TISTAʼ tara x’ġara? It-​tifel salva lil dan il-​ħaruf ċkejken mill-​ors. L-​ors ġie u ħataf lill-​ħaruf u kien se jieklu. Iżda t-​tifel ġera warajhom, u salva lill-​ħaruf minn ħalq l-​ors. U meta l-​ors qam, it-​tifel ta daqqa lill-​ors u qatlu! Darb’oħra, hu salva nagħġa minn iljun. Kemm hu kuraġġuż, hux? Taf min hu?

Dan hu ż-​żagħżugħ David. Hu jgħix fil-​belt taʼ Betlehem. Nannuh kien Għobed, it-​tifel taʼ Rut u Bogħaż. Tiftakarhom? U missier David hu Ġesse. David jieħu ħsieb in-​nagħaġ taʼ missieru. David twieled 10 snin wara li Ġeħova għażel lil Sawl biex ikun is-​sultan.

Jiġi ż-​żmien meta Ġeħova jgħid lil Samwel: ‘Ħu ftit miż-​żejt speċjali u mur fid-​dar taʼ Ġesse f’Betlehem. Jien għażilt wieħed mit-​tfal tiegħu biex ikun sultan.’ Meta Samwel jara lit-​tifel il-​kbir taʼ Ġesse, Eljab, hu jgħid lilu nnifsu: ‘Żgur li dan hu dak li Ġeħova għażel.’ Imma Ġeħova jgħidlu: ‘Tħarisx lejn kemm hu twil u gustuż. Jien m’għażiltux biex ikun sultan.’

Għalhekk, Ġesse jgħajjat lil ibnu Abinadab u jġibu għand Samwel. Imma Samwel jgħid: ‘Le, Ġeħova m’għażlux lanqas.’ Wara, Ġesse jġib lil ibnu Sammah. Samwel jgħid: ‘Le, Ġeħova m’għażlux lanqas.’ Ġesse jġib sebgħa minn uliedu quddiem Samwel, imma Ġeħova ma jagħżel lil ebda wieħed minnhom. ‘Dawn huma t-​tfal kollha?’ jistaqsi Samwel.

‘Għad hemm iż-​żgħir,’ jgħid Ġesse. ‘Imma qiegħed barra jieħu ħsieb in-​nagħaġ.’ Meta David jidħol, Samwel jistaʼ jara li hu tifel gustuż. Ġeħova jgħidlu: ‘Dan hu l-​wieħed. Ferraʼ ż-​żejt fuqu.’ U hekk jagħmel Samwel. Iż-​żmien għad jiġi meta David isir is-​sultan t’Iżrael.