li jistgħu jafdaw f’missierhom jew ommhom. Għalhekk, il-​ġenituri Kristjani jieħdu ħsieb li jkunu ġwejdin u raġunevoli, billi ma jagħmluhomx bi kbar meta wliedhom jammettu li jkunu għamlu xi żball jew jesprimu xi ħsieb li ma jkunx xieraq. Hekk kif il-​ġenituri jħarrġu lil uliedhom bil-​paċenzja, huma jistinkaw biex iżommu l-​komunikazzjoni miftuħa. Fil-​fatt, ilkoll kemm aħna rridu nibqgħu avviċinabbli, bħalma kien Ġesù. Fil-​kapitlu li jmiss, se niddiskutu l-​mogħdrija mill-​qalb li wera Ġesù—waħda mill-​kwalitajiet prinċipali li għamlitu persuna avviċinabbli.