Kapitlu Sebgħa

Gwaj għall-​Għalqa tad-​Dwieli Infidila!

Isaija 5:​1-30

1, 2. “Il-​maħbub” x’iħawwel, imma din kif tiddiżappuntah?

 “DIN il-​parabbola kważi m’hawnx oħra tal-​kalibru tagħha għas-​sbuħija skwiżita tal-​lingwaġġ u s-​sengħa gwappa f’dik li hi komunikazzjoni effettiva.” Hekk qal wieħed kummentatur tal-​Bibbja meta rrefera għall-​ewwel versi taʼ Isaija kapitlu 5. Kliem Isaija m’huwiex biss kapulavur, imma jagħti wkoll deskrizzjoni kommoventi taʼ kif Jehovah b’imħabba jieħu ħsieb il-​poplu tiegħu. Fl-​istess waqt, dan il-​kliem iwissina kontra affarijiet li ma jogħġbuhx.

² Il-​parabbola taʼ Isaija tibda hekk: “Ħa ngħanni lill-​maħbub tiegħi l-​għanja taʼ mħabbtu għall-​għalqa tad-​dwieli tiegħu. Il-​maħbub tiegħi kellu għalqa tad-​dwieli fuq għolja għammiela. Għażaqha u naddafha miż-​żrar, u ħawwel fiha dwieli mill-​aħjar; bena torri f’nofsha, u wkoll ħaffer magħsar fiha. Stennieha tagħmel l-​għeneb tajjeb, iżda kull ma għamlet kien għeneb qares.”​—Isaija 5:​1, 2; qabbel Mark 12:1.

Il-​Kura taʼ l-​Għalqa tad-​Dwieli

3, 4. Liema kura b’imħabba tingħata lill-​għalqa tad-​dwieli?

³ Kemm jekk Isaija jgħanni letteralment din il-​parabbola lis-​semmiegħa tiegħu u kemm jekk le, din żgur li tiġbdilhom l-​attenzjoni. Il-​biċċa l-​kbira x’aktarx li huma familjari maʼ kif titħawwel għalqa tad-​dwieli, u  d-​deskrizzjoni taʼ Isaija hija ħajja u realistika. Bħal dawk li jkabbru d-​dwieli llum, sid l-​għalqa tad-​dwieli ma jħawwilx żrieragħ taʼ l-​għeneb, imma fergħa jew żarġun minn dielja oħra biex ikollu “dwieli mill-​aħjar,” taʼ kwalità għolja. B’mod xieraq, hu jħawwel din l-​għalqa tad-​dwieli “fuq għolja għammiela,” post fejn għalqa tad-​dwieli tistaʼ tiffjorixxi.

⁴ Biex għalqa tad-​dwieli tagħmilha tipproduċi trid verament taqtaʼ bi snienek. Isaija jiddeskrivi lis-​sid bħala li qed ‘jagħżaq l-​art u jnaddafha miż-​żrar’​—xogħol tedjanti li jħallik bla nifs! Hu x’aktarx li juża l-​ġebel il-​kbir ‘biex jibni torri.’ Fil-​qedem, dawn it-​torrijiet kienu jservu bħala stazzjonijiet għall-​għassiesa li kienu jgħassu l-​uċuħ tar-​rabaʼ mill-​ħallelin u l-​annimali. a Ukoll, hu jibni ħajt tal-​ġebel madwar l-​għalqa tad-​dwieli. (Isaija 5:5) Dan spiss kien isir biex il-​ħamrija vitali tal-​wiċċ ma tkunx tistaʼ tinġarr maʼ l-​ilma.

5. Is-​sid x’jistenna b’mod xieraq mill-​għalqa tad-​dwieli tiegħu, imma x’jieħu?

⁵ Billi ħadem daqshekk iebes biex jipproteġi l-​għalqa tad-​dwieli tiegħu, is-​sid għandu kull dritt li jistenna li din tagħmel il-​frott. B’dan f’moħħu, hu jħaffer magħsar taʼ l-​inbid. Imma sseħħ it-​tama tiegħu għall-​ħsad? Le, l-​għalqa tad-​dwieli tipproduċi għeneb qares.

L-​Għalqa tad-​Dwieli u Sidha

6, 7. (a) Min hu sid l-​għalqa tad-​dwieli, u x’inhi l-​għalqa tad-​dwieli? (b) Is-​sid jinkuraġġixxi liema ħaqq?

⁶ Min hu s-​sid, u x’inhi l-​għalqa tad-​dwieli? Sid l-​għalqa  tad-​dwieli jindika t-​tweġibiet għal dawn il-​mistoqsijiet meta hu nnifsu jgħid: “U issa, intom li tgħammru f’Ġerusalemm, rġiel taʼ Ġuda, agħmlu intom ħaqq bejni u bejn l-​għalqa tad-​dwieli tiegħi. X’kien fadalli nagħmel għall-​għalqa tiegħi u ma għamiltux? Stennejtha tagħmel għeneb tajjeb, u kull ma għamlet kien għeneb qares. U issa ħa nurikom x’sejjer nagħmel jien lill-​għalqa tiegħi tad-​dwieli. Nneħħilha l-​ilqugħ taʼ madwarha, u jħarbtuha; nġarrfilha l-​ħajt, biex in-​nies tgħaffiġha.”​—Isaija 5:​3-5.

⁷ Iva, Jehovah hu sid l-​għalqa tad-​dwieli, u bħallikieku poġġa lilu nnifsu f’awla tal-​qorti, u talab li jsir ħaqq bejnu u bejn l-​għalqa tad-​dwieli li ddiżappuntatu. Allura,  x’inhi l-​għalqa tad-​dwieli? Jispjega s-​sid: “L-​għalqa tad-​dwieli tal-​Mulej taʼ l-​eżerċti hija d-​dar taʼ Iżrael; u l-​irġiel taʼ Ġuda huma l-​mixtla taʼ l-​għalqa tiegħu.”​—Isaija 5:7a.

8. X’hemm sinjifikanti dwar il-​fatt li Isaija jsejjaħ lil Jehovah, il-​“maħbub tiegħi”?

⁸ Lil Jehovah, li hu sid l-​għalqa tad-​dwieli, Isaija jsejjaħlu l-​“maħbub tiegħi.” (Isaija 5:1) Isaija jistaʼ jitkellem b’dan il-​mod intimu dwar Alla sempliċement għaliex għandu relazzjoni mill-​qrib Miegħu. (Qabbel Ġob 29:4; Salm 25:14.) Madankollu, l-​imħabba li kellu l-​profeta għal Alla m’hi xejn meta tqabbilha maʼ l-​imħabba li wera Alla għall-​“għalqa tad-​dwieli” tiegħu​—il-​ġens li kien “ħawwel.”​—Qabbel Eżodu 15:17; Salm 80:​9, 10 [80:​8, 9, NW].

9. Jehovah kif ħa ħsieb il-​ġens tiegħu bħal għalqa tad-​dwieli taʼ valur?

⁹ Jehovah “ħawwel” il-​ġens tiegħu fl-​art taʼ Kangħan u tahom il-​liġijiet u r-​regolamenti tiegħu, li servew bħala ħajt biex ma jħalluhomx jiġu korrotti minn ġnus oħrajn. (Eżodu 19:​5, 6; Salm 147:​19, 20; Efesin 2:14) Barra minn hekk, Jehovah tahom imħallfin, qassisin, u profeti biex jgħallmuhom. (2 Slaten 17:13; Malakija 2:7; Atti 13:20) Meta Iżrael kien ikun mhedded minn xi aggressjoni militari, Jehovah kien iqajjem lil min jeħlishom. (Lhud 11:​32, 33) Jehovah għandu raġun jistaqsi: “X’kien fadalli nagħmel għall-​għalqa tiegħi u ma għamiltux?”

Nidentifikaw l-​Għalqa tad-​Dwieli t’Alla Llum

10. Ġesù ta liema parabbola li tinvolvi għalqa tad-​dwieli?

¹⁰ Jistaʼ jkun li Ġesù kellu kliem Isaija f’moħħu meta rrakkonta l-​parabbola tal-​bdiewa qattiela: “Kien hemm wieħed, sid taʼ għalqa, u ħawwilha bid-​dwieli; tellgħalha ħajt tas-​sejjieħ madwarha, ħaffer magħsar fiha, u bnielha  torri; u qabbilha lil xi bdiewa. U siefer f’art oħra.” Jiddispjaċina ngħidu, il-​bdiewa ttradewh lil sid l-​għalqa tad-​dwieli, u saħansitra qatlulu lil ibnu. Ġesù ssokta juri li din il-​parabbola ma kinitx tinvolvi biss lil Iżrael letterali meta qal: “Għalhekk ngħidilkom li s-​Saltna taʼ Alla tittieħed mingħandkom [Iżrael tal-​laħam] u tingħata lil ġens li jagħmel il-​frott minnha.”​—Mattew 21:​33-41, 43.

11. Liema għalqa tad-​dwieli spiritwali eżistiet fl-​ewwel seklu, imma x’ġara wara l-​mewt taʼ l-​appostli?

¹¹ Dan il-​“ġens” ġdid hu l-​“Iżrael taʼ Alla”​—ġens spiritwali taʼ Kristjani midlukin li b’kollox jgħoddu 144,000. (Galatin 6:16; 1 Pietru 2:​9, 10; Apokalissi 7:​3, 4) Ġesù qabbel lil dawn id-​dixxipli maʼ “friegħi” fuq id-​“dielja vera,” li tirrappreżenta lilu stess. Naturalment, dawn il-​friegħi hu mistenni minnhom li jagħmlu l-​frott. (Ġwann 15:​1-5) Dawn iridu juru kwalitajiet bħal taʼ Kristu u jipparteċipaw fix-​xogħol taʼ li jippridkaw “dan l-​Evanġelju tas-​Saltna.” (Mattew 24:14; Galatin 5:​22, 23) Imma mindu mietu t-​tnax-il appostlu, il-​maġġuranza taʼ dawk li jsostnu li huma friegħi tad-​“dielja vera” wrew li kienu foloz​—billi pproduċew għeneb qares minflok frott tajjeb.​—Mattew 13:​24-30, 38, 39.

12. Kliem Isaija kif jikkundanna lill-​Kristjaneżmu, imma x’lezzjoni fih għall-​Kristjani veri?

¹² Għalhekk, il-​kundanna minn Isaija fuq Ġuda llum tapplika għall-​Kristjaneżmu. Studju taʼ l-​istorja tiegħu​—il-​gwerer tiegħu, il-​kruċjati tiegħu, l-​Inkwiżizzjonijiet tiegħu​—jirrivela kemm kien qares il-​frott tiegħu! Minkejja dan, il-​Kristjani midlukin, il-​vera għalqa tad-​dwieli, u sħabhom tal-​“kotra kbira” jridu jagħtu kas kliem Isaija. (Apokalissi 7:9) Jekk iridu jogħġbu lil sid l-​għalqa tad-​dwieli, dawn iridu, kemm individwalment u kemm bħala grupp, jipproduċu frott li jogħġob lilu.

 “Għeneb Qares”

13. Jehovah x’se jagħmlilha l-​għalqa tad-​dwieli tiegħu minħabba li pproduċiet frott ħażin?

¹³ Billi għamel sforzi kbar biex irawwem u jikkultiva l-​għalqa tad-​dwieli tiegħu, Jehovah bi dritt jistennieha ssir ‘ġnejna tad-​dwieli li fiha għaxqa!’ (Isaija 27:2) Madankollu, minflok ma tipproduċi frott li jittiekel, din tipproduċi “għeneb qares,” letteralment “żibel” jew “frott ħażin (imħassar).” (Isaija 5:2; nota taʼ taħt fin-​NW; Ġeremija 2:21) Għalhekk, Jehovah jiddikjara li se jneħħi “l-​ilqugħ” protettiv tiegħu minn madwar il-​ġens. Il-​ġens se jintgħamel “xagħra” u se jġarrab l-​abbandun u n-​nixfa. (Aqra Isaija 5:6.) Mosè kien wissiehom li kellhom jgħaddu minn dawn l-​affarijiet jekk ma jobdux il-​Liġi t’Alla.​—Dewteronomju 11:17; 28:​63, 64; 29:​22, 23.

14. Jehovah liema frott jistenna mingħand il-​ġens tiegħu, imma għall-​kuntrarju dan x’jipproduċi?

¹⁴ Alla jistenna li l-​ġens jipproduċi frott tajjeb. Mikea, il-​kontemporanju taʼ Isaija, jiddikjara: “Bniedem, huwa wriek x’inhu tajjeb u x’jistenna minnek il-​Mulej: li tagħmel dak li hu ġust, li tħobb u tkun ħanin, u li tkun umli fl-​imġiba tiegħek maʼ Alla tiegħek.” (Mikea 6:8; Żakkarija 7:9) Madankollu, il-​ġens ma jagħtix kas it-​twissija taʼ Jehovah. “[Alla] stenna l-​ġustizzja, u araw sab it-​tixrid tad-​demm, stenna s-​sewwa, u araw samaʼ l-​għajat tal-​maħqura.” (Isaija 5:7b) Mosè bassar li l-​ġens żleali kien se jipproduċi għeneb velenuż “mid-​dielja taʼ Sodoma.” (Dewteronomju 32:32) X’aktarx, allura, l-​immoralità sesswali, inkluż l-​omosesswalità, hija mod wieħed kif kienu qed jitbegħdu mil-​Liġi t’Alla. (Levitiku 18:22) L-​espressjoni “tixrid tad-​demm” qed tiġi wżata minflok “ksur tal-​liġi.” Imġiba brutali bħal din bla dubju rriżultat f’“għajat” mill-​maħqurin​—għajat li wasal f’widnejn Dak li ħawwel l-​għalqa tad-​dwieli.​—Qabbel Ġob 34:28.

15, 16. Il-​Kristjani veri kif jistgħu jevitaw li jipproduċu l-​frott ħażin li pproduċa Iżrael?

 ¹⁵ Alla Jehovah “jħobb id-​dritt u s-​sewwa.” (Salm 33:5) Hu kkmanda lil-​Lhud: “La tgħawwiġx fil-​ħaqq li tagħmel; la tħarisx lejn wiċċ il-​fqir; lanqas ma tweġġaħ lill-​kbir għal wiċċu; imma tagħmel ħaqq mill-​proxxmu tiegħek fis-​sewwa.” (Levitiku 19:15) Għalhekk, ma rridux nuru parzjalità meta nittrattaw maʼ xulxin, u qatt ma nħallu affarijiet bħalma huma r-​razza, l-​età, l-​għana, jew il-​faqar jinfluwenzaw il-​mod kif aħna niġġudikaw lin-​nies. (Ġakbu 2:​1-4) Huwa partikolarment importanti li dawk li jaqdu f’pożizzjonijiet taʼ indokrar ‘ma jxaqilbu lejn ħadd,’ waqt li jfittxu dejjem li jisimgħu ż-​żewġ qniepen fi kwistjoni qabel ma jiġġudikaw.​—1 Timotju 5:21; Proverbji 18:13.

¹⁶ Iżjed minn hekk, billi l-​Kristjani qegħdin jgħixu f’dinja taʼ mingħajr liġi jkun faċli għalihom li jiżviluppaw attitudni negattiva jew ribelluża lejn il-​livelli divini. Imma l-​Kristjani veri jridu jkunu ‘lesti li jobdu’ l-​liġijiet t’Alla. (Ġakbu 3:​17, NW) Minkejja l-​immoralità sesswali u l-​vjolenza taʼ “din id-​dinja ħażina tallum,” dawn jeħtieġ li ‘jqisu sewwa kif iġibu ruħhom, mhux bħal nies bla dehen, iżda bħal nies għorrief.’ (Galatin 1:4; Efesin 5:15) Iridu jaħarbu ideat permissivi dwar is-​sess, u meta jkun hemm xi nuqqas taʼ qbil, għandhom ifittxu li jintlaħaq ftehim mingħajr “saħna, korla, tagħjir, għajat.” (Efesin 4:31) Billi jikkultivaw it-​tjieba, il-​Kristjani veri jonoraw ’l Alla u jiksbu l-​favur tiegħu.

Il-​Prezz tar-​Regħba

17. Liema kondotta mill-​agħar hija kundannata fl-​ewwel gwaj taʼ Isaija?

¹⁷ Fil-​vers 8, Isaija m’għadux jikkwota kliem Jehovah. Waqt li jikkundanna xi ftit mill-​“għeneb qares” prodott  f’Ġuda, hu jlissen personalment l-​ewwel wieħed minn sitt gwajijiet: “Gwaj għal dawk li jżidu dar maʼ dar, u jgħaqqdu għalqa maʼ għalqa, sakemm ma jibqax aktar wisaʼ u tibqgħu tgħammru weħidkom f’nofs il-​pajjiż! Jien smajt b’widnejja l-​Mulej taʼ l-​eżerċti: ‘Naħlef li dawn il-​ħafna djar isiru ħerba, djar kbar u sbieħ, u ħadd ma jgħammar fihom. Għax għaxar fiddien dwieli jagħtu bat wieħed; u ħomer żerriegħa jagħmlu efa.’”​—Isaija 5:​8-10.

18, 19. Il-​kontemporanji taʼ Isaija kif jinjoraw il-​liġijiet taʼ Jehovah rigward il-​propjetà, u x’se jkun ir-​riżultat għalihom?

¹⁸ F’Iżrael tal-​qedem l-​art kollha fl-​aħħar mill-​aħħar kienet tappartjeni lil Jehovah. Kull familja kellha wirt mogħti lilha minn Alla, li setgħet tikrih jew tisilfu imma qatt ma tbigħu “għal dejjem.” (Levitiku 25:23) Din il-​liġi kienet tevita li jsiru l-​abbużi, bħal monopolji fuq propjetà immobbli. Din ipproteġiet ukoll lill-​familji milli jogħdsu iktar ’l isfel fil-​faqar. Madankollu, xi wħud f’Ġuda kienu qed jiksru b’regħba l-​liġijiet t’Alla rigward il-​propjetà. Kiteb Mikea: “Jekk jitlebilbu għall-​għelieqi, jisirquhom; jekk għad-​djar, jaħtfuhom; jagħmlu l-​vjolenza fuq raġel u daru, fuq is-​sid u ġidu.” (Mikea 2:2) Imma Proverbji 20:21 iwissi: “Il-​ġid miksub bl-​għaġla mill-​ewwel, ma jkollux barka fi tmiemu.”

¹⁹ Jehovah jwiegħed li jneżżaʼ lil dawn l-​uħud rgħibin mill-​ġid tagħhom miksub b’mezzi illeċiti. Id-​djar li jaħtfu ‘ħadd ma se jgħammar fihom.’ L-​artijiet li jixxennqu għalihom se jipproduċu sempliċi farka mill-​kapaċità tagħhom. Ma jintqalx eżattament kif u meta se titwettaq din is-​saħta. X’aktarx li tirreferi, għallinqas parti minnha, għall-​kundizzjonijiet kaġunati mill-​eżilju Babiloniż li kien ġej fil-​futur.​—Isaija 27:10.

20. Il-​Kristjani llum kif jistgħu ma jimitawx l-​attitudni taʼ regħba murija minn xi wħud f’Iżrael?

²⁰ Il-​Kristjani llum iridu jistmerru r-​regħba bla xabaʼ  bħal dik murija minn xi Iżraelin lura f’dak iż-​żmien. (Proverbji 27:20) Meta l-​affarijiet materjali jsiru importanti b’mod esaġerat, ikun faċli li dak li jkun jispiċċa li jagħmel kulma jiġi għal idejh biex jikseb il-​flus. Wieħed jistaʼ faċilment jaqaʼ fin-​nassa taʼ negozju diżonest jew xi proġetti mhux realistiċi li bihom isir sinjur f’ħakka t’għajn. “Kastig ikollu min irid jistagħna malajr.” (Proverbji 28:20) Kemm hu importanti, għalhekk, li nkunu kuntenti b’dak li għandna!​—1 Timotju 6:8.

In-​Nasba taʼ Divertiment Dubjuż

21. Liema dnubiet huma kundannati fit-​tieni gwaj taʼ Isaija?

²¹ Imbagħad jiġi t-​tieni gwaj taʼ Isaija: “Gwaj għal dawk li jbakkru fil-​għodu, u jiġru għal wara s-​sokor; jiddawwru billejl sa ma jisħnu bl-​inbid. Kitarra u arpa, tanbur u flawt, u nbid x’jixorbu fl-​ikliet tagħhom, u xejn ma jaħsbu f’għemil il-​Mulej, u għemil idejh ma jagħtux kasu.”​—Isaija 5:​11, 12.

22. Liema nuqqas taʼ rażna jintwera f’Iżrael, u x’se jkun ir-​riżultat għall-​ġens?

²² Jehovah hu “Alla hieni” u ma jċaħħadx lill-​qaddejja tiegħu minn rikreazzjoni raġunevoli. (1 Timotju 1:​11, NW) Madankollu, dawn l-​uħud li jiġru wara l-​pjaċiri jaqbżu kull limitu! “Min jisker, jisker billejl,” tgħid il-​Bibbja. (1 Tessalonikin 5:7) Imma x-​xalaturi tal-​profezija jibdew ilegilgu l-​inbid malli titlaʼ x-​xemx u jibqgħu jixorbu sa fil-​għaxija! Huma jġibu ruħhom bħallikieku Alla ma jeżistix, bħallikieku mhux se jitlobhom kont taʼ dak li jagħmlu. Isaija jbassar futur ikrah għal uħud bħal dawn. “Għalhekk il-​poplu tiegħi jitturufnawh, għax hu poplu bla moħħ. U l-​kbarat tiegħu bil-​ġuħ imutu, tinxef bil-​għatx il-​kotra tiegħu.” (Isaija 5:13) Peress li ma jridx jaġixxi skond l-​għarfien veru, il-​poplu f’patt m’Alla​—il-​kbar u ż-​żgħar—se jinżel f’Xeol.​—Aqra Isaija 5:​14-17.

23, 24. Il-​Kristjani huma mħeġġin li juru liema rażna u moderazzjoni?

 ²³ It-​“tbahrid,” jew ix-​“xalar,” kien ukoll problema fost xi Kristjani fl-​ewwel seklu. (Galatin 5:21; KŻ; 2 Pietru 2:13) Mela m’għandniex għalfejn nissorprendu ruħna li xi Kristjani dedikati llum urew nuqqas taʼ għaqal fejn għandhom x’jaqsmu l-​laqgħat soċjali. L-​użu bla kontroll taʼ xorb alkoħoliku ġagħal lil xi wħud isiru storbjużi u bla rażan. (Proverbji 20:1) Kien hemm saħansitra dawk li ġabu ruħhom b’mod immorali taħt l-​influwenza taʼ ħafna alkoħol, u xi laqgħat soċjali tħallew jibqgħu sejrin kważi l-​lejl kollu, u b’hekk fixklu l-​attivitajiet Kristjani tal-​ġurnata taʼ wara.

²⁴ Madankollu, Kristjani bilanċjati jipproduċu frott kif irid Alla u jeżerċitaw ir-​rażna u l-​moderazzjoni meta jagħżlu r-​rikreazzjoni. Huma jagħtu kas il-​parir taʼ Pawlu li nsibu f’Rumani 13:13: “Ngħixu kif jixraq, bħal f’binhar; mhux bl-​ikel iż-​żejjed u s-​sokor, mhux biż-​żína u t-​tbahrid.”

Nobogħdu d-​Dnub u Nħobbu l-​Verità

25, 26. Isaija jesponi liema raġunar mill-​agħar min-​naħa taʼ l-​Iżraelin fit-​tielet u r-​rabaʼ gwaj tiegħu?

²⁵ Ismaʼ issa t-​tielet u r-​rabaʼ gwaj taʼ Isaija: “Gwaj għal dawk li jiġbdu l-​ħażen lejhom bil-​ħbula tal-​barrin; u d-​dnub bil-​ħbula tal-​karrijiet. Gwaj għal dawk li jgħidu: ‘Ħa jfittex jagħmel li għandu jagħmel ħalli narawh; ħa joqrob u jseħħ ħsieb il-​Qaddis taʼ Iżrael, ħalli nagħrfuh!’ Gwaj għal dawk li jsejjħu tajjeb il-​ħażin, u ħażin it-​tajjeb; u jibdlu d-​dlam mad-​dawl, li jibdlu l-​morr mal-​ħelu, u l-​ħelu mal-​morr.”​—Isaija 5:​18-20.

²⁶ Xi stampa ħajja dik taʼ dawk li jipprattikaw id-​dnub! Dawn jintrabtu mad-​dnub bħalma bhejjem tal-​ġbid ikunu  marbutin mal-​karettuni. Dawn il-​midinbin ma jibżgħux minn xi jum taʼ ġudizzju li ġej. Biex iwaqqgħu kollox għaċ-​ċajt jgħidu: “Ħa jfittex jagħmel li għandu jagħmel” Alla! Minflok ma jissottomettu ruħhom għal-​Liġi t’Alla, dawn jgħawġu l-​affarijiet, billi “jsejjħu tajjeb il-​ħażin, u ħażin it-​tajjeb.”​—Qabbel Ġeremija 6:15; 2 Pietru 3:​3-7.

27. Il-​Kristjani llum kif jistgħu jevitaw attitudni bħal dik taʼ l-​Iżraelin?

²⁷ Il-​Kristjani llum iridu jevitaw assolutament kull attitudni bħal din. Per eżempju, huma jirrifjutaw li jħaddnu l-​ħarsa tad-​dinja dwar li l-​fornikazzjoni u l-​omosesswalità huma aċċettabbli. (Efesin 4:​18, 19) Veru, Kristjan għandu mnejn “jieħu xi pass falz” li jistaʼ jwasslu biex jikkommetti dnub serju. (Galatin 6:1, NW)  L-​anzjani fil-​kongregazzjoni lesti li jgħinu lil dawk li jkunu waqgħu u jeħtieġu l-​assistenza. (Ġakbu 5:​14, 15) Bl-​għajnuna tat-​talb u taʼ pariri bbażati fuq il-​Bibbja, ikun possibbli li wieħed jirkupra spiritwalment. Inkella, ikun hemm il-​periklu li jsir ‘ilsir tad-​dnub.’ (Ġwann 8:34) Minflok ma jwaqqgħu lil Alla għaċ-​ċajt, u b’hekk ma jibqgħux konxji tal-​jum taʼ ġudizzju li ġej, il-​Kristjani jistinkaw biex jibqgħu “bla tebgħa u bla dnub” quddiem Jehovah.​—2 Pietru 3:14; Galatin 6:​7, 8.

28. Liema dnubiet huma kundannati fil-​gwajijiet finali taʼ Isaija, u l-​Kristjani llum kif jistgħu jevitawhom dawn id-​dnubiet?

²⁸ B’mod xieraq, Isaija jżid dawn il-​gwajijiet finali: “Gwaj għal dawk li huma għorrief f’għajnejhom, u mingħalihom għandhom id-​dehen. Gwaj għal dawk qalbiena għal xorb l-​inbid, u rġiel jinqalgħu għat-​taħlit taʼ xorb is-​sokor. Gwaj għal dawk li jeħilsu l-​ħati mit-​tixħim; u mid-​dritt tiegħu jċaħħdu l-​bniedem sewwa.” (Isaija 5:​21-23) B’mod evidenti, dan il-​kliem kien indirizzat lil dawk li kienu jaqdu bħala mħallfin fil-​pajjiż. L-​anzjani tal-​kongregazzjoni llum jevitaw li jkunu jidhru “għorrief f’għajnejhom.” Huma jaċċettaw umilment il-​pariri mingħand sħabhom l-​anzjani l-​oħrajn u jżommu mill-​qrib maʼ l-​istruzzjonijiet organizzazzjonali. (Proverbji 1:5; 1 Korintin 14:33) Jużaw il-​moderazzjoni f’dak li hu użu taʼ xorb alkoħoliku, u qatt ma jixorbu qabel ma jkunu se jwettqu xi responsabbiltà fil-​kongregazzjoni. (Hosegħa 4:11) L-​anzjani jevitaw ukoll li saħansitra jidhru li qishom qegħdin juru xi favoritiżmu. (Ġakbu 2:9) X’differenza mill-​kleru tal-​Kristjaneżmu! Ħafna minn dawn jiskużaw lil midinbin għonja u taʼ pożizzjoni f’nofshom, b’kuntrast dirett mat-​twissijiet taʼ l-​appostlu Pawlu li nsibu f’Rumani 1:​18, 26, 27; fl-​1 Korintin 6:​9, 10; u f’Efesin 5:​3-5.

29. Liema tmiem taʼ hemm kbir jistenna lill-​għalqa tad-​dwieli Iżraelija taʼ Jehovah?

 ²⁹ Isaija jikkonkludi dan il-​messaġġ profetiku billi jiddeskrivi tmiem taʼ hemm kbir għal dawk li “warrbu l-​liġi tal-​Mulej” u li m’għamlux frott taʼ tjieba. (Isaija 5:​24, 25; Hosegħa 9:16; Malakija 3:19 [4:1, NW]) Hu jiddikjara: “[Jehovah] għolla . . . [“sinjal,” “NW”] lill-​ġens mill-​bogħod; u saffarlu minn truf l-​art; arawh ġej ħafif ħafif.”​—Isaija 5:26; Dewteronomju 28:49; Ġeremija 5:15.

30. Min se jlaqqaʼ “ġens” kbir kontra l-​poplu taʼ Jehovah, u b’liema riżultat?

³⁰ Fil-​qedem, arblu f’post fl-​għoli setaʼ jservi taʼ “sinjal,” jew post fejn kienu jiltaqgħu n-​nies jew l-​eżerċti. (Qabbel Isaija 18:3; Ġeremija 51:27.) Issa Jehovah nnifsu se jlaqqaʼ lil dan il-​“ġens” kbir bla isem biex jesegwixxi l-​ħaqq tiegħu. b Hu se ‘jsaffarlu,’ jiġifieri, jiġbidlu l-​attenzjoni lejn il-​poplu xellerat tiegħu bħala oġġett li hu taʼ min jikkonkwistah. Il-​profeta mbagħad jiddeskrivi l-​attakk qawwi u tal-​biżaʼ li jsir b’ħeffa kbira minn dawn il-​konkwistaturi bħal iljuni. Dawn se “jaħtfu l-​priża,” jiġifieri, il-​ġens t’Alla, u “jaħarbu biha” lejn il-​jasar. (Aqra Isaija 5:​27-30a.) U x’riżultat taʼ niket għall-​pajjiż tal-​poplu taʼ Jehovah! “U jħares lejn l-​art, u ara, dalma u diqa, u d-​dawl imdallam bis-​sħab iswed tagħha.”​—Isaija 5:30b.

31. Il-​Kristjani veri kif jistgħu jevitaw li jsofru l-​kastig mogħti lill-​għalqa tad-​dwieli Iżraelija taʼ Jehovah?

³¹ Iva, l-​għalqa tad-​dwieli mħawla minn Alla b’tant imħabba tispiċċa għerja​—tajba biss biex tinqered. X’lezzjoni qawwija fih kliem Isaija għal dawk kollha li jixtiequ jaqdu lil Jehovah llum! Jalla jistinkaw biex jagħmlu biss frott taʼ tjieba, għat-​tifħir taʼ Jehovah u għas-​salvazzjoni tagħhom stess!

[Noti taʼ taħt]

[Mistoqsijiet taʼ Studju]

[Stampa f’paġna 83]

Il-​midneb ikun marbut mad-​dnub bħalma bhima tal-​ġbid tkun marbuta maʼ karettun

 [Stampa taʼ paġna sħiħa f’paġna 85]