“Ħadd minn Min Jgħammar Hemm Ma Jgħid: ‘Jien Marid’”
Kapitlu Sitta u Għoxrin
“Ħadd minn Min Jgħammar Hemm Ma Jgħid: ‘Jien Marid’”
1. Għala hu taʼ faraġ il-kliem taʼ Isaija 33:24?
“IL-ĦOLQIEN kollu għadu s’issa jitniehed bl-uġigħ tal-ħlas.” Hekk qal l-appostlu Pawlu. (Rumani 8:22) Minkejja l-avvanzi li saru fix-xjenza medika, il-mard u l-mewt ikomplu jaħqru lir-razza umana. Għalhekk, kemm hi taʼ l-għaġeb il-wegħda li biha tagħlaq din il-parti tal-profezija taʼ Isaija! Immaġina ż-żmien meta “ħadd minn min jgħammar hemm ma jgħid: ‘Jien marid.’” (Isaija 33:24) Meta u kif se titwettaq din il-wegħda?
2, 3. (a) Il-ġens taʼ Iżrael b’liema mod hu marid? (b) L-Assirja kif isservi bħala l-“ħatar” tad-dixxiplina minn Alla?
2 Isaija qed jikteb fi żmien meta l-poplu f’patt m’Alla hu marid spiritwalment. (Isaija 1:5, 6) Dan tant għodos fil-fond f’dik li hi apostasija u immoralità li jeħtieġ jiġi dixxiplinat bl-aħrax minn Alla Jehovah. Jehovah juża l-Assirja bħala l-“ħatar” tiegħu biex jamministra din id-dixxiplina. (Isaija 7:17; 10:5, 15) L-ewwel, is-saltna b’għaxar tribujiet taʼ Iżrael fit-tramuntana taqaʼ taħt idejn l-Assirjani fis-sena 740 Q.E.K. (2 Slaten 17:1-18; 18:9-11) Ftit snin wara, is-Sultan Sanħerib taʼ l-Assirja jibda jattakka bla ħniena s-saltna taʼ Ġuda fin-nofsinhar. (2 Slaten 18:13; Isaija 36:1) Hekk kif il-forza qawwija taʼ l-Assirja tiknes kollox quddiemha minn kulfejn tgħaddi fil-pajjiż, il-qerda totali taʼ Ġuda tidher li hi inevitabbli.
3 Imma l-Assirja, billi qed taqbeż il-limitu safejn għandha tiddixxiplina lin-nies t’Alla, qegħda issa ssus b’ambizzjoni rgħiba biex tikkonkwista d-dinja. (Isaija 10:7-11) Sejjer Jehovah jippermetti li ma jiġix kastigat il-mod bla qalb kif l-Assirja qed tittratta ħażin lin-nies tiegħu? Se jkun hemm fejqan għall-mard spiritwali tal-ġens? F’Isaija kapitlu 33, naqraw it-tweġibiet li Jehovah jagħti għal dawn il-mistoqsijiet.
Titħarbat Dik li Tħarbat
4, 5. (a) Kif se jinbidlu l-affarijiet għall-Assirja? (b) Isaija liema talba joffri għan-nom tal-poplu taʼ Jehovah?
4 Il-profezija tibda hekk: “Ħażin għalik, int li tħarbat u għadhom ma ħarbtukx; int li tqarraq, u għadhom ma qarrqux bik. Meta ma tħarbatx aktar, iħarbtuk; meta ma tqarraqx aktar, iqarrqu bik.” (Isaija 33:1) Isaija jindirizza direttament lill-Assirja, dik li tħarbat. Fil-quċċata tal-qawwa tiegħu, dan il-ġens aħrax jidher li ħadd ma jistaʼ għalih. Fil-fatt, hu ‘ħarbat avolja kien għadhom ma ħarbtuhx,’ billi għamel ħerba mill-bliet taʼ Ġuda, u saħansitra neżżaʼ d-dar taʼ Jehovah mill-ġid li kellha—u dan għamlu mingħajr ma donnu li ġie kastigat! (2 Slaten 18:14-16; 2 Kronaki 28:21) Iżda issa l-affarijiet se jinbidlu. “Iħarbtuk,” jiddikjara Isaija bi qlubija. Kemm hi taʼ faraġ din il-profezija għal dawk li huma leali!
5 Matul dan il-perijodu tal-biżaʼ, l-adoraturi leali taʼ Jehovah se jkollhom bżonn iduru lejh għall-għajnuna. B’hekk, Isaija jitlob: “Mulej ħenn għalina, fik nittamaw. Kun driegħ [taʼ saħħa u t’appoġġ] għalina kull filgħodu, u s-salvazzjoni tagħna fi żmien it-taħbit. Għall-ħsejjes taʼ l-għagħa ħarbu l-ġnus; mal-qawmien tiegħek xterdu l-popli.” (Isaija 33:2, 3) B’mod xieraq, Isaija jitlob li Jehovah jeħles lin-nies Tiegħu bħalma għamel ħafna drabi fil-passat. (Salm 44:4 [44:3, NW]; 68:2 [68:1, NW]) U malli Isaija joffri din it-talba, hu jbassar kif Jehovah se jweġibha!
6. X’se jiġrilha l-Assirja, u dan għala huwa xieraq?
6 “Nġabret il-priża [l-Assirjani], bħalma jinġabru l-ġradijiet; jinxteħtu fuqha bħalma jinxteħet il-ġrad.” (Isaija 33:4) Ġuda hija familjari maʼ l-invażjonijiet qerrieda taʼ l-insetti. Iżda, din id-darba huma l-għedewwa taʼ Ġuda li se jinqerdu. L-Assirja se ssofri telfa umiljanti, u s-suldati tagħha se jiġu mġagħlin jaħarbu, u b’hekk iħallu warajhom priża kbira li se tinġabar mill-abitanti taʼ Ġuda! Huwa biss xieraq li l-Assirja, magħrufa għall-ħruxija tagħha, iġġarrab x’ifisser li tiġi mħarbta.—Isaija 37:36.
L-Assirjan taʼ Żmienna
7. (a) Min illum jistaʼ jitqabbel mal-ġens taʼ Iżrael li hu marid spiritwalment? (b) Min se jservi bħala l-“ħatar” taʼ Jehovah biex jeqred lill-Kristjaneżmu?
7 Il-profezija taʼ Isaija kif tapplika fi żmienna? Il-ġens marid spiritwalment taʼ Iżrael jistaʼ jitqabbel mal-Kristjaneżmu li mhux leali. Sewwa sew bħalma Jehovah uża l-Assirja bħala “ħatar” biex jikkastiga lill-Iżrael, hekk ukoll se juża “ħatar” biex jikkastiga lill-Kristjaneżmu—kif ukoll lill-bqija taʼ l-imperu dinji taʼ reliġjon falza, “Babilonja l-Kbira.” (Isaija 10:5; Apokalissi 18:2-8) Dan il-“ħatar” se jkun jikkonsisti fi ġnus li huma membri tal-Ġnus Magħquda—organizzazzjoni li f’Apokalissi hija rappreżentata bħala Bhima taʼ lewn aħmar dagħmieni b’sebat irjus u għaxart iqrun.—Apokalissi 17:3, 15-17.
8. (a) Min illum jistaʼ jitqabbel maʼ Sanħerib? (b) Sanħerib taʼ żmienna lil min se jażżarda jattakka, u x’se jkun ir-riżultat?
8 Meta l-Assirjan taʼ żmienna jgħaddi b’saħħa kbira minn ġol-qasam tar-reliġjon falza, se jkun jidher bħallikieku li ħadd u xejn ma jistaʼ jwaqqfu. B’attitudni bħal dik taʼ Sanħerib, Satana x-Xitan se jażżarda jattakka—mhux biss lill-organizzazzjonijiet apostati li jixirqilhom kastig imma wkoll lill-Kristjani veri. Flimkien maʼ dawk li fadal mill-ulied spiritwali midlukin taʼ Jehovah, miljuni sħaħ taʼ nies li ħarġu mid-dinja taʼ Satana, li tinkludi lil Babilonja l-Kbira, jieħdu l-waqfa tagħhom fuq in-naħa tas-Saltna taʼ Jehovah. Peress li jirrabja għaliex il-Kristjani veri ma jkunux iridu jagħtuh qima, Satana, “l-alla taʼ din id-dinja,” se jibda jattakkahom bla ħniena. (2 Korintin 4:4; Eżekjel 38:10-16) Għalkemm dan l-attakk se jkun bla dubju tal-biżaʼ, in-nies taʼ Jehovah mhux se jkollhom għalfejn jitwerwru u jċedu. (Isaija 10:24, 25) Għandhom l-assiguranza mingħand Alla li hu se jkun ‘is-salvazzjoni tagħhom fi żmien it-taħbit.’ Hu se jindaħal, billi jġib ħerba fuq Satana u l-folla tiegħu. (Eżekjel 38:18-23) Sewwa sew bħalma ġara fil-qedem, dawk li jipprovaw iħarbtu lin-nies t’Alla se jiġu mħarbtin huma stess! (Qabbel Proverbji 13:22b.) Isem Jehovah se jitqaddes, u dawk li jibqgħu ħajjin se jiġu premjati talli jkunu fittxew ‘l-għerf u s-sapjenza u l-biżaʼ taʼ Alla.’—Aqra Isaija 33:5, 6.
Twissija għan-Nies bla Fidi
9. (a) X’se jagħmlu ‘l-qalbenin’ u ‘l-messaġġiera tas-sliem’ minn Ġuda? (b) L-Assirjan kif se jwieġeb għall-passi li Ġuda tieħu biex iġġib il-paċi?
9 Iżda, x’se jkun it-tmiem taʼ nies bla fidi li jgħixu f’Ġuda? Isaija jagħti deskrizzjoni kerha tal-kundanna li ġejja fuqhom minn taħt idejn l-Assirja. (Aqra Isaija 33:7.) “In-nies taʼ Arjel [jew, il-qalbenin]” fl-armata taʼ Ġuda jgħajtu bil-biżaʼ meta jaraw l-Assirjani javanzaw. “Il-messaġġiera taʼ Salem,” diplomatiċi mibgħutin biex jinnegozjaw il-paċi mal-gwerriera Assirjani, jiffaċċjaw twaqqigħ għaċ-ċajt u umiljazzjoni. Se jibku biki taʼ mrar minħabba li ma jirnexxilhomx f’dan. (Qabbel Ġeremija 8:15.) L-Assirjan kiefer mhux se jitħassarhom. (Aqra Isaija 33:8, 9.) Se jinjora bla ħniena l-pattijiet li għamel maʼ l-abitanti taʼ Ġuda. (2 Slaten 18:14-16) L-Assirjan se ‘jistmerrhom’ il-bliet taʼ Ġuda, billi jħares lejhom b’disprezz u tmaqdir, għax m’għandu ebda rispett lejn il-ħajja umana. Is-sitwazzjoni se tkun tant imwegħra li l-pajjiż innifsu bħallikieku se jinfena bil-vistu. Il-Libanu, Saron, Basan, u Karmel se jitnikktu bl-istess mod minħabba l-ħerba.
10. (a) ‘Il-qalbenin’ tal-Kristjaneżmu għala se jkunu hemm għalxejn? (b) Min se jipproteġihom lill-Kristjani ġenwini matul jum in-niket tal-Kristjaneżmu?
10 Ċirkustanzi simili bla dubju se jiżviluppaw fil-futur qarib meta l-ġnus jiftħu l-attakk tagħhom fuq ir-reliġjon. Bħalma ġara fi żmien Ħeżekija, se jkun għalxejn li wieħed jirreżisti fiżikament dawn il-forzi qerrieda. Il-qalbenin tal-Kristjaneżmu—il-politikanti, il-finanzieri, u nies prominenti oħrajn tiegħu—mhux se jkunu jistgħu jiġu jagħtuh l-għajnuna. ‘Pattijiet,’ jew ftehim, politiċi u finanzjarji mfasslin biex jipproteġu l-interessi tal-Kristjaneżmu se jitħassru. (Isaija 28:15-18) Attentati ddisprati biex il-qerda tinżamm ’il bogħod permezz tad-diplomazija se jfallu. L-attivitajiet kummerċjali se jieqfu, hekk kif il-propjetà u l-investiment tal-Kristjaneżmu jiġu konfiskati jew meqrudin. Kulmin jibqagħlu xi sentimenti taʼ ħbiberija għall-Kristjaneżmu ma jkun jistaʼ jagħmel xejn ħlief li jieqaf ’il bogħod u jibki t-telfa tiegħu. (Apokalissi 18:9-19) Sejra l-Kristjanità vera tinkines mal-falza? Le, għax Jehovah nnifsu jagħti l-assiguranza: “‘Issa nqum!’ jgħid il-Mulej, ‘Issa nqum fuq qaddi; issa nogħla ’l fuq.’” (Isaija 33:10) Finalment, Jehovah se jindaħal għan-nom taʼ nies leali, bħal Ħeżekija, u ma jħallix lill-Assirjan javanza iktar.—Salm 12:6 [12:5, NW].
11, 12. (a) Il-kliem taʼ Isaija 33:11-14 meta u kif jitwettaq? (b) Il-kliem taʼ Jehovah liema twissija jagħti għal żmienna?
11 Dawk li m’humiex leali ma jistgħux jistrieħu fuq din il-protezzjoni. Jgħid Jehovah: “Intom ħbiltu l-ħuxlief, u issa tildu t-tiben; nifsi bħan-nar jikolkom. U l-ġnus jinħarqu bħal kalkara tal-ġir, bħal xwiek maqtugħa u mogħtija n-nar. Intom li fil-bogħod tinsabu, isimgħu jien x’għamilt! Intom li qegħdin fil-qrib, kunu afu bis-setgħa tiegħi! Il-ħatja f’Sijon twerwru, fuq il-ħżiena waqaʼ l-biżaʼ. Min minna se joqgħod maʼ nar qerriedi? Min minna se joqgħod maʼ nirien dejjem iħeġġu?” (Isaija 33:11-14) Huwa evidenti li dan il-kliem japplika għaż-żmien meta Ġuda tiffaċċja għadu ġdid, Babilonja. Wara li jmut Ħeżekija, Ġuda terġaʼ tmur lura lejn it-triqat mill-agħar tagħha. Matul is-snin li ġejjin, il-kundizzjonijiet f’Ġuda tant imorru għall-agħar li l-ġens kollu kemm hu jkollu jsofri n-nar tal-qilla t’Alla.—Dewteronomju 32:22.
12 Pjanijiet u proġetti mill-agħar imfasslin minn uħud diżubbidjenti biex jevitaw il-ġudizzju t’Alla jtiru mar-riħ bħat-tiben. Fil-fatt, dan l-istess spirtu kburi u ribelluż tal-ġens se jagħti bidu għall-ġrajjiet li jwasslu għall-qerda tiegħu. (Ġeremija 52:3-11) Uħud mill-agħar se jsiru “bħal kalkara tal-ġir”—meqrudin għalkollox! Hekk kif jimmeditaw fuq din il-kundanna li ġejja fuqhom, l-abitanti ribellużi taʼ Ġuda se jħosshom ħażin bil-biżaʼ. Il-kliem li Jehovah qal lil Ġuda li ma baqgħetx leali jagħti stampa tas-sitwazzjoni li jinsabu fiha l-membri tal-Kristjaneżmu llum. Jekk ma jagħtux kas it-twissija t’Alla, futur ikrah hemm jistenniehom.
‘Jimxu Kontinwament fis-Sewwa’
13. X’wegħda ssir lil min ‘jimxi kontinwament fis-sewwa,’ u din kif twettqet fil-każ taʼ Ġeremija?
13 Bħala kuntrast, Jehovah mbagħad jgħid: “Min jimxi fis-sewwa u jgħid id-dritt, min jistmerr il-qligħ miksub bil-qerq, min iwarrab idejh biex ma jixxaħħamx, min isodd widnejh biex b’tixrid id-dmija ma jismax, min jagħlaq għajnejh biex ħażen ma jarax: dan jgħammar fl-għoli: fortizza taż-żonqor il-kenn tiegħu, il-ħobż tiegħu jsibu, u l-ilma qatt ma jonqsu.” (Isaija 33:15, 16) Bħalma jesprimiha f’post ieħor l-appostlu Pietru, “jaf mela l-Mulej jeħles it-tajbin mit-tiġrib u jħalli l-ħżiena biex jieħdu l-kastig f’jum il-ġudizzju.” (2 Pietru 2:9) Ġeremija jġarrab dan il-ħelsien. Matul l-assedju minn Babilonja, in-nies kellhom “b’qalbhom ittaqtaq . . . jiżnu l-ħobż li jieklu.” (Eżekjel 4:16) Xi nisa saħansitra kielu l-laħam taʼ wliedhom stess. (Lamentazzjonijiet 2:20) Madankollu, Jehovah ħa ħsieb li Ġeremija jinżamm fis-sigurtà.
14. Il-Kristjani llum kif jistgħu jibqgħu ‘mexjin kontinwament fis-sewwa’?
14 Il-Kristjani llum iridu bl-istess mod ‘jimxu kontinwament fis-sewwa,’ billi josservaw kuljum il-livelli taʼ Jehovah. (Salm 15:1-5) Iridu ‘jgħidu s-sewwa’ u jiċħdu l-gideb u n-nuqqas taʼ verità. (Proverbji 3:32) Il-qerq u t-tixħim għandhom mnejn li huma aċċettati f’ħafna pajjiżi, imma huma moqżieża għal min ‘jimxi kontinwament fis-sewwa.’ Il-Kristjani jridu jżommu wkoll “kuxjenza safja” fin-negozju, billi bil-galbu jevitaw proġetti dubjużi jew qarrieqa. (Lhud 13:18; 1 Timotju 6:9, 10) U min ‘sadd widnejh biex b’tixrid id-dmija ma jismax u għalaq għajnejh biex ħażen ma jarax’ se joqgħod attent meta jagħżel il-mużika u d-divertiment. (Salm 119:37) F’jum il-ġudizzju tiegħu, Jehovah se jipproteġi u jwieżen lill-adoraturi tiegħu, li jgħixu fi qbil maʼ dawn il-livelli.—Sofonija 2:3.
Jaraw lis-Sultan Tagħhom
15. Liema wegħda se twieżen lil-Lhud leali fl-eżilju?
15 Isaija mbagħad jagħti din id-dehra mill-isbaħ dwar il-futur: “Jaraw għajnejk sultan fi ġmielu, jaraw art mifruxa ’l bogħod. Ħsiebek imur fuq it-twerwir li għadda: ‘Fejn hu dak li jgħodd? Fejn hu dak li jiżen? Fejn hu min jgħodd il-fortizzi?’ Ma tarax iżjed poplu qalil, poplu bi lsien tqil li ma tifhmux, b’ilsien itemtem li ma tfissrux.” (Isaija 33:17-19) Il-wegħda li fil-futur se jkun hemm Sultan Messjaniku bis-Saltna tiegħu se twieżen lil-Lhud leali matul is-snin twal taʼ eżilju f’Babilonja, avolja dik is-Saltna jistgħu jarawha biss mill-bogħod. (Lhud 11:13) Meta l-ħakma tal-Messija finalment issir realtà, it-tirannija taʼ Babilonja se tkun għoddha ntesiet. Dawk li jibqgħu ħajjin wara l-attakk taʼ l-Assirjan se jistaqsu bil-ferħ: “Fejn huma l-fizzjali tat-tirann, li ntaxxawna, għabbewna, ħadulna l-ħaraġ?”—Isaija 33:18, Moffatt.
16. In-nies t’Alla minn meta setgħu “jaraw” lis-Sultan Messjaniku, u b’liema riżultat?
16 Għalkemm kliem Isaija jiggarantixxi li se jkun hemm min jirritorna mill-jasar taħt Babilonja, eżiljati Lhud individwali se jkollhom jistennew l-irxoxt biex igawdu t-twettiq sħiħ taʼ din il-parti mill-profezija. Xi ngħidu għall-qaddejja t’Alla llum? Mill-1914 ’l hawn, in-nies taʼ Jehovah setgħu “jaraw,” jew jirrikonoxxu, lis-Sultan Messjaniku, Ġesù Kristu, fil-ġmiel spiritwali kollu tiegħu. (Salm 45:3 [45:2, NW]; 118:22-26) B’riżultat taʼ dan, ma baqgħux iktar oppressi u maħkumin mis-sistema mill-agħar taʼ Satana, imma jgawdu l-vera sigurtà spiritwali taħt Sijon, il-post fejn tinsab is-Saltna t’Alla.
17. (a) Liema wegħdi jintgħamlu rigward Sijon? (b) Il-wegħdi taʼ Jehovah rigward Sijon kif jitwettqu fuq is-Saltna Messjanika u fuq dawk li jappoġġawha mad-dinja kollha?
17 Ikompli Isaija: “Ħares lejn Sijon, il-belt taʼ festi tagħna! Jaraw għajnejk ’il Ġerusalemm, dar is-sliem, għarix ma jħarrku ħadd; il-kunjardi tagħha ma jaqlagħhom ħadd; il-ħbula tagħha ma jinqatgħu b’xejn. Għax hemm għalina jkun il-kobor tal-Mulej, hemmhekk ix-xmajjar u l-widien wesgħin, mnejn ebda ġifen bl-imqadef ma jgħaddi, u lanqas ma jaqsmu xwieni kbar.” (Isaija 33:20, 21) Isaija jassigurana li s-Saltna Messjanika t’Alla la tistaʼ tiġi mqaċċta mill-għeruq u lanqas meqruda. Iktar minn hekk, jidher ċar li din il-protezzjoni jgawduha wkoll dawk in-nies leali madwar id-dinja li llum jappoġġaw is-Saltna. Saħansitra jekk ħafna individwi jgħaddu minn provi ħorox, is-sudditi tas-Saltna t’Alla huma assigurati li l-ebda sforz biex jinqerdu bħala kongregazzjoni m’għandu ċans jirnexxi. (Isaija 54:17) Jehovah se jipproteġi lin-nies tiegħu bħalma foss jew gandott kbir jipproteġi belt. Kull għadu li jiġi kontrihom—saħansitra jekk ikun qawwi daqs “ġifen bl-imqadef” jew ‘xini kbir’—se jiffaċċja l-qerda!
18. Jehovah liema responsabbiltà jaċċetta?
18 Iżda, dawk li jħobbu s-Saltna t’Alla għala jistgħu jħossuhom daqshekk fiduċjużi mill-protezzjoni divina? Jispjega Isaija: “Il-Mulej hu l-imħallef tagħna; il-Mulej il-leġislatur tagħna. Il-Mulej is-sultan tagħna, hu li jsalvana.” (Isaija 33:22) Jehovah jaċċetta r-responsabbiltà li jipproteġi u jidderieġi lin-nies tiegħu, li jirrikonoxxu l-pożizzjoni tiegħu bħala Sovran Suprem. Dawn minn rajhom jissottomettu ruħhom taħt il-ħakma tiegħu f’idejn is-Sultan Messjaniku tiegħu, waqt li jirrikonoxxu li Jehovah mhux biss għandu l-awtorità li jagħmel il-liġijiet imma wkoll li jara li dawn jitwettqu. Madankollu, peress li Jehovah jħobb is-sewwa u l-ħaqq, il-ħakma tiegħu, permezz taʼ Ibnu, m’hijiex taʼ piż għall-adoraturi tiegħu. Minflok, huwa ‘għall-ġid tagħhom’ li jissottomettu ruħhom taħt l-awtorità tiegħu. (Isaija 48:17) Hu qatt ma se jitlaq lin-nies leali tiegħu.—Salm 37:28.
19. Isaija kif jiddeskrivi kemm se jkunu dgħajfin l-għedewwa tan-nies leali taʼ Jehovah?
19 Isaija jgħid lill-għedewwa tan-nies leali taʼ Jehovah: “Rħew il-ħbula tiegħek, ma jżommux aktar l-arblu f’postu, ma jifirxux aktar il-qlugħ. Mbagħad l-għomja jaqsmu priża kbira, u z-zopop ikollhom sehem fil-ħatfa.” (Isaija 33:23) Kull għadu li jersaq se jkun ma jiswa xejn u dgħajjef kontra Jehovah bħal bastiment tal-gwerra bi ħbula maħlulin, b’arblu jixxengel, u mingħajr qlugħ. Tant se jkun hemm priża x’tittieħed wara l-qerda taʼ l-għedewwa t’Alla li saħansitra l-għomja u z-zopop se jieħdu sehem fil-ħtif tagħha. Għalhekk nistgħu nkunu fiduċjużi li permezz tas-Sultan Ġesù Kristu, Jehovah se jittrijonfa fuq l-għedewwa tiegħu fit-“taħbit il-kbir” li ġej.—Apokalissi 7:14.
Fejqan
20. In-nies t’Alla se jġarrbu liema tip taʼ fejqan, u meta?
20 Din is-silta mill-profezija taʼ Isaija tagħlaq b’wegħda li tqawwi l-qalb: “Ħadd minn min jgħammar hemm ma jgħid: ‘Jien marid.’ Il-poplu li hemm fiha tinħafirlu ħżunitu.” (Isaija 33:24) Il-mard li jitkellem dwaru Isaija huwa primarjament spiritwali, għax huwa marbut mad-dnub, jew il-‘ħażen.’ Meta dan il-kliem jitwettaq għall-ewwel darba, Jehovah jwiegħed li wara li jinħelsu mill-jasar f’Babilonja, in-nies tal-ġens se jitfejqu spiritwalment. (Isaija 35:5, 6; Ġeremija 33:6; qabbel Salm 103:1-5.) Wara li jkunu nħafrulhom id-dnubiet li jkunu għamlu qabel, il-Lhud li jirritornaw se jistabbilixxu mill-ġdid il-qima safja f’Ġerusalemm.
21. L-adoraturi taʼ Jehovah llum b’liema mod iġarrbu fejqan spiritwali?
21 Madankollu, il-profezija taʼ Isaija għandha twettiq modern. Illum, in-nies taʼ Jehovah wkoll gawdew fejqan spiritwali, billi ġew meħlusin minn tagħlim falz bħalma hu l-immortalità tar-ruħ, it-Trinità, u n-nar taʼ l-infern. Huma jirċievu gwida morali, u din tilliberahom minn drawwiet immorali u tgħinhom jieħdu deċiżjonijiet tajbin. U grazzi għas-sagrifiċċju taʼ Ġesù Kristu li tħallas bħala prezz tal-fidwa, huma jidhru nodfa quddiem Alla u jgawdu kuxjenza safja. (Kolossin 1:13, 14; 1 Pietru 2:24; 1 Ġwann 4:10) Dan il-fejqan spiritwali għandu benefiċċji fiżiċi. Per eżempju, il-fatt li jevitaw is-sess immorali u l-użu taʼ prodotti tat-tabakk jipproteġi lill-Kristjani minn mard trasmess sesswalment u minn ċerti għamliet taʼ kanċer.—1 Korintin 6:18; 2 Korintin 7:1.
22, 23. (a) Isaija 33:24 xi twettiq grandjuż se jkollu fil-futur? (b) X’inhi d-determinazzjoni taʼ l-adoraturi veri llum?
22 Iktar minn hekk, se jkun hemm twettiq iktar grandjuż tal-kliem taʼ Isaija 33:24 wara Armageddon, fid-dinja l-ġdida t’Alla. Taħt il-ħakma tas-Saltna Messjanika, il-bnedmin se jġarrbu fejqan fiżiku kbir flimkien mal-fejqan spiritwali li kisbu. (Apokalissi 21:3, 4) Ftit wara l-qerda tas-sistema taʼ Satana, bla dubju mad-dinja kollha se jseħħu mirakli bħal dawk li wettaq Ġesù meta kien fuq l-art. L-għomja se jaraw, it-torox se jisimgħu, iz-zopop se jimxu! (Isaija 35:5, 6) Minħabba f’hekk, dawk kollha li jibqgħu ħajjin wara t-tribulazzjoni l-kbira se jkunu jistgħu jieħdu sehem fix-xogħol grandjuż li jġibu l-art f’kundizzjoni taʼ ġenna.
23 Iktar tard, meta jibda l-irxoxt, dawk li jiġu lura għall-ħajja bla dubju se jitqajmu f’saħħithom. Imma hekk kif il-valur tas-sagrifiċċju li tħallas bħala prezz tal-fidwa jissarraf u jinfirex dejjem iżjed, dan se jġib iktar benefiċċji fiżiċi, sakemm il-bnedmin jitgħollew għall-perfezzjoni. Imbagħad, it-twajbin se ‘jieħdu l-ħajja’ fis-sens l-iktar sħiħ. (Apokalissi 20:5, 6) F’dak iż-żmien, kemm spiritwalment u kemm fiżikament, “Ħadd minn min jgħammar hemm ma jgħid: ‘Jien marid.’” X’wegħda eċċitanti! Jalla l-adoraturi veri kollha llum jiddeċiedu li jkunu fost dawk li se jġarrbu t-twettiq taʼ din il-wegħda!
[Mistoqsijiet taʼ Studju]
[Stampa f’paġna 344]
Isaija jitlob bil-fiduċja lil Jehovah
[Stampa f’paġna 353]
Grazzi għas-sagrifiċċju li tħallas bħala prezz tal-fidwa, in-nies taʼ Jehovah jidhru nodfa quddiemu
[Stampa f’paġna 354]
Fid-dinja l-ġdida, se jkun hemm fejqan fiżiku kbir
