Id-Dar taʼ Jehovah Merfugħa ’l Fuq
Kapitlu Erbgħa
Id-Dar taʼ Jehovah Merfugħa ’l Fuq
1, 2. Liema kliem huwa mnaqqax fuq ħajt f’misraħ il-Ġnus Magħquda, u minfejn oriġina?
“JIBDLU x-xwabel tagħhom f’sikek tal-moħriet, u l-lanez tagħhom fi mnieġel. Ebda ġens ma jerfaʼ x-xabla kontra ġens ieħor, u s-sengħa tal-gwerra ma jitgħallmuhiex iżjed.” Dan il-kliem huwa mnaqqax fuq ħajt f’misraħ il-Ġnus Magħquda fil-Belt taʼ New York. Għal għaxriet taʼ snin is-sors taʼ dik il-kwotazzjoni ma kienx identifikat. Ladarba l-mira tal-ĠM hija li taħdem favur is-sliem fid-dinja, kien faċli li wieħed jikkonkludi li kienu l-fundaturi tal-ĠM li oriġinaw dan il-kliem fl-1945.
2 Madankollu, fl-1975, l-isem Isaija ġie mnaqqax fil-ħajt taħt il-kwotazzjoni. Dakinhar sar evidenti li l-kliem m’oriġinax fi żmienna. Fil-fatt, kien dokumentat bħala profezija ’l fuq minn 2,700 sena ilu f’dak li issa huwa t-tieni kapitlu tal-ktieb taʼ Isaija. Għal eluf taʼ snin dawk li jħobbu s-sliem ħasbu fil-fond fuq kif u meta kellhom iseħħu l-affarijiet imbassrin minn Isaija. M’għandniex għalfejn noqogħdu nberrnu iktar. Illum naraw quddiemna t-twettiq taʼ l-għaġeb taʼ din il-profezija tal-qedem.
3. Min huma l-ġnus li jibdlu x-xwabel tagħhom f’sikek tal-moħriet?
3 Min huma l-ġnus li jibdlu x-xwabel tagħhom f’sikek tal-moħriet? Żgur li m’humiex il-ġnus u l-gvernijiet politiċi taʼ żmienna. Sa llum dawn il-ġnus żviluppaw xwabel, jew armamenti, kemm biex jiggwerraw u kemm biex iżommu s-“sliem” permezz tal-forza. Attwalment, it-tendenza tal-ġnus minn dejjem kienet li jibdlu s-sikek tal-moħriet tagħhom fi xwabel! Il-profezija taʼ Isaija titwettaq minn rappreżentanti mill-ġnus kollha, nies li jqimu lil Jehovah, dak “Alla tas-sliem.”—Filippin 4:9.
Il-Ġnus li Jiġru Lejn il-Qima Safja
4, 5. X’ibassru l-ewwel versi taʼ Isaija kapitlu 2, u liema ħaġa tenfasizza kemm hu taʼ min joqgħod fuqu dan il-kliem?
4 Isaija kapitlu 2 jibda b’dan il-kliem: “Il-kelma li ġiet f’dehra lil Isaija bin Amos, dwar Ġuda u Ġerusalemm. Għad jiġri fl-aħħar jiem li . . . [“l-muntanja,” “KŻ”] tad-dar tal-Mulej togħla ’l fuq mill-qċaċet tal-muntanji, u tintrefaʼ ’l fuq mill-għoljiet, lejha għad jiġru l-ġnus kollha.”—Isaija 2:1, 2.
5 Innota li dak li jbassar Isaija m’huwiex sempliċi spekulazzjoni. Isaija hu mqabbad biex jikteb ġrajjiet li ‘għad jiġru’—bla ma jfallu. Kulma Jehovah jkollu l-iskop li jagħmel ‘ikollu r-riżq.’ (Isaija 55:11, KŻ) Huwa evidenti li biex jenfasizza kemm hi taʼ min joqgħod fuqha l-wegħda tiegħu, Alla nebbaħ lill-profeta Mikea, li kien jgħix fl-istess żmien taʼ Isaija, biex jikteb fil-ktieb tiegħu l-istess profezija li hija mniżżla f’Isaija 2:2-4.—Mikea 4:1-3.
6. Il-profezija taʼ Isaija meta titwettaq?
6 Meta se titwettaq il-profezija taʼ Isaija? “Fl-aħħar jiem.” In-New World Translation tgħid: “Fil-parti finali tal-jiem.” L-Iskrittura Griega Kristjana bassret xi karatteristiċi li kellhom jidentifikaw dan il-perijodu. Inkluż fosthom hemm gwerer, theżżiż taʼ l-art, mard li jittieħed, ġuħ, u “żmien iebes.” a (2 Timotju 3:1-5; Luqa 21:10, 11) It-twettiq taʼ dawn il-profeziji jagħti evidenza abbundanti li aħna qegħdin ngħixu “fil-parti finali tal-jiem,” l-aħħar jiem taʼ din is-sistema dinjija preżenti. Loġikament, allura, għandna nistennew li fi żmienna naraw jitwettqu l-affarijiet li bassar Isaija.
Muntanja li Fuqha Ssir il-Qima
7. Isaija liema stampa profetika jpitter?
7 F’erbaʼ kelmiet, Isaija jpitter stampa profetika ċara ferm. Naraw muntanja għolja, inkurunata b’dar glorjuża, it-tempju taʼ Jehovah. Din il-muntanja hija ogħla mill-muntanji u l-għoljiet taʼ madwarha, u madankollu, la twerwrek u lanqas tintimidak; anzi, tiġbdek. Nies mill-ġnus kollha jixxennqu biex jitilgħu fuq il-muntanja tad-dar taʼ Jehovah; dawn jiġru lejha. Dan faċli biex nimmaġinawh, imma x’ifisser?
8. (a) Fi żmien Isaija, l-għoljiet u l-muntanji maʼ liema ħaġa jiġu assoċjati? (b) X’jiffigura l-ġiri tal-ġnus lejn il-“muntanja” tad-dar tal-Mulej Jehovah?
8 Fi żmien Isaija l-għoljiet u l-muntanji spiss jiġu assoċjati mal-qima. Per eżempju, jintużaw bħala siti għal qima idolatruża u għal santwarji t’allat foloz. (Dewteronomju 12:2; Ġeremija 3:6) Madankollu, id-dar, jew tempju, taʼ Jehovah żżejjen il-quċċata tal-Muntanja Morija f’Ġerusalemm. Iżraelin leali jivvjaġġaw tliet darbiet fis-sena lejn Ġerusalemm u jitilgħu fuq il-Muntanja Morija biex iqimu lil dak Alla veru. (Dewteronomju 16:16) Mela l-ġiri tal-ġnus lejn il-“muntanja” tad-dar tal-Mulej Jehovah jiffigura l-ġbir taʼ ħafna popli lejn il-qima vera.
9. X’tirrappreżenta l-“muntanja” tad-dar tal-Mulej Jehovah?
9 M’għandniex xi ngħidu, illum in-nies t’Alla ma jinġabrux fuq xi muntanja letterali b’tempju tal-ġebel. Fis-sena 70 E.K., it-tempju taʼ Jehovah f’Ġerusalemm inqered mill-eżerċti Rumani. Barra minn dan, l-appostlu Pawlu għamilha ċara li t-tempju f’Ġerusalemm u t-tabernaklu li kien hemm qabel it-tempju kienu figurattivi. Dawn irrappreżentaw realtà akbar spiritwali, it-“tabernaklu veru li hu magħmul mill-Mulej u mhux mill-bnedmin.” (Lhud 8:2) Dak it-tabernaklu, jew tinda, spiritwali huwa l-arranġament biex wieħed jersaq lejn Jehovah fil-qima bbażat fuq is-sagrifiċċju taʼ Ġesù Kristu bħala prezz tal-fidwa. (Lhud 9:2-10, 23) Fi qbil maʼ dan, il-“muntanja” tad-dar tal-Mulej Jehovah msemmija f’Isaija 2:2 tirrappreżenta l-qima safja u eżaltata taʼ Jehovah fi żmienna. Dawk li jħaddnu l-qima safja ma jinġabrux f’xi post ġeografiku; jinġabru magħqudin fil-qima.
Il-Qima Safja Tiġi Elevata
10, 11. Il-qima taʼ Jehovah f’liema sens ġiet elevata fi żmienna?
10 Il-profeta jgħid li “l-muntanja” tad-dar tal-Mulej Jehovah, jew il-qima safja, kellha “togħla ’l fuq mill-qċaċet tal-muntanji” u “tintrefaʼ ’l fuq mill-għoljiet.” Ħafna snin qabel żmien Isaija, is-Sultan David tellaʼ l-arka tal-patt fuq il-Muntanja Sijon f’Ġerusalemm, li kienet tinsab 760 metru ’l fuq mil-livell tal-baħar. L-arka tqegħdet hemmhekk sakemm ittrasferewha għal fuq il-Muntanja Morija, fit-tempju li kien tlesta minn kollox. (2 Samwel 5:7; 6:14-19; 2 Kronaki 3:1; 5:1-10) B’hekk, sa żmien Isaija l-arka sagra kienet diġà ġiet elevata fiżikament u mpoġġija fit-tempju, f’pożizzjoni ogħla mill-ħafna għoljiet taʼ madwarha wżati għall-qima falza.
11 M’għandniex xi ngħidu, f’sens spiritwali, il-qima taʼ Jehovah minn dejjem kienet superjuri għall-prattiċi reliġjużi taʼ dawk li jaqdu lil allat foloz. Madankollu, fi żmienna, Jehovah eżalta l-qima tiegħu m’ogħla s-sema, ’il fuq mill-għamliet kollha taʼ qima mhix nadifa, iva, ferm ’il fuq mill-“għoljiet” u l-“qċaċet tal-muntanji” kollha. Kif? Prinċipalment permezz tal-ġbir flimkien taʼ dawk li jridu jqimuh “fl-ispirtu u l-verità.”—Ġwann 4:23.
12. Min huma “wlied is-Saltna,” u liema ġbir seħħ?
12 Kristu Ġesù rrefera għal “tmiem id-dinja” bħala żmien taʼ ħsad meta l-anġli kellhom jiġbru lil ‘ulied is-Saltna’—dawk li għandhom it-tama li jaħkmu maʼ Ġesù fil-glorja tas-sema. (Mattew 13:36-43) Mill-1919 ’l hawn, Jehovah awtorizza lil dawk li ‘baqaʼ’ minn dawn l-ulied biex jieħdu sehem maʼ l-anġli fix-xogħol tal-ħsad. (Apokalissi 12:17) B’hekk, ‘ulied is-Saltna,’ l-aħwa midlukin taʼ Ġesù, huma dawk li jinġabru l-ewwel. Imbagħad huma jieħdu sehem f’xogħol ieħor taʼ ġbir.
13. Jehovah kif bierek lill-fdal midluk?
13 Matul dan iż-żmien taʼ ħsad, Jehovah għen progressivament lill-membri tal-fdal midluk biex jifhmu u japplikaw il-Kelma Tiegħu, il-Bibbja. Dan ukoll ikkontribwixxa biex il-qima safja tiġi elevata. Għalkemm “dlamijiet jiksu l-art, u sħab iswed il-popli,” il-midlukin ‘jiddu bħal kwiekeb’ fost l-ispeċi umana, għax Jehovah naddafhom u rfinahom. (Isaija 60:2; Filippin 2:15) Mogħnijin bir-“rieda taʼ Alla bl-għerf kollu u d-dehen spiritwali,” dawn l-uħud midlukin bl-ispirtu “jiddu bħax-xemx fis-Saltna taʼ Missierhom.”—Kolossin 1:9; Mattew 13:43.
14, 15. Minbarra l-ġbir taʼ “wlied is-Saltna,” liema ġbir ieħor seħħ, u dan kif kien imbassar minn Ħaggaj?
14 Iktar minn hekk, kien hemm oħrajn li ġrew lejn il-“muntanja” tad-dar tal-Mulej Jehovah. Ġesù sejħilhom in-“nagħaġ oħra” tiegħu u dawn għandhom it-tama li jgħixu għal dejjem fuq art magħmula ġenna. (Ġwann 10:16; Apokalissi 21:3, 4) Mis-snin tletin ’l hawn, dawn tfaċċaw bl-eluf, imbagħad bil-mijiet taʼ eluf, u issa bil-miljuni! F’waħda mill-viżjonijiet mogħtijin lill-appostlu Ġwanni, dawn jiġu deskritti bħala “kotra kbira li ħadd ma jistaʼ jgħoddha, minn kull ġens u tribù, minn kull poplu u lsien.”—Apokalissi 7:9.
15 Il-profeta Ħaggaj bassar li kellha titfaċċa din il-kotra kbira meta kiteb: “Hekk jgħid il-Mulej taʼ l-eżerċti: ‘Dalwaqt, ftit ieħor biss, u jiena nheżheż is-smewwiet u l-baħar u l-blat, u nqanqal il-ġnus kollha, u l-ġid kollu tal-popli [dawk li jingħaqdu mal-Kristjani midlukin fil-qima safja] jiġi kollu hawn, u nimla dan it-tempju bil-glorja,’ jgħid il-Mulej taʼ l-eżerċti.” (Ħaggaj 2:6, 7) L-eżistenza taʼ din il-“kotra kbira,” li dejjem tiżdied, u sħabhom il-midlukin terfaʼ ’l fuq, iva tigglorifika, il-qima safja fid-dar taʼ Jehovah. Qatt qabel ma kien hawn għadd daqshekk kbir taʼ nies li huma magħqudin fil-qima taʼ dak Alla veru, u dan iġib glorja lil Jehovah u lil Ġesù Kristu, is-Sultan tiegħu mqiegħed fuq it-tron. Is-Sultan Salamun kiteb: “Kbir hu s-sultan li għandu poplu kbir.”—Proverbji 14:28.
Qima Eżaltata fil-Ħajjiet tan-Nies
16-18. Xi wħud liema bidliet għamlu sabiex iqimu lil Jehovah b’mod aċċettabbli?
16 Jehovah jixraqlu l-kredtu kollu għall-fatt li l-qima safja ġiet elevata fi żmienna. Xorta waħda, dawk li javviċinawh għandhom il-privileġġ li jieħdu sehem f’dan ix-xogħol. Sewwa sew bħalma jirrikjedi sforz biex wieħed jitlaʼ fuq muntanja, hekk, ukoll, jirrikjedi sforz biex wieħed isir jaf bil-livelli taʼ tjieba t’Alla u jgħix fi qbil magħhom. Bħall-Kristjani taʼ l-ewwel seklu, il-qaddejja t’Alla llum ħallew warajhom stili taʼ ħajja u prattiċi li m’humiex fi qbil mal-qima vera. Dawk li kienu żienja, idolatri, adulteri, ħallelin, rgħiba, skaren, u oħrajn bidlu l-mogħdijiet tagħhom u ‘tnaddfu’ fil-ħarsa t’Alla.—1 Korintin 6:9-11.
17 L-esperjenza taʼ waħda żagħżugħa hija tipika. Din kitbet: “Jien kont mitlufa u bla tama. Tajtha għall-immoralità u għas-sokor. Kelli mard sesswali. Kont inbigħ id-drogi wkoll u ma kien jimpurtani minn xejn.” Wara li studjat il-Bibbja, hi għamlet bidliet kbar sabiex tkun tistaʼ tgħix fi qbil mal-livelli t’Alla. Issa hi tgħid: “Ingawdi paċi tal-moħħ, rispett lejja nnifsi, tama għall-futur, familja vera u, fuq kollox, relazzjoni maʼ Missierna, Jehovah.”
18 Saħansitra wara li jikseb l-approvazzjoni taʼ Jehovah, kull individwu jrid ikompli jigglorifika l-qima safja billi jagħmilha prominenti f’ħajtu. Eluf taʼ snin ilu, permezz taʼ Isaija, Jehovah esprima l-fiduċja tiegħu li kellu jkun hemm kotriet illum li bil-ħerqa kienu se juru li l-iktar ħaġa importanti f’ħajjithom hija l-qima tiegħu. Qiegħed int fosthom?
Poplu Mgħallem il-Mogħdija taʼ Jehovah
19, 20. In-nies t’Alla x’jiġu mgħallmin, u fejn?
19 Isaija jgħidilna iktar dwar dawk li llum iħaddnu l-qima safja, billi jżid: “Kotra taʼ popli għad jiġu u jgħidu: ‘Ħalli mmorru u nitilgħu fuq l-għolja tal-Mulej, lejn id-dar taʼ Alla taʼ Ġakobb, biex jgħallimna triqatu, u nimxu fil-mogħdijiet tiegħu. Għax minn Sijon joħroġ it-tagħlim, u l-kelma tal-Mulej minn Ġerusalemm.’”—Isaija 2:3.
20 Lin-nies tiegħu Jehovah ma jħallihomx jiġġerrew ’l hawn u ’l hinn bħal nagħaġ mitlufin. Permezz tal-Bibbja u pubblikazzjonijiet ibbażati fuq il-Bibbja, hu jagħtihom it-“tagħlim” u l-“kelma” tiegħu sabiex jitgħallmu mogħdijietu. Dan l-għarfien jgħammarhom biex ‘jimxu fil-mogħdijiet tiegħu.’ Peress li qlubhom huma mimlijin apprezzament u f’armonija mad-direzzjoni divina, dawn ikellmu lil xulxin dwar il-mogħdijiet taʼ Jehovah. Huma jinġabru flimkien f’konvenzjonijiet kbar u fi gruppi iżgħar—fi Swali tas-Saltna u fi djar privati—sabiex jisimgħu l-mogħdijiet t’Alla u jitgħallmuhom. (Dewteronomju 31:12, 13) B’hekk, jimitaw il-mudell tal-Kristjani bikrin, li kienu jiltaqgħu flimkien biex jinkuraġġixxu u jqanqlu lil xulxin biex joktru fl-‘imħabba u fl-għemil tajjeb.’—Lhud 10:24, 25.
21. Il-qaddejja taʼ Jehovah f’liema xogħol jieħdu sehem?
21 Huma jistiednu lil oħrajn biex ‘jitilgħu’ lejn il-qima eżaltata t’Alla Jehovah. Kemm jaqbel tajjeb dan mal-kmand mogħti minn Ġesù lid-dixxipli tiegħu preċiż qabel ma telaʼ fis-sema! Qalilhom: “Morru, mela, agħmlu dixxipli mill-ġnus kollha, u għammduhom fl-isem tal-Missier u taʼ l-Iben u taʼ l-Ispirtu s-Santu, u għallmuhom iħarsu dak kollu li ordnajtilkom jien.” (Mattew 28:19, 20) B’appoġġ divin, ix-Xhieda taʼ Jehovah joħorġu b’ubbidjenza madwar id-dinja kollha, jgħallmu u jagħmlu dixxipli, billi jgħammduhom.
Xwabel f’Sikek tal-Moħriet
22, 23. X’ibassar Isaija 2:4, u uffiċjal tal-ĠM x’qal dwar dan?
22 Issa niġu għall-vers li jmiss, li parti minnu huwa mnaqqax fuq il-ħajt taʼ misraħ il-ĠM. Isaija jikteb: “Il-Mulej jagħmel il-ħaqq bejn il-ġnus, u jaqtaʼ s-sentenza bejn ħafna popli; u huma jibdlu x-xwabel tagħhom f’sikek tal-moħriet, u l-lanez tagħhom fi mnieġel. Ebda ġens ma jerfaʼ x-xabla kontra ġens ieħor, u s-sengħa tal-gwerra ma jitgħallmuhiex iżjed.”—Isaija 2:4.
23 Dan diffiċli ferm biex iseħħ. Federico Mayor, direttur-ġenerali taʼ l-Organizzazzjoni Edukattiva, Xjentifika, u Kulturali tal-Ġnus Magħquda, darba qal: “L-oxxenitajiet kollha tal-gwerra, imwasslin lilna llum il-ġurnata permezz taʼ tagħmir awdjo-viżiv, jidhru li m’għandhomx il-ħila jwaqqfu l-avvanz taʼ l-organizzazzjoni politika u militari mostruża li ilha stabbilita u miżmuma matul ħafna sekli. Il-ġenerazzjonijiet preżenti għandhom il-biċċa xogħol Biblika, kważi impossibbli, li ‘jibdlu x-xwabel tagħhom f’sikek tal-moħriet’ u jgħaddu minn istint taʼ gwerra—żviluppat minn żmien żemżem—għal tfittxija għas-sliem. It-twettiq taʼ dan kieku jkun l-aqwa att u l-iktar wieħed nobbli li n-‘nies taʼ madwar il-globu’ jistgħu jwettqu, u l-aqwa wirt għad-dixxendenti tagħna.”
24, 25. Il-kliem taʼ Isaija minn min jitwettaq, u b’liema mod?
24 Il-ġnus in ġenerali qatt ma se jwettqu dan l-għan sublimi għax qiegħed sempliċement fejn ma jistax jintlaħaq minnhom. Il-kliem taʼ Isaija jitwettaq minn individwi minn ħafna ġnus, li huma magħqudin fil-qima safja. Jehovah ‘rraġuna’ magħhom. Hu għallem lin-nies tiegħu biex jgħixu fis-sliem bejniethom. Verament, f’dinja maqsuma u mifnija bil-ġlied, dawn bidlu figurattivament ix-“xwabel tagħhom f’sikek tal-moħriet, u l-lanez tagħhom fi mnieġel.” Kif?
25 L-ewwelnett, ma jappoġġaw lil ebda naħa fil-gwerer tan-nazzjonijiet. Ftit qabel il-mewt taʼ Ġesù, ġew xi rġiel armati biex jarrestawh. Meta Pietru silet sejf biex jiddefendi lil Sidu, Ġesù qallu: “Erġaʼ daħħal sejfek f’postu għax kull min jaqbad is-sejf, bis-sejf jinqered.” (Mattew 26:52) Minn dakinhar ’l hawn, is-segwaċi taʼ Ġesù li mxew wara l-passi tiegħu bidlu x-xwabel tagħhom f’sikek tal-moħriet u żammew lura milli jaqbdu l-armi biex joqtlu lill-proxxmu tagħhom u milli jappoġġaw il-gwerer b’xi modi oħrajn. Huma ‘jfittxu li jżommu s-sliem maʼ kulħadd.’—Lhud 12:14.
Insusu wara l-Mogħdijiet taʼ Sliem
26, 27. In-nies t’Alla kif ‘ifittxu s-sliem u jqisu li jiksbuh’? Agħti xi eżempju.
26 Biex in-nies t’Alla jkollhom is-sliem ma jridux biss jirrifjutaw li jieħdu sehem fil-gwerer. Għalkemm jinsabu f’iktar minn 230 pajjiż u jirrappreżentaw lingwi u kulturi bla għadd, huma jgawdu s-sliem bejniethom. Fihom wieħed jistaʼ jara t-twettiq modern tal-kliem taʼ Ġesù, li qal lid-dixxipli tiegħu fl-ewwel seklu: “Minn dan jagħraf kulħadd li intom dixxipli tiegħi, jiġifieri, jekk ikollkom l-imħabba bejnietkom.” (Ġwann 13:35) Il-Kristjani llum huma “dawk li jġibu l-paċi.” (Mattew 5:9) Huma ‘jfittxu s-sliem u jqisu li jiksbuh.’ (1 Pietru 3:11) Dak li jsostnihom hu Jehovah, dak “Alla tas-sliem.”—Rumani 15:33.
27 Hemm eżempji impressjonanti taʼ nies li tgħallmu jkunu wħud li jġibu l-paċi. Żagħżugħ jikteb dwar il-ħajja bikrija tiegħu: “L-esperjenza iebsa għallmitni kif niddefendi ruħi. Għamlitni aħrax u rrabjat għall-ħajja. Dejjem kont nispiċċa f’xi ġlieda. Ma kinitx tgħaddi ġurnata li ma kontx niġġieled maʼ xi żagħżugħ differenti fejn konna noqogħdu, kultant bl-idejn, kultant bil-ġebel jew bil-fliexken. Trabbejt f’ambjent li għamilni vjolenti ferm.” Madankollu, eventwalment hu wieġeb għall-istedina biex imur lejn il-“muntanja” tad-dar tal-Mulej Jehovah. Tgħallem il-mogħdijiet t’Alla u sar qaddej paċifiku t’Alla.
28. Il-Kristjani x’jistgħu jagħmlu biex ifittxu s-sliem?
28 Il-biċċa l-kbira tal-qaddejja taʼ Jehovah ma jiġux minn sfond vjolenti bħal dan, imma xorta waħda, f’affarijiet relattivament żgħar—atti taʼ qalb tajba, maħfra, u empatija—jistinkaw biex ixerrdu s-sliem maʼ persuni oħrajn. Għalkemm huma imperfetti, jagħmlu ħilithom biex japplikaw il-parir tal-Bibbja sabiex ‘jistabru b’xulxin, u, jekk xi ħadd minnhom ikollu xi jgħid maʼ ħaddieħor, jaħfru lil xulxin.’—Kolossin 3:13.
Futur taʼ Sliem
29, 30. Xi prospett hemm għall-art?
29 Jehovah għamel xi ħaġa meraviljuża f’dawn l-“aħħar jiem.” Ġabar mill-ġnus kollha nies li jridu jaqduh. Għallimhom jimxu fil-mogħdijiet tiegħu, mogħdijiet taʼ sliem. Dawn huma li se jibqgħu ħajjin wara t-“taħbit il-kbir” li ġej u jgħaddu għal ġo dinja ġdida paċifika li fiha l-gwerer se jitneħħew għal dejjem.—Apokalissi 7:14.
30 Ix-xwabel—l-armamenti—m’humiex se jibqgħu jeżistu. Is-salmista kiteb dwar dak iż-żmien: “Ejjew, araw x’għamel il-Mulej, għemejjel taʼ l-għaġeb fuq l-art. Iwaqqaf il-gwerer sa tarf l-art; l-ark jaqsam u l-lanza jkisser, jaħraq it-tarka bin-nar.” (Salm 46:9, 10 [46:8, 9, NW]) Meta tqis prospett bħal dan, dak li issa jħeġġiġna Isaija biex nagħmlu huwa addattat illum daqskemm kien addattat meta kitbu: “Ejja, dar Ġakobb, ħalli nimxu fid-dawl tal-Mulej!” (Isaija 2:5) Iva, jalla d-dawl taʼ Jehovah jdawlilna triqitna issa, u jalla nimxu fil-mogħdija tiegħu għall-eternità kollha.—Mikea 4:5.
[Nota taʼ taħt]
a Ara l-ktieb Għarfien Li Jwassal Għall-Ħajja Taʼ Dejjem, kapitlu 11, “Dawn Huma l-Aħħar Jiem!,” pubblikat mill-Watchtower Bible and Tract Society of New York, Inc.
[Mistoqsijiet taʼ Studju]
