Kapitlu Tlieta u Għoxrin

Ibqaʼ Stenna lil Jehovah

Isaija 30:1-33

1, 2. (a) X’fih Isaija kapitlu 30? (b) Liema mistoqsijiet se nikkunsidraw issa?

 F’ISAIJA kapitlu 30, naqraw iktar dikjarazzjonijiet divini kontra n-​nies mill-​agħar. Minkejja dan, din il-​parti mill-​profezija taʼ Isaija tenfasizza wħud mill-​kwalitajiet taʼ Jehovah li jqawwu l-​qalb. Fil-​fatt, il-​karatteristiċi taʼ Jehovah jiġu deskritti bi kliem tant ħaj li nkunu nistgħu, bħallikieku, naraw il-​preżenza tiegħu li tfarraġna, nisimgħu leħnu li jiggwidana, u nħossuh ifejjaqna.—Isaija 30:20, 21, 26.

² Xorta waħda, in-​nies taʼ pajjiż Isaija, l-​abitanti apostati taʼ Ġuda, ma jridux jirritornaw lejn Jehovah. Minflok, huma jpoġġu l-​fiduċja tagħhom fil-​bniedem. Jehovah kif iħossu dwar dan? U din il-​parti mill-​profezija taʼ Isaija kif tgħin lill-​Kristjani llum biex jibqgħu jistennew lil Jehovah? (Isaija 30:18) Ejja niskopru.

Bluha u Għawġ

3. Jehovah liema pjan jikxef?

³ Għal xi żmien il-​mexxejja taʼ Ġuda kienu qegħdin jippjanaw bil-​moħbi biex isibu mod kif jevitaw li jiġu taħt il-​madmad taʼ l-​Assirja. Madankollu, Jehovah kien qed jarahom. Issa hu jikxef il-​pjan tagħhom: “‘Ħażin għalikom, ulied xewwiexa,’ oraklu tal-​Mulej. ‘Jippruvaw, iżda mingħajri, jintrabtu u jiftiehmu, iżda mhux skond  l-​ispirtu tiegħi, biex iżidu dnub fuq dnub. Telqu u niżlu l-​Eġittu.’”—Isaija 30:1, 2a.

4. In-​nies ribellużi t’Alla kif poġġew l-​Eġittu minflok Alla?

⁴ Kif inħasdu dawk il-​mexxejja xewwiexa meta semgħu li l-​pjan tagħhom inkixef! Meta jmorru l-​Eġittu biex jagħmlu alleanza miegħu din ma tkunx biss azzjoni ostili kontra l-​Assirja; b’dan huma jirribellaw kontra Alla Jehovah. Fi żmien is-​Sultan David, il-​ġens ħares lejn Jehovah bħala l-​kenn tiegħu u qagħad ‘fid-​dell taʼ ġwinħajh.’ (Salm 27:1; 36:8 [36:7, NW]) Issa huma “jistagħnew bil-​qawwa tal-​Fargħun” u ‘jfittxu l-​kenn taħt dell l-​Eġittu.’ (Isaija 30:2b) L-​Eġittu poġġewh minflok Alla! Xi tradiment!—Aqra Isaija 30:3-5.

5, 6. (a) L-​alleanza maʼ l-​Eġittu għala hija żball fatali? (b) Liema vjaġġ li sar qabel mill-​poplu t’Alla jenfasizza l-​bluha taʼ din il-​mawra lejn l-​Eġittu?

⁵ Bħallikieku biex iwieġeb lil kulmin forsi jaħseb li l-​missjoni lejn l-​Eġittu hija sempliċement żjara taʼ bla ħsieb, Isaija jagħti iktar dettalji. “Oraklu għall-​bhejjem tan-​Negeb: F’art taʼ hemm u dwejjaq, fejn hemm l-​iljun u l-​iljuna jgħajjtu, il-​lifgħa u s-​serp itir, iġorru ġidhom fuq dahar il-​ħmir, u t-​teżori tagħhom fuq ħotbiet l-​iġmla.” (Isaija 30:6a) Jidher ċar li l-​vjaġġ huwa pjanat sew. Messaġġiera jorganizzaw grupp taʼ iġmla u ħmir, li jgħabbuhom b’affarijiet li jiswew ħafna flus u jniżżluhom l-​Eġittu minn ġo deżert għeri mimli ljuni jgħajtu u sriep velenużi. Fl-​aħħar il-​messaġġiera jaslu fid-​destinazzjoni tagħhom u t-​teżori tagħhom jagħtuhom lill-​Eġizzjani. Xtraw il-​protezzjoni—jew hekk jaħsbu. Madankollu, Jehovah jgħid: “Għal għand poplu li ma jiswiex. L-​għajnuna taʼ l-​Eġittu hi fiergħa u vojta; għalhekk jien sejjaħtlu: ‘Raħab l-​għażżiena.’” (Isaija 30:6b, 7) L-​Eġittu qed jiġi ffigurat minn  “Raħab,” id-​“Dragun.” (Isaija 51:9, 10) Dan iwiegħed kollox imma ma jagħmel xejn. L-​alleanza li Ġuda għamlet miegħu hija żball fatali.

⁶ Hekk kif Isaija jiddeskrivi l-​vjaġġ tal-​messaġġiera, dawk li jisimgħuh għandhom mnejn jiftakru fi vjaġġ simili li sar fi żmien Mosè. Missirijiethom tal-​qedem għaddew minn dak l-​istess “deżert kbir u jwaħħax.” (Dewteronomju 8:14-16) Madankollu, fi żmien Mosè, l-​Iżraelin kienu ħerġin mill-​Eġittu u ’l barra mill-​jasar. Din id-​darba l-​messaġġiera qed jivvjaġġaw lejn l-​Eġittu, u b’hekk deħlin biex ikunu taħtu. Xi bluha! Jalla aħna qatt ma nieħdu xi deċiżjoni ħażina bħal din u nibdlu l-​libertà spiritwali li għandna mal-​jasar!—Qabbel Galatin 5:1.

Oppożizzjoni għall-​Messaġġ tal-​Profeta

7. Jehovah għala jqabbad lil Isaija jniżżel bil-​miktub it-​twissija Tiegħu lil Ġuda?

⁷ Jehovah jgħid lil Isaija jniżżel bil-​miktub il-​messaġġ li għadu kif għaddielu sabiex ‘ikun għaż-​żmien li ġej xhieda għal dejjem.’ (Isaija 30:8) Jehovah ma jaqbilx li jsiru alleanzi mal-​bniedem, u b’hekk ma nistriħux Fuqu. Għalhekk irid li dan jitniżżel għall-​benefiċċju taʼ ġenerazzjonijiet futuri—inkluż il-​ġenerazzjoni tagħna llum. (2 Pietru 3:1-4) Imma f’dan iż-​żmien hawn ħtieġa akbar biex dan jitniżżel bil-​miktub. “Dan il-​poplu xewwiex, ulied giddieba; ulied li ma jridux jisimgħu l-​liġi tal-​Mulej.” (Isaija 30:9) In-​nies m’aċċettawhx il-​parir t’Alla. Għaldaqstant, irid jitniżżel bil-​miktub sabiex iktar tard ma jkunux jistgħu jiċħdu li rċivew twissija xierqa.—Proverbji 28:9; Isaija 8:1, 2.

8, 9. (a) Il-​mexxejja taʼ Ġuda b’liema mod jipprovaw jikkorrompu lill-​profeti taʼ Jehovah? (b) Isaija kif juri li mhux se jħalli lil min ibeżżgħu?

 ⁸ Isaija issa jagħti eżempju taʼ l-​attitudni ribelluża tal-​poplu. Dawn “jgħidu lill-​veġġenti: ‘La tarawx,’ u lill-​profeti: ‘La tħabbrulniex is-​sewwa. Għidulna li jogħġobna; ħabbrulna l-​ħolm.’” (Isaija 30:10) Billi jordnaw lill-​profeti leali biex ma jibqgħux jgħidulhom dak li hu “sewwa,” jew veru, u biex minflok jgħidulhom dak li ‘jogħġobhom’ u dak li hu “ħolm,” jew falz, il-​mexxejja taʼ Ġuda juru li jridu min jgħarrxilhom widnejhom. Iridu min ifaħħarhom, mhux min jikkundannahom. Fl-​opinjoni tagħhom, jekk xi profeta ma jkunx lest li jipprofetizza skond il-​gosti tagħhom, dan għandu ‘joħroġ mit-​triq, iwarrab mill-​mogħdija.’ (Isaija 30:11a) Dan għandu, jew jgħid affarijiet li jdoqqu għal widnejhom, jew inkella jieqaf jippriedka għalkollox!

⁹ Dawk li jopponu lil Isaija jinsistu: “Neħħulna minn quddiemna l-​Qaddis taʼ Iżrael.” (Isaija 30:11b) Isaija għandu jieqaf jitkellem f’isem Jehovah, il-​“Qaddis taʼ Iżrael”! Anki dan it-​titlu jdejjaqhom għaliex il-​livelli għoljin taʼ Jehovah jikxfu l-​kundizzjoni taʼ disprezz tagħhom. Kif jirreaġixxi Isaija? Jiddikjara: “Dan jgħid il-​Qaddis taʼ Iżrael.” (Isaija 30:12a) Bla ma joqgħod jaħsibha, Isaija jlissen l-​istess kliem li l-​opponenti tiegħu jobogħdu jisimgħu. Mhux se jħalli lil min ibeżżgħu. X’eżempju mill-​aħjar għalina! Fejn jidħol ix-​xandir tal-​messaġġ t’Alla, il-​Kristjani qatt m’għandhom iċedu. (Atti 5:27-29) Bħal Isaija, ikomplu jipproklamaw: ‘Dan hu li jgħid Jehovah’!

Il-​Konsegwenzi taʼ l-​Irvell

10, 11. X’se jkunu l-​konsegwenzi għal Ġuda minħabba l-​irvell tagħha?

¹⁰ Ġuda m’aċċettathiex il-​kelma t’Alla, fdat f’gidba,  u strieħet fuq il-​“qerq.” (Isaija 30:12b) X’se jkunu l-​konsegwenzi? Minflok ma jisparixxi hu, bħalma jixtieq il-​ġens, Jehovah se jġiegħel li l-​ġens ma jibqax jeżisti! Dan se jseħħ ħabta u sabta u kompletament, bħalma jenfasizza Isaija permezz taʼ tixbieha. L-​irvell tal-​ġens huwa bħallikieku “biċċa ħajt imżakkra se taqaʼ mill-​għoli, waslet fi tmiemha sakemm tiġġarraf ħabta u sabta.” (Isaija 30:13) Sewwa sew bħalma ħajt għoli li jiżżaqqaq jispiċċa biex iċedi, hekk ukoll in-​nies taʼ żmien Isaija se jġarrfuh lil ġenshom bl-​irvell tagħhom li dejjem jikber.

¹¹ Permezz taʼ tixbieha oħra Isaija juri kemm se tkun sħiħa l-​qerda li ġejja: “Titfarrak bħalma titfarrak ġarra tal-​fuħħar, titkisser bla ħniena, u ma tibqax xaqqufa mill-​frak tagħha biex tiġbor biha ġamra mill-​kenur, jew timla qatra ilma minn ġol-​ġiebja.” (Isaija 30:14) Il-​qerda taʼ Ġuda tant se tkun sħiħa li fiha ma se jibqaʼ xejn taʼ valur—lanqas saħansitra xaqqufa kbira biżżejjed biex jinġabar il-​ġamar minn kenur jew jimtela l-​ilma minn ġo ġiebja. Xi tmiem taʼ għajb! Il-​qerda li ġejja fuq dawk li llum jirribellaw kontra l-​qima vera se tkun daqstant ħabta u sabta u kompleta.—Lhud 6:4-8; 2 Pietru 2:1.

Miċħuda l-​Offerta taʼ Jehovah

12. In-​nies taʼ Ġuda kif jistgħu jevitawha l-​qerda?

¹² Iżda, għal dawk li qed jisimgħu lil Isaija, il-​qerda tistaʼ tiġi evitata. Hemm soluzzjoni. Il-​profeta jispjega: “Dan jgħid Sidi l-​Mulej, il-​Qaddis taʼ Iżrael: ‘Fil-​konverżjoni u l-​kalma ssibu s-​salvazzjoni tagħkom; fil-​kwiet u l-​fiduċja qiegħda l-​qawwa tagħkom.’” (Isaija 30:15a) Jehovah lest li jsalva lin-​nies tiegħu—jekk dawn juru fidi billi jkunu ‘kalmi,’ u ma jipprovawx jiksbu s-​salvazzjoni permezz taʼ xi alleanzi mal-​bniedem, u billi jibqgħu ‘kwieti,’ u juru fiduċja fil-​qawwa protettiva t’Alla  mingħajr ma jċedu għall-​biżaʼ. “Imma,” Isaija jgħid lin-​nies, “intom ma ridtux.”—Isaija 30:15b.

13. Il-​mexxejja taʼ Ġuda f’liema ħaġa jpoġġu l-​fiduċja tagħhom, u għandhom raġun f’dan?

¹³ Isaija mbagħad jidħol iktar fid-​dettall: “Iżda għedtu: ‘Fuq żwiemel naħarbu,’ għalhekk tassew għad taħarbu. ‘Fuq żwiemel ħfief nirkbu,’ u ħfief ikunu dawk li għad jiġru warajkom.” (Isaija 30:15b, 16) In-​nies taʼ Ġuda jaħsbu li mhux Jehovah se jkun il-​mezz taʼ salvazzjoni tagħhom imma ż-​żwiemel ħfief. (Dewteronomju 17:16; Proverbji 21:31) Madankollu, il-​profeta jkompli jgħid li se jitqarrqu fil-​fiduċja tagħhom għaliex l-​għedewwa tagħhom se jiġru iktar minnhom. Anki l-​fatt li jkunu f’għadd kbir mhux se jgħinhom. “Mit-​theddida taʼ wieħed jitbeżżgħu elf, quddiem it-​theddida taʼ ħamsa taħarbu.” (Isaija 30:17a) L-​eżerċti taʼ Ġuda se jitilfu rashom u jaħarbu malli jisimgħu l-​għajta taʼ sempliċi ħamsa mill-​għadu. a Fl-​aħħar, fdal biss se jibqaʼ, jitħalla waħdu, “bħal arblu fuq quċċata taʼ muntanja, bħal lasta fuq għolja.” (Isaija 30:17b) Fi qbil mal-​profezija, meta Ġerusalemm tinqered fis-​sena 607 Q.E.K., fdal biss isalva.—Ġeremija 25:8-11.

Faraġ Minkejja l-​Kundanna

14, 15. Il-​kliem taʼ Isaija 30:18 liema faraġ joffri għan-​nies li jgħixu f’Ġuda tal-​qedem u għall-​Kristjani veri llum?

¹⁴ Waqt li dan il-​kliem serju għadu jidwi f’widnejn dawk li jisimgħu lil Isaija, it-​ton tal-​messaġġ tiegħu jinbidel. It-​theddida taʼ diżastru tinbidel f’wegħda taʼ barkiet. “Madankollu mxennaq il-​Mulej biex jagħdirkom, u għalhekk iqum biex iħenn għalikom. Għax Alla ġust hu l-​Mulej; henjin dawk li jafdaw fih.” (Isaija 30:18) Xi kliem li jqawwi l-​qalb! Jehovah huwa Missier li jagħder u  li jixxennaq biex jgħin lil uliedu. L-​għaxqa tiegħu hi li juri ħniena.—Salm 103:13; Isaija 55:7.

¹⁵ Dan il-​kliem li jqawwi l-​qalb japplika għall-​membri tal-​fdal Lhudi li bi ħniena jitħallew jibqgħu ħajjin wara l-​qerda taʼ Ġerusalemm fis-​sena 607 Q.E.K. u għal dawk il-​ftit li jirritornaw lejn l-​Art Imwegħda fis-​sena 537 Q.E.K. Madankollu, kliem il-​profeta jfarraġ ukoll lill-​Kristjani llum. Niġu mfakkrin li Jehovah se ‘jqum’ għan-​nom tagħna, u b’hekk iġib fi tmiem din id-​dinja mill-​agħar. Adoraturi leali jistgħu jkunu fiduċjużi li Jehovah—“Alla ġust”—mhux se jippermetti li d-​dinja taʼ Satana tibqaʼ teżisti jum iktar milli titlob il-​ġustizzja. Għalhekk, “dawk li jafdaw fih” għandhom ħafna għalfejn jifirħu.

Jehovah Jfarraġ lin-​Nies Tiegħu Billi Jwieġeb it-​Talb Tagħhom

16. Jehovah kif ifarraġhom lil dawk skuraġġiti?

¹⁶ Iżda, xi wħud għandhom mnejn iħossuhom skuraġġiti peress li l-​ħelsien ma ġiex malajr daqskemm kienu ttamaw. (Proverbji 13:12; 2 Pietru 3:9) Jalla dawn jiksbu l-​faraġ mill-​kliem li jmiss taʼ Isaija, li jenfasizza aspett speċjali mill-​personalità taʼ Jehovah. “Iva, poplu taʼ Sijon, int li tgħammar f’Ġerusalemm, ma tibkix aktar. Il-​Mulej iħenn għalik mal-​ħoss taʼ l-​għajta tiegħek, malli jisimgħek jagħtik widen.” (Isaija 30:19) F’dan il-​kliem taʼ Isaija hemm it-​tenerezza għaliex filwaqt li fil-​vers 18 juża l-​kelma “għalikom,” fil-​plural, fil-​vers 19 juża l-​kelma “għalik,” fis-​singular. Meta Jehovah jfarraġ lill-​imnikktin, hu jittratta lil kull persuna individwalment. Bħala Missier, hu ma jistaqsix lil iben skuraġġit, ‘Għala ma tistax tkun b’saħħtek bħal ħuk?’ (Galatin 6:4) Minflok, jiftaħ widnejh biex jismaʼ lil kull wieħed u waħda minna.  Fil-​fatt, “malli jisimgħek jagħtik widen.” Xi kliem li jqawwi l-​qalb! Uħud skuraġġiti jistgħu jissaħħu bil-​kbir jekk jitolbu lil Jehovah.—Salm 65:3 [65:2 NW].

Ismaʼ Leħen Alla Jiggwidak Billi Taqra l-​Kelma Tiegħu

17, 18. Saħansitra fi żminijiet diffiċli, Jehovah kif jipprovdi gwida?

¹⁷ Hekk kif Isaija jkompli jitkellem, hu jfakkar lil dawk li qed jisimgħuh li ġej in-​niket. In-​nies se jirċievu “ħobż l-​imrar, u l-​ilma tan-​niket.” (Isaija 30:20a) L-​imrar u n-​niket li se jġarrbu meta jkunu qed jiġu attakkati se jsiru qishom il-​ħobż u l-​ilma għalihom. Xorta waħda, Jehovah lest li jeħles lil dawk taʼ qalb retta. “Ma jinħebiex iżjed minnek l-​Imgħallem tiegħek: għajnejk jaraw l-​Imgħallem tiegħek. Minn warajk jisimgħu widnejk kliem li jwissik u jgħidlek: ‘Din hi t-​triq; għaddi minnha, sew jekk tikser lejn il-​lemin, sew lejn ix-​xellug.’”—Isaija 30:20b, 21. b

¹⁸ Jehovah hu l-​“Imgħallem.” M’hawnx għalliem ieħor bħalu. Iżda, in-​nies kif jistgħu ‘jisimgħuh’ u ‘jarawh’? Jehovah jirrivela lilu nnifsu permezz tal-​profeti tiegħu, li kliemhom insibuh fil-​Bibbja. (Għamos 3:6, 7) Illum, meta l-​adoraturi leali jaqraw il-​Bibbja, ikun bħallikieku l-​leħen t’Alla, bħal dak taʼ missier, qed jgħidilhom fejn għandhom imorru u jħeġġiġhom biex jirranġaw il-​korsa taʼ kondotta tagħhom sabiex jimxu fiha. Kull Kristjan għandu jismaʼ b’attenzjoni kbira hekk kif Jehovah jitkellem permezz tal-​paġni tal-​Bibbja u permezz taʼ pubblikazzjonijiet ibbażati fuq il-​Bibbja provduti mill-​ilsir leali u diskret. (Mattew 24:45-47) Ħalli kull wieħed u waħda minna jagħti ruħu għall-​qari tal-​Bibbja, għax dan ikun ifisser ‘ħajtu.’—Dewteronomju 32:46, 47; Isaija 48:17.

 Ikkontempla fuq il-​Barkiet li Ġejjin fil-​Futur

19, 20. Liema barkiet hemm maħżunin għal dawk li jwieġbu għal leħen l-​Imgħallem?

¹⁹ Dawk li jwieġbu għal leħen l-​Imgħallem se jarmu l-​istatwi tagħhom, billi jqisuhom bħala xi ħaġa maħmuġa. (Aqra Isaija 30:22.) Imbagħad, dawk li jobdu se jgawdu barkiet taʼ l-​għaġeb. Dawn huma deskritti minn Isaija, bħalma nsibu f’Isaija 30:23-26. Din hi profezija taʼ restawr li tgħaxxqek u li titwettaq l-​ewwel darba meta fdal Lhudi jirritorna mill-​jasar fis-​sena 537 Q.E.K. Illum, din il-​profezija tgħinna naraw il-​barkiet meraviljużi li se jinġiebu mill-​Messija fil-​ġenna spiritwali issa u fil-​Ġenna taʼ l-​art letterali li ġejja.

²⁰ “Hu jibgħat ix-​xita fuq il-​miżrugħ tiegħek, u l-​qamħ, frott l-​art, ikun bnin u mimli. Dakinhar l-​imrieħel tiegħek jirgħu f’wesgħat kbar; fir-​rabaʼ l-​gniedes u l-​ħmir tax-​xogħol jieklu għalf immellaħ, mderri bil-​midra u mgħoddi mill-​għarbiel.” (Isaija 30:23, 24) Qamħ “bnin u mimli”—ikel mimli nutriment—se jkun l-​ikel taʼ kuljum għan-​nies. L-​art se tipproduċi b’tant abbundanza  li saħansitra l-​annimali se jibbenefikaw. Il-​bhejjem se jiġu mitmugħin “għalf immellaħ”—għalf b’togħma tajba merfugħ għal xi okkażjonijiet speċjali. Dan l-​ikel ġie saħansitra “mderri”—xi ħaġa li normalment issir biss lill-​qamħ li se jkun konsmat mill-​bniedem. X’dettalji li jgħaxxquk huma preżentati hawnhekk minn Isaija biex juri r-​rikkezza tal-​barkiet taʼ Jehovah fuq il-​bnedmin leali!

21. Iddeskrivi kemm se jkunu mżejnin b’kollox il-​barkiet li ġejjin.

²¹ “Fuq kull muntanja kbira, fuq kull għolja wieqfa, ikun hemm xmajjar taʼ ilma.” (Isaija 30:25a) c Isaija jippreżenta deskrizzjoni xierqa li tenfasizza kemm huma  mżejnin b’kollox il-​barkiet taʼ Jehovah. M’hemmx nuqqas taʼ ilma. Dan l-​ilma prezzjuż mhux se jgelgel biss fuq l-​artijiet baxxi imma fuq kull muntanja, saħansitra “fuq kull muntanja kbira, fuq kull għolja wieqfa.” Iva, il-​ġuħ se jkun xi ħaġa tal-​passat. (Salm 72:16) Iżjed minn hekk, l-​attenzjoni tal-​profeta ddur lejn affarijiet li huma saħansitra ogħla mill-​muntanji. “Id-​dawl tal-​qamar ikun jiddi bħad-​dawl tax-​xemx, u d-​dawl tax-​xemx jitqawwa sebaʼ darbiet, daqs id-​dawl taʼ sebat ijiem; dakinhar il-​Mulej idewwi l-​ġrieħi tal-​poplu tiegħu u jfejjaq it-​tbenġil tas-​swat tiegħu.” (Isaija 30:26) Kemm twassalna fuq livell għoli u kommoventi din il-​profezija brillanti! Il-​glorja t’Alla se tiddi bil-​qawwa kollha tagħha. Il-​barkiet li hemm maħżunin għall-​adoraturi leali t’Alla se jisbqu bil-​kbir—għal sebaʼ darbiet iktar—lil kull ħaġa li jkunu ġarrbu qabel.

Ġudizzju u Ferħ

22. Flok il-​barkiet li ġejjin għal dawk li huma leali, Jehovah x’għandu maħżun għal dawk li huma mill-​agħar?

²² It-​ton tal-​messaġġ taʼ Isaija jerġaʼ jinbidel. “Araw,” jgħid hu, bħallikieku biex jiġbed l-​attenzjoni tas-​semmiegħa tiegħu. “Isem il-​Mulej ġej mill-​bogħod, mixgħul bil-​korla u b’duħħan tielaʼ madwaru, xufftejh mimlija qilla, u lsienu jiblaʼ bħan-​nar.” (Isaija 30:27) S’issa, Jehovah żamm ’il bogħod u ħalla lill-​għedewwa tan-​nies tiegħu jmorru fejn iridu. Issa jersaq fil-​qrib—bħal maltempata bir-​ragħad li riesqa bl-​għaġla—biex jagħmel il-​ħaqq. “Nifsu bħal xmara mfawwra tilħaq sa l-​għonq, ġej biex jgħarbel il-​ġnus b’għarbiel il-​qerda, u jxedd f’xedaq il-​popli lġiem, li joħroġhom barra t-​triq.” (Isaija 30:28) L-​għedewwa tan-​nies t’Alla se jiġu mdawrin bi ‘xmara mfawra,’ mheżżin b’mod vjolenti “b’għarbiel,” u miżmumin bi “lġiem.” Huma se jinqerdu għalkollox.

23. X’inhu dak li llum jikkaġuna “ferħ taʼ qalb” għall-​Kristjani?

 ²³ It-​ton taʼ Isaija jinbidel mill-​ġdid hekk kif jiddeskrivi l-​kundizzjoni hienja taʼ l-​adoraturi leali li xi darba se jirritornaw lejn pajjiżhom. “U jkunilkom l-​għana bħal meta billejl tiċċelebraw xi festa, u ferħ taʼ qalb bħal min jimxi bid-​daqq tal-​flawt, u jmur fuq l-​għolja tal-​Mulej lejn il-​Blata taʼ Iżrael.” (Isaija 30:29) Illum, il-​Kristjani veri wkoll iġarrbu “ferħ taʼ qalb” hekk kif jikkontemplaw dwar il-​ġudizzju li ġej fuq id-​dinja taʼ Satana; il-​protezzjoni li se jagħtihom Jehovah, il-​“Blata tas-​salvazzjoni;” u l-​barkiet li se ġġib is-​Saltna.—Salm 95:1.

24, 25. Il-​profezija taʼ Isaija kif tenfasizza li l-​ġudizzju li ġej fuq l-​Assirja huwa realtà?

²⁴ Wara din l-​espressjoni taʼ kuntentizza, Isaija jirritorna lejn it-​tema taʼ ġudizzju u jurina fuq min se jaqaʼ l-​għadab t’Alla. “U l-​Mulej isammaʼ l-​leħen solenni tiegħu, u juri d-​daqqa taʼ driegħu, bil-​qilla taʼ għadbu u lsien taʼ nar wikkiel, b’xita qawwija, tempesta u silġ kbir. Għax għal leħen il-​Mulej titwerwer l-​Assirja, meta jidrobha bil-​virga tiegħu.” (Isaija 30:30, 31) B’din l-​istampa ċara, Isaija jenfasizza r-​realtà tal-​ġudizzju t’Alla fuq l-​Assirja. Fil-​fatt, l-​Assirja tinsab quddiem Alla u qegħda tirtogħod malli tara ‘d-​daqqa tad-​driegħ’ taʼ ġudizzju tiegħu.

²⁵ Ikompli l-​profeta: “Maʼ kull daqqa taʼ ħatar il-​kastig li jniżżel il-​Mulej idoqqu t-​tnabar u l-​arpi flimkien maż-​żfin; ixejjer l-​armi u jissielet bihom. Ilu mħejji t-​Tofet għall-​ħruq, lest għas-​sultan, fond u wiesaʼ, b’gozz kbir ħatab għan-​nar; nifs il-​Mulej, bħal wied kubrit, jagħtih in-​nar.” (Isaija 30:32, 33) Tofet, li jinsab fil-​Wied taʼ Ħinnom, jintuża hawnhekk bħala post figurattiv jaqbad bin-​nar. Billi juri li l-​Assirja se tispiċċa hemmhekk, Isaija jenfasizza l-​qerda ħabta u sabta u kompleta li trid tiġi fuq dak il-​ġens.—Qabbel it-​2 Slaten 23:10.

26. (a) Il-​proklamazzjonijiet taʼ Jehovah kontra l-​Assirja kif japplikaw fi żmienna? (b) Illum il-​Kristjani kif jibqgħu jistennew lil Jehovah?

 ²⁶ Għalkemm dan il-​messaġġ taʼ ġudizzju huwa mmirat kontra l-​Assirja, il-​profezija taʼ Isaija tfisser iżjed minn hekk. (Rumani 15:4) Jehovah se jerġaʼ, bħallikieku, jiġi mill-​bogħod biex jgħarraq, jheżżeż, u jrażżan lil dawk kollha li jaħqru lill-​poplu tiegħu. (Eżekjel 38:18-23; 2 Pietru 3:7; Apokalissi 19:11-21) Jalla jiġi malajr dak il-​jum! Sadanittant, il-​Kristjani jistennew bil-​ħerqa l-​jum tal-​ħelsien. Huma jiksbu s-​saħħa billi jirriflettu fuq il-​kliem ċar miktub f’Isaija kapitlu 30. Dan il-​kliem jinkuraġġixxi lill-​qaddejja t’Alla biex jgħożżu l-​privileġġ tat-​talb, jagħtu ruħhom għall-​istudju tal-​Bibbja, u jimmeditaw fuq il-​barkiet li se ġġib is-​Saltna. (Salm 42:2, 3 [42:1, 2, NW]; Proverbji 2:1-6; Rumani 12:12) B’hekk, kliem Isaija jgħinna lkoll biex nibqgħu nistennew lil Jehovah.

[Noti taʼ taħt]

[Mistoqsijiet taʼ Studju]

 [Stampi f’paġna 305]

Fi żmien Mosè, l-​Iżraelin ħarbu mill-​Eġittu. Fi żmien Isaija, Ġuda tmur għall-​għajnuna għand l-​Eġittu

[Stampa f’paġna 311]

“Fuq kull għolja wieqfa, ikun hemm xmajjar taʼ ilma”

[Stampa f’paġna 312]

Jehovah se jiġi “bil-​korla u b’duħħan tielaʼ madwaru”