Kapitlu Sbatax

Barranin Miġburin fid-​Dar t’Alla għat-​Talb

Isaija 56:1-12

1, 2. Liema aħbar kommoventi ngħatat fl-​1935, u din kienet parti minn liema ħaġa?

 NHAR il-​Ġimgħa, 31 taʼ Mejju, 1935, Joseph F. Rutherford indirizza lil folla li kienet miġbura f’konvenzjoni li saret f’Washington, D.C. Hu ddiskuta l-​identità tal-​“folla kbira,” jew “kotra kbira,” li l-​appostlu Ġwanni ra fil-​viżjoni. Fil-​quċċata tat-​taħdita tiegħu, Ħuna Rutherford staqsa: “Jistgħu jekk jogħġobhom dawk kollha li għandhom it-​tama li jgħixu għal dejjem fuq l-​art iqumu bil-​wieqfa?” Skond wieħed minn dawk li kienu hemm, “iktar minn nofs l-​udjenza qamet bil-​wieqfa.” Imbagħad il-​kelliemi qal: “Ara! Il-​kotra kbira!” Waħda oħra li kienet preżenti tiftakar: “Għall-​ewwel kien hemm is-​skiet, imbagħad għajta taʼ ferħ, u ċ-​ċapċip kien qawwi ħafna u fit-​tul.”—Rivelazzjoni 7:9; King James Version.

² Dan kien mument storiku fit-​twettiq, li għadu għaddej, taʼ profezija li nkitbet xi 2,700 sena qabel u li tidher fil-​Bibbji tagħna bħala Isaija kapitlu 56. Bħalma huwa l-​każ taʼ ħafna profeziji oħrajn fil-​ktieb taʼ Isaija, din il-​profezija fiha kemm wegħdi li jfarrġu kif ukoll twissijiet ibsin. Fl-​ewwel applikar tagħha, tiġi indirizzata lill-​poplu f’patt m’Alla taʼ żmien Isaija stess, imma t-​twettiq tagħha jestendi matul is-​sekli sa żmienna.

 Dak li Hu Meħtieġ għas-​Salvazzjoni

3. Jekk il-​Lhud ifittxu s-​salvazzjoni mingħand Alla, x’iridu jagħmlu?

³ Isaija kapitlu 56 jibda bi twissija lil-​Lhud. Madankollu, l-​adoraturi veri kollha għandhom jagħtu kas dak li jikteb il-​profeta. Naqraw: “Dan jgħid il-​Mulej: ‘Żommu s-​sewwa u agħmlu l-​ġustizzja, għax is-​salvazzjoni tiegħi għoddha waslet, u l-​ġustizzja tiegħi dalwaqt tfeġġ. Hieni r-​raġel li jagħmel dan, u l-​bniedem li jżomm sħiħ fih, iħares is-​Sibt u ma jiksrux, u jżomm idu ’l bogħod mill-​għemil ħażin.’” (Isaija 56:1, 2) L-​abitanti taʼ Ġuda li jfittxu s-​salvazzjoni mingħand Alla jridu jobdu l-​Liġi Mosajka, billi josservaw il-​ġustizzja u jgħixu ħajja taʼ tjieba. Għala? Għaliex Jehovah nnifsu kollu tjieba. Dawk li jimxu fit-​triq tat-​tjieba jgawdu l-​hena li jiġi milli jkollhom il-​favur taʼ Jehovah.—Salm 144:15b.

4. Għala huwa importanti f’Iżrael li wieħed iħares is-​Sabat?

⁴ Il-​profezija tenfasizza li wieħed għandu jħares is-​Sabat għaliex is-​Sabat huwa karatteristika importanti tal-​Liġi Mosajka. Tabilħaqq, waħda mir-​raġunijiet għala l-​abitanti taʼ Ġuda eventwalment imorru fl-​eżilju hija l-​fatt li ttraskuraw is-​Sabat. (Levitiku 26:34, 35; 2 Kronaki 36:20, 21) Is-​Sabat huwa sinjal tar-​relazzjoni speċjali li teżisti bejn Jehovah u l-​Lhud, u dawk li jħarsu s-​Sabat juru li japprezzawha din ir-​relazzjoni. (Eżodu 31:13) Iżjed minn hekk, li jħarsu s-​Sabat kien se jfakkar lin-​nies taʼ żmien Isaija li Jehovah hu l-​Ħallieq. Kien ifakkarhom ukoll fil-​ħniena li kien jurihom. (Eżodu 20:8-11; Dewteronomju 5:12-15) Fl-​aħħarnett, li jħarsu s-​Sabat kien se jipprovdi arranġament regulari u organizzat f’dik li hi qima lejn Jehovah. Il-​fatt li jistrieħu darba fil-​ġimgħa mix-​xogħol regulari tagħhom kien se jagħti opportunità lill-​abitanti taʼ Ġuda biex jitolbu, jistudjaw, u jimmeditaw.

5. Fil-​prinċipju, il-​Kristjani kif jistgħu japplikaw il-​parir biex iħarsu s-​Sabat?

 ⁵ Iżda, xi ngħidu għall-​Kristjani? Japplika għalihom l-​inkuraġġiment li jħarsu s-​Sabat? Mhux direttament, ladarba l-​Kristjani m’humiex taħt il-​Liġi, u għalhekk m’humiex obbligati li jħarsu s-​Sabat. (Kolossin 2:16, 17) Xorta waħda, l-​appostlu Pawlu spjega li hemm “mistrieħ tas-​Sibt” għall-​Kristjani leali. Dan il-​“mistrieħ tas-​Sibt” jinvolvi li l-​individwu juri fidi fis-​sagrifiċċju li Ġesù ħallas bħala prezz tal-​fidwa għas-​salvazzjoni u li ma jibqax jistrieħ fuq l-​opri biss. (Lhud 4:6-10) Għaldaqstant, il-​kliem tal-​profezija taʼ Isaija rigward is-​Sabat ifakkar lill-​qaddejja taʼ Jehovah llum kemm huwa vitali li jkollhom fidi fl-​arranġament t’Alla għas-​salvazzjoni. Ifakkarhom ukoll kemm għandhom bżonn jikkultivaw relazzjoni mill-​qrib maʼ Jehovah u li jkunu regulari u konsistenti fil-​qima tagħhom.

Faraġ għall-​Barrani u għall-​Ewnuku

6. Liema żewġ gruppi issa jingħataw l-​attenzjoni?

⁶ Jehovah issa jindirizza lil żewġ gruppi li jridu jaqduh imma li taħt il-​Liġi Mosajka jinżammu milli jidħlu fil-​kongregazzjoni Lhudija. Naqraw: “[Ħa] ma jgħidx il-​frustier li jintrabat mal-​Mulej: ‘Se jifridni l-​Mulej mill-​poplu tiegħu.’ Ma jgħidx l-​ewnuku: ‘Arawni, jiena siġra niexfa!’” (Isaija 56:3) Il-​frustier, jew il-​barrani, qed jibżaʼ li se jinqataʼ minn maʼ Iżrael. L-​ewnuku huwa mħasseb għaliex qatt ma se jkollu tfal biex ismu jibqaʼ jissemma. Iż-​żewġ gruppi għandhom irabbu l-​kuraġġ. Qabel ma naraw għala, ejja nikkunsidraw x’inhi l-​pożizzjoni tagħhom taħt il-​Liġi f’relazzjoni mal-​ġens taʼ Iżrael.

7. Il-​Liġi liema limiti tpoġġi fuq il-​barranin f’Iżrael?

⁷ Il-​barranin mhux ċirkonċiżi ma jistgħux jieħdu sehem fil-​qima maʼ Iżrael. Per eżempju, ma jitħallewx  jieklu mill-​ħaruf tal-​Qbiż. (Eżodu 12:43) Il-​barranin li ma jiksrux il-​liġijiet tal-​pajjiż bħallikieku bi sfida jgawdu l-​ġustizzja u l-​ospitalità, imma m’għandhomx rabtiet permanenti mal-​ġens. M’għandniex xi ngħidu, xi wħud iħaddnu l-​Liġi bis-​sħiħ, u bħala sinjal taʼ dan, l-​irġiel isiru ċirkonċiżi. B’hekk isiru proseliti bil-​privileġġ li jqimu fil-​bitħa tad-​dar taʼ Jehovah u jitqiesu bħala parti mill-​kongregazzjoni taʼ Iżrael. (Levitiku 17:10-14; 20:2; 24:22) Madankollu, anki l-​proseliti ma jipparteċipawx bis-​sħiħ fil-​patt taʼ Jehovah maʼ Iżrael, u m’għandhomx wirt fl-​Art Imwiegħda. Barranin oħrajn jistgħu jduru lejn it-​tempju biex jitolbu, u milli jidher jistgħu joffru sagrifiċċji permezz tas-​saċerdozju sakemm is-​sagrifiċċji jkunu jaqblu mal-​Liġi. (Levitiku 22:25; 1 Slaten 8:41-43) Imma l-​Iżraelin m’għandhomx jassoċjaw mill-​qrib magħhom.

L-​Ewnuki Jirċievu Isem għal Dejjem

8. (a) Fil-​Liġi, kif kienu jitqiesu l-​ewnuki? (b) L-​ewnuki kif kienu jintużaw fi ġnus pagani, u kultant il-​kelma “ewnuku” għalxiex tistaʼ tirreferi?

⁸ L-​ewnuki, anki jekk il-​ġenituri tagħhom ikunu Lhud, jiġu miċħudin sħubija sħiħa mal-​ġens taʼ Iżrael. a (Dewteronomju 23:2 [23:1, NW]) Fost xi ġnus pagani taʼ żminijiet Bibliċi, l-​ewnuki kellhom post speċjali u kienet id-​drawwa li ftit mit-​tfal li jittieħdu fil-​jasar fil-​gwerra jiġu kastrati. L-​ewnuki kienu jinħatru bħala uffiċjali  fil-​palazzi rjali. Ewnuku setaʼ jkun “inkarigat min-​nisa,” “inkarigat mill-​konkubini,” jew qaddej tas-​sultana. (Ester 2:3, 12-15; 4:4-6, 9) M’hemm ebda evidenza li l-​Iżraelin segwew dawn il-​prattiċi jew li l-​ewnuki kienu mfittxijin b’mod speċjali għal impjieg fis-​servizz tas-​slaten Iżraelin. b

9. Jehovah liema kliem taʼ konsolazzjoni jgħid lill-​ewnuki fiżiċi?

⁹ Minbarra li jistgħu jieħdu sehem b’mod limitat biss fil-​qima taʼ dak Alla veru, l-​ewnuki fiżiċi f’Iżrael isofru umiljazzjoni kbira għax ma jistgħux ikollhom tfal biex l-​isem tal-​familja tagħhom jibqaʼ minn ġenerazzjoni għal oħra. Kemm hu taʼ faraġ, għalhekk, il-​kliem li jmiss tal-​profezija! Naqraw: “Dan jgħid il-​Mulej: ‘Għall-​ewnuki li jħarsu Sibtijieti, u jagħżlu dak li jogħġob lili, u jżommu sħiħ fil-​patt tiegħi, jiena nagħtihom f’dari u swari, nagħtihom monument u isem, xi ħaġa aħjar minn subjien u bniet; nagħtihom isem għal dejjem, li ma jitħassar qatt.’”—Isaija 56:4, 5.

10. Is-​sitwazzjoni taʼ l-​ewnuki meta nbidlet, u minn dakinhar ’l hawn liema privileġġ kien miftuħ għalihom?

¹⁰ Iva, se jasal iż-​żmien meta li wieħed ikun saħansitra ewnuku fiżiku ma jitqiesx iktar bħala impediment biex jiġi aċċettat bis-​sħiħ bħala l-​qaddej taʼ Jehovah. Jekk ikunu ubbidjenti, l-​ewnuki se jkollhom “monument,” jew post, fid-​dar taʼ Jehovah u isem, aħjar minn ulied subien u bniet. Meta jseħħ dan? Mhux qabel ma jkun miet Ġesù Kristu. F’dak iż-​żmien il-​patt il-​ġdid jieħu post il-​patt il-​qadim tal-​Liġi, u l-​“Iżrael taʼ Alla” jieħu post Iżrael tal-​laħam. (Galatin 6:16) Minn  dakinhar ’l hawn, dawk kollha li juru fidi setgħu jqimu lil Alla b’mod aċċettabbli. Id-​distinzjonijiet bejn in-​nies u l-​kundizzjoni fiżika m’għadhomx jgħoddu. Dawk li jissaportu fedelment, hu x’inhu l-​istat fiżiku tagħhom, se jkollhom “isem għal dejjem, li ma jitħassar qatt.” Jehovah mhux se jinsiehom. Ismijiethom se jkunu miktubin fi “ktieb it-​tifkiriet” tiegħu. Fiż-​żmien stabbilit minn Alla, dawn se jirċievu ħajja taʼ dejjem.—Malakija 3:16; Proverbji 22:1; 1 Ġwann 2:17.

Barranin Iqimu mal-​Poplu t’Alla

11. Biex jirċievu l-​barkiet, il-​barranin x’inhuma inkuraġġiti jagħmlu?

¹¹ Iżda, xi ngħidu għall-​barranin? Il-​profezija issa terġaʼ tirreferi għal dawn, u Jehovah għandu kliem taʼ faraġ kbir għalihom. Jikteb Isaija: “Ulied il-​frustier li ntrabtu mal-​Mulej biex jaqduh, u biex iħobbu isem il-​Mulej, u jkunu qaddejja tiegħu, kull min iħares is-​Sibt u ma jiksrux u jżomm sħiħ fil-​patt tiegħi, lil dawn inwassalhom sal-​muntanja mqaddsa tiegħi, u nferraħhom f’dar it-​talb tiegħi; il-​vittmi maħruqa u s-​sagrifiċċji tagħhom ikunu jogħġbuni telgħin minn fuq l-​artal tiegħi, għax dari ‘dar it-​talb’ tissejjaħ għall-​popli kollha.”—Isaija 56:6, 7.

12. Kif kienu jifhmuha qabel il-​profezija taʼ Ġesù dwar in-​“nagħaġ oħra”?

¹² Fi żmienna l-​barranin bdew jidhru bil-​mod il-​mod. Qabel l-​ewwel gwerra dinjija, kien mifhum li n-​numru taʼ individwi li kienu se jirċievu s-​salvazzjoni kien akbar min-​numru taʼ dawk li kellhom it-​tama li jaħkmu fis-​sema maʼ Ġesù—dawk li llum nirrikonoxxuhom bħala l-​Iżrael t’Alla. L-​istudenti tal-​Bibbja kienu konxji tal-​kliem taʼ Ġesù li nsibu fi Ġwann 10:16: “Għandi wkoll nagħaġ oħra, li m’humiex minn dan il-​maqjel; lilhom ukoll jeħtieġ li niġbor, u huma jisimgħu leħni, u  jkun hemm merħla waħda, ragħaj wieħed.” Kienu jifhmu li dawn in-​“nagħaġ oħra” huma klassi taʼ l-​art. Imma l-​biċċa l-​kbira mill-​istudenti tal-​Bibbja emmnu li n-​nagħaġ oħra kienu se jidhru matul ir-​Renju Millennjali taʼ Ġesù Kristu.

13. Għala ġie raġunat li n-​nagħaġ taʼ Mattew kapitlu 25 iridu jidhru matul l-​aħħar jiem taʼ din is-​sistema t’affarijiet?

¹³ Maż-​żmien, sar progress f’dik li hi fehma dwar skrittura relatata li titkellem dwar in-​nagħaġ. F’Mattew kapitlu 25 insibu r-​rakkont tal-​parabbola taʼ Ġesù dwar in-​nagħaġ u l-​mogħoż. Skond din il-​parabbola, in-​nagħaġ jirċievu ħajja taʼ dejjem għaliex jappoġġaw lil ħut Ġesù. Għaldaqstant, huma klassi separata u distinta mill-​aħwa midlukin taʼ Kristu. Fis-​sena 1923, waqt konvenzjoni li saret f’Los Angeles, Kalifornja, fl-​Istati Uniti taʼ l-​Amerika, ġie spjegat li dawn in-​nagħaġ iridu jidhru matul l-​aħħar jiem taʼ din is-​sistema t’affarijiet u mhux matul il-​Millennju. Għala? Għaliex Ġesù ta l-​parabbola bħala parti mit-​tweġiba tiegħu għall-​mistoqsija: “Dan meta għad jiġri? U x’se jkun is-​sinjal tal-​miġja tiegħek u taʼ tmiem id-​dinja?”—Mattew 24:3.

14, 15. Kif sar il-​progress f’dik li hi fehma dwar il-​pożizzjoni tan-​nagħaġ oħra fiż-​żmien taʼ l-​aħħar?

¹⁴ Matul is-​snin 20 tas-​seklu l-​ieħor, xi individwi li kienu mseħbin maʼ l-​Istudenti tal-​Bibbja bdew iħossu li l-​ispirtu taʼ Jehovah ma kienx qed jixhdilhom li kienu msejħin għas-​sema. Madankollu, kienu qaddejja żelużi taʼ dak Alla l-​Iktar Għoli. Fl-​1931 il-​pożizzjoni tagħhom kienet mifhuma aħjar meta ġie pubblikat il-​ktieb Vindication. Bħala parti minn diskussjoni vers b’vers tal-​ktieb Bibliku taʼ Eżekjel, il-​ktieb Vindication spjega l-​viżjoni tar-​“raġel” li għandu l-​qarn tal-​linka biex jikteb. (Eżekjel 9:1-11) Dan “ir-​raġel” jidher għaddej minn  Ġerusalemm jimmarka fuq ġbinhom lil dawk li qegħdin jitniehdu u jitbikkew minħabba l-​qżiżijiet kollha li qed isiru hemmhekk. “Ir-​raġel” jirrappreżenta lil ħut Ġesù, il-​membri tal-​fdal tal-​Kristjani midlukin li jkunu ħajjin fuq l-​art matul iż-​żmien taʼ ġudizzju fuq il-​Kristjaneżmu, li hu ffigurat minn Ġerusalemm. Dawk li jiġu mmarkati huma n-​nagħaġ oħra li jkunu ħajjin matul dan iż-​żmien. Fil-​viżjoni dawn jiġu meħlusin meta l-​esekuturi taʼ Jehovah jġibu vendetta fuq din il-​belt apostata.

¹⁵ Fis-​sena 1932 fehma iktar profonda dwar id-​dramm profetiku tas-​Sultan Ġeħu taʼ Iżrael u Ġeħonadab, li kien jappoġġah għalkemm ma kienx Iżraeli, uriet kif jaġixxu dawn in-​nagħaġ oħra biex jappoġġaw lill-​aħwa midlukin taʼ Kristu—sewwa sew bħalma Ġeħonadab mar maʼ Ġeħu u appoġġah fil-​qerda tal-​qima lil Bagħal. Fl-​aħħarnett, fl-​1935 in-​nagħaġ oħra, li kienu ħajjin matul iż-​żmien tat-​tmiem taʼ din is-​sistema t’affarijiet, kienu rikonoxxuti bħala li huma l-​kotra kbira li tidher fil-​viżjoni li ra l-​appostlu Ġwanni. Dan kien spjegat għall-​ewwel darba fil-​konvenzjoni li ssemmiet qabel u li saret f’Washington, D.C., meta Joseph F. Rutherford ġibed l-​attenzjoni lejn dawk li għandhom it-​tama li jgħixu fuq l-​art u qal li dawn huma “l-​kotra kbira.”

16. Il-​barranin igawdu liema privileġġi u responsabbiltajiet?

¹⁶ B’hekk, bil-​mod il-​mod in-​nies t’Alla fehmu li l-​barranin għandhom parti kbira ferm x’iwettqu fl-​iskopijiet taʼ Jehovah matul dawn l-​aħħar jiem. Dawn jiġu għand l-​Iżrael t’Alla sabiex iqimu lil Jehovah. (Żakkarija 8:23) Maʼ dan il-​ġens spiritwali, huma joffru sagrifiċċji aċċettabbli lil Alla u jidħlu fil-​mistrieħ tas-​sabat. (Lhud 13:15, 16) Iktar minn hekk, huma jqimu fit-​tempju spiritwali t’Alla li, bħat-​tempju li kien hemm  Ġerusalemm, huwa “dar it-​talb għall-​ġnus kollha.” (Mark 11:17) Huma jeżerċitaw fidi fis-​sagrifiċċju li Ġesù Kristu ħallas bħala prezz tal-​fidwa, billi ‘jaħslu l-​ilbiesi tagħhom u jbajduhom fid-​demm tal-​Ħaruf.’ U huma jaqdu lil Jehovah l-​ħin kollu, billi jagħtuh servizz sagru lejl u nhar.—Apokalissi 7:14, 15.

17. Il-​barranin taʼ żmienna kif iżommu sħiħ fil-​patt il-​ġdid?

¹⁷ Dawn il-​barranin taʼ żmienna jżommu sħiħ fil-​patt il-​ġdid fis-​sens li, billi jassoċjaw maʼ l-​Iżrael t’Alla, huma jgawdu benefiċċji u barkiet li jiġu permezz tal-​patt il-​ġdid. Waqt li ma jipparteċipawx f’dan il-​patt, huma jissottomettu ruħhom b’qalbhom kollha għal-​liġijiet  assoċjati miegħu. B’hekk il-​liġi taʼ Jehovah qiegħda f’qalbhom, u huma jsiru jafu lil Jehovah bħala Missierhom tas-​sema u s-​Sovran suprem.—Ġeremija 31:33, 34; Mattew 6:9; Ġwann 17:3.

18. Liema xogħol taʼ ġbir qed jitwettaq matul iż-​żmien taʼ l-​aħħar?

¹⁸ Tkompli l-​profezija taʼ Isaija: “Oraklu taʼ Sidi l-​Mulej, li jiġbor l-​imxerrdin taʼ Iżrael; ‘Nissokta niġbor l-​itturufnati tiegħu flimkien maʼ dawk li diġà ġbart.’” (Isaija 56:8) Matul iż-​żmien taʼ l-​aħħar, Jehovah ġabar “l-​imxerrdin taʼ Iżrael,” il-​membri tal-​fdal midluk. Iżjed minn hekk, qed jiġbor lil oħrajn, dawk tal-​kotra kbira. Dawn iqimu flimkien fis-​sliem u f’unità taħt il-​ħarsien taʼ Jehovah u taʼ Kristu Ġesù, is-​Sultan tiegħu fuq it-​tron. Minħabba l-​lealtà tagħhom lejn il-​gvern taʼ Jehovah bi Kristu, ir-​Ragħaj mill-​Aħjar għamilhom merħla magħquda u ferriħija.

Għassiesa Għomja, Klieb Muti

19. Liema stedina ssirilhom lill-​annimali salvaġġi tar-​rabaʼ u tal-​foresta?

¹⁹ Il-​kliem t’hawn fuq li jibni u li ġej mill-​qalb jiġi segwit minn kuntrast qawwi li kważi jaħsdek. Jehovah hu lest li jaġixxi bil-​ħniena mal-​barranin u l-​ewnuki. Imma ħafna li jsostnu li huma membri fil-​kongregazzjoni t’Alla huma kundannati u hemm ġudizzju jistenniehom. Iktar minn hekk, lanqas biss jixirqilhom difna deċenti u huma tajbin biss biex jibilgħuhom annimali li huma mejtin bil-​ġuħ. B’hekk, naqraw: “Intom bhejjem tar-​rabaʼ, ejjew kulu, intom bhejjem tal-​foresta.” (Isaija 56:9) Dawn l-​annimali salvaġġi minn xiex se jagħmlu festa? Il-​profezija se tispjegah dan. B’hekk din tistaʼ tfakkarna fit-​tmiem li hemm jistenna lil dawk li jopponu ’l Alla fil-​gwerra li ġejja t’Armageddon, li  l-​iġsma maqtulin tagħhom jitħallew biex jinbelgħu mill-​għasafar tas-​sema.—Apokalissi 19:17, 18.

20, 21. Liema nuqqasijiet jagħmlu lill-​mexxejja reliġjużi ma jiswew xejn bħala gwidi spiritwali?

²⁰ Tkompli l-​profezija: “L-​għassiesa tal-​poplu tiegħi, lkoll għomja, ma jintebħu b’xejn; lkoll klieb muti, ma jistgħux jinbħu. Jimteddu u joħolmu, ħsiebhom biex jorqdu. Huma klieb rgħiba, ma jixbgħu qatt. Dawn huma r-​rgħajja, li ma jafux jaħsbu. Qabdu triqthom ilkoll, kulħadd jaħseb għal rasu. Ejjew ħa nġibu l-​inbid, u niskru bix-​xorb qawwi. Għada jkun bħal-​lum, anzi aħjar, u ħafna aħjar.”—Isaija 56:10-12.

²¹ Il-​mexxejja reliġjużi taʼ Ġuda jgħidu li qed iqimu lil Jehovah; isostnu li huma “l-​għassiesa” tiegħu. Imma huma għomja, muti, u bi nagħas spiritwalment. Jekk ma jistgħux jibqgħu għassa u jsemmgħu t-​twissija taʼ periklu, x’jiswew? Dawn l-​għassiesa reliġjużi m’għandhomx dehen, u għalhekk m’humiex f’pożizzjoni li jagħtu direzzjoni spiritwali lin-​nies li huma bħal nagħaġ. Iktar minn hekk, huma korrotti. Għandhom xewqat egoistiċi bla xabaʼ. Minflok ma jsegwu d-​direzzjoni taʼ Jehovah, jagħmlu dak li jfettlilhom, ifittxu l-​qligħ inġust, jiskru bix-​xorb qawwi, u jinkuraġġixxu lil ħaddieħor biex jagħmel bħalhom. Tant m’humiex konxji tal-​ġudizzju li wasal t’Alla illi lin-​nies jgħidulhom li m’għandhomx għalfejn jinkwetaw.

22. Il-​mexxejja reliġjużi taʼ żmien Ġesù kif inhuma bħal dawk taʼ Ġuda tal-​qedem?

²² Iktar kmieni fil-​profezija tiegħu, Isaija uża lingwaġġ figurattiv simili biex jiddeskrivi lill-​mexxejja reliġjużi infidili taʼ Ġuda—spiritwalment fis-​sakra, bi nagħas, u bla fehma. Huma għabbew lin-​nies bi tradizzjonijiet tal-​bnedmin, tkellmu l-​gideb f’isem ir-​reliġjon, u fdaw  fl-​Assirja għall-​għajnuna minflok ma fittxew lil Alla. (2 Slaten 16:5-9; Isaija 29:1, 9-14) Jidher ċar li ma tgħallmu xejn. B’sogħba, l-​istess tip taʼ mexxejja kienu preżenti fl-​ewwel seklu. Minflok ma ħaddnu l-​aħbar tajba li ġabilhom l-​Iben t’Alla stess, dawn ċaħdu lil Ġesù u kkonfoffaw biex joqtluh. Ġesù sejħilhom bla tlaqliq “mexxejja taʼ l-​għomja,” u żied li jekk “agħma jmexxi lil agħma ieħor, it-​tnejn jaqgħu ġol-​ħofra.”—Mattew 15:14.

 Għassiesa taʼ Llum

23. Liema profezija taʼ Pietru rigward il-​mexxejja reliġjużi twettqet?

²³ L-​appostlu Pietru wissa li kienu se jqumu wkoll għalliema foloz biex jiżvijaw lill-​Kristjani, meta kiteb: “Dehru wkoll profeti foloz fost il-​poplu [taʼ Iżrael], kif għad ikun hemm għalliema foloz fostkom. Dawn idaħħlu firdiet, li jġibu l-​qerda, sa jaslu biex jiċħdu s-​Sid li għalih kisibhom u malajr iġibu l-​qerda fuqhom infushom.” (2 Pietru 2:1) X’irriżulta mit-​tagħlim falz u mis-​setet li ħolqu dawn l-​għalliema foloz? Il-​Kristjaneżmu, li l-​mexxejja reliġjużi tiegħu llum jitolbu għall-​barka t’Alla fuq il-​ħbieb politiċi tagħhom u mbagħad iwiegħdu futur mill-​isbaħ. Il-​mexxejja reliġjużi tal-​Kristjaneżmu wrew li huma għomja, muti, u bi nagħas rigward l-​affarijiet spiritwali.

24. Liema unità teżisti bejn Iżrael spiritwali u l-​barranin?

²⁴ Madankollu, Jehovah qed iġib miljuni sħaħ taʼ barranin biex iqimu maʼ l-​aħħar individwi taʼ l-​Iżrael t’Alla fid-​dar tat-​talb spiritwali u kbira tiegħu. Għalkemm ġejjin minn ħafna ġnus, razez, u lingwi, dawn il-​barranin qegħdin f’unità bejniethom u maʼ l-​Iżrael t’Alla. Huma konvinti li s-​salvazzjoni tistaʼ tiġi biss mingħand Alla Jehovah permezz taʼ Ġesù Kristu. L-​imħabba li għandhom għal Jehovah tqanqalhom biex jissieħbu maʼ l-​aħwa midlukin taʼ Kristu ħalli ma jibqgħux muti imma jitkellmu dwar il-​fidi tagħhom. U jitfarrġu profondament bil-​kliem taʼ l-​appostlu ispirat li kiteb: “Jekk inti tistqarr b’fommok, ‘Ġesù hu l-​Mulej’, u temmen b’qalbek li Alla qajjmu mill-​imwiet, inti ssalva.”—Rumani 10:9.

[Noti taʼ taħt]

[Mistoqsijiet taʼ Studju]

 [Stampa f’paġna 250]

Is-​Sabat kellu jipprovdi opportunità għal talb, studju, u meditazzjoni

[Stampi f’paġna 256]

Il-​pożizzjoni tan-​nagħaġ oħra ġiet spjegata b’mod ċar f’konvenzjoni li saret f’Washington, D.C., fl-​1935 (il-magħmudija fl-​istampa hawn taħt, il-​programm fuq il-​lemin)

[Stampa f’paġna 259]

L-​annimali salvaġġi huma mistidnin biex jiġu jagħmlu festa

 [Stampi f’paġna 261]

Il-​barranin u l-​Iżrael t’Alla huma f’unità bejniethom