ĦARES lejn dawn is-​siġar twal, il-​fjuri sbieħ, u l-​muntanji għoljin. Kemm hawn sabiħ, hux? Ara ċ-​ċerva li qed tiekol minn id it-​tifel ċkejken! U ara l-​iljuni u ż-​żwiemel hemm fuq il-​ħaxix. Ma tixtieqx kieku tgħix f’dar f’post bħal dan?

Alla jridek tgħix għal dejjem f’ġenna fuq l-​art. Ma jridekx tbati mill-​uġigħ u l-​inkwiet li jkollhom in-​nies illum. Din hi l-​wegħda tal-​Bibbja għal dawk li se jgħixu fil-​ġenna tal-​art ġdida: ‘Alla se jkun magħhom. Mhux se jkun hemm iktar mewt jew biki jew uġigħ. L-​affarijiet taʼ qabel ikunu spiċċaw.’

Ġesù se jagħmel ċert li ssir din il-​bidla meraviljuża. Taf meta? Iva, wara li jnaddaf l-​art mill-​ħażen u min-​nies ħżiena kollha. Tinsiex, meta Ġesù kien fuq l-​art hu fejjaq lin-​nies minn kull xorta taʼ mard, u saħansitra qajjem lin-​nies mill-​mewt. Ġesù għamel dan biex juri x’kien se jagħmel mal-​art kollha meta jsir is-​Sultan tas-​Saltna t’Alla.

Aħseb ftit kemm se tkun tal-​għaġeb il-​ħajja fil-​ġenna ġdida fuq l-​art! Ġesù se jkun qed isaltan mis-​sema flimkien maʼ xi ftit minn dawk li jagħżel. Dawn il-​ħakkiema se jieħdu ħsieb lil kulħadd fuq l-​art u jagħmlu ċert li jkunu ferħanin. Ejja naraw xi rridu nagħmlu biex inkunu ċerti li Alla se jagħtina l-​ħajja taʼ dejjem fil-​ġenna tal-​art ġdida tiegħu.