ĦARES lejn il-​frott li qed iġorru dawn l-​irġiel. Qed tara kemm hu kbir dak l-​għanqud għeneb? Hemm bżonn taʼ żewġt irġiel biex iġorruh fuq lasta. U ara t-​tin u r-​rummien. Minn fejn ġie dal-​frott sabiħ? Mill-​art taʼ Kangħan. Ftakar, Kangħan hu l-​post fejn darba kienu jgħixu Abraham, Iżakk, u Ġakobb. Imma minħabba l-​ġuħ li kien hemm, Ġakobb mal-​familja tiegħu marru jgħixu l-​Eġittu. Issa, xi 216-​il sena wara, Mosè qed imexxi lill-​Iżraelin lura lejn Kangħan. Waslu f’post fid-​deżert li jismu Kades.

Fl-​art taʼ Kangħan jgħixu nies ħżiena. Għalhekk Mosè jibgħat 12-​il spija, u jgħidilhom: ‘Tkixxfu kemm nies jgħixu hemm, u kemm huma b’saħħithom. U araw jekk l-​art hix tajba biex tkabbar l-​ikel. U kunu ċerti li ġġibu lura ftit mill-​frott.’

Meta l-​ispiji jiġu lura lejn Kades, huma jgħidu lil Mosè: ‘Veru pajjiż sabiħ.’ U biex juru li dan hu minnu, huma juru lil Mosè ftit mill-​frott. Imma 10 mill-​ispiji jgħidu: ‘In-​nies li jgħixu hemm huma kbar u b’saħħithom. Żgur joqtluna jekk nipprovaw nieħdu l-​art.’

L-​Iżraelin jibżgħu meta jisimgħu dan. Huma jgħidu: ‘Aħjar mitna fl-​Eġittu jew saħansitra hawn fid-​deżert. Żgur li joqtluna fil-​battalja, u jiħdulna n-​nisa u t-​tfal tagħna. Ejjew nagħżlu mexxej ġdid minflok Mosè, u nerġgħu lura l-​Eġittu!’

Iżda tnejn mill-​ispiji jafdaw f’Ġeħova, u jipprovaw jikkalmaw lin-​nies. L-​ispiji jisimhom Ġożwè u Kaleb. Dawn jgħidu: ‘Tibżgħux. Ġeħova magħna. Se jkun faċli li nieħdu l-​art.’ Imma n-​nies ma jisimgħux. Pjuttost ikunu jridu joqtlu lil Ġożwè u lil Kaleb.

Dan iġiegħel lil Ġeħova jirrabja ħafna u jgħid lil Mosè: ‘Ħadd min-​nies, minn 20 sena ’l fuq, mhu se jidħol fl-​art taʼ Kangħan. Huma raw il-​mirakli li għamilt fl-​Eġittu u fid-​deżert, imma xorta waħda ma jafdawnix. Għalhekk se jkollhom jiġġerrew fid-​deżert għal 40 sena sakemm imutu kollha. Ġożwè u Kaleb biss se jidħlu fl-​art taʼ Kangħan.’