Kapitlu Sitta

Alla Jehovah Juri Ħniena lil Fdal

Isaija 4:​2-6

1, 2. Il-​profeta Isaija x’ibassar dwar Ġuda u Ġerusalemm?

 MALTEMPATA vjolenti tolqot reġjun fejn hemm popolazzjoni kbira. Irjieħ qawwijin, xita bil-​qliel, u għargħar taʼ qawwa kbira ħallew il-​marka tagħhom mal-​pajjiż kollu, billi qerdu djar, għamlu l-​ħsara lill-​uċuħ tar-​rabaʼ, u qatlu ħafna nies. Imma l-​maltempata tgħaddi malajr, u warajha tħalli perijodu taʼ kalma. Għal dawk li baqgħu ħajjin, dan huwa żmien taʼ restawr u bini mill-​ġdid.

² Il-​profeta Isaija jbassar xi ħaġa simili dwar Ġuda u Ġerusalemm. Is-​sħab tal-​maltempata taʼ ġudizzju divin riesaq b’theddida​—u bir-​raġun! Il-​ħtija tal-​ġens hija kbira ħafna. Kemm il-​ħakkiema u kemm in-​nies imlew il-​pajjiż bl-​inġustizzji u bit-​tixrid taʼ demm. Permezz taʼ Isaija, Jehovah jikxef il-​ħtija taʼ Ġuda u jwissi li Hu se jesegwixxi ġudizzju fuq dak il-​ġens delinkwenti. (Isaija 3:25) Il-​pajjiż taʼ Ġuda se jitħalla ħerba għalkollox wara li tgħaddi din il-​maltempata. Dan il-​prospett bilfors li jsewwidlu qalbu lil Isaija.

3. Liema aħbar tajba fih il-​messaġġ ispirat taʼ Isaija 4:​2-6?

³ Imma hemm aħbar tajba! Il-​maltempata tal-​ġudizzju taʼ tjieba taʼ Jehovah se tgħaddi, u se jkun hemm fdal li jibqaʼ ħaj. Iva, il-​ġudizzju taʼ Jehovah fuq Ġuda se jkun bilanċjat bil-​ħniena! Il-​messaġġ ispirat taʼ Isaija dokumentat f’Isaija 4:​2-6 jħares ’il quddiem lejn dan iż-​żmien imbierek. Huwa bħallikieku x-​xemx tfeġġ minn wara s-​sħab; ix-​xena  tinbidel mid-​dehriet u l-​ħsejjes taʼ ġudizzju​—deskritti f’Isaija 2:6–4:1—​għal pajjiż u poplu mġeddin b’mod mill-​isbaħ.

4. Għala għandna niddiskutu l-​profezija taʼ Isaija dwar ir-​restawr taʼ fdal?

⁴ Il-​profezija taʼ Isaija rigward ir-​restawr taʼ fdal u s-​sigurtà sussegwenti tiegħu titwettaq ukoll fi żmienna​—“fl-​aħħar jiem.” (Isaija 2:​2-4) Ejja niddiskutu dan il-​messaġġ f’waqtu, għax mhux biss għandu sinjifikat profetiku imma jgħallimna wkoll dwar il-​ħniena taʼ Jehovah u kif aħna bħala individwi nistgħu naqilgħuha.

“Ir-​Rimja” taʼ Jehovah

5, 6. (a) Isaija kif jiddeskrivih iż-​żmien paċifiku li jiġi wara t-​tempesta li ġejja? (b) X’ifisser it-​terminu “rimja,” u dan x’jindika dwar il-​pajjiż taʼ Ġuda?

⁵ L-​istil t’espressjoni wżat minn Isaija jsir kordjali hekk kif hu jħares lejn żmien iktar paċifiku li ġej wara t-​tempesta li riesqa. Hu jikteb: “Dakinhar ir-​rimja tal-​Mulej tkun ġmiel u glorja, u l-​frott taʼ l-​art ikun kburija u żína tal-​fdal taʼ Iżrael.”​—Isaija 4:2.

⁶ Isaija hawnhekk jitkellem dwar restawr. In-​nom Ebrajk tradott “rimja” jirreferi għal ‘dak li jinbet, nebbieta, fergħa.’ Dan hu assoċjat maʼ prosperità, żjieda, u barkiet mingħand Jehovah. Isaija b’hekk ipinġi stampa taʼ tama​—il-​ħerba li riesqa m’hijiex se tibqaʼ għal dejjem. Bil-​barka taʼ Jehovah, il-​pajjiż taʼ Ġuda, li darba kien prosperuż, se jerġaʼ jipproduċi frott abbundanti. a​—Levitiku 26:​3-5.

7. In-​nebbieta taʼ Jehovah b’liema mod se “tkun ġmiel u glorja”?

 ⁷ Isaija juża termini vivaċi biex jiddeskrivi kemm se tkun kbira t-​trasformazzjoni li ġejja fil-​futur. In-​nebbieta taʼ Jehovah se “tkun ġmiel u glorja.” Il-​kelma “ġmiel” tfakkarna fis-​sbuħija taʼ l-​Art Imwegħda meta Jehovah taha lil Iżrael sekli qabel. Tant kienet sabiħa li kienet meqjusa bħala “ġawhra [“ġojjell,” New American Bible] fost kemm huma l-​artijiet.” (Eżekjel 20:6) Kliem Isaija b’hekk jassigura lin-​nies li l-​pajjiż taʼ Ġuda se jerġaʼ jkollu l-​glorja u l-​ġmiel li kellu qabel. Tabilħaqq, se jkun bħal ġojjell mill-​isbaħ fuq l-​art.

8. Min se jkun preżenti biex igawdi l-​ġmiel restawrat tal-​pajjiż, u Isaija kif jiddeskrivihom is-​sentimenti tagħhom?

⁸ Iżda, min se jkun preżenti biex igawdi l-​ġmiel restawrat tal-​pajjiż? Il-​“fdal taʼ Iżrael,” jikteb Isaija. Iva, se jkun hemm xi wħud li se jibqgħu ħajjin wara l-​qerda umiljanti  li kienet imbassra qabel. (Isaija 3:​25, 26) Fdal minn dawk li jibqgħu ħajjin se jirritorna lejn Ġuda u jieħu sehem fir-​restawr tagħha. Għal dawn l-​uħud li jirritornaw​—il-​“fdal”—​il-prodott abbundanti tal-​pajjiż restawrat tagħhom se jsir “kburija u żína.” (Isaija 4:2) L-​umiljazzjoni tal-​ħerba se tagħmel il-​wisaʼ għal sens taʼ kburija mġedded.

9. (a) Bi twettiq taʼ kliem Isaija, x’ġara fis-​sena 537 Q.E.K.? (b) Għala jistaʼ jingħad li l-​“fdal” jinkludi lil xi wħud li twieldu fl-​eżilju? (Ara n-​nota taʼ taħt.)

⁹ Fi qbil maʼ kliem Isaija, il-​maltempata tal-​ġudizzju waslet fis-​sena 607 Q.E.K. meta l-​Babiloniżi qerdu lil Ġerusalemm u ħafna Iżraelin ntilfu. Xi wħud baqgħu ħajjin u ttieħdu fl-​eżilju ġewwa Babilonja, imma li ma kienx għall-​ħniena t’Alla, assolutament ħadd ma kien jibqaʼ ħaj. (Neħemija 9:31) Eventwalment, Ġuda tħalliet ħerba għalkollox. (2 Kronaki 36:​17-21) Imbagħad, fis-​sena 537 Q.E.K., dak Alla taʼ ħniena ppermetta li “fdal” jirritorna lejn Ġuda sabiex jirrestawra l-​qima vera. b (Esdra 1:​1-4; 2:1) L-​indiema mill-​qalb taʼ dawn l-​eżiljati li rritornaw hija espressa b’mod sabiħ f’Salm 137, li x’aktarx inkiteb matul il-​jasar jew ftit wara. Lura f’Ġuda dawn għażqu l-​ħamrija u żergħu ż-​żerriegħa fl-​għelieqi. Aħseb ftit kif ħassewhom meta raw li Alla kien qed ibierek l-​isforzi tagħhom, billi jġiegħel l-​art tnibbet bħall-​“ġnien taʼ l-​Għeden” mimli frott!​—Eżekjel 36:​34-36.

10, 11. (a) L-​Istudenti tal-​Bibbja b’liema mod kienu fil-​jasar taħt “Babilonja l-​Kbira” kmieni fis-​seklu 20? (b) Jehovah kif bierku lill-​fdal taʼ Iżraelin spiritwali?

¹⁰ Fi żmienna seħħ restawr simili. Kmieni fis-​seklu 20, l-​Istudenti tal-​Bibbja, kif kienu magħrufin ix-​Xhieda  taʼ Jehovah dak iż-​żmien, waqgħu f’jasar spiritwali taħt “Babilonja l-​Kbira,” l-​imperu dinji taʼ reliġjon falza. (Apokalissi 17:5) Għalkemm kienu ċaħdu ħafna tagħlim reliġjuż falz, l-​Istudenti tal-​Bibbja kienu għadhom imċappsin b’ċerti ideat u prattiċi Babiloniżi. Bħala riżultat taʼ oppożizzjoni mqanqla mill-​membri tal-​kleru, xi wħud minnhom ġew mitfugħin il-​ħabs letteralment. Il-​pajjiż spiritwali tagħhom​—il-​qasam reliġjuż, jew spiritwali, tagħhom—​tħalla ħerba.

¹¹ Imma fir-​rebbiegħa taʼ l-​1919, Jehovah ġietu ħniena minn dan il-​fdal taʼ Iżraelin spiritwali. (Galatin 6:16) Hu ra l-​indiema tagħhom u x-​xewqa li kellhom biex iqimuh fil-​verità, u għalhekk ħelishom mill-​ħabs letterali u, iktar importanti, mill-​jasar spiritwali. Dawn il-​membri tal-​“fdal” ġew restawrati lejn il-​qasam spiritwali mogħti lilhom minn Alla, liema qasam hu ġagħal li jnibbet bl-​abbundanza. Dan il-​qasam spiritwali għandu dehra kordjali u attraenti li ġibdet lil miljuni taʼ nies oħrajn li jibżgħu minn Alla biex jissieħbu mal-​fdal fil-​qima vera.

12. Kliem Isaija kif ifaħħar bil-​kbir il-​ħniena li Jehovah għandu għall-​poplu tiegħu?

¹² Kliem Isaija hawnhekk ifaħħar bil-​kbir il-​ħniena li Alla għandu għall-​poplu tiegħu. Għalkemm l-​Iżraelin bħala ġens daru kontra Jehovah, hu kellu ħniena minn fdal li nidem. Nistgħu niksbu l-​faraġ mill-​fatt li nafu li saħansitra dawk li jiżbaljaw serjament jistgħu jirritornaw lejn Jehovah bit-​tama. Uħud li jindmu m’għandhomx għalfejn iħossu li ma jistgħux jaqilgħu l-​ħniena taʼ Jehovah, għax hu ma jwarrabhiex qalb sogħbiena. (Salm 51:19 [51:​17, NW]) Il-​Bibbja tassigurana: “Ħanin u twajjeb il-​Mulej, idum ma jagħdab u kollu mogħdrija. Bħalma jħenn il-​missier għal uliedu, hekk iħenn il-​Mulej għal min għandu l-​biżaʼ tiegħu.” (Salm 103:​8, 13) Ċertament  li Alla mimli ħniena bħal dan jixraqlu t-​tifħir kollu tagħna!

Fdal Isir Qaddis għal Jehovah

13. Bħalma huwa dokumentat f’Isaija 4:​3, Isaija kif jiddeskrivih lill-​fdal li kellu jintwera ħniena minn Jehovah?

¹³ Diġà ġejna introdotti mal-​fdal li kellu jintwera ħniena minn Jehovah, imma issa Isaija jiddeskrivih b’iktar dettall, billi jikteb: “Jiġri li min jibqaʼ f’Sijon u min jitħalla f’Ġerusalemm, qaddis jissejjaħ, min hu miktub għall-​ħajja f’Ġerusalemm.”—Isaija 4:3.

14. Min huma dawk li ‘jibqgħu’ u dawk li ‘jitħallew,’ u Jehovah għala se jkollu ħniena minnhom?

¹⁴ Min huma dawk li ‘jibqgħu’ u dawk li ‘jitħallew’? Dawn huma l-​fdal imsemmi fil-​vers taʼ qabel​—l-​eżiljati Lhud li se jitħallew jirritornaw lejn Ġuda. Issa Isaija juri għala Jehovah se jkollu ħniena minnhom​—se jkunu ‘qaddisin’ għalih. Il-​qdusija tfisser “indafa jew purità reliġjuża; is-​sagru.” Li tkun qaddis jinvolvi li tkun nadif, jew pur, fil-​kliem u fl-​azzjoni, li tikkonforma ruħek mal-​livell taʼ Jehovah dwar x’inhu sewwa u xieraq. Iva, Jehovah se jkollu ħniena minn dawk li huma ‘qaddisin’ għalih, u se jħallihom jirritornaw lejn “il-​belt qaddisa,” Ġerusalemm.​—Neħemija 11:1.

15. (a) L-​espressjoni “miktub għall-​ħajja f’Ġerusalemm” tfakkarna dwar liema drawwa Lhudija? (b) Kliem Isaija jimplika liema twissija serja?

¹⁵ Se jibqaʼ hemmhekk dan il-​fdal leali? Se jkun “miktub għall-​ħajja f’Ġerusalemm,” iwiegħed Isaija. Dan ifakkarna fid-​drawwa Lhudija li jinżammu reġistri, li jsiru b’attenzjoni kbira, tal-​familji u t-​tribujiet taʼ Iżrael. (Neħemija 7:5) Li tkun miktub f’reġistru kien ifisser li int ħaj, għax meta kien imut xi ħadd, ismu kien jitneħħa. F’partijiet oħrajn tal-​Bibbja, naqraw dwar reġistru, jew ktieb,  figurattiv li fih l-​ismijiet taʼ dawk li Jehovah jippremja bil-​ħajja. Imma l-​ismijiet jitniżżlu f’dan il-​ktieb taħt kundizzjoni, għax Jehovah jistaʼ ‘jħassarhom.’ (Eżodu 32:​32, 33; Salm 69:29 [69:​28, NW]) Il-​kliem taʼ Isaija, allura, jimplika twissija serja​—dawk li jirritornaw jistgħu jibqgħu ħajjin fil-​pajjiż restawrat tagħhom biss jekk jibqgħu qaddisin fil-​ħarsa t’Alla.

16. (a) Jehovah x’irrikjeda minn dawk li ħalla jirritornaw lejn Ġuda fis-​sena 537 Q.E.K.? (b) Għala jistaʼ jingħad li l-​ħniena taʼ Jehovah mal-​fdal midluk u n-​“nagħaġ oħra” ma kinitx għalxejn?

¹⁶ Fis-​sena 537 Q.E.K., il-​membri tal-​fdal li rritornaw lejn Ġerusalemm għamlu dan b’motiv pur​—biex jirrestawraw il-​qima vera. L-​ebda bniedem li kien kontaminat bi prattiċi reliġjużi pagani jew bil-​kondotta maħmuġa li Isaija kien wissa kontriha b’tant forza ma kellu d-​dritt jirritorna. (Isaija 1:​15-17) Dawk biss li Jehovah kien iqishom bħala qaddisin setgħu jirritornaw lejn Ġuda. (Isaija 35:8) B’mod simili, minn mindu nħelsu mill-​jasar spiritwali fl-​1919, il-​membri tal-​fdal midluk, li issa ngħaqdu magħhom miljuni taʼ “nagħaġ oħra”​—dawk bit-​tama taʼ ħajja taʼ dejjem fuq l-​art—​għamlu kull sforz biex ikunu qaddisin fil-​ħarsa t’Alla. (Ġwann 10:16) Huma ħelsu mit-​tagħlim u l-​prattiċi Babiloniżi, u individwalment, jagħmlu ħilithom kollha biex iżommu mal-​livelli għoljin t’Alla dwar il-​moralità. (1 Pietru 1:​14-16) Il-​ħniena taʼ Jehovah magħhom ma kinitx għalxejn.

17. Jehovah l-​ismijiet taʼ min jikteb fi “ktieb il-​ħajja,” u x’għandna nkunu determinati li nagħmlu?

¹⁷ Ftakar li Jehovah nnota lil dawk li kienu qaddisin f’Iżrael u li hu ‘kiteb l-​ismijiet tagħhom għall-​ħajja.’ Illum, ukoll, Jehovah jinnota l-​isforzi tagħna biex inkunu nodfa fil-​moħħ u fil-​ġisem hekk kif ‘noffru ġisimna bħala sagrifiċċju ħaj, qaddis, jogħġob lil Alla.’ (Rumani 12:1)  U dawk kollha li jsegwu korsa taʼ ħajja bħal din jinkitbu minn Alla fi “ktieb il-​ħajja”​—id-​dokument figurattiv li fih l-​ismijiet taʼ dawk li huma f’pożizzjoni li jirċievu ħajja taʼ dejjem, jew fis-​sema jew fuq l-​art. (Filippin 4:3; Malakija 3:16) Ejja, mela, nagħmlu l-​almu tagħna kollu biex nibqgħu qaddisin f’għajnejn Alla, għax b’hekk inkunu nistgħu nżommu l-​ismijiet tagħna f’dak il-​“ktieb” prezzjuż.​—Apokalissi 3:5.

Wegħda li Jieħu Ħsiebna b’Imħabba Kbira

18, 19. Skond Isaija 4:​4, 5, liema tindif irid isir minn Jehovah, u dan kif se jsir?

¹⁸ Imbagħad Isaija juri kif l-​abitanti tal-​pajjiż restawrat se jsiru qaddisin u liema barkiet hemm jistennewhom, billi jgħid: “Meta Sidi jkun naddaf il-​ħmieġ tal-​bniet taʼ Sijon, u ħasel id-​dmija taʼ Ġerusalemm minn ġo nofsha b’ruħ il-​ġustizzja u b’riħ il-​qerda, joħloq il-​Mulej fuq il-​medda kollha tal-​muntanja taʼ Sijon, u fuq in-​nies miġmugħa fiha sħaba binhar u duħħan, u dija taʼ nar iħeġġeġ billejl, għax fuq kollox tinfirex il-​glorja.”​—Isaija 4:​4, 5.

¹⁹ Iktar kmieni Isaija ċanfar lill-​“bniet taʼ Sijon,” li l-​korruzzjoni morali tagħhom kienet moħbija taħt it-​tiżjin ilellex tagħhom. Hu kixef ukoll il-​ħtija tad-​demm tal-​poplu b’mod ġenerali, billi ħeġġiġhom biex jitnaddfu. (Isaija 1:​15, 16; 3:​16-23) Iżda, hawnhekk, hu jħares ’il quddiem lejn iż-​żmien meta Alla nnifsu se jkun “naddaf il-​ħmieġ,” jew il-​qżiżijiet morali, u “ħasel id-​dmija.” (Isaija 4:4) Kif se jsir dan il-​ħasil? “B’ruħ il-​ġustizzja” u “b’riħ il-​qerda.” Il-​qerda li ġejja fuq Ġerusalemm u l-​eżilju f’Babilonja se jkunu buffuri tal-​ġudizzju u tar-​rabja taħraq t’Alla fuq ġens maħmuġ. Il-​fdal li jibqaʼ ħaj wara dawn il-​gwajijiet u jirritorna f’art twelidu se jkun  ġie umiljat u rfinut. Huwa għalhekk li se jkun qaddis għal Jehovah u jirċievi l-​ħniena.​—Qabbel Malakija 3:​2, 3.

20. (a) Dwar liema ħaġa jfakkruna l-​espressjonijiet “sħaba,” “duħħan,” u “nar iħeġġeġ”? (b) L-​eżiljati mnaddfin għala mhux se jkollhom għalfejn jibżgħu?

²⁰ Permezz taʼ Isaija, Jehovah jwiegħed li se jieħu ħsiebu b’imħabba kbira lil dan il-​fdal imnaddaf. L-​espressjonijiet “sħaba,” “duħħan,” u “nar iħeġġeġ” ifakkruna dwar kif Jehovah ħa ħsieb l-​Iżraelin wara li telqu mill-​Eġittu. “Kolonna tan-​nar u s-​sħaba” pproteġiethom mill-​Eġizzjani li ġew jiġru warajhom; din iggwidathom ukoll fid-​deżert. (Eżodu 13:​21, 22; 14:​19, 20, 24) Meta Jehovah wera ruħu fuq il-​Muntanja Sinaj, il-​muntanja “bdiet iddaħħan kollha kemm hi.” (Eżodu 19:18) L-​eżiljati mnaddfin, allura,  mhux se jkollhom għalfejn jibżgħu. Jehovah se jkun il-​Protettur tagħhom. Hu se jkun magħhom kemm jekk jinġabru fi djarhom stess u kemm jekk jiltaqgħu flimkien f’konvenzjonijiet qaddisin.

21, 22. (a) Għarix, jew kamp, għal liema skop kienu jinbnew taʼ spiss? (b) Liema prospett hemm quddiem il-​fdal imnaddaf?

²¹ Isaija jikkonkludi d-​deskrizzjoni tiegħu dwar il-​protezzjoni divina billi jiffoka fuq il-​ħajja taʼ kuljum. Hu jikteb: “Għarix għad-​dell mis-​sħana binhar u kenn u lqugħ mill-​irwiefen u x-​xita.” (Isaija 4:6) Taʼ spiss, għarix, jew kamp, kienu jinbnew f’għalqa tad-​dwieli jew f’għalqa kwalunkwe biex jipprovdu kenn meħtieġ ferm mix-​xemx taħraq taʼ l-​istaġun niexef u mill-​kesħa u l-​maltempati taʼ l-​istaġun tax-​xita.​—Qabbel Ġona 4:5.

²² Meta jħabbtu wiċċhom mas-​sħana tikwi tal-​persekuzzjoni u l-​maltempati taʼ l-​oppożizzjoni, il-​membri tal-​fdal imnaddaf se jsibu li Jehovah hu s-​Sors tagħhom taʼ protezzjoni, sigurtà, u kenn. (Salm 91:​1, 2; 121:5) B’hekk, jitpoġġa quddiemhom prospett mill-​isbaħ: Jekk iħallu warajhom it-​twemmin u l-​prattiċi mhux nodfa taʼ Babilonja, jissottomettu ruħhom għat-​tindif tal-​ġudizzju minn Jehovah, u jagħmlu ħilithom biex jibqgħu qaddisin, allura se jibqgħu fis-​sigurtà, bħallikieku ġo “għarix” taʼ protezzjoni divina.

23. Jehovah għala berikhom lill-​fdal midluk u lil sħabhom?

²³ Innota li l-​ewwel jiġi t-​tindif, imbagħad il-​barkiet. Dan seħħ ukoll fi żmienna. Lura fl-​1919 il-​membri tal-​fdal midluk issottomettew ruħhom umilment biex jiġu rfinuti, u Jehovah “ħasel” in-​nuqqas taʼ ndafa tagħhom. Minn dakinhar ’l hawn, “kotra kbira” taʼ nagħaġ oħra wkoll ħallew lilhom infushom jiġu mnaddfin minn Jehovah. (Apokalissi 7:9) Imnaddfin b’dan il-​mod, il-​fdal  u sħabhom tbierku, għax Jehovah ħadhom fi ħdanu biex jieħu ħsiebhom u jipproteġihom. Hu ma jżommx lura mirakolożament is-​sħana tikwi tal-​persekuzzjoni jew il-​maltempati taʼ l-​oppożizzjoni milli jgħakksuhom. Imma hu jipproteġihom, billi bħallikieku jibni fuqhom ‘għarix għad-​dell u lqugħ mix-​xita.’ Kif?

24. Kif inhu evidenti li Jehovah bierek lill-​poplu tiegħu bħala organizzazzjoni?

²⁴ Ikkunsidra dan: Xi wħud mill-​gvernijiet l-​iktar potenti fl-​istorja pprojbew ix-​xogħol taʼ l-​ippridkar mix-​Xhieda taʼ Jehovah jew ipprovaw jeliminawhom kompletament. Madankollu, ix-​Xhieda baqgħu sodi u komplew jippridkaw bla heda! Il-​ġnus setgħana għala ma kellhomx il-​ħila jwaqqfu l-​attività taʼ dan il-​grupp taʼ nies li hu relattivament żgħir u donnu bla difiża? Għaliex Jehovah poġġa lill-​qaddejja nodfa tiegħu ġo “għarix” taʼ protezzjoni li ebda bniedem ma jistaʼ jġarrfu!

25. X’ifisser għalina bħala individwi li jkollna lil Jehovah bħala l-​Protettur tagħna?

²⁵ Xi ngħidu dwarna bħala individwi? Li jkollna lil Jehovah bħala l-​Protettur tagħna ma jfissirx li għandna ħajja mingħajr problemi f’din is-​sistema t’affarijiet. Ħafna Kristjani leali jiffaċċjaw għawġ kbir, bħal faqar, diżastri naturali, gwerer, mard, u mewt. Meta niffaċċjaw affarijiet taʼ dwejjaq bħal dawn, ejja ma ninsew qatt li Alla tagħna qiegħed magħna. Hu jipproteġina spiritwalment, billi jipprovdi dak li neħtieġu​—saħansitra ‘l-​kobor tal-​qawwa’ iktar min-​normal—​biex nissaportu l-​provi fedelment. (2 Korintin 4:7) Fis-​sigurtà tal-​preżenza tiegħu, ma jkollniex għalfejn nibżgħu. Wara kollox, sakemm nagħmlu l-​almu tagħna kollu biex inżommu ruħna qaddisin fil-​ħarsa tiegħu, xejn ‘ma jistaʼ jifridna mill-​imħabba taʼ Alla.’​—Rumani 8:​38, 39.

[Noti taʼ taħt]

[Mistoqsijiet taʼ Studju]

 [Stampa f’paġna 63]

Maltempata taʼ ġudizzju divin ġejja fuq Ġuda