Alla Jehovah Qiegħed fit-Tempju Qaddis Tiegħu
Kapitlu Tmienja
Alla Jehovah Qiegħed fit-Tempju Qaddis Tiegħu
1, 2. (a) Il-profeta Isaija meta jirċievi l-viżjoni tiegħu tat-tempju? (b) Is-Sultan Għużżija għala tilef il-favur taʼ Jehovah?
“FIS-SENA li fiha miet is-sultan Għużżija, jien rajt lil sidi bilqiegħda fuq tron għoli merfugħ ’il fuq; djul il-libsa tiegħu kienu jimlew it-tempju.” (Isaija 6:1) Is-sitt kapitlu tal-ktieb taʼ Isaija jibda b’dan il-kliem tal-profeta. Ninsabu fis-sena 778 Q.E.K.
2 Għużżija saltan 52 sena bħala sultan taʼ Ġuda u, fil-parti l-kbira, ir-renju tiegħu kien suċċess brillanti. Billi għamel “is-sewwa f’għajnejn il-Mulej,” hu gawda l-appoġġ t’Alla fil-proġetti militari, strutturali, u agrikoli tiegħu. Imma s-suċċess li kellu rriżulta wkoll fir-rovina tiegħu. Eventwalment, hu tkabbar f’qalbu u “dineb kontra l-Mulej, Alla tiegħu, u daħal fis-santwarju tal-Mulej biex jaħraq l-inċens.” Minħabba dan l-att prużuntuż u d-dagħdigħa tiegħu kontra l-qassisin li ċanfruh, Għużżija miet imġiddem. (2 Kronaki 26:3-22) Kien għall-ħabta taʼ dan iż-żmien li Isaija beda s-servizz profetiku tiegħu.
3. (a) Isaija attwalment jarah lil Jehovah? Spjega. (b) Isaija liema xena jara, u għal liema raġuni?
3 Ma jintqalilniex fejn hu stazzjonat Isaija meta jara l-viżjoni. Imma jidher ċar li dak li jara bl-għajnejn fiżiċi tiegħu hu viżjoni, u mhux li attwalment jara lil Dak li Jistaʼ Kollox, għax “lil Alla għadu ħadd ma rah.” (Ġwann 1:18; Eżodu 33:20) Xorta waħda, li tara lill-Ħallieq, Jehovah, saħansitra fil-viżjoni, hija dehra affaxxinanti. Il-Wieħed li għandu d-dritt li jaħkem, il-Ħakkiem Universali u s-Sors taʼ kull gvern, qiegħed bil-qegħda fuq tron fil-għoli. Dan jissimbolizza l-irwol tiegħu bħala Sultan u Mħallef għal dejjem. Djul il-libsa twila u wiesgħa tiegħu jimlew it-tempju. Isaija qed jissejjaħ għal servizz profetiku li se jfaħħar bil-kbir il-qawwa u l-ġustizzja taʼ Jehovah, is-Sovran. Bi tħejjija, se jingħata viżjoni tal-qdusija t’Alla.
4. (a) Id-deskrizzjonijiet taʼ Jehovah li jidhru fil-viżjoni u li huma miktubin fil-Bibbja għala jridu jkunu simboliċi? (b) X’nitgħallmu dwar Jehovah mill-viżjoni taʼ Isaija?
4 Isaija ma jipprovdi ebda deskrizzjoni taʼ l-apparenza taʼ Jehovah fil-viżjoni tiegħu—kuntrarju għall-viżjonijiet rapportati minn Eżekjel, Danjel, u Ġwanni. U dawn ir-rakkonti kollha jvarjaw inkwantu għal dak li jidher fis-sema. (Eżekjel 1:26-28; Danjel 7:9, 10; Apokalissi 4:2, 3) Madankollu, irridu nżommu f’moħħna n-natura u l-iskop taʼ dawn il-viżjonijiet. M’humiex deskrizzjonijiet letterali tal-preżenza taʼ Jehovah. L-għajn fiżika ma tistax tara dak li hu spiritwali, u lanqas il-moħħ uman limitat ma jistaʼ jifhem il-qasam taʼ l-ispirti. Għaldaqstant, il-viżjonijiet jippreżentaw b’termini umani t-tagħrif li jrid jitwassal. (Qabbel Apokalissi 1:1.) Fil-viżjoni taʼ Isaija m’hemmx bżonn li tiġi deskritta l-apparenza t’Alla. Il-viżjoni tgħarraf lil Isaija li Jehovah qiegħed fit-tempju qaddis tiegħu u li hu qaddis u l-ħaqq tiegħu huwa safi.
Is-Serafini
5. (a) Min huma s-serafini, u t-terminu x’ifisser? (b) Is-serafini għala jaħbu wiċċhom u riġlejhom?
5 Ismaʼ! Isaija jkompli: “ ’Il fuq minnu kien hemm [“weqfin,” “Saydon”] serafini, kull wieħed b’sitt ġwienaħ: bi tnejn kienu jgħattu wiċċhom, bi tnejn kienu jgħattu riġlejhom, u bi tnejn jittajjru.” (Isaija 6:2) L-uniku post fil-Bibbja fejn jissemmew is-serafini huwa kapitlu 6 taʼ Isaija. Ovvjament, dawn huma ħlejjaq anġeliċi fis-servizz taʼ Jehovah li għandhom pożizzjoni għolja ferm f’dawk li huma privileġġi u unur, billi huma stazzjonati madwar it-tron taʼ Jehovah fis-sema. Kuntrarju għas-Sultan Għużżija li kien kburi, dawn jokkupaw il-pożizzjoni tagħhom bl-umiltà u l-modestja kollha. Peress li qegħdin fil-preżenza tas-Sovran tas-sema, dawn jgħattu wiċċhom b’par ġwienaħ; u b’rispett kbir lejn il-post qaddis, jgħattu riġlejhom b’par ieħor. Billi jinsabu qrib is-Sovran Universali, is-serafini jagħmlu minn kollox biex ma jiġbdux l-attenzjoni fuqhom, sabiex ma jnaqqsu xejn mill-glorja persunali t’Alla. It-terminu “serafini,” li jfisser “uħud bħan-nar” jew “uħud imkebbsin,” jissuġġerixxi li minnhom toħroġ id-dija, u madankollu jaħbu wiċċhom mid-dija u l-glorja akbar taʼ Jehovah.
6. X’inhi l-pożizzjoni tas-serafini f’relazzjoni maʼ Jehovah?
6 Is-serafini jużaw it-tielet par ġwienaħ tagħhom biex itiru u, bla dubju, biex jittajru, jew ‘jieqfu,’ fil-postijiet tagħhom. (Qabbel Dewteronomju 31:15.) Inkwantu għall-pożizzjoni tagħhom, il-Professur Franz Delitzsch jikkummenta: “Is-serafini ma kinux se jogħlew fuq ras Dak li qagħad bil-qegħda fuq it-tron, imma huma ttajru ’l fuq mil-libsa Tiegħu li biha s-sala kienet mimlija.” (Commentary on the Old Testament) Dan jidher li hu raġunevoli. Dawn qegħdin ‘weqfin ’il fuq,’ mhux bħala li huma superjuri għal Jehovah, imma bħala l-qaddejja tiegħu, ubbidjenti u lesti li jservuh.
7. (a) Is-serafini jwettqu liema inkarigu? (b) Is-serafini għala jiddikjaraw tliet darbiet il-qdusija t’Alla?
7 Ismaʼ, issa, lil dawk is-serafini privileġġati! “U kienu jgħajjtu u jwieġbu lil xulxin: ‘Qaddis, qaddis, qaddis hu l-Mulej taʼ l-eżerċti. L-art kollha mimlija bil-glorja tiegħu.’” (Isaija 6:3) L-inkarigu tagħhom huwa li jaraw li l-qdusija taʼ Jehovah tiġi mxandra u li l-glorja tiegħu tiġi rikonoxxuta fl-univers kollu, li minnu l-art hija parti. Il-glorja tiegħu tidher f’dak kollu li ħalaq u dalwaqt se jagħrfuha l-abitanti kollha taʼ l-art. (Numri 14:21; Salm 19:2-4 [19:1-3, NW]; Ħabakkuk 2:14) Id-dikjarazzjoni tripla, “qaddis, qaddis, qaddis,” m’hijiex evidenza taʼ xi Trinità. Pjuttost, din tenfasizza l-qdusija t’Alla għal tliet darbiet. (Qabbel Apokalissi 4:8.) Jehovah hu qaddis sal-grad superlattiv.
8. X’jirriżulta mid-dikjarazzjonijiet tas-serafini?
8 Għalkemm l-għadd taʼ serafini ma jissemmiex, jistaʼ jkun hemm gruppi taʼ serafini stazzjonati qrib it-tron. F’għanja melodjuża, dawn jirrepetu wieħed wara l-ieħor id-dikjarazzjoni tal-qdusija u l-glorja t’Alla. Liema riżultat ninnotaw? Ismaʼ mill-ġdid hekk kif Isaija jkompli: “Bl-għajat tagħhom is-sisien taʼ l-għetiebi theżhżu, u t-tempju mtela bid-duħħan.” (Isaija 6:4) Fil-Bibbja, id-duħħan jew xi sħaba spiss jipprovdu evidenza viżibbli tal-preżenza t’Alla. (Eżodu 19:18; 40:34, 35; 1 Slaten 8:10, 11; Apokalissi 15:5-8) Dawn jindikaw glorja li aħna l-ħlejjaq umani ma nistgħux nersqu lejha.
Ma Jistħoqqlux, u Madankollu Mnaddaf
9. (a) Il-viżjoni x’effett għandha fuq Isaija? (b) Liema kuntrast huwa evidenti bejn Isaija u s-Sultan Għużżija?
9 Din il-viżjoni tat-tron taʼ Jehovah għandha effett profond fuq Isaija, li jikteb: “Mbagħad jiena għedt: ‘Jaħasra għalija! Mitluf jien! Bniedem b’xufftejh imniġġsa jien! U f’nofs poplu b’xufftejh imniġġsa ngħammar; madankollu rajt b’għajnejja lis-Sultan, Il-Mulej taʼ l-eżerċti.’” (Isaija 6:5) X’kuntrast qawwi dak bejn Isaija u s-Sultan Għużżija! Għużżija ħa bla jedd il-pożizzjoni tas-saċerdozju midluk, u bla biżaʼ t’Alla daħal fil-post Qaddis tat-tempju. Għalkemm Għużżija ra l-gandlieri tad-deheb, l-artal tad-deheb taʼ l-inċens, u l-imwejjed tal-“ħobż tal-preżenza,” hu ma rax il-wiċċ t’approvazzjoni taʼ Jehovah u lanqas ma rċieva xi inkarigu speċjali mingħandu. (1 Slaten 7:48-50) Mill-banda l-oħra, il-profeta Isaija ma jinjorax is-saċerdozju u lanqas jabbuża jidħol bla permess fit-tempju. Madankollu, hu jara viżjoni taʼ Jehovah fit-tempju qaddis tiegħu u jiġi onorat b’inkarigu dirett mingħand Alla. Waqt li s-serafini ma jissograwx iħarsu lejn Sid it-tempju fuq it-tron tiegħu, Isaija jitħalla, fil-viżjoni, iħares lejn is-“Sultan, Il-Mulej taʼ l-eżerċti” nnifsu!
10. Isaija għala jħossu mkexkex meta jara l-viżjoni?
10 Il-kuntrast li jara Isaija bejn il-qdusija t’Alla u l-istat midneb tiegħu stess iġagħlu jħossu ferm mhux nadif. Mimli biżaʼ, hu jirraġuna li se jmut. (Eżodu 33:20) Hu jismaʼ lis-serafini jfaħħru ’l Alla b’xofftejn nodfa, imma xofftejh stess m’humiex nodfa u jkomplu jiċċappsu minħabba n-nuqqas taʼ ndafa taʼ xofftejn in-nies li jgħammar fosthom u jismaʼ diskorshom. Jehovah hu qaddis, u l-qaddejja tiegħu jridu jirriflettu din il-kwalità. (1 Pietru 1:15, 16) Għalkemm Isaija diġà ntgħażel bħala kelliemi għal Alla, hu jimpressjona ruħu profondament għaliex jirrealizza li l-kundizzjoni tiegħu hija midinba u m’għandux ix-xofftejn nodfa li jixirqu lil kelliemi tas-Sultan glorjuż u qaddis. X’se tkun ir-reazzjoni mis-sema?
11. (a) Wieħed mis-serafini x’jagħmel, u din l-azzjoni x’tissimbolizza? (b) Li nirriflettu fuq dak li s-serafin jgħid lil Isaija kif jistaʼ jgħinna meta nħossuna li ma jistħoqqilniex inkunu qaddejja t’Alla?
11 Minflok ma jkeċċu lill-umli Isaija minn quddiem il-preżenza taʼ Jehovah, is-serafini jaġixxu biex jgħinuh. Tgħid il-kitba: “Wieħed mis-serafini ttajjar lejja, b’ġamra nar f’idu, li hu kien qabad bi mqass minn fuq l-artal, u messli fommi biha u qalli: ‘Ara, din messitlek xufftejk: ħżunitek għebet, u dnubek inħafer.’” (Isaija 6:6, 7) F’sens simboliku, in-nar għandu l-qawwa li jippurifika. Meta jmiss il-ġamra taqbad min-nar qaddis taʼ l-artal maʼ xofftejn Isaija, is-serafin jassigura lil Isaija li dnubietu nfdew sal-punt neċessarju biex ikun jistaʼ jirċievi l-favur t’Alla u inkarigu mingħandu. Kemm hu rassiguranti dan għalina! Aħna wkoll midinbin u ma jistħoqqilniex nersqu lejn Alla. Imma ġejna mifdijin bil-mertu tas-sagrifiċċju taʼ Ġesù li ħallas bħala prezz tal-fidwa u nistgħu nirċievu l-favur t’Alla u nersqu lejh bit-talb.—2 Korintin 5:18, 21; 1 Ġwann 4:10.
12. Isaija liema artal jara, u x’inhu l-effett tan-nar?
12 Il-fatt li jissemma “l-artal” jerġaʼ jfakkarna li din hija viżjoni. (Qabbel Apokalissi 8:3; 9:13.) Kien hemm żewġ artali fit-tempju f’Ġerusalemm. Preċiż quddiem il-purtiera taʼ l-Iktar Qaddis kien hemm l-artal iż-żgħir taʼ l-inċens, u faċċata tad-daħla għas-santwarju kien hemm l-artal kbir ferm tas-sagrifiċċju, fejn in-nar ma kien jintefa qatt. (Levitiku 6:12, 13; 16:12, 13) Imma dawn l-artali taʼ fuq l-art kienu tipiċi, u kienu jirrappreżentaw affarijiet akbar. (Lhud 8:5; 9:23; 10:5, 10) Meta s-Sultan Salamun inawgura t-tempju, kien nar mis-sema li kkonsma l-offerta maħruqa fuq l-artal. (2 Kronaki 7:1-3) U issa huwa nar mill-artal veru tas-sema li jwarrab in-nuqqas taʼ ndafa minn fuq xofftejn Isaija.
13. Jehovah jipproponi liema mistoqsija, u lil min jinkludi meta jgħid ‘imurilna’?
13 Ejja nisimgħu maʼ Isaija. “Mbagħad smajt leħen Sidi jgħid: ‘Lil min se nibgħat? Min se jmurilna?’ U jien weġibt: ‘Hawn jien: ibgħat lili!’” (Isaija 6:8) Il-mistoqsija proposta minn Jehovah hija b’mod ċar disinjata biex tqanqal risposta mingħand Isaija, għax ma jidher ebda profeta uman ieħor fil-viżjoni. Bla dubju din hija stedina għal Isaija biex ikun il-messaġġier taʼ Jehovah. Imma Jehovah għala jistaqsi, ‘Min se jmurilna?’ Billi jaqleb mill-pronom persunali fis-singular “Jien” għall-plural, Jehovah issa qed jinkludi mill-inqas persuna oħra miegħu. Lil min? Ma kienx dan l-Iben uniġenitu tiegħu, li iktar tard sar il-bniedem Ġesù Kristu? Tabilħaqq, kien dan l-istess Iben li lilu Alla qal, “Ħa nagħmlu l-bniedem fuq is-sura u x-xbieha tagħna.” (Ġenesi 1:26; Proverbji 8:30, 31) Iva, maġenb Jehovah fil-qrati tas-sema hemm l-Iben uniġenitu tiegħu.—Ġwann 1:14.
14. Isaija kif iwieġeb għall-istedina taʼ Jehovah, u liema eżempju jħallilna?
14 Isaija ma jaħsibhiex darbtejn biex iwieġeb! Minkejja x’jistaʼ jkun il-messaġġ, hu jwieġeb minnufih: “Hawn jien: ibgħat lili!” Lanqas ma jistaqsi x’jistaʼ jikseb talli jaċċetta l-inkarigu. L-ispirtu dispost tiegħu huwa eżempju mill-aħjar għall-qaddejja kollha t’Alla llum, li għandhom l-inkarigu li jippridkaw “l-Evanġelju tas-Saltna . . . fid-dinja kollha.” (Mattew 24:14) Bħal Isaija, dawn jibqgħu fedelment fl-inkarigu tagħhom u jwettqu x-‘xhieda lill-ġnus kollha,’ minkejja n-nuqqas taʼ rispons mifrux maʼ kullimkien. U, bħalma għamel Isaija, huma jimxu ’l quddiem bil-fiduċja, billi jafu li l-inkarigu tagħhom għandu l-ogħla awtorizzazzjoni.
L-Inkarigu taʼ Isaija
15, 16. (a) Isaija x’se jgħidlu lil “dan il-poplu,” u x’se tkun ir-reazzjoni tal-poplu? (b) Għandu xi ħtija Isaija għar-reazzjoni tan-nies? Spjega.
15 Jehovah issa jispjega x’għandu jgħid Isaija u x’se jkun ir-rispons: “Mur u għid lil dan il-poplu: Tisimgħu [“darba wara l-oħra,” “NW”], iva, imma ma tifhmux, taraw, iva, imma la tagħrfux. Semmen qalb dan il-poplu, soddlu widnejh, agħmilu għajnejh, li ma jmurx jara b’għajnejh, u jismaʼ b’widnejh, u f’qalbu jifhem, u jdur u jfiq.” (Isaija 6:9, 10) Ifisser dan li Isaija se jkun żorr u mhux se juża tattika biex b’hekk jimbottahom lil-Lhud, ħalli jibqgħu miksurin maʼ Jehovah? Assolutament le! Dawn huma n-nies taʼ Isaija stess li hu għandu ġibda lejhom. Imma kliem Jehovah jindika kif in-nies se jwieġbu għall-messaġġ tiegħu, minkejja l-lealtà kollha murija minn Isaija f’li jwettaq il-biċċa xogħol fdata lilu.
16 Il-ħtija hija tan-nies. Isaija se jkellimhom “darba wara l-oħra,” imma huma la se jaċċettaw il-messaġġ u lanqas se jiksbu l-fehma. Il-maġġuranza se jkunu stinati u ma jweġbux, bħallikieku huma għomja u torox totalment. Billi jmur għandhom ripetutament, Isaija se jħalli lill-membri taʼ “dan il-poplu” juru li ma jridux jifhmu. Dawn se jagħtu prova li qegħdin jagħlqu mħuħhom u qlubhom għall-messaġġ taʼ Isaija—il-messaġġ t’Alla—mibgħut lilhom. Kemm hu veru dan dwar in-nies illum! Ħafna minnhom ma jkunux iridu jisimgħu lix-Xhieda taʼ Jehovah hekk kif dawn jippridkaw l-aħbar tajba tas-Saltna t’Alla li ġejja.
17. Meta Isaija jistaqsi, “Sakemm?” għal liema ħaġa jirreferi?
17 Isaija huwa inkwetat: “U jien għedt: ‘Sakemm Sidi?’ U hu wieġeb: ‘Sakemm jitħarbtu l-bliet, u ħadd ma jgħammar fihom, u d-djar jibqgħu bla nies, u r-rabaʼ jinbidel f’xagħri. U l-Mulej ibiegħed lin-nies u bosta jkunu l-imkejjen fil-pajjiż mitluqa.’” (Isaija 6:11, 12) Billi jistaqsi, “Sakemm?” Isaija mhux qiegħed jistaqsi kemm se jkollu jdum jippriedka lil poplu li ma jweġibx. Minflok, huwa inkwetat dwar in-nies u jistaqsi kemm se jdum sejjer l-istat spiritwali ħażin tagħhom u kemm se jdum isem Jehovah jiġi diżonorat fuq l-art. (Ara Salm 74:9-11.) Mela, allura, kemm se ddum sejra s-sitwazzjoni bla sens?
18. L-istat spiritwali ħażin tan-nies kemm se jdum sejjer, u se jibqaʼ ħaj Isaija biex jara t-twettiq sħiħ tal-profezija?
18 Jaħasra, ir-risposta li jagħti Jehovah turi li l-istat spiritwali ħażin tal-poplu se jibqaʼ sejjer sakemm jitwettqu l-konsegwenzi kollha tad-diżubbidjenza lejn Alla, kif inhu spjegat fil-patt tiegħu. (Levitiku 26:21-33; Dewteronomju 28:49-68) In-nazzjon se jsir rovina, in-nies se jiġu turufnati, u l-art se titħalla ħerba. Isaija mhux se jibqaʼ ħaj biex jara l-qerda taʼ Ġerusalemm u t-tempju tagħha mill-eżerċtu Babiloniż fis-sena 607 Q.E.K., għalkemm se jipprofetizza għal iktar minn 40 sena, u se jkompli fir-renju taʼ Ħeżekija, it-tifel tan-neputi tas-Sultan Għużżija. Xorta waħda, Isaija se jibqaʼ jwettaq fedelment l-inkarigu tiegħu sakemm imut, iktar minn 100 sena qabel ma jseħħ dak id-diżastru nazzjonali.
19. Għalkemm in-nazzjon se jitqaċċat bħal siġra, Alla liema assiguranza jagħtih lil Isaija?
19 Il-qerda li se tħalli lil Ġuda “xagħri” żgur li se tiġi, imma s-sitwazzjoni m’hijiex bla tama. (2 Slaten 25:1-26) Jehovah jassigura lil Isaija: “‘U tibqaʼ l-waħda fl-għaxra, imma wkoll din terġaʼ tilħaq il-ħerba. Bħalma l-balluta u t-terebint meta jqaċċtuhom, minnhom jibqaʼ biss iz-zokk.’ Żerriegħa qaddisa jkun iz-zokk tagħha.” (Isaija 6:13) Iva, “waħda fl-għaxra, . . . żerriegħa qaddisa,” se tibqaʼ, sewwa sew bħaz-zokk taʼ balluta li titqaċċat. Bla dubju, din l-assiguranza tfarraġ lil Isaija—fdal qaddis se jinstab qalb il-poplu tiegħu. Għalkemm il-ġens jgħaddi min-nar ripetutament, bħal balluta li titqaċċat biex tinħaraq, xorta waħda se jibqaʼ zokk vitali mis-siġra simbolika taʼ Iżrael. Dan se jkun żerriegħa, jew nisel, li hu qaddis għal Jehovah. Maż-żmien, dan se jerġaʼ jinbet, u s-siġra se tikber mill-ġdid.—Qabbel Ġob 14:7-9; Danjel 4:23 [4:26, NW].
20. L-aħħar parti tal-profezija taʼ Isaija kif twettqet inizjalment?
20 Seħħ il-kliem tal-profezija? Iva. Sebgħin sena wara li l-pajjiż taʼ Ġuda kien sar ħerba, fdal li kellu l-biżaʼ t’Alla rritorna mill-eżilju f’Babilonja. Dawn l-uħud bnew it-tempju u l-belt mill-ġdid, u rrestawraw il-qima vera fil-pajjiż. Il-fatt li l-Lhud irritornaw lejn art twelidhom, mogħtija lilhom minn Alla, għamilha possibbli li din il-profezija li Jehovah ta lil Isaija titwettaq it-tieni darba. Kif?—Esdra 1:1-4.
Twettiq Ieħor
21-23. (a) Il-profezija taʼ Isaija f’min sabet twettiq fl-ewwel seklu, u kif? (b) Min kienet iż-“żerriegħa qaddisa” fl-ewwel seklu, u din kif ġiet preservata?
21 Ix-xogħol profetiku taʼ Isaija ffigura bil-quddiem ix-xogħol li kien se jsir 800 sena wara mill-Messija, Ġesù Kristu. (Isaija 8:18; 61:1, 2; Luqa 4:16-21; Lhud 2:13, 14) Għalkemm iktar importanti minn Isaija, Ġesù kien daqstant lest li jintbagħat minn Missieru tas-sema, billi qal: “Hawn jien, ġejt biex nagħmel ir-rieda tiegħek.”—Lhud 10:5-9; Salm 40:7-9 [40:6-8, NW].
22 Bħal Isaija, Ġesù wettaq fedelment ix-xogħol mogħti lilu u sab l-istess reazzjoni. Il-Lhud fi żmien Ġesù ma kinux aħjar minn dawk li lilhom ippriedka l-profeta Isaija f’li jkunu lesti li jaċċettaw il-messaġġ. (Isaija 1:4) L-użu tat-tixbihat kien karatteristika tal-ministeru taʼ Ġesù. Dan qanqal lid-dixxipli tiegħu biex jistaqsu: “Għaliex tkellimhom bil-parabboli?” Wieġeb Ġesù: “Għax lilkom ingħata li tagħrfu l-misteri tas-Saltna tas-Smewwiet; iżda lilhom dan ma kienx mogħti. Jien għalhekk inkellimhom bil-parabboli; għax iħarsu kemm iħarsu ma jarawx, u jisimgħu kemm jisimgħu ma jifhmux. U hekk isseħħ fihom il-profezija taʼ Isaija li tgħid: ‘Tisimgħu kemm tisimgħu ma tifhmux, u tħarsu kemm tħarsu ma tarawx. Għax il-qalb taʼ dan il-poplu twebbset: kienu tqal biex jisimgħu b’widnejhom, u għalqu għajnejhom li ma jmorrux jaraw b’għajnejhom, u jisimgħu b’widnejhom u jifhmu b’moħħhom, u hekk ibiddlu ħajjiethom u jiena nfejjaqhom.’”—Mattew 13:10, 11, 13-15; Mark 4:10-12; Luqa 8:9, 10.
23 Meta kkwota minn Isaija, Ġesù kien qed juri li l-profezija kellha twettiq fi żmienu. In-nies in ġenerali kellhom attitudni tal-qalb bħal dik tal-Lhud fi żmien Isaija. Għamew u ttarrxu għall-messaġġ tiegħu u bl-istess mod sabu l-qerda tistenniehom. (Mattew 23:35-38; 24:1, 2) Dan seħħ meta l-qawwiet armati Rumani taħt il-Ġeneral Titu ġew kontra Ġerusalemm fis-sena 70 E.K. u ġarrfu l-belt u t-tempju tagħha. Madankollu, xi wħud kienu taw widen lil Ġesù u kienu saru dixxipli tiegħu. Lil dawn Ġesù ddikjarahom “henjin.” (Mattew 13:16-23, 51) Hu kien informahom li meta jaraw lil “Ġerusalemm magħluqa minn kullimkien bl-eżerċti,” għandhom “jaħarbu mbagħad lejn il-muntanji.” (Luqa 21:20-22) B’hekk, iż-“żerriegħa qaddisa” li kienet eżerċitat fidi u li kienet ġiet imsawra f’ġens spiritwali, l-“Iżrael taʼ Alla,” ġiet salvata. a—Galatin 6:16.
24. Pawlu kif applikaha l-profezija taʼ Isaija, u dan x’jindika?
24 Għall-ħabta tas-sena 60 E.K., l-appostlu Pawlu sab ruħu arrestat ġo daru f’Ruma. Hemmhekk irranġa biex jiltaqaʼ mal-“kapijiet tal-Lhud” kif ukoll m’oħrajn u tahom ‘xhieda u fissrilhom x’inhi s-Saltna taʼ Alla.’ Meta ħafna minnhom m’aċċettawx il-messaġġ tiegħu, Pawlu spjega li dan kien bi twettiq tal-profezija taʼ Isaija. (Atti 28:17-27; Isaija 6:9, 10) Mela d-dixxipli taʼ Ġesù wettqu inkarigu simili għal dak taʼ Isaija.
25. Ix-Xhieda t’Alla taʼ żmienna x’għarfu, u kif iwieġbu?
25 B’mod simili, ix-Xhieda taʼ Jehovah llum jagħrfu li Alla Jehovah qiegħed fit-tempju qaddis tiegħu. (Malakija 3:1) Bħal Isaija, huma jgħidu: “Hawn jien: ibgħat lili!” B’mod żeluż, dawn isemmgħu l-messaġġ taʼ twissija dwar it-tmiem li riesaq taʼ din is-sistema t’affarijiet mill-agħar. Imma, bħalma indika Ġesù, relattivament ftit huma dawk li jiftħu għajnejhom u widnejhom biex jaraw u jisimgħu u jiġu salvati. (Mattew 7:13, 14) Henjin, tabilħaqq, huma dawk li jiftħu qlubhom biex jisimgħu u jiġu ‘mfejqin’!—Isaija 6:8, 10.
[Nota taʼ taħt]
a Fis-sena 66 E.K., bi tpattija għal rewwixta Lhudija, il-qawwiet armati Rumani taħt Ċestju Gallu ċċirkondaw lil Ġerusalemm u ppenetraw fil-belt billi waslu sal-ħitan tat-tempju. Imbagħad dawn irtiraw, u b’hekk id-dixxipli taʼ Ġesù setgħu jaħarbu lejn il-muntanji taʼ Perea qabel ma rritornaw ir-Rumani fis-sena 70 E.K.
[Mistoqsijiet taʼ Studju]
[Stampa f’paġna 94]
“Hawn jien: ibgħat lili!”
[Stampa f’paġna 97]
“Sakemm jitħarbtu l-bliet, u ħadd ma jgħammar fihom”
