L-Art Terġaʼ Ssir Ġenna!
Kapitlu Tmienja u Għoxrin
L-Art Terġaʼ Ssir Ġenna!
1. Ħafna reliġjonijiet għala joffru t-tama taʼ ħajja f’ġenna?
“IN-NOSTALĠIJA għall-ġenna hija waħda mill-iktar affarijiet li l-bniedem dejjem jhewden dwarhom. Din hi x’aktarx l-iktar xewqa kbira u persistenti li għandu. F’kull livell tal-ħajja reliġjuża tidher ċerta xenqa għall-ġenna.” Hekk tgħid The Encyclopedia of Religion. Hija ħaġa naturali li l-bniedem ikollu din in-nostalġija ladarba l-Bibbja tgħidilna li l-ħajja umana bdiet fil-Ġenna taʼ l-art—ġnien mill-isbaħ ħieles mill-mard u l-mewt. (Ġenesi 2:8-15) Mhix sorpriża għalina li ħafna mir-reliġjonijiet tad-dinja joffru t-tama taʼ ħajja futura f’xi xorta taʼ ġenna.
2. Fejn nistgħu nsibuha t-tama vera taʼ Ġenna taʼ l-art fil-futur?
2 F’ħafna partijiet tal-Bibbja, nistgħu naqraw dwar it-tama vera taʼ Ġenna taʼ l-art fil-futur. (Isaija 51:3) Per eżempju, il-parti mill-profezija taʼ Isaija li nsibu f’kapitlu 35taʼ Is tiddeskrivi kif reġjuni li huma bħal xagħri jinbidlu f’imsaġar u ġonna u għelieqi mimlijin frott. L-għomja jiksbu d-dawl, l-imbikkmin jistgħu jitkellmu, u t-torox jistgħu jisimgħu. F’din il-Ġenna taʼ l-art imwegħda m’hemmx swied il-qalb jew għajat, u dan iġagħalna naħsbu li saħansitra l-mewt m’għadhiex teżisti. X’wegħda meraviljuża! Kif għandna nifhmuh dan il-kliem? Joffrilna xi tama llum? Ir-risposti għal dawn il-mistoqsijiet se jiġu provduti hekk kif nikkunsidraw dan il-kapitlu taʼ Isaija.
Jithenna Pajjiż Imħarbat
3. Skond il-profezija taʼ Isaija, il-pajjiż liema bidla se jġarrab?
3 Il-profezija mnebbħa taʼ Isaija dwar kif l-art se terġaʼ ssir Ġenna tibda b’dan il-kliem: “Ħa jifirħu d-deżert u l-art maħruqa; ħa jifraħ ix-xagħri u jwarrad, ħa jwarrad bħar-ranġis. Ħa tifraħ fuq li tifraħ, taqbeż u tgħanni. Sebħ il-Libanu jingħata lilha, il-ġmiel tal-Karmel u taʼ Saron. Għad jaraw is-sebħ tal-Mulej, il-ġmiel taʼ Alla tagħna.”—Isaija 35:1, 2.
4. Pajjiż il-Lhud meta u kif jieħu d-dehra taʼ xagħri?
4 Isaija jikteb dan il-kliem madwar is-sena 732 Q.E.K. Xi 125 sena wara, il-Babiloniżi jeqirdu lil Ġerusalemm u n-nies taʼ Ġuda jintbagħtu fl-eżilju. Pajjiżhom jitħalla baħħ u jsir ħerba. (2 Slaten 25:8-11, 21-26) B’dan il-mod titwettaq it-twissija taʼ Jehovah li n-nies taʼ Iżrael kienu se jispiċċaw fl-eżilju jekk ma jurux lealtà. (Dewteronomju 28:15, 36, 37; 1 Slaten 9:6-8) Meta l-ġens Lhudi jaqaʼ fil-jasar f’pajjiż barrani, l-għelieqi u l-ġonna tagħhom imsoqqijin sew jitħallew mitluqin għal 70 sena u jsiru bħal xagħri.—Isaija 64:9 [64:10, NW]; Ġeremija 4:23-27; 9:10-12.
5. (a) Il-kundizzjonijiet taʼ ġenna taʼ l-art kif jerġgħu jitgawdew fil-pajjiż? (b) In-nies f’liema sens “jaraw is-sebħ tal-Mulej”?
5 Madankollu, il-profezija taʼ Isaija tbassar li l-pajjiż mhux se jibqaʼ ħerba għal dejjem. Se jerġaʼ jsir ġenna taʼ l-art fil-veru sens tal-kelma. Se jingħatalu “sebħ il-Libanu” u l-“ġmiel tal-Karmel u taʼ Saron.” a Kif? Malli jirritornaw mill-eżilju, il-Lhud jistgħu jikkultivaw u jsaqqu l-għelieqi tagħhom mill-ġdid, u pajjiżhom jerġaʼ jsir għammiel u għani kif kien qabel. Il-kredtu għal dan jistaʼ jingħata biss lil Jehovah. Huwa bis-saħħa tar-rieda tiegħu u bl-appoġġ u l-barka tiegħu li l-Lhud jaslu biex igawdu dawn il-kundizzjonijiet taʼ ġenna taʼ l-art. In-nies jistgħu jaraw “is-sebħ tal-Mulej, il-ġmiel taʼ Alla” tagħhom meta jirrikonoxxu li hemm id Jehovah wara l-bidla meraviljuża taʼ pajjiżhom.
6. Liema twettiq importanti taʼ kliem Isaija jidher hawn?
6 Minkejja dan, fil-pajjiż taʼ Iżrael mibdul f’ġenna, kliem Isaija għandu twettiq iktar importanti. F’sens spiritwali, Iżrael kien fi stat taʼ nixfa bħal deżert għal bosta snin. Waqt li l-eżiljati kienu f’Babilonja, il-qima safja kienet maħnuqa ferm. Ma kienx hemm tempju, ma kienx hemm artal, u ma kienx hemm saċerdozju organizzat. Is-sagrifiċċji taʼ kuljum waqfu. Issa, Isaija jipprofetizza li se jseħħ l-oppost. Taħt it-tmexxija taʼ rġiel bħal Żerubbabel, Esdra, u Neħemija, rappreżentanti mit-12-il tribù kollha taʼ Iżrael jirritornaw lejn Ġerusalemm, jibnu t-tempju mill-ġdid, u jqimu lil Jehovah fil-libertà. (Esdra 2:1, 2) Din tabilħaqq li hi ġenna spiritwali!
Mixgħulin bl-Ispirtu
7, 8. Il-Lhud eżiljati għala jeħtieġu attitudni pożittiva, u kliem Isaija kif jipprovdi l-inkuraġġiment?
7 Il-kliem taʼ Isaija f’kapitlu 35 għandu xejra ferriħija. Il-profeta qed iħabbar futur mill-isbaħ għall-ġens niedem. Tabilħaqq, hu jitkellem b’konvinzjoni u ottimiżmu. Żewġ sekli wara, meta waslu biex jerġgħu jieħdu posthom f’arthom, il-Lhud eżiljati jeħtieġu l-istess konvinzjoni u ottimiżmu. Permezz taʼ Isaija, Jehovah jħeġġiġhom profetikament: “Qawwu l-idejn mitruħa; saħħu l-irkubbtejn imriegħda. Għidu lil dawk b’qalbhom imbeżżgħa: ‘Agħmlu l-ħila, la tibżgħux! Araw, Alla tagħkom ġej jitħallas; il-ħlas taʼ Alla wasal; Hu stess ġej biex isalvakom.’”—Isaija 35:3, 4.
8 Meta fl-aħħar jintemm l-eżilju jkun hemm ħafna x’irid isir. Is-Sultan Ċiru tal-Persja, il-mezz li bih Jehovah ġab vendetta kontra Babilonja, ħareġ kmand li l-qima taʼ Jehovah trid terġaʼ tieħu postha f’Ġerusalemm. (2 Kronaki 36:22, 23) Eluf taʼ familji Lhud għandhom bżonn jorganizzaw ruħhom sabiex jagħmlu l-vjaġġ perikoluż minn Babilonja sa Ġerusalemm. Meta jaslu hemmhekk, se jkollhom jibnu postijiet addattati fejn jgħixu u jħejju għax-xogħol enormi tal-bini mill-ġdid tat-tempju u l-belt. Għal xi Lhud f’Babilonja, dan kollu għandu mnejn jidher li hu taʼ qtigħ il-qalb. Madankollu, dan m’huwiex iż-żmien biex wieħed jintelaq jew jitbeżżaʼ. Il-Lhud iridu jsaħħu lil xulxin u jkollhom fiduċja f’Jehovah. Hu jassigurahom li se jiġu salvati.
9. Liema wegħda grandjuża hi offruta lil-Lhud li jirritornaw?
9 Dawk li jinħelsu mill-jasar f’Babilonja se jkollhom għalfejn jithennew, għax hemm jistenniehom futur grandjuż malli jirritornaw Ġerusalemm. Ibassar Isaija: “Mbagħad jinfetħu għajnejn l-għomja, jinfetħu widnejn it-torox. Mbagħad iz-zopp jaqbeż bħal għażżiela u lsien l-imbikkma jinħall bil-ferħ.”—Isaija 35:5, 6a.
10, 11. Għal-Lhud li jiġu lura, kliem Isaija għala jrid ikollu tifsira spiritwali, u dan x’iġagħalna naħsbu?
10 Jidher ċar li Jehovah għandu f’moħħu l-kundizzjoni spiritwali tan-nies tiegħu. Dawn ġew kastigati b’70 sena taʼ eżilju għall-apostasija li wettqu qabel. Xorta waħda, meta ddixxiplina lin-nies tiegħu, Jehovah m’għamilhomx għomja, torox, zopop, u mbikkmin. Għaldaqstant, biex il-ġens taʼ Iżrael jerġaʼ għal li kien qabel m’hemmx bżonn li jitfejqu l-mankamenti fiżiċi. Jehovah jagħti lura dak li ntilef, jiġifieri, is-saħħa spiritwali.
11 Il-Lhud li jindmu jitfejqu billi jerġgħu jiksbu s-sensi spiritwali tagħhom—il-vista spiritwali tagħhom u l-abbiltà tagħhom li jisimgħu, jobdu, u jlissnu l-kelma taʼ Jehovah. Huma jsiru konxji tal-fatt li jeħtieġu jibqgħu qrib Jehovah. Bil-kondotta tajba tagħhom, ‘ilsienhom jinħall’ b’tifħir ferrieħi lil Alla tagħhom. Dak li qabel kien “zopp” isir ħerqan u attiv fil-qima tiegħu lejn Jehovah. F’sens figurattiv, hu se “jaqbeż bħal għażżiela.”
Jehovah Jiffriska lin-Nies Tiegħu
12. Jehovah sa liema punt se jipprovdi ilma għall-art?
12 Huwa diffiċli li timmaġina ġenna taʼ l-art mingħajr ilma. Il-Ġenna taʼ l-art oriġinali f’Għeden kellha abbundanza taʼ ilma. (Ġenesi 2:10-14) L-art mogħtija lil Iżrael kienet ukoll “art taʼ widien taʼ ilma, taʼ għejun u gliegel.” (Dewteronomju 8:7) Għalhekk, b’mod xieraq Isaija jagħmel din il-wegħda rifreskanti: “Iva, igelgel l-ilma fid-deżert, u l-widien fix-xagħri. L-art maħruqa tinbidel f’għadira, u l-art niexfa f’għejun taʼ ilma ġieri. Fejn qabel kienu jimteddu x-xakalli, issa hemm il-ħmiemel tal-qasab u l-ġummar.” (Isaija 35:6b, 7) Meta l-Iżraelin jerġgħu jieħdu ħsieb il-pajjiż, l-inħawi li kienu ħerba, fejn darba kienu jħufu x-xakalli, se jinksew b’siġar li jħaddru mfawrin bil-frott. Art niexfa bit-trab se tiġi mibdula f’“għadira” fejn jistgħu jikbru l-ġummar u qasab ieħor li jikber fl-ilma.—Ġob 8:11.
13. Il-ġens li reġaʼ ħa postu liema ilma spiritwali se jkollu bl-abbundanza?
13 Iżda, iktar importanti huwa l-ilma spiritwali tal-verità, li l-Lhud li jirritornaw f’arthom se jgawdu bl-abbundanza. Jehovah se jipprovdi għarfien, inkuraġġiment, u faraġ permezz tal-Kelma tiegħu. Iktar minn hekk, irġiel ixjeħ u prinċpijiet li huma leali se jkunu “bħal swieqi taʼ l-ilma f’art niexfa.” (Isaija 32:1, 2) Nies li għandhom għal qalbhom il-qima safja, bħal Esdra, Ħaggaj, Ġożwè, Neħemija, Żakkarija u Żerubbabel, tabilħaqq li se jaraw b’għajnejhom stess it-twettiq tal-profezija taʼ Isaija.—Esdra 5:1, 2; 7:6, 10; Neħemija 12:47.
“It-Triq il-Qaddisa”
14. Iddeskrivi kif minn Babilonja tistaʼ tasal Ġerusalemm.
14 Madankollu, biex ikunu jistgħu jgawdu dawn il-kundizzjonijiet fiżiċi u spiritwali bħal taʼ ġenna, il-Lhud eżiljati se jkollhom jagħmlu l-vjaġġ twil u perikoluż minn Babilonja sa Ġerusalemm. Jekk jaqbdu rotta dritta jkollhom jaqsmu madwar 800 kilometru taʼ deżert niexef u għeri. Biex jaqbdu rotta inqas diffiċli jridu jivvjaġġaw 1,600 kilometru. Jieħdu liema vjaġġ jieħdu jkun ifisser li jqattgħu xhur sħaħ fil-beraħ. Barra minn hekk, ikunu fil-periklu li jiġu attakkati kemm minn bhejjem salvaġġi u kemm minn bnedmin li huma bħall-bhejjem. Xorta waħda, dawk li jemmnu l-profezija taʼ Isaija ma jinkwetawx iżżejjed. Għala?
15, 16. (a) Jehovah liema protezzjoni jipprovdilhom lil-Lhud leali fil-vjaġġ tagħhom lejn darhom? (b) Jehovah f’liema sens ieħor jipprovdi triq imħarsa għal-Lhud?
15 Permezz taʼ Isaija, Jehovah jwiegħed: “Hekk ikun hemm triq, isejjħulha: ‘It-Triq il-Qaddisaʼ. Ħadd imniġġes ma jgħaddi minnha, u l-boloh ma jiġġerrewx fiha. Ma jkunx hemm l-iljun, u ebda bhima feroċi ma titlaʼ minnha: minnha jgħaddu l-mifdijin.” (Isaija 35:8, 9) Jehovah ħeles lin-nies tiegħu! Huma “l-mifdijin” tiegħu, u jiggarantilhom li jaslu qawwijin u sħaħ fi triqithom lejn darhom. Hemm xi triq letterali miksija, merfugħa ’l fuq, u bil-ħitan fil-ġnub minn Babilonja sa Ġerusalemm? Le, imma l-protezzjoni li Jehovah jagħti lin-nies tiegħu fil-vjaġġ tagħhom tant hi ċerta li għalihom daqs li kieku għaddejjin minn triq bħal din.—Qabbel Salm 91:1-16.
16 Il-Lhud huma protetti wkoll minn perikli spiritwali. It-triq figurattiva hi t-“Triq il-Qaddisa.” Dawk li ma jurux rispett lejn l-affarijiet sagri jew li m’humiex nodfa spiritwalment ma jitħallewx jgħaddu minnha. Ħadd ma jridhom fil-pajjiż li jerġaʼ jsir ġenna. Dawk li jiġu aċċettati għandhom motiv tajjeb. Mhux sejrin lura lejn Ġuda u Ġerusalemm għax iħossuhom kburin b’ġenshom jew biex jiġru wara l-interessi persunali. Il-Lhud li huma spiritwali jirrealizzaw li r-raġuni prinċipali għala sejrin lura hi biex jagħtu l-ħajja mill-ġdid lill-qima safja taʼ Jehovah f’dak il-pajjiż.—Esdra 1:1-3.
In-Nies taʼ Jehovah Jithennew
17. Il-profezija taʼ Isaija kif farrġithom lil-Lhud leali matul l-eżilju twil tagħhom?
17 Kapitlu 35 tal-profezija taʼ Isaija jispiċċa fuq nota ferriħija: “Jerġgħu lura l-mifdijin tal-Mulej, u jidħlu f’Sijon jgħajjtu bil-ferħ, b’ferħ taʼ dejjem fuq rashom. Il-ferħ u l-hena jiksbu, u jgħibu swied il-qalb u l-krib.” (Isaija 35:10) L-ilsiera Lhud li fdaw f’din il-profezija biex jiksbu l-faraġ u t-tama matul l-eżilju tagħhom forsi qagħdu jitħassbu dwar kif kienu se jitwettqu d-diversi dettalji tagħha. X’aktarx li ħafna aspetti mill-profezija ma fehmuhomx. Xorta waħda, il-fatt li kienu se “jerġgħu lura . . . u jidħlu f’Sijon” kien ċar daqs il-kristall.
18. Il-ferħ u l-hena fil-pajjiż li jerġaʼ għal li kien qabel, b’liema mod jieħdu post is-swied il-qalb u l-krib f’Babilonja?
18 Għaldaqstant, fis-sena 537 Q.E.K., xi 50,000 raġel (inkluż iktar minn 7,000 ilsir) flimkien man-nisa u t-tfal jagħmlu l-vjaġġ lura lejn Ġerusalemm li jieħu erbaʼ xhur, b’fiduċja sħiħa f’Jehovah. (Esdra 2:64, 65) Ftit xhur biss wara, l-artal taʼ Jehovah jinbena mill-ġdid, u dan kien l-ewwel pass fil-bini mill-ġdid tat-tempju. B’hekk titwettaq il-profezija taʼ Isaija li kien ilha 200 sena li tlissnet. Il-ferħ u l-hena fil-pajjiż li jerġaʼ għal li kien qabel jieħdu post is-swied il-qalb u l-krib tal-ġens waqt li kien f’Babilonja. Jehovah wettaq il-wegħda tiegħu. Il-pajjiż jerġaʼ jsir ġenna—kemm letterali u kemm spiritwali!
It-Twelid taʼ Ġens Ġdid
19. Għala jrid jingħad li l-profezija taʼ Isaija għandha biss twettiq limitat fis-sitt seklu Q.E.K.?
19 M’għandniex xi ngħidu, fis-sitt seklu Q.E.K., ma sarx it-twettiq sħiħ taʼ Isaija kapitlu 35. Il-kundizzjonijiet taʼ ġenna taʼ l-art gawduti mil-Lhud li jerġgħu lura f’arthom m’humiex dejjiema. Maż-żmien, it-tagħlim reliġjuż falz u n-nazzjonaliżmu jniġġsu l-qima safja. Spiritwalment, il-Lhud jerġgħu jġarrbu s-swied il-qalb u l-krib. Maż-żmien, Jehovah ma jibqax jaċċettahom bħala l-poplu tiegħu. (Mattew 21:43) Minħabba li reġgħu m’obdewhx, l-hena tagħhom m’huwiex għal dejjem. Dan kollu jindika li hemm twettiq ieħor, akbar minn dan, taʼ Isaija kapitlu 35.
20. Liema Iżrael ġdid beda jeżisti fl-ewwel seklu E.K.?
20 Meta wasal il-waqt taʼ Jehovah, beda jeżisti Iżrael ieħor, dak spiritwali. (Galatin 6:16) Ġesù ħejja t-triq għat-twelid taʼ dan Iżrael ġdid matul il-ministeru tiegħu fuq l-art. Hu reġaʼ ta l-ħajja lill-qima safja, u bit-tagħlim tiegħu, l-ilmijiet tal-verità bdew igelglu mill-ġdid. Fejjaq lill-morda, kemm fiżikament u kemm spiritwalment. Ħarġet għajta ferriħija hekk kif ixxandret l-aħbar tajba tas-Saltna t’Alla. Sebaʼ ġimgħat wara l-mewt u l-irxoxt tiegħu, Ġesù glorifikat stabbilixxa l-kongregazzjoni Kristjana, Iżrael spiritwali magħmul minn Lhud u oħrajn mifdijin bid-demm li xerred Ġesù. Dawn ġew imnisslin bħala wlied spiritwali t’Alla, saru ħut Ġesù, u ġew midlukin bl-ispirtu qaddis.—Atti 2:1-4; Rumani 8:16, 17; 1 Pietru 1:18, 19.
21. Rigward il-kongregazzjoni Kristjana fl-ewwel seklu, liema ġrajjiet jistgħu jitqiesu bħala twettiq taʼ ċerti karatteristiċi mill-profezija taʼ Isaija?
21 Meta kien qed jikteb lill-membri taʼ Iżrael spiritwali, l-appostlu Pawlu rrefera għall-kliem taʼ Isaija 35:3 billi qal: “Erfgħu l-idejn merħija u l-irkubbtejn mitluqa tagħkom.” (Lhud 12:12) Għalhekk, jidher ċar li fl-ewwel seklu E.K. kien hemm twettiq tal-kliem taʼ Isaija kapitlu 35. F’sens letterali, Ġesù u d-dixxipli tiegħu mirakolożament taw id-dawl lill-għomja u s-smigħ lit-torox. Bis-saħħa tagħhom iz-‘zopop’ setgħu jimxu u l-imbikkmin setgħu jerġgħu jitkellmu. (Mattew 9:32; 11:5; Luqa 10:9) Iktar importanti, nies taʼ qalb retta ħarbu mir-reliġjon falza u bdew igawdu ġenna spiritwali ġewwa l-kongregazzjoni Kristjana. (Isaija 52:11; 2 Korintin 6:17) Bħalma kien fil-każ tal-Lhud li rritornaw minn Babilonja, dawn il-maħrubin ukoll kellhom bżonn taʼ spirtu pożittiv u kuraġġuż.—Rumani 12:11.
22. Kristjani sinċieri li qegħdin ifittxu l-verità fi żmienna kif daħlu fil-jasar taħt Babilonja?
22 Xi ngħidu għal żmienna? Għandha l-profezija taʼ Isaija twettiq ieħor, wieħed iktar sħiħ li jinvolvi l-kongregazzjoni Kristjana llum? Iva. Wara li mietu l-appostli, l-għadd tal-veri Kristjani midlukin naqas bil-kbir, u Kristjani foloz, “sikrana,” imxew ’il quddiem fix-xena dinjija. (Mattew 13:36-43; Atti 20:30; 2 Pietru 2:1-3) Anki meta, matul is-seklu 19, individwi sinċieri bdew jisseparaw ruħhom mill-Kristjaneżmu u jfittxu l-qima safja, il-fehma tagħhom baqgħet imniġġsa b’tagħlim mhux skritturali. Fl-1914, Ġesù ngħata t-tron bħala Sultan Messjaniku, imma ftit wara, is-sitwazzjoni kienet tidher kerha għal dawn l-uħud sinċieri li kienu qegħdin ifittxu l-verità. Bit-twettiq tal-profezija, il-ġnus ‘għamlulhom gwerra u rebħuhom,’ u dawn il-Kristjani sinċieri ma tħallewx jippridkaw l-aħbar tajba. Kienu fil-fatt daħlu fil-jasar taħt Babilonja.—Apokalissi 11:7, 8.
23, 24. Kliem Isaija b’liema modi twettaq fost in-nies t’Alla mill-1919 ’l hawn?
23 Madankollu, fl-1919 l-affarijiet inbidlu. Jehovah ħareġ lin-nies tiegħu mill-jasar. Huma bdew jiċħdu t-tagħlim falz li qabel kien niġġes il-qima tagħhom. B’riżultat taʼ dan, gawdew fejqan. Huma sabu ruħhom f’ġenna spiritwali, li saħansitra llum tkompli tinfirex madwar l-art. F’sens spiritwali, l-għomja qegħdin jitgħallmu jaraw u t-torox jisimgħu—billi joqogħdu attenti bis-sħiħ għall-ħidma taʼ l-ispirtu qaddis t’Alla, u jkunu konxji l-ħin kollu tal-ħtieġa li jibqgħu qrib Jehovah. (1 Tessalonikin 5:6; 2 Timotju 4:5) Billi m’għadhomx imbikkmin, il-veri Kristjani huma ħerqanin biex ‘iħollu lsienhom’ ħalli jxandru l-veritajiet Bibliċi lil ħaddieħor. (Rumani 1:15) Dawk li kienu dgħajfin, jew ‘zopop,’ spiritwalment, issa juru żelu u ferħ. B’mod figurattiv, dawn kapaċi ‘jaqbżu bħal għażżiela.’
24 Dawn il-Kristjani li ngħataw il-ħajja mill-ġdid jimxu fit-“Triq il-Qaddisa.” Din it-“Triq,” li twassal lil dak li jkun minn Babilonja l-Kbira għal ġo ġenna spiritwali, hija miftuħa għall-adoraturi kollha li huma nodfa spiritwalment. (1 Pietru 1:13-16) Dawn jistgħu jistrieħu fuq Jehovah għall-protezzjoni u jkunu fiduċjużi li Satana mhux se jirnexxilu jeqred il-qima vera bl-attakki tiegħu bħal taʼ bhima. (1 Pietru 5:8) Uħud diżubbidjenti u kulmin iġib ruħu bħal annimal salvaġġ li jgħix fuq il-priża, ma jitħallewx iniġġsu lil dawk li mexjin fit-triq il-qaddisa t’Alla. (1 Korintin 5:11) Ġewwa dan l-ambjent protett, il-mifdijin taʼ Jehovah—il-midlukin u n-“nagħaġ oħra”—isibu l-ferħ f’li jaqdu lill-uniku Alla veru.—Ġwanni 10:16.
25. Se jkun hemm twettiq fiżiku taʼ Isaija kapitlu 35? Spjega.
25 Xi ngħidu għall-futur? Qatt se titwettaq b’mod fiżiku l-profezija taʼ Isaija? Iva. Il-fejqan mirakoluż imwettaq minn Ġesù u l-appostli tiegħu fl-ewwel seklu wera x-xewqa u l-abbiltà taʼ Jehovah biex iwettaq dan il-fejqan fuq skala kbira ferm fil-futur. Is-Salmi mnebbħin jitkellmu dwar ħajja taʼ dejjem f’kundizzjonijiet taʼ paċi fuq l-art. (Salm 37:9, 11, 29) Ġesù wiegħed ħajja fil-Ġenna taʼ l-art. (Luqa 23:43) Mill-bidu sat-tmiem, il-Bibbja tipprovdi tama għal ġenna taʼ l-art letterali. F’dak iż-żmien, l-għomja, it-torox, iz-zopop, u l-imbikkmin se jitfejqu fiżikament u għal dejjem. Is-swied il-qalb u l-krib se jisparixxu. L-hena tabilħaqq li se jkun għal żmien indefinit, saħansitra għal dejjem.—Apokalissi 7:9, 16, 17; 21:3, 4.
26. Kliem Isaija kif isaħħaħhom lill-Kristjani llum?
26 Waqt li l-Kristjani veri jistennew li l-art letterali terġaʼ ssir Ġenna, minn issa stess huma jgawdu l-barkiet tal-ġenna spiritwali. Huma jiffaċċjaw b’ottimiżmu l-provi u t-tribulazzjonijiet. B’fiduċja li ma titħarrikx f’Jehovah, dawn jinkuraġġixxu lil xulxin, billi jagħtu kas it-twissija: “Qawwu l-idejn mitruħa; saħħu l-irkubbtejn imriegħda. Għidu lil dawk b’qalbhom imbeżżgħa: ‘Agħmlu l-ħila, la tibżgħux.’” Huma għandhom fiduċja sħiħa fl-assiguranza profetika: “Araw, Alla tagħkom ġej jitħallas; il-ħlas taʼ Alla wasal; Hu stess ġej biex isalvakom.”—Isaija 35:3, 4.
[Nota taʼ taħt]
a L-Iskrittura tiddeskrivi l-Libanu tal-qedem bħala pajjiż għammiel b’foresti jħaddru u ċedri maestużi, li jitqabbel mal-Ġnien taʼ Għeden. (Salm 29:5; 72:16; Eżekjel 28:11-13) Saron kienet magħrufa għall-ilma ġieri u l-foresti tal-ballut; Karmel kienet famuża għad-dwieli, il-ġonna bis-siġar tal-frott, u l-għoljiet miksijin bil-fjuri.
[Mistoqsijiet taʼ Studju]
[Stampa taʼ paġna sħiħa f’paġna 370]
[Stampi f’paġna 375]
Postijiet li huma deżert isiru postijiet imsoqqijin sew mimlijin ħmiemel tal-qasab u l-ġummar
[Stampa f’paġna 378]
Ġesù fejjaq lill-morda, kemm spiritwalment u kemm fiżikament
