APPENDIĊI

Jum il-​Ġudizzju​—X’Inhu?

KIF timmaġinah Jum il-​Ġudizzju? Ħafna jaħsbu li biljuni taʼ nies se jittieħdu wieħed wieħed quddiem it-​tron t’Alla. Hemmhekk, isir ġudizzju għal kull individwu. Xi wħud se jiġu premjati bi premju fis-​sema, u oħrajn se jiġu kundannati għal turment etern. Madankollu, il-​Bibbja tpinġi stampa differenti mhux ħażin taʼ dan il-​perijodu taʼ żmien. Il-​Kelma t’Alla turi li dan m’huwiex żmien taʼ biżaʼ, imma żmien taʼ tama u tiġdid.

F’Rivelazzjoni 20:​11, 12, naqraw id-​deskrizzjoni taʼ l-​appostlu Ġwanni dwar Jum il-​Ġudizzju: “Rajt tron kbir abjad u lil dak li kien bil-​qiegħda fuqu. Minn quddiemu ħarbu l-​art u s-​sema, u ma nstabx post għalihom. U rajt il-​mejtin, il-​kbar u ż-​żgħar, weqfin quddiem it-​tron, u nfetħu r-​rombli. U nfetaħ romblu ieħor, ir-​romblu tal-​ħajja. U l-​mejtin ġew ġudikati fuq dak li kien miktub fir-​rombli skond l-​għemejjel tagħhom.” Min hu l-​Imħallef deskritt hawnhekk?

Alla Ġeħova huwa l-​Imħallef suprem taʼ l-​umanità. Madankollu hu jiddelega x-​xogħol attwali taʼ l-​iġġudikar. Skond Atti 17:​31, l-​appostlu Pawlu qal li Alla “stabbilixxa jum li fih bi  ħsiebu jiġġudika l-​art abitata fis-​sewwa permezz taʼ bniedem li ħatar.” Dan l-​Imħallef maħtur huwa Ġesù Kristu rxoxtat. (Ġwanni 5:​22) Allura Jum il-​Ġudizzju meta jibda? Kemm idum?

Il-ktieb taʼ Rivelazzjoni juri li Jum il-​Ġudizzju jibda wara l-​gwerra t’Armageddon, meta s-​sistema li Satana għandu fuq l-​art se tkun meqruda. * (Rivelazzjoni 16:​14, 16; 19:19–​20:3) Wara Armageddon, Satana u d-​demonji tiegħu se jiġu maqfula f’abbiss għal elf sena. Matul dak iż-​żmien, il-​144,000 werrieta bi sħab se jkunu mħallfin u se ‘jsaltnu mal-​Kristu għal elf sena.’ (Rivelazzjoni 14:​1-3; 20:​1-4; Rumani 8:17) Jum il-​Ġudizzju m’huwiex xi ġrajja mgħaġġla li ddum 24 siegħa biss. Dan idum elf sena.

Matul il-​perijodu t’elf sena, Ġesù Kristu se “jiġġudika l-​ħajjin u l-​mejtin.” (2 Timotju 4:1) “Il-​ħajjin” se jkunu l-​“folla kbira” li jibqgħu ħajjin wara Armageddon. (Rivelazzjoni 7:​9-17) L-​appostlu Ġwanni ra wkoll “il-​mejtin . . . weqfin quddiem it-​tron” tal-​ġudizzju. Bħalma wiegħed Ġesù, “dawk kollha li qegħdin fl-​oqbra tat-​tifkira jisimgħu leħnu u joħorġu” permezz taʼ rxoxt. (Ġwanni 5:​28, 29; Atti 24:15) Imma fuq liema bażi se jiġi ġudikat kulħadd?

Skond il-​viżjoni taʼ l-​appostlu Ġwanni, “infetħu r-​rombli,” u “l-​mejtin ġew ġudikati fuq dak li kien miktub fir-​rombli skond l-​għemejjel tagħhom.” Fihom dawn ir-​rombli r-​rekord taʼ l-​għemejjel tal-​passat taʼ dawn in-​nies? Le, il-​ġudizzju mhux se jiffoka fuq dak li n-​nies għamlu qabel ma mietu. Dan kif nafuh? Il-​Bibbja tgħid: “Min miet inħeles mid-​dnub.” (Rumani 6:7) Għalhekk, dawk li rxoxtaw ġew lura għall-​ħajja b’folja ġdida, biex ngħidu hekk. Ir-​rombli b’hekk għandhom jirrappreżentaw iktar ħtiġijiet minn Alla. Sabiex jgħixu għal dejjem, kemm dawk li jibqgħu ħajjin wara Armageddon u kemm dawk irxoxtati se jkollhom jobdu l-​kmandamenti t’Alla, fosthom kwalunkwe ħtiġijiet ġodda li Ġeħova jistaʼ  jirrivela matul l-​elf sena. Għaldaqstant, l-​individwi se jiġu ġudikati fuq il-​bażi taʼ dak li jagħmlu matul Jum il-​Ġudizzju.

Jum il-​Ġudizzju se jagħti l-​ewwel opportunità lil miljuni taʼ nies biex jitgħallmu dwar ir-​rieda t’Alla u biex iżommu magħha. Dan ifisser li se jkun hemm xogħol edukattiv fuq skala kbira. Iva, “in-​nies tad-​dinja jitgħallmu l-​ġustizzja.” (Isaija 26:9) Madankollu, mhux kulħadd se jkun irid jimxi fi qbil mar-​rieda t’Alla. Isaija 26:10 jgħid: “Iħennu għall-​ħażin, imma dan is-​sewwa ma jitgħallimx; f’art id-​dritt jimxi bl-​imgħawweġ, u l-​kobor tal-​Mulej ma jqisux.” Dawn l-​uħud ħżiena se jingħataw il-​mewt għal dejjem matul Jum il-​Ġudizzju.​—Isaija 65.20.

Sa tmiem Jum il-​Ġudizzju, dawk li jibqgħu ħajjin se jkunu ‘ħadu l-​ħajja’ kompletament bħala nies perfetti. (Rivelazzjoni 20:5) Jum il-​Ġudizzju b’hekk se jara t-​tiġdid taʼ l-​umanità għall-​istat perfett li kellha fil-​bidu. (1 Korintin 15:​24-28) Imbagħad se jkun hemm test finali. Satana se jinħeles minn fejn ikun magħluq u se jitħalla jerġaʼ jqarraq bl-​umanità għall-​aħħar darba. (Rivelazzjoni 20:​3, 7-10) Dawk li jirreżistuh se jgawdu mit-​twettiq komplet tal-​wegħda li tagħmel il-​Bibbja: “Il-​ġusti jirtu l-​art, u jgħammru fiha għal dejjem.” (Salm 37:29) Iva, Jum il-​Ġudizzju se jkun barka għall-​umanità leali kollha!

[Nota taʼ taħt]