QATT smajt dwar ħmara li titkellem? Probabbli tgħid: ‘Le. L-​annimali ma jistgħux jitkellmu.’ Imma l-​Bibbja tirrakkonta dwar ħmara li tkellmet. Ejja naraw kif ġara dan.

L-​Iżraelin huma kważi lesti biex jidħlu fl-​art taʼ Kangħan. Balak, is-​sultan taʼ Mowab, qed jibżaʼ mill-​Iżraelin. Għalhekk, jibgħat għal raġel jilħaqlu li jismu Balgħam biex jiġi u jisħet lill-​Iżraelin. Balak iwiegħed li se jagħti ħafna flus lil Balgħam, u għalhekk Balgħam jirkeb fuq il-​ħmara tiegħu u jitlaq biex jara lil Balak.

Ġeħova ma jridx li Balgħam jisħet lill-​poplu Tiegħu. Għalhekk jibgħat anġlu b’sejf twil biex jieqaf fit-​triq ħalli jwaqqaf lil Balgħam. Balgħam ma jistax jara lill-​anġlu, imma l-​ħmara tistaʼ. Allura l-​ħmara tibqaʼ tipprova ddur lil hinn mill-​anġlu, u fl-​aħħar sempliċement tinxteħet fl-​art fit-​triq. Balgħam jirrabja ħafna, u jsawwat lill-​ħmara b’ħatar.

Imbagħad Ġeħova jġiegħel lil Balgħam jismaʼ l-​ħmara tiegħu tkellmu. Il-​ħmara tistaqsi: ‘X’għamiltlek biex qed issawwatni?’

Balgħam jgħid: ‘Int għaddejtni biż-​żmien. Kieku kelli sejf kont noqtlok!’

‘Qatt xi darba għamiltlek hekk qabel?’ tistaqsi l-​ħmara.

‘Le,’ iwieġeb Balgħam.

Imbagħad Ġeħova jħalli ’l Balgħam jara lill-​anġlu bis-​sejf wieqaf fit-​triq. L-​anġlu jgħid: ‘Għalfejn sawwatt lill-​ħmara tiegħek? Jien ġejt biex nagħlaqlek triqtek, għax ma jmissekx sejjer biex tisħet lil Iżrael. Li kieku l-​ħmara tiegħek ma daritx minni, jien kont noqtlok, imma ma kontx inweġġa’ lill-​ħmara tiegħek.’

Balgħam jgħid: ‘Dnibt. Ma kontx naf li int kont wieqaf fit-​triq.’ L-​anġlu jħalli ’l Balgħam jitlaq, u Balgħam jibqaʼ sejjer biex jara ’l Balak. Xorta jipprova jisħet lil Iżrael, imma, minflok, Ġeħova jġiegħlu jbierek lil Iżrael tliet darbiet.