Qim lil Alla Kif Irid Hu

ĠESÙ qal f’talba lil Alla: “Dan ifisser il-​ħajja taʼ dejjem, li jieħdu għarfien dwarek, l-​uniku veru Alla, u dwar dak li inti bgħatt, Ġesù Kristu.” (Ġwann 17:3) Liema xorta taʼ għarfien? “Ir-​rieda [t’Alla] hi li kull xorta taʼ bnedmin għandhom jiġu salvati u jaslu għal għarfien eżatt tal-​verità.” (1 Timotew 2:4) The Amplified Bible jittraduċi l-​aħħar frażi b’dan il-​mod: “Ikunu jafu b’mod preċiż u b’mod korrett il-​Verità [divina].”

Mela Alla jridna nkunu nafu lilu u lill-​għanijiet tiegħu b’mod eżatt, fi qbil mal-​verità divina. U l-​Kelma t’Alla, il-​Bibbja Mqaddsa, hija s-​sors taʼ dik il-​verità. (Ġwann 17:17; 2 Timotew 3:​16, 17) Meta n-​nies isiru jafu b’mod eżatt dak li l-​Bibbja tgħid dwar Alla, allura m’humiex se jkunu bħal dawk imsemmijin f’Rumani 10:​2, 3, li kellhom “żelu għal Alla; imma mhux skond il-​għarfien eżatt.” Jew bħas-​Samaritani, li lilhom Ġesù qal: “Intom tqimu lil dak li ma tafux.”​—Ġwann 4:22.

Għalhekk, jekk irridu l-​approvazzjoni t’Alla, irridu nistaqsu lilna nfusna: Alla xi jgħid dwaru nnifsu? Kif irid hu li jiġi meqjum? X’inhuma l-​għanijiet tiegħu, u kif għandna aħna naqblu magħhom? Għarfien eżatt tal-​verità jagħtina t-​tweġibiet tajbin għal dawn il-​mistoqsijiet. Imbagħad inkunu nistgħu nqimu lil Alla kif irid hu.

Jiddiżonoraw lil Alla

“LIL DAWK li qed jonorawni jien se nonorahom,” igħid Alla. (1 Samwel 2:30) Iġiblu unur lil Alla li ssejjaħ lil xi ħadd ugwali miegħu? Iġiblu unur li ssejjaħ lil Marija “omm Alla” u l-​“Medjatriċi . . . bejn il-​Ħallieq u l-​ħlejjaq Tiegħu,” bħalma tagħmel in-​New Catholic Encyclopedia? Le, dawk l-​idejat jinsulentaw lil Alla. Ħadd ma hu ugwali miegħu; lanqas ma kellu omm tal-​laħam, ladarba Ġesù ma kienx Alla. U ma hemm ebda “Medjatriċi,” għax Alla ħatar biss “medjatur wieħed bejn Alla u l-​bnedmin,” Ġesù.​—1 Timotew 2:5; 1 Ġwann 2:​1, 2.

Mingħajr l-​iċken dubju, id-​duttrina tat-​Trinità ħawdet u gerfxet il-​fehma tan-​nies dwar il-​vera pożizzjoni t’Alla. Ma tħallix lin-​nies ikunu jafu b’mod eżatt lis-​Sovran Universali, Alla Jehovah, u ma tħallihomx iqimuh kif irid hu. Bħalma qal it-​teologu Hans Küng: “Għala għandu xi ħadd ikun irid li jżid xi ħaġa mal-​ideja taʼ Alla wieħed u uniku li tistaʼ biss tnaqqas jew ixxejjen dak l-​istat taʼ Alla wieħed u uniku?” Imma dak hu li għamel it-​twemmin fit-​Trinità.

Dawk li jemmnu fit-​Trinità m’humiex “iżommu ’l Alla b’għarfien eżatt.” (Rumani 1:28) Dak il-​vers igħid ukoll: “Alla telaqhom għal stat mentali diżapprovat, biex jagħmlu l-​affarijiet li m’humiex xierqa.” Versi 29 sa 31 jillistjaw xi ftit minn dawk l-​affarijiet ‘mhux xierqa,’ bħalma huma ‘l-​qtil, il-​ġlied, ma jaqblu qatt, m’għandhom ebda ġibda naturali, bla ħniena.’ Dawk l-​istess affarijiet ġew ipprattikati minn reliġjonijiet li jaċċettaw it-​Trinità.

Per eżempju, dawk li jemmnu fit-​Trinità spiss ippersegwitaw u saħansitra qatlu lil dawk li ma aċċettawx id-​duttrina tat-​Trinità. U huma marru saħansitra iktar ’il bogħod minn hekk. Huma qatlu lil sħabhom li jemmnu fit-​Trinità fi żmien taʼ gwerra. X’jistaʼ jkun iktar ‘mhux xieraq’ milli Kattoliċi joqtlu lil Kattoliċi, Ortodossi joqtlu lil Ortodossi, Protestanti joqtlu lil Protestanti​—ilkoll f’isem l-​istess Alla Trinitarjan?

Iżda, Ġesù qal biċ-​ċar: “B’dan kulħadd se jkun jaf li intom dixxipli tiegħi, jekk għandkom l-​imħabba bejnietkom.” (Ġwann 13:35) Il-​Kelma t’Alla tespandi fuq dan, billi tgħid: “It-​tfal t’Alla u t-​tfal tax-​Xitan huma evidenti minn dan il-​fatt: Kulmin ma jkomplix jagħmel it-​tjieba ma joriġinax minn Alla, lanqas ma jagħmel hekk dak li ma jħobbx lil ħuh.” Hija xxebbah lil dawk li joqtlu lil ħuthom spiritwali maʼ “Kajjin, li oriġina mal-​wieħed mill-​agħar [Satana] u biċċer lil ħuh.”​—1 Ġwann 3:​10-12.

B’hekk, it-​tagħlim taʼ duttrini li jħawdu lil dak li jkun dwar Alla wassal għal azzjonijiet li jiksru l-​liġijiet tiegħu. Tabilħaqq, dak li ġara fil-​Kristjaneżmu huwa dak li ġie deskritt mit-​teologu Daniż Søren Kierkegaard: “Il-​Kristjaneżmu qered lill-​Kristjanità mingħajr ma nduna.”

Il-kundizzjoni spiritwali tal-​Kristjaneżmu tixraq lil dak li kiteb l-​appostlu Pawlu: “Huma pubblikament jiddikjaraw li jafu lil Alla, imma jiċħduh bix-​xogħlijiet tagħhom, għaliex huma mistmerra u diżubbidjenti u m’humiex approvati għal xogħol tajjeb taʼ kwalunkwe xorta.”​—Titus 1:16.

Dalwaqt, meta Alla jġib lil din is-​sistema taʼ affarijiet ħażina u preżenti għat-​tmiem tagħha, il-​Kristjaneżmu Trinitarjan se jiġi mitlub jagħti kont. U hu se jkollu ġudizzju taʼ kundanna minħabba l-​azzjonijiet u d-​duttrini tiegħu li jġibu diżunur lil Alla.​—Mattew 24:​14, 34; 25:​31-34, 41, 46; Rivelazzjoni 17:​1-6, 16; 18:​1-8, 20, 24; 19:​17-21.

Taċċettax it-​Trinità

MA JISTAʼ jkun hemm ebda kompromess mal-​veritajiet t’Alla. Għalhekk, li tqim lil Alla kif irid hu jfisser li ma taċċettax id-​duttrina tat-​Trinità. Tikkuntradixxi lil dak li l-​profeti, Ġesù, l-​appostli, u l-​Kristjani bikrin emmnu u għallmu. Tikkuntradixxi lil dak li Alla jgħid dwaru nnifsu fil-​Kelma mnebbħa tiegħu stess. B’hekk, hu jagħti parir: “Irrikonoxxi li jien waħdi jien Alla u li ma hemm ħadd iżjed bħali.”​—Isaija 46:​9, TEV.

Wieħed ma jaqdix l-​interessi t’Alla billi jagħmlu mħawwad u misterjuż. Minflok, iktar maʼ n-​nies isiru mħawdin dwar Alla u l-​għanijiet tiegħu, iktar jieħu pjaċir l-​Avversarju t’Alla, Satana x-​Xitan, l-​‘alla taʼ din id-​dinja.’ Huwa hu li jġib ’il quddiem duttrini foloz bħal dawn biex ‘jagħmi l-​imħuħ taʼ dawk li ma jemmnux.’ (2 Korintin 4:4) U d-​duttrina tat-​Trinità taqdi wkoll l-​interessi tal-​kleru li jridu jżommu lin-​nies taħt idejhom, għax huma jagħmluh jidher bħal li kieku t-​teoloġi biss jistgħu jifhmuha.​—Ara Ġwann 8:44.

Għarfien eżatt dwar Alla jġib serħan kbir. Jeħlisna minn tagħlim li ma jaqbilx mal-​Kelma t’Alla u minn organizzazzjonijiet li apostatizzaw. Bħalma qal Ġesù: “Se tkunu tafu l-​verità, u l-​verità se teħliskom.”​—Ġwann 8:32.

Billi nonoraw lil Alla bħala suprem u billi nqimuh kif irid hu, aħna nistgħu nevitaw il-​ġudizzju li hu dalwaqt se jġib fuq il-​Kristjaneżmu apostat. Minflok, aħna nistgħu nħarsu ’l quddiem lejn il-​favur t’Alla meta tispiċċa din is-​sistema: “Id-​dinja qed tgħaddi u l-​istess ix-​xewqa tagħha, imma dak li jagħmel ir-​rieda t’Alla jibqaʼ għal dejjem.”​—1 Ġwann 2:17.

 [Stampa f’paġna 31]

Din l-​iskultura fi Franza li ilha sekli sħaħ tiffigura l-​inkurunazzjoni tal-​“verġni” Marija mit-​Trinità. Twemmin fit-​Trinità wassal għall-​venerazzjoni taʼ Marija bħala “Omm Alla”