GĦADDEW iktar minn 10 snin mindu s-​Sultan Nebukadnessar ħa f’Babilonja l-​Iżraelin kollha l-​iktar taʼ skola. U issa ara x’qed jiġri! Ġerusalemm qed tinħaraq. U l-​Iżraelin li ma nqatlux qed jittieħdu bħala priġunieri f’Babilonja.

Ftakar, dan hu dak li l-​profeti taʼ Ġeħova qalu li kien se jiġri jekk in-​nies ma jiqfux jagħmlu l-​ħażen. Imma l-​Iżraelin ma semgħux mill-​profeti. Huma baqgħu jqimu lill-​allat foloz minflok lil Ġeħova. Allura n-​nies ħaqqhom li jiġu kastigati. Aħna nafu dan għax il-​profeta t’Alla Eżekjel jgħidilna dwar l-​affarijiet ħżiena li kienu qed jagħmlu l-​Iżraelin.

Taf min hu Eżekjel? Huwa wieħed miż-​żgħażagħ li s-​Sultan Nebukadnessar ħa Babilonja iktar minn 10 snin qabel ma seħħet din il-​qerda kbira taʼ Ġerusalemm. Danjel u t-​tlett iħbieb tiegħu, Sidrak, Mesak, u Għabednego, ukoll kienu ttieħdu Babilonja fl-​istess żmien.

Waqt li Eżekjel għadu f’Babilonja, Ġeħova jurih l-​affarijiet ħżiena li qed jiġru f’Ġerusalemm ġot-​tempju. Ġeħova jagħmel dan permezz taʼ miraklu. Fil-​fatt, Eżekjel għadu f’Babilonja, imma Ġeħova jħallih jara dak kollu li qed jiġri fit-​tempju. U dak li jara Eżekjel ikexkxek!

Ġeħova jgħid lil Eżekjel: ‘Ara l-​affarijiet moqżieża li n-​nies qed jagħmlu hawn fit-​tempju. Ħares lejn il-​ħitan miksijin bi stampi taʼ sriep u annimali oħra. U ara l-​Iżraelin li qed iqimuhom!’ Eżekjel jistaʼ jara dawn l-​affarijiet, u hu jikteb dak li qed jiġri.

Ġeħova jistaqsi lil Eżekjel: ‘Qed tara x’qed jagħmlu bil-​moħbi l-​mexxejja Iżraelin?’ Iva, hu jistaʼ jara dan ukoll. Hemm 70 raġel, u kollha qed iqimu lill-​allat foloz. Qed jgħidu: ‘Ġeħova mhuwiex qed jarana. Hu telaq mill-​art.’

Imbagħad Ġeħova juri lil Eżekjel xi nisa ħdejn il-​bieb tat-​Tramuntana tat-​tempju. Huma bilqiegħda hemmhekk iqimu lill-​alla falz Tammuż. U ara dawk l-​irġiel fid-​daħla tat-​tempju taʼ Ġeħova! Hemm xi 25 minnhom. Eżekjel jarahom. Huma qed jinżlu għarkopptejhom lejn il-​Lvant u jqimu lix-​xemx!

‘Dawn in-​nies ma jirrispettawnix,’ jgħid Ġeħova. ‘Mhux talli jagħmlu affarijiet ħżiena imma jiġu fit-​tempju tiegħi biex jagħmluhom!’ Għalhekk Ġeħova jwiegħed: ‘Huma se jħossu l-​qawwa tar-​rabja tiegħi. U m’iniex se nitħassarhom meta jinqerdu.’

Huwa biss madwar tliet snin wara li Ġeħova juri dawn l-​affarijiet lil Eżekjel li l-​Iżraelin jirribellaw kontra s-​Sultan Nebukadnessar. Għalhekk hu jmur jiġġieled kontrihom. Wara sena u nofs il-​Babiloniżi jkissru s-​swar taʼ Ġerusalemm u jaħarqu l-​belt kollha. Il-​biċċa l-​kbira tan-​nies jinqatlu jew jittieħdu bħala priġunieri f’Babilonja.

Ġeħova għala ħalla din il-​qerda terribbli tiġri lill-​Iżraelin? Għax huma ma semgħux minn Ġeħova u m’obdewx il-​liġijiet tiegħu. Dan jurina kemm hu importanti li dejjem nagħmlu dak li jgħidilna Alla.

Għall-​ewwel xi ftit nies jitħallew joqogħdu fl-​art t’Iżrael. Is-​Sultan Nebukadnessar ipoġġi lil raġel Lhudi jismu Gedalija biex jieħu ħsieb lil dawn in-​nies. Imma mbagħad xi Iżraelin joqtlu lil Gedalija. Issa n-​nies jibżgħu li l-​Babiloniżi jiġu u jeqirduhom ilkoll minħabba din il-​ħaġa ħażina. Għalhekk iġiegħlu lil Ġeremija jmur magħhom, u jaħarbu l-​Eġittu.

Dan iħalli l-​art t’Iżrael vojta għalkollox min-​nies. Għal 70 sena ħadd ma jgħix f’dik l-​art. Lanqas bniedem wieħed ma jkun hemm. Iżda Ġeħova jwiegħed li ħa jġib lin-​nies tiegħu lura lejn l-​art wara 70 sena. Sadanittant, x’inhu jiġri lin-​nies t’Alla fl-​art taʼ Babilonja fejn ittieħdu? Ejja naraw.