Kapitlu Għaxra

“Żmien taʼ Rieda Tajba”

Isaija 49:1-26

1, 2. (a) Isaija liema barka gawda? (b) Min huma dawk involuti fil-​kliem profetiku li nsibu fl-​ewwel parti minn Isaija kapitlu 49?

 IL-​BNEDMIN leali kollha minn dejjem gawdew l-​approvazzjoni u l-​protezzjoni t’Alla. Imma Jehovah ma jurix ir-​rieda tajba tiegħu lil min ġie ġie. Individwu jrid jikkwalifika biex jikseb din il-​barka li m’hawnx bħalha. Isaija hekk għamel. Hu gawda l-​favur t’Alla u ntuża minn Jehovah bħala strument biex jgħarraf ir-​rieda Tiegħu lil oħrajn. Insibu eżempju taʼ dan fl-​ewwel parti mill-​profezija taʼ Isaija kapitlu 49.

² Dan il-​kliem hu indirizzat b’mod profetiku lil nisel Abraham. Fl-​ewwel twettiq, dan in-​nisel huwa l-​ġens taʼ Iżrael, li kien dixxendent t’Abraham. Madankollu, jidher ċar li ħafna mil-​lingwaġġ japplika għal Nisel Abraham, il-​Messija mwiegħed, li kien ilu tant mistenni. Il-​kliem imnebbaħ japplika wkoll għall-​aħwa spiritwali tal-​Messija, li jsiru parti min-​nisel spiritwali t’Abraham u taʼ l-​“Iżrael taʼ Alla.” (Galatin 3:7, 16, 29; 6:16) B’mod partikulari, din il-​parti mill-​profezija taʼ Isaija tiddeskrivi r-​relazzjoni speċjali li teżisti bejn Jehovah u Ibnu l-​maħbub, Ġesù Kristu.—Isaija 49:26.

Maħtur u Protett minn Jehovah

3, 4. (a) Il-​Messija x’appoġġ għandu? (b) Il-​Messija lil min qed ikellem?

³ Il-​Messija jgawdi r-​rieda tajba, jew l-​approvazzjoni,  t’Alla. Jehovah jagħtih l-​awtorità u l-​kredenzjali meħtiġin biex iwettaq il-​missjoni tiegħu. B’mod xieraq, għalhekk, dak li se jkun il-​Messija jgħid: “Isimgħuni, gżejjer, agħtuni widen, popli mbiegħda! Il-​Mulej mill-​ġuf sejjaħli, mill-​ġewwieni taʼ ommi ftakar f’ismi.”—Isaija 49:1.

⁴ Hawnhekk il-​Messija jindirizza kliemu lil popli li jiġu ‘mill-​bogħod.’ Għalkemm il-​Messija hu mwiegħed lil-​Lhud, permezz tal-​ministeru tiegħu se jitbierku l-​ġnus kollha. (Mattew 25:31-33) Avolja l-​“gżejjer” u l-​“popli” m’humiex f’patt maʼ Jehovah, dawn għandhom jagħtu kas il-​Messija taʼ Iżrael għaliex hu mibgħut biex isalva lill-​bnedmin kollha.

5. Il-​Messija kif jingħata isem saħansitra qabel ma jitwieled bħala bniedem?

⁵ Il-​profezija tgħid li qabel ma jitwieled bħala bniedem, il-​Messija se jingħata isem minn Jehovah. (Mattew 1:21; Luqa 1:31) Ferm qabel ma jitwieled, Ġesù jingħata l-​isem taʼ “Kunsillier taʼ l-​għaġeb, Alla setgħan, Missier għal dejjem, Prinċep tas-​sliem.” (Isaija 9:5 [9:6, NW]) Għimmanu-el, li x’aktarx hu l-​isem taʼ wieħed minn ulied Isaija, ukoll jirriżulta li hu isem profetiku tal-​Messija. (Isaija 7:14; Mattew 1:21-23) Anki l-​isem Ġesù, li jingħata lill-​Messija u li bih se jsir magħruf, huwa mbassar qabel it-​twelid tiegħu. (Luqa 1:30, 31) Dan l-​isem ġej mill-​kelma Ebrajka li tfisser “Jehovah Hu Salvazzjoni.” Jidher ċar li Ġesù ma ħatarx lilu nnifsu bħala Kristu.

6. Fomm il-​Messija b’liema mod hu bħal xabla misnuna, u kif inhu moħbi, jew mistur?

⁶ Il-​kliem profetiku tal-​Messija jkompli: “Għamilli fommi xabla misnuna, taħt id-​dell taʼ idu ħbieni. Għamel minni vleġġa maħtura, fil-​barżakka tiegħu ħbieni.” (Isaija 49:2) Meta jasal iż-​żmien biex il-​Messija taʼ Jehovah jibda l-​ministeru tiegħu fuq l-​art fis-​sena 29 E.K.,  il-​kliem u l-​azzjonijiet taʼ Ġesù tassew juru li huma bħal armi misnunin u jleqqu li kapaċi jidħlu fi qlub dawk li jisimgħuh. (Luqa 4:31, 32) Il-​kliem u l-​azzjonijiet tiegħu jqanqlu l-​għadab taʼ l-​għadu l-​kbir taʼ Jehovah, Satana, u l-​aġenti tiegħu. Minn dak in-​nhar li jitwieled Ġesù, Satana jipprova jiħodlu ħajtu, imma Ġesù hu bħal vleġġa moħbija fil-​barżakka taʼ Jehovah. a Bil-​fiduċja, hu jistaʼ jserraħ moħħu mill-​protezzjoni taʼ Missieru. (Salm 91:1; Luqa 1:35) Fiż-​żmien stabbilit, Ġesù jagħti ħajtu għan-​nom tal-​bnedmin. Imma se jiġi ż-​żmien meta se joħroġ bħala gwerrier setgħan mis-​sema li hu armat f’sens differenti, b’xabla misnuna ħierġa minn fommu. Din id-​darba, ix-​xabla misnuna tirrappreżenta l-​awtorità li għandu Ġesù biex jiddikjara u jwettaq ġudizzji kontra l-​għedewwa taʼ Jehovah.—Apokalissi 1:16.

Il-​Ħidma tal-​Qaddej t’Alla M’Hijiex Għalxejn

7. Il-​kliem taʼ Jehovah f’Isaija 49:3 għal min japplika, u għala?

⁷ Issa Jehovah jgħid dan il-​kliem profetiku: “Iżrael, inti l-​qaddej tiegħi, bik jiena nkun imfaħħar.” (Isaija 49:3) Fin-​New World Translation, l-​aħħar parti taʼ dan il-​vers tinqara hekk, “int dak li fih se nuri l-​ġmiel tiegħi.” Jehovah jirreferi għall-​ġens taʼ Iżrael bħala l-​qaddej  tiegħu. (Isaija 41:8) Imma Ġesù Kristu hu l-​aqwa Qaddej t’Alla. (Atti 3:13) Ħadd minn fost il-​ħlejjaq t’Alla ma jistaʼ jirrifletti l-​“ġmiel” taʼ Jehovah aħjar minn Ġesù. Għaldaqstant, waqt li letteralment huwa indirizzat lil Iżrael, dan il-​kliem japplika realment għal Ġesù.—Ġwann 14:9; Kolossin 1:15.

8. Il-​poplu tal-​Messija stess kif jirreaġixxi għalih, imma l-​Messija lejn min iħares biex jiġġudika s-​suċċess tiegħu?

⁸ M’huwiex minnu, iżda, li Ġesù jiġi disprezzat u miċħud mill-​biċċa l-​kbira mill-​poplu tiegħu stess? Iva. B’mod ġenerali, il-​ġens taʼ Iżrael ma jaċċettahx lil Ġesù bħala l-​Qaddej midluk t’Alla. (Ġwann 1:11) Kulma jwettaq Ġesù waqt li qiegħed fuq l-​art jistaʼ jidher min-​nies taʼ żmienu bħala li hu bla valur, saħansitra insinifikanti. Il-​Messija issa jirreferi għal dan li jidher qisu fjask fil-​ministeru tiegħu billi jgħid: “Għalxejn inkeddejt, u fix-​xejn ħlejt saħħti.” (Isaija 49:4a) Dan il-​kliem ma jintqalx għaliex il-​Messija hu skuraġġit. Ikkunsidra x’jgħid imbagħad: “Imma f’idejn il-​Mulej il-​kawża tiegħi, u l-​ħlas tiegħi għand Alla tiegħi.” (Isaija 49:4b) Is-​suċċess tal-​Messija ma jiġix ġudikat mill-​bniedem imma minn Alla.

9, 10. (a) Il-​Messija x’inkarigu jingħata mingħand Jehovah, u x’riżultati jikseb? (b) Illum, il-​Kristjani kif jistgħu jiġu inkuraġġiti mill-​esperjenzi tal-​Messija?

⁹ Ġesù hu interessat prinċipalment fl-​approvazzjoni, jew ir-​rieda tajba, t’Alla. Fil-​profezija, il-​Messija jgħid: “Issa tkellem il-​Mulej [Jehovah], li minn ġuf ommi għamilni qaddej tiegħu, biex għandu nraġġaʼ lura ’l Ġakobb, u biex Iżrael jinġabar miegħu mill-​ġdid, għax jien kont imfaħħar f’għajnejn il-​Mulej, u Alla tiegħi kien il-​qawwa tiegħi.” (Isaija 49:5) Il-​Messija jiġi biex idawwar qlub ulied Iżrael lura lejn Missierhom tas-​sema. Il-​biċċa l-​kbira ma jaċċettawx, imma xi wħud jaċċettaw. Madankollu, il-​ħlas veru tiegħu jagħtihulu Alla Jehovah.  Is-​suċċess tiegħu ma jitkejjilx skond kif jarah il-​bniedem imma skond il-​livelli taʼ Jehovah stess.

¹⁰ Illum, xi kultant is-​segwaċi taʼ Ġesù jistgħu jħossu li bħallikieku qegħdin jaħdmu għalxejn. F’xi postijiet, ir-​riżultati fil-​ministeru tagħhom jistgħu jidhru li huma insinifikanti meta jitqabblu maʼ l-​ammont taʼ xogħol u sforzi li jsiru. Xorta waħda, huma jissaportu billi jiġu inkuraġġiti mill-​eżempju taʼ Ġesù. Jiġu msaħħin ukoll bil-​kliem taʼ l-​appostlu Pawlu, li kiteb: “Għalhekk, ħuti għeżież, żommu sħiħ, titħarrkux; ħabirku dejjem fil-​ħidma tal-​Mulej. Kunu afu li l-​ħidma tagħkom fil-​Mulej m’hijiex għalxejn.”—1 Korintin 15:58.

“Dawl għall-​Ġnus”

11, 12. Il-​Messija kif kien u għadu “dawl għall-​ġnus”?

¹¹ Fil-​profezija taʼ Isaija, Jehovah jinkuraġġixxi lill-​Messija billi jfakkru li l-​fatt li hu l-​Qaddej t’Alla m’huwiex xi “ħaġa żgħira wisq.” Ġesù jrid ‘iqajjem it-​tribù taʼ Ġakobb, u jreġġaʼ lura l-​fdal taʼ Iżrael.’ Jehovah  jispjega wkoll: “Jien nagħmel minnek dawl għall-​ġnus, biex is-​salvazzjoni tiegħi sa truf l-​art tinfirex.” (Isaija 49:6) Ġesù kif idawwal lill-​popli “sa truf l-​art” meta l-​ministeru tiegħu fuq l-​art hu limitat biss għal Iżrael?

¹² Il-​Bibbja turi li d-​“dawl [t’Alla] għall-​ġnus” ma ntefiex meta Ġesù telaq minn fuq l-​art. Xi 15-il sena wara li miet Ġesù, il-​missjunarji Pawlu u Barnaba kkwotaw il-​profezija taʼ Isaija 49:6 u applikawha għad-​dixxipli taʼ Ġesù, ħutu spiritwali. Huma spjegaw: “Għax hekk ordnalna l-​Mulej, ‘Jien għamiltek dawl tal-​ġnus, biex twassal is-​salvazzjoni sa truf l-​art.’” (Atti 13:47) Qabel ma miet, Pawlu ra l-​aħbar tajba taʼ salvazzjoni titħabbar mhux biss lil-​Lhud imma wkoll “lill-​ħlejjaq kollha taħt is-​smewwiet.” (Kolossin 1:6, 23) Illum, dawk li fadal mill-​aħwa midlukin taʼ Kristu jkomplu f’dan ix-​xogħol. Appoġġati minn “kotra kbira” li tgħodd bil-​miljuni, huma jaqdu bħala “dawl għall-​ġnus” f’iktar minn 230 pajjiż madwar id-​dinja.—Apokalissi 7:9.

13, 14. (a) Il-​Messija u s-​segwaċi tiegħu ffaċċjaw liema reazzjoni għax-​xogħol taʼ l-​ippridkar? (b) Kif inqalbet il-​folja?

¹³ Jehovah tabilħaqq li jagħti s-​saħħa lill-​Qaddej tiegħu l-​Messija, lill-​aħwa midlukin tal-​Messija, u lil dawk kollha tal-​kotra kbira li, flimkien magħhom, ikomplu x-​xogħol taʼ l-​ippridkar taʼ l-​aħbar tajba. Huwa minnu li d-​dixxipli tiegħu ffaċċjaw l-​istmerrija u l-​oppożizzjoni bħal Ġesù. (Ġwann 15:20) Imma fiż-​żmien stabbilit minnu, Jehovah dejjem iġiegħel li tinqaleb il-​folja sabiex isalva u jippremja lill-​qaddejja leali tiegħu. Rigward il-​Messija, li hu “mkasbar min-​nies” u “mistmerr mill-​poplu,” Jehovah jwiegħed: “Is-​slaten għad jaraw u jqimu, u l-​prinċpijiet iqimu wiċċhom fl-​art, minħabba l-​Mulej li hu fidil, il-​Qaddis taʼ Iżrael, Dak li ħatrek.”—Isaija 49:7.

 ¹⁴ Iktar tard l-​appostlu Pawlu kiteb lill-​Kristjani ġewwa Filippi dwar kif ġie mbassar li kellha tinqaleb il-​folja. Hu ddeskriva lil Ġesù bħala wieħed li kien ġie umiljat fuq zokk tat-​tortura imma li mbagħad ngħata pożizzjoni għolja minn Alla. Lill-​Qaddej tiegħu, Jehovah “għollieh sas-​smewwiet u żejjnu bl-​Isem li hu fuq kull isem, biex fl-​isem taʼ Ġesù . . . l-​ħlejjaq kollha jinżlu għarkubbtejhom.” (Filippin 2:8-11) Is-​segwaċi leali taʼ Kristu ġew imwissijin li huma wkoll se jiġu persegwitati. Imma bħalma ġara fil-​każ tal-​Messija, huma assigurati mir-​rieda tajba taʼ Jehovah.—Mattew 5:10-12; 24:9-13; Mark 10:29, 30.

“Iż-​Żmien Speċjalment Aċċettabbli”

15. Liema “żmien” speċjali jissemma fil-​profezija taʼ Isaija, u dan x’jindika?

¹⁵ Il-​profezija taʼ Isaija tkompli bi stqarrija sinifikanti ferm. Jehovah jgħid lill-​Messija: “Fiż-​żmien it-​tajjeb [“żmien taʼ rieda tajba,” “NW”] smajtek, u f’jum is-​salvazzjoni għentek. Ħaristek u għamilt minnek patt mal-​poplu.” (Isaija 49:8a) Profezija simili tinstab f’Salm 69:14-19 [69:13-18, NW]. Is-​salmista jirreferi għal “żmien taʼ rieda tajba,” billi juża l-​espressjoni “żmien aċċettabbli” (NW). Dawn it-​termini jindikaw li r-​rieda tajba u l-​protezzjoni taʼ Jehovah jintwerew b’manjiera speċjali biss waqt perijodu speċifiku u temporanju.

16. X’kien iż-​żmien taʼ rieda tajba mingħand Jehovah għal Iżrael tal-​qedem?

¹⁶ Meta seħħ dan iż-​żmien taʼ rieda tajba? Fl-​isfond oriġinali, il-​kliem kien parti minn profezija taʼ tiġdid u bassar li l-​Lhud kellhom jirritornaw mill-​eżilju. L-​Iżraelin esperjenzaw żmien taʼ rieda tajba meta setgħu ‘jerġgħu jqajmu l-​art’ u jippossiedu mill-​ġdid “il-​wirt imħarbat.” (Isaija 49:8b) Ma kinux għadhom iktar “imjassrin”  f’Babilonja. Matul il-​vjaġġ tagħhom lejn pajjiżhom, Jehovah ħa ħsieb li ma jaqbadhomx “ġuħ” jew “għatx,” u ma “tolqothomx is-​sħana u lanqas ix-​xemx.” L-​Iżraelin li kienu mxerrdin ġew bi ħġarhom lura lejn art twelidhom “mill-​bogħod; . . . mit-​tramuntana u l-​punent.” (Isaija 49:9-12) Minkejja dan l-​ewwel twettiq drammatiku, il-​Bibbja turi li din il-​profezija tapplika iktar minn darba.

17, 18. Jehovah liema żmien taʼ rieda tajba ħatar matul l-​ewwel seklu?

¹⁷ L-​ewwelnett, dak in-​nhar li twieled Ġesù, l-​anġli ħabbru sliem u rieda tajba, jew favur, mingħand Alla għall-​bnedmin. (Luqa 2:13, 14, Saydon) Din ir-​rieda tajba ma ġietx offruta lill-​bnedmin in ġenerali, imma biss lil dawk li eżerċitaw fidi f’Ġesù. Iktar tard Ġesù qara pubblikament il-​profezija taʼ Isaija 61:1, 2 u applikaha għalih innifsu bħala x-​xandâr tas-​“sena tal-​grazzja [“aċċettabbli,” NW] tal-​Mulej” Jehovah. (Luqa 4:17-21) L-​appostlu Pawlu tkellem dwar Kristu bħala li rċieva l-​protezzjoni speċjali taʼ Jehovah matul iż-​żmien meta kien jgħix bħala bniedem. (Lhud 5:7-9) Mela dan iż-​żmien taʼ rieda tajba japplika għall-​favur t’Alla fuq Ġesù matul ħajtu bħala bniedem.

¹⁸ Madankollu, din il-​profezija terġaʼ tiġi applikata f’post ieħor. Wara li kkwota l-​kliem taʼ Isaija rigward iż-​żmien taʼ rieda tajba, Pawlu ssokta jgħid: “Araw, issa hu ż-​żmien tajjeb [“iż-​żmien speċjalment aċċettabbli,” NW], araw, issa hu jum is-​salvazzjoni!” (2 Korintin 6:2) Pawlu kiteb dan il-​kliem 22 sena wara li miet Ġesù. B’mod evidenti, meta twieldet il-​kongregazzjoni Kristjana nhar Pentekoste tas-​sena 33 E.K., Jehovah estenda s-​sena taʼ rieda tajba tiegħu sabiex tinkludi lis-​segwaċi midlukin taʼ Kristu.

19. Illum, il-​Kristjani kif jistgħu jibbenefikaw miż-​żmien taʼ rieda tajba mingħand Jehovah?

 ¹⁹ Illum, xi ngħidu għas-​segwaċi taʼ Ġesù li m’humiex midlukin bħala werrieta tas-​saltna t’Alla fis-​sema? Jistgħu dawk li għandhom it-​tama għall-​art jibbenefikaw minn dan iż-​żmien aċċettabbli? Iva. Il-​ktieb Bibliku taʼ l-​Apokalissi juri li dan hu żmien taʼ rieda tajba min-​naħa taʼ Jehovah lejn il-​kotra kbira li se toħroġ “mit-​taħbit il-​kbir” biex tgawdi l-​ħajja fuq art magħmula ġenna. (Apokalissi 7:13-17) Għaldaqstant, il-​Kristjani kollha jistgħu jieħdu vantaġġ minn dan il-​perijodu limitat li matulu Jehovah joffri r-​rieda tajba tiegħu lill-​bnedmin imperfetti.

20. Il-​Kristjani b’liema mod jistgħu jevitaw li jirċievu l-​grazzja taʼ Jehovah għalxejn?

²⁰ Qabel ma xandar iż-​żmien aċċettabbli taʼ Jehovah, l-​appostlu Pawlu lissen twissija. Hu ħeġġeġ lill-​Kristjani ‘biex ma jirċivux il-​grazzja t’Alla għal xejn.’ (2 Korintin 6:1) Fi qbil maʼ dan, il-​Kristjani jużaw kull opportunità biex jogħġbu lil Alla u jagħmlu r-​rieda tiegħu. (Efesin 5:15, 16) Ikun taʼ ġid għalihom jekk isegwu t-​twissija taʼ Pawlu: “Ħuti, araw li f’ebda wieħed minnkom ma jkun hemm qalb imħassra bin-​nuqqas taʼ twemmin li jwassal għall-​firda minn Alla l-​ħaj. Imma agħmlu l-​qalb lil xulxin kull jum, sakemm inkunu għadna nistgħu ngħidu ‘illum’, biex ħadd minnkom ma jiġġarraf mid-​dnub u jwebbes qalbu.”—Lhud 3:12, 13.

21. Liema stqarrija taʼ ferħ ittemm l-​ewwel parti minn Isaija kapitlu 49?

²¹ Hekk kif l-​espressjonijiet profetiċi bejn Jehovah u l-​Messija tiegħu jiġu fi tmiem, Isaija jlissen stqarrija taʼ ferħ: “Għannu, o smewwiet, aqbeż bil-​ferħ, o art, infexxu fl-​għana, o muntanji! Għax farraġ il-​Mulej lill-​poplu tiegħu; u ħenn għall-​imsejknin tiegħu!” (Isaija 49:13) Xi  kliem sabiħ taʼ faraġ għall-​Iżraelin tal-​qedem u għal Ġesù Kristu, il-​Qaddej il-​kbir taʼ Jehovah, kif ukoll għall-​qaddejja midlukin taʼ Jehovah u sħabhom in-​“nagħaġ oħra” llum!—Ġwann 10:16.

Jehovah Ma Jinsiehx lill-​Poplu Tiegħu

22. Jehovah kif jenfasizza li qatt ma se jinsieh lill-​poplu tiegħu?

²² Isaija issa jkompli jirrapporta d-​dikjarazzjonijiet taʼ Jehovah. Hu jbassar li l-​Iżraelin eżiljati se juru t-​tendenza li jgħajjew u jitilfu kull tama. Jgħid Isaija: “Sijon kienet tgħid: ‘Ħallieni l-​Mulej,’ u: ‘Sidi nsieni.’” (Isaija 49:14) Huwa minnu dan? Ħallieh u nsieh Jehovah lill-​poplu tiegħu? Waqt li jaġixxi bħala l-​kelliemi taʼ Jehovah, Isaija jkompli: “Tistaʼ mara tinsa t-​tarbija tagħha, u ma tħennx għal bin ġufha? Mqar jekk din tinsa, jien ma ninsiek qatt!” (Isaija 49:15) X’risposta mimlija mħabba mingħand Jehovah! L-​imħabba li għandu Alla għall-​poplu tiegħu hija akbar minn dik taʼ omm għat-​tarbija tagħha. Hu jaħseb il-​ħin kollu dwar dawk li huma leali lejh. Jiftakarhom bħallikieku ismijiethom kienu minquxin fuq idejh: “Ara! Naqqaxtek fuq il-​keffa taʼ jdejja; ħitanek dejjem quddiemi.”—Isaija 49:16.

23. Pawlu kif inkuraġġiehom lill-​Kristjani biex ikunu fiduċjużi li Jehovah ma jinsihomx?

²³ Fl-​ittra li kiteb lill-​Galatin, l-​appostlu Pawlu ħeġġeġ lill-​Kristjani: “Ma negħjew qatt nagħmlu l-​ġid; għax jekk ma naqtgħux qalbna, naħsdu fi żmienu.” (Galatin 6:9) Lil-​Lhud kitbilhom il-​kliem inkuraġġanti: “Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu.” (Lhud 6:10) Qatt m’għandna nħossu li Jehovah nesa lill-​poplu tiegħu. Bħal Sijon tal-​qedem, il-​Kristjani għandhom raġun jithennew u jistennew bil-​paċenzja lil Jehovah. Hu ma jerġax  lura minn kelmtu rigward dak li stqarr u li wiegħed fil-​patt tiegħu.

24. Sijon b’liema mod se tiġi stabbilita mill-​ġdid, u liema mistoqsijiet se tistaqsi?

²⁴ Permezz taʼ Isaija, Jehovah joffri iktar faraġ. M’għadhomx iktar taʼ theddida dawk li qegħdin ‘iġarrfu lil Sijon,’ sew jekk huma l-​Babiloniżi u sew jekk huma l-​Lhud apostati. “Il-​bennejja” taʼ Sijon, Lhud eżiljati li jibqgħu leali lejn Jehovah, “ġejjin mgħaġġla.” Se ‘jinġabru’ flimkien. Wara li jkunu marru bl-​għaġla lura lejn Ġerusalemm, il-​Lhud li jinsabu mill-​ġdid f’art twelidhom se jkunu ornamenti taʼ tiżjin għall-​belt kapitali tagħhom, sewwa sew bħalma “għarusa” “tiżżejjen” bi lbies sabiħ. (Isaija 49:17, 18) Il-​postijiet taʼ Sijon saru ‘ħerba.’ Immaġina kif se tissorprendi ruħha meta ħabta u sabta  tant ikollha nies fiha li l-​post fejn tgħammar hi se jkun qisu djieq. (Aqra Isaija 49:19, 20.) Naturalment, hi tistaqsi minfejn ġejjin dawn l-​ulied kollha: “Mbagħad int tgħid f’qalbek ‘Min welidli ’l dawn, meta jien bla tfal, ħawlija, kont ilsira u mitluqa? Min rabbihomli? Ara! Jien kont bqajt waħdi. Minn fejn ġew dawn?’” (Isaija 49:21) X’sitwazzjoni hienja għal Sijon li qabel kienet bla tfal!

25. Iżrael spiritwali liema tiġdid esperjenza fi żmienna?

²⁵ Dan il-​kliem jitwettaq ukoll fi żmienna. Fis-​snin diffiċli taʼ l-​ewwel gwerra dinjija, Iżrael spiritwali esperjenza perijodu li fih kien imħarbat u mjassar. Imma ġie stabbilit mill-​ġdid u sab ruħu f’ġenna spiritwali. (Isaija 35:1-10) Ġralu bħal dik il-​belt li darba kienet imħarbta, li ddeskriva Isaija. Kemm tgħaxxaq Iżrael spiritwali meta sab ruħu miżgħud b’adoraturi ferrieħa u attivi taʼ Jehovah!

“Sinjal lill-​Ġnus”

26. Jehovah liema direzzjoni jipprovdi għall-​poplu meħlus tiegħu?

²⁶ B’mod profetiku, Jehovah issa jieħu lil Isaija lejn iż-​żmien meta n-​nies Tiegħu se jkunu meħlusin minn Babilonja. Se jirċievu huma xi direzzjoni divina? Iwieġeb Jehovah: “Arawni! Se nagħti sinjal lill-​ġnus, u ngħolli l-​istendard tiegħi għall-​popli, u jġibu s-​subjien tiegħek fuq dirgħajhom, u l-​bniet tiegħek iġorruhom fuq spallejhom.” (Isaija 49:22) Fit-​twettiq tal-​bidu, Ġerusalemm, il-​post fejn kien ċentrat il-​gvern u fejn kien hemm it-​tempju taʼ Jehovah, issir is-​“sinjal” taʼ Jehovah. Anki nies prominenti u setgħana taʼ ġnus oħrajn, bħalma huma “s-​slaten” u “l-​irġejjen,” jassistu lill-​Iżraelin fil-​vjaġġ tagħhom lura hemmhekk. (Isaija 49:23a) Fost dawn li jagħtu l-​għajnuna hemm is-​slaten Persjani Ċiru  u Artasersi Longimanu u n-​nies taʼ darhom. (Esdra 5:13; 7:11-26) U kliem Isaija japplika wkoll xi mkien ieħor.

27. (a) Fit-​twettiq akbar, il-​popli lejn liema “sinjal” se jiġu bi ħġarhom? (b) X’se jkun ir-​riżultat meta l-​ġnus kollha se jiġu mġagħlin ibaxxu rashom għall-​ħakma tal-​Messija?

²⁷ Isaija 11:10 jitkellem dwar “sinjal għall-​popli.” L-​appostlu Pawlu applika dan il-​kliem għal Kristu Ġesù. (Rumani 15:8-12) Għaldaqstant, fit-​twettiq akbar, Ġesù u l-​ħakkiema sħabu midlukin bl-​ispirtu huma s-​“sinjal” taʼ Jehovah li lejh jiġu l-​popli bi ħġarhom. (Apokalissi 14:1) Meta jasal il-​waqt, il-​popli kollha taʼ l-​art, saħansitra l-​ħakkiema taʼ llum, se jkollhom ibaxxu rashom għall-​ħakma tal-​Messija. (Salm 2:10, 11; Danjel 2:44) X’se jkun ir-​riżultat? Jgħid Jehovah: “Int tkun taf li jien il-​Mulej, li min jittama fija, ma jitħawwadx.”—Isaija 49:23b.

Issa “s-​Salvazzjoni Tagħna Hi Eqreb”

28. (a) Jehovah b’liema kliem jerġaʼ jassigura lin-​nies tiegħu li se jinħelsu? (b) Jehovah liema wegħda għad għandu rigward il-​poplu tiegħu?

²⁸ Xi wħud minn dawk li jinsabu eżiljati f’Babilonja għandhom mnejn jistaqsu, ‘Huwa tassew possibbli li Iżrael se jinħeles?’ Jehovah jqis din il-​mistoqsija u jistaqsi: “Tistaʼ tittieħed il-​priża minn id il-​qawwi? jew jinħelsu l-​ilsiera minn id it-​tirann?” (Isaija 49:24) Ir-​risposta hi iva. Jehovah jassigurahom: “Iva! Jittieħdu l-​ilsiera minn id il-​qawwi; il-​priża tat-​tirann tinħeles.” (Isaija 49:25a) X’assiguranza taʼ faraġ! Iktar minn hekk, minbarra li juri rieda tajba lejn in-​nies tiegħu, Jehovah jwegħedhom b’mod solenni li jipproteġihom. Hu jgħidilhom ċar u tond: “Jiena stess neħodha maʼ dawk li ħaduha miegħek, u jiena stess insalva lil uliedek.” (Isaija 49:25b) Din il-​wegħda għadha tgħodd. Bħalma nsibu f’Żakkarija 2:12 [2:8, NW], Jehovah jgħid lill-​poplu tiegħu: ‘Min  imiss lilkom imiss il-​mimmi t’għajnejja.’ Huwa minnu li aħna issa ngawdu perijodu taʼ rieda tajba li matulu l-​popli taʼ l-​art għandhom l-​opportunità li jmorru bi ħġarhom lejn Sijon spiritwali. Madankollu, dan il-​perijodu taʼ rieda tajba se jintemm.

29. Liema prospett ikrah hemm jistenna lil dawk li jirrifjutaw li jobdu lil Jehovah?

²⁹ X’se jiġrilhom dawk li b’ras iebsa jirrifjutaw li jobdu lil Jehovah u li saħansitra jippersegwitaw lil dawk li jqimuh? Hu jgħid: “U ’l dawk li ħaqruk inġagħalhom jieklu laħamhom stess, u jiskru b’demmhom bħal bl-​inbid ġdid.” (Isaija 49:26a) Xi prospett ikrah! Dawn l-​opponenti rashom iebsa m’għandhomx futur fit-​tul. Se jinqerdu. B’hekk, kemm billi jsalva lin-​nies tiegħu u kemm billi jeqred lill-​għedewwa tagħhom, Jehovah se jkun jidher li hu Salvatur. “Kull bniedem ikun jaf li jien il-​Mulej, il-​Ħellies tiegħek, il-​Feddej tiegħek, il-​Qawwi taʼ Ġakobb.”—Isaija 49:26b.

30. Jehovah liema atti taʼ salvazzjoni wettaq għan-​nom tal-​poplu tiegħu, u x’għad irid jagħmel?

³⁰ Dan il-​kliem applika l-​ewwel darba meta Jehovah uża lil Ċiru biex jeħles lill-​poplu Tiegħu mill-​jasar f’Babilonja. Applika bl-​istess mod fl-​1919 meta Jehovah uża lil Ibnu, Ġesù Kristu, li ngħata t-​tron biex jeħles lill-​poplu Tiegħu mill-​jasar spiritwali. Għaldaqstant, il-​Bibbja titkellem kemm dwar Jehovah u kemm dwar Ġesù bħala li huma salvaturi. (Titu 2:11-13; 3:4-6) Jehovah hu s-​Salvatur tagħna, u Ġesù, il-​Messija, hu l-​Aġent Ewlieni tiegħu. (Atti 5:31) Tabilħaqq, l-​atti taʼ salvazzjoni minn Alla permezz taʼ Ġesù Kristu huma meraviljużi. Permezz taʼ l-​aħbar tajba, Jehovah jeħles lil dawk taʼ qalb retta mill-​jasar tar-​reliġjon falza. Permezz tas-​sagrifiċċju li tħallas bħala prezz tal-​fidwa, hu jeħlishom mill-​jasar  tad-​dnub u l-​mewt. Fis-​sena 1919 hu ħeles lil ħut Ġesù mill-​jasar spiritwali. U fil-​gwerra t’Armageddon li riesqa bl-​għaġla, hu se jeħles lil kotra kbira taʼ bnedmin leali mill-​qerda li se tiġi fuq il-​midinbin.

31. Il-​Kristjani kif għandhom jirreaġixxu għall-​fatt li jistgħu jgawdu r-​rieda tajba t’Alla?

³¹ Għalhekk, xi privileġġ dan li nistgħu ngawdu r-​rieda tajba t’Alla! Jalla lkoll kemm aħna nużaw b’mod għaqli dan iż-​żmien aċċettabbli. U jalla naġixxu f’armonija maʼ l-​urġenza taʼ żminijietna, billi nagħtu kas il-​kliem taʼ Pawlu lir-​Rumani: “Intom tafu f’liema żmien qegħdin. Waslet is-​siegħa li intom tqumu min-​ngħas; għax is-​salvazzjoni tagħna hi eqreb minn meta bdejna nemmnu. Il-​lejl għoddu għadda, u qorob il-​jum. Inwarrbu mela l-​għemil tad-​dlam u nilbsu l-​armi tad-​dawl. Ngħixu kif jixraq, bħal f’binhar; mhux bl-​ikel iż-​żejjed u s-​sokor, mhux biż-​żína u t-​tbahrid, mhux bil-​ġlied u l-​għira. Imma ilbsu lil Sidna Ġesù Kristu u ħallukom mill-​ħsieb tal-​ġisem u l-​ġibdiet tiegħu.”—Rumani 13:11-14.

32. In-​nies t’Alla liema assiguranzi għandhom?

³² Jehovah se jkompli jiffavorixxi lil dawk li jagħtu kas il-​pariri tiegħu. Se jipprovdilhom is-​saħħa u l-​abbiltajiet meħtiġin biex iwettqu l-​ippridkar taʼ l-​aħbar tajba. (2 Korintin 4:7) Jehovah se juża lill-​qaddejja tiegħu bħalma juża lil Ġesù, il-​Mexxej tagħhom. Fommhom se jagħmilhulhom bħal “xabla misnuna” sabiex ikunu jistgħu jilħqu l-​qlub tal-​ġwejdin bil-​messaġġ taʼ l-​aħbar tajba. (Mattew 28:19, 20) Hu se jipproteġi lin-​nies tiegħu “taħt id-​dell taʼ idu.” Bħal “vleġġa” tleqq, huma se jiġu misturin “fil-​barżakka tiegħu.” Tabilħaqq, Jehovah mhux se jabbandunah lill-​poplu tiegħu!—Salm 94:14; Isaija 49:2, 15.

[Nota taʼ taħt]

[Mistoqsijiet taʼ Studju]

 [Stampa f’paġna 139]

Il-​Messija hu bħal “vleġġa” tleqq fil-​barżakka taʼ Jehovah

[Stampa f’paġna 141]

Il-​Messija kien u għadu “dawl għall-​ġnus”

[Stampa f’paġna 147]

L-​imħabba li għandu Alla għall-​poplu tiegħu hija akbar minn dik taʼ omm għat-​tarbija tagħha