Kapitlu Tmienja u Għoxrin

Dawl għall-​Ġnus

Isaija 66:15-24

1, 2. Id-​dawl għala huwa vitali, u liema xorta taʼ dlam jiksi l-​art illum?

 JEHOVAH hu s-​Sors tad-​dawl; “għamel ix-​xemx għad-​dawl binhar, il-​qamar u l-​kwiekeb b’liġijiethom għad-​dawl billejl.” (Ġeremija 31:35) Fuq din il-​bażi biss ukoll għandu jiġi rikonoxxut bħala s-​Sors tal-​ħajja, ladarba d-​dawl ifisser ħajja. Kieku l-​art ma kinitx il-​ħin kollu mdawra bis-​sħana u d-​dawl tax-​xemx, il-​ħajja kif nafuha aħna ma kinitx tkun possibbli. Il-​pjaneta tagħna ma kinitx tkun abitabbli.

² Għaldaqstant, għandna għalfejn nitħassbu li, meta ħares ’il quddiem lejn żmienna, Jehovah bassar żmien taʼ dlam, mhux taʼ dawl. Taħt ispirazzjoni, Isaija kiteb: “Ara d-​dlamijiet jiksu l-​art, u sħab iswed il-​popli.” (Isaija 60:2) M’għandniex xi ngħidu, dan il-​kliem kellu x’jaqsam mad-​dlam spiritwali, mhux letterali, imma m’għandniex nonqsu li niħduh bis-​serjetà. Il-​ħajja maż-​żmien issir impossibbli għal dawk li m’għandhomx dawl spiritwali, sewwa sew bħalma ssir impossibbli għal dawk li jiġu mċaħħdin mid-​dawl tax-​xemx.

3. F’dawn iż-​żminijiet mudlama, fejn nistgħu nduru għad-​dawl?

³ Matul dawn iż-​żminijiet mudlama, ma nistgħux ninjoraw id-​dawl spiritwali li Jehovah jagħmel disponibbli għalina. Huwa essenzjali li nfittxu l-​Kelma t’Alla biex iddawlilna l-​mogħdija tagħna, billi naqraw il-​Bibbja kuljum jekk jistaʼ jkun. (Salm 119:105) Il-​laqgħat Kristjani  jipprovdulna opportunitajiet biex ninkuraġġixxu lil xulxin ħalli nibqgħu fi “triq it-​tajbin.” (Proverbji 4:18; Lhud 10:23-25) Is-​saħħa li niksbu minn studju bil-​għaqal tal-​Bibbja u minn sħubija Kristjana bnina tgħinna nevitaw li ninbelgħu mid-​dlam taʼ dan iż-​żmien taʼ “l-​aħħar tad-​dinja,” li se jilħaq il-​quċċata tiegħu fil-​jum il-​kbir tal-​korla taʼ Jehovah. (2 Timotju 3:1; Sofonija 2:3) Dan il-​jum riesaq b’pass mgħaġġel! Dan se jiġi żgur daqskemm ġie jum simili fuq l-​abitanti taʼ Ġerusalemm tal-​qedem.

Jehovah “Jagħmel il-​Ħaqq”

4, 5. (a) Jehovah b’liema mod jiġi kontra Ġerusalemm? (b) Għala nistgħu nikkonkludu li huwa biss għadd relattivament żgħir li se jibqaʼ ħaj wara l-​qerda taʼ Ġerusalemm fis-​sena 607 Q.E.K.? (Ara n-​nota taʼ taħt.)

⁴ Fl-​aħħar versi tal-​profezija kommoventi taʼ Isaija, Jehovah jiddeskrivi b’mod ħaj il-​ġrajjiet li jwasslu għall-​jum tar-​rabja tiegħu. Naqraw: “Arawh! Ġej il-​Mulej imdawwar bin-​nar, bħal riefnu l-​imriekeb tiegħu, u jferraʼ għadbu fis-​saħna tiegħu, u jheddu bl-​ilsna tan-​nar. Għax bin-​nar il-​Mulej mill-​art kollha jagħmel il-​ħaqq, bix-​xabla tiegħu minn kull bniedem; kotra kbira joqtol il-​Mulej.”—Isaija 66:15, 16.

⁵ Dan il-​kliem għandu jgħin lin-​nies taʼ żmien Isaija jirrealizzaw kemm hi serja s-​sitwazzjoni tagħhom. Riesaq iż-​żmien meta l-​Babiloniżi, li ntużaw minn Jehovah biex jesegwixxu l-​ħaqq tiegħu, se jiġu kontra Ġerusalemm, u l-​imriekeb tagħhom se jqanqlu sħaba kbira taʼ trab preċiż bħalma jagħmel riefnu. X’dehra li tqanqal il-​biżaʼ se tkun din! Jehovah se juża lill-​invażuri biex iwettqu l-​ġudizzju jaħraq tiegħu kontra l-​‘bnedmin’ Lhud kollha li m’humiex leali. B’dan il-​mod se jkun bħallikieku Jehovah nnifsu qed jiġġieled kontra l-​poplu tiegħu. Is-​“saħna” tiegħu  mhux se tbatti. Ħafna Lhud se jaqgħu bħala ‘l-​maqtulin tal-​Mulej.’ Din il-​profezija titwettaq fis-​sena 607 Q.E.K. a

6. Liema prattiċi taʼ min jikkundannahom isiru f’Ġuda?

⁶ Għandu raġun Jehovah “jagħmel il-​ħaqq” kontra l-​poplu tiegħu? Ċertament! Bosta drabi fid-​diskussjoni tagħna dwar il-​ktieb taʼ Isaija, rajna li l-​Lhud, għalkemm suppost kienu dedikati lil Jehovah, kienu mgħaddsin fil-​qima falza—u Jehovah m’għalaqx għajnejh għal dak li għamlu. Dan narawh mill-​ġdid fil-​kliem li ġej tal-​profezija: “‘Dawk li jitqaddsu u jitnaddfu, u jmorru fil-​ġonna wara xulxin fid-​dawra tas-​sħarijiet, dawk li jieklu l-​laħam tal-​ħanżir, il-​qżiżijiet u l-​ġrieden, ilkoll jintemmu f’daqqa,’ oraklu tal-​Mulej.” (Isaija 66:17) Qegħdin dawn il-​Lhud “jitqaddsu u jitnaddfu” sabiex iħejju ruħhom għall-​qima safja? Ċertament li le. Minflok, qegħdin jieħdu sehem f’riti pagani taʼ purifikazzjoni f’ġonna speċjali. Wara dan, huma jieklu b’regħba l-​laħam tal-​ħanżir u taʼ ħlejjaq oħrajn meqjusin bħala mniġġsin taħt il-​Liġi Mosajka.—Levitiku 11:7, 21-23.

7. Il-​Kristjaneżmu kif jixbah lil Ġuda idolatruża?

⁷ X’sitwazzjoni taʼ għajb għal ġens li għamel patt maʼ l-​uniku Alla veru! Imma ikkunsidra: Sitwazzjoni daqstant taʼ għajb teżisti llum fost ir-​reliġjonijiet tal-​Kristjaneżmu. Dawn bl-​istess mod isostnu li qed jaqdu lil Alla, u ħafna mill-​mexxejja tagħhom taħsibhom xi qaddisin. Madankollu, huma jitniġġsu b’tagħlim u tradizzjonijiet  pagani, u b’hekk juru li qegħdin fi dlam spiritwali. Kemm hu tabilħaqq kbir dan id-​dlam!—Mattew 6:23; Ġwann 3:19, 20.

‘Dawn Jaraw is-​Sebħ Tiegħi’

8. (a) Kemm Ġuda kif ukoll il-​Kristjaneżmu x’se jiġrilhom? (b) Il-​ġnus f’liema sens se “jaraw is-​sebħ” taʼ Jehovah?

⁸ Jinnotahom Jehovah l-​azzjonijiet taʼ min jikkundannahom u t-​tagħlim falz tal-​Kristjaneżmu? Aqra l-​kliem li ġej taʼ Jehovah, imniżżel bil-​miktub minn Isaija, u ara x’tikkonkludi: “Jiena naf b’għemilhom u fehmithom; għad niġi niġbor il-​ġnus kollha, u l-​popli taʼ kull ilsien; dawn jiġu u jaraw is-​sebħ tiegħi.” (Isaija 66:18) Jehovah jaf u lest biex jiġġudika mhux biss ix-​xogħlijiet imma wkoll il-​ħsibijiet taʼ dawk li jgħidu li huma l-​qaddejja tiegħu. Ġuda tgħid li temmen b’Jehovah, imma x-​xogħlijiet idolatrużi u l-​prattiċi pagani tagħha juru li qed tigdeb. Huwa għalxejn li ċ-​ċittadini tagħha “jippurifikaw” lilhom infushom skond ir-​riti pagani. Il-​ġens se jsir ħerba, u meta jseħħ dan, se jkunu jistgħu jarawh b’għajnejhom il-​pajjiżi ġirien tiegħu li jqimu l-​idoli. Dawn se “jaraw is-​sebħ” taʼ Jehovah billi jkunu xhieda tal-​ġrajjiet u jkollhom jammettu li l-​kelma taʼ Jehovah seħħet. Dan kollu kif japplika għall-​Kristjaneżmu? Meta jasal fi tmiemu, ħafna minn dawk li qabel kienu l-​ħbieb u l-​imseħbin tiegħu fin-​negozju se jkollhom jieqfu u jħarsu bla ma jistgħu jagħmlu xejn hekk kif titwettaq il-​kelma taʼ Jehovah.—Ġeremija 25:31-33; Apokalissi 17:15-18; 18:9-19.

9. Jehovah liema aħbar tajba jiddikjara?

⁹ Tfisser il-​qerda taʼ Ġerusalemm fis-​sena 607 Q.E.K. li Jehovah mhux se jkollu iktar xhieda fuq l-​art? Le. Individwi li jispikkaw bħala wħud li jżommu l-​integrità, bħalma huma Danjel u t-​tliet sħabu, se jkomplu jaqdu lil Jehovah  saħansitra bħala wħud eżiljati f’Babilonja. (Danjel 1:6, 7) Iva, il-​linja taʼ xhieda leali taʼ Jehovah se tibqaʼ sħiħa, u fi tmiem is-​70 sena, irġiel u nisa leali se jitilqu minn Babilonja, jirritornaw lejn Ġuda, u jistabbilixxu mill-​ġdid il-​qima safja hemmhekk. Jehovah għal dan jalludi issa: “Jiena ngħolli għalihom sinjal, u nibgħat lil xi wħud mill-​fdal taʼ Iżrael għand il-​ġnus, f’Tarsis, Put, Lud, u Mesek, Ros, Tubal u Ġawan, u lejn ix-​xtut imbiegħda li qatt ma semgħu bija, u qatt ma raw is-​sebħ tiegħi, u huma jxandru s-​sebħ tiegħi qalb il-​ġnus.”—Isaija 66:19.

10. (a) Il-​Lhud leali li jinħelsu minn Babilonja f’liema sens se jservu bħala sinjal? (b) Illum min iservi bħala sinjal?

¹⁰ L-​għadd taʼ rġiel u nisa leali li jirritornaw lejn Ġerusalemm fis-​sena 537 Q.E.K. se jservi bħala sinjal taʼ l-​għaġeb, evidenza li Jehovah ħeles lill-​poplu tiegħu. Min kien joħlom li l-​ilsiera Lhud se jkunu xi darba ħelsin li jipprattikaw il-​qima safja fit-​tempju taʼ Jehovah? B’mod simili fl-​ewwel seklu, dawk li kienu jaqdu bħala “sinjali u għeġubijiet” kienu l-​Kristjani midlukin, li lejhom ġrew bi ħġarhom il-​ġwejdin li riedu jaqdu lil Jehovah. (Isaija 8:18; Lhud 2:13) Illum il-​Kristjani midlukin, li qed ikollhom ir-​riżq fil-​pajjiż tagħhom li reġaʼ ngħata l-​ħajja, iservu bħala sinjal taʼ l-​għaġeb fuq l-​art. (Isaija 66:8) Huma evidenza ħajja tal-​qawwa taʼ l-​ispirtu taʼ Jehovah, u qed jiġbdu lejhom lill-​ġwejdin li qlubhom iqanqluhom biex jaqdu lil Jehovah.

11. (a) Wara t-​tiġdid, kif se jiġri li nies tal-​ġnus jiġu biex jitgħallmu dwar Jehovah? (b) Żakkarija 8:23 kif twettaq l-​ewwel darba?

¹¹ Iżda, wara t-​tiġdid li seħħ fis-​sena 537 Q.E.K., nies tal-​ġnus li ma semgħux b’Jehovah kif se jsiru jafuh? Sewwa, mhux il-​Lhud leali kollha se jirritornaw lejn Ġerusalemm fi tmiem il-​jasar f’Babilonja. Xi wħud, bħal Danjel, se jibqgħu f’Babilonja. Oħrajn se jixterdu maʼ l-​erbaʼ  rkejjen taʼ l-​art. Sal-​ħames seklu Q.E.K., kien hemm Lhud imxerrdin maʼ l-​Imperu Persjan kollu. (Ester 1:1; 3:8) Bla dubju xi wħud minnhom tkellmu mal-​ġirien pagani tagħhom dwar Jehovah, għax ħafna min-​nies taʼ dawn il-​ġnus saru proseliti Lhud. Milli jidher dan kien il-​każ taʼ l-​ewnuku Etjopjan, li lilu d-​dixxiplu Kristjan Filippu ppriedka fl-​ewwel seklu. (Atti 8:26-40) Dan kollu seħħ bħala l-​ewwel twettiq tal-​kliem tal-​profeta Żakkarija: “F’dawk il-​jiem għaxart irġiel mill-​ilsna kollha tal-​ġnus jaqbdu Lhudi u jżommuh minn tarf il-​libsa tiegħu, u jgħidulu: ‘Ħa niġu magħkom, għaliex smajna li Alla magħkom!’” (Żakkarija 8:23) Tabilħaqq, Jehovah bagħtilhom id-​dawl lill-​ġnus!—Salm 43:3.

Tinġieb “Offerta lill-​Mulej”

12, 13. B’liema mod se jkun hemm ‘aħwa’ li jinġiebu lejn Ġerusalemm b’seħħ mis-​sena 537 Q.E.K.?

¹² Wara li Ġerusalemm tinbena mill-​ġdid, il-​Lhud li huma mxerrdin ’il bogħod minn arthom se jħarsu lejn il-​belt u lejn is-​saċerdozju tagħha, li twaqqaf mill-​ġdid, bħala ċ-​ċentru tal-​qima safja. Ħafna minnhom se jivvjaġġaw distanzi twal biex jattendu għall-​festi annwali hemmhekk. Taħt ispirazzjoni, Isaija jikteb: “‘Iġibu lil ħutkom kollha minn kull ġens, bħala offerta lill-​Mulej; iġibuhom fuq żwiemel u karrijiet, fuq suġġetti u bgħula u iġmla, għal fuq il-​muntanja qaddisa tiegħi, f’Ġerusalemm,’ jgħid il-​Mulej, ‘bħalma wlied Iżrael iġibu l-​offerti tal-​qmuħ tagħhom f’ġarar indaf fit-​tempju tal-​Mulej. U lil xi wħud minnhom neħodhom b’qassisin u Leviti.’”—Isaija 66:20, 21.

¹³ Xi wħud minn dawn “ħutkom kollha minn kull ġens” kienu preżenti nhar jum il-​Pentekoste meta l-​ispirtu qaddis tferraʼ fuq id-​dixxipli taʼ Ġesù. Ir-​rakkont jgħid: “F’Ġerusalemm kien hemm xi Lhud, nies twajba minn kull  nazzjon li hawn taħt is-​sema.” (Atti 2:5) Dawn ġew Ġerusalemm biex iqimu skond id-​drawwa Lhudija, imma meta semgħu l-​aħbar tajba dwar Ġesù Kristu, ħafna eżerċitaw fidi fih u tgħammdu.

14, 15. (a) Il-​Kristjani midlukin kif ġabru iktar ‘aħwa’ spiritwali wara l-​Ewwel Gwerra Dinjija, u dawn kif inġiebu lil Jehovah bħala ‘offerta f’ġarra nadifa’? (b) Jehovah b’liema mod ‘ħa lil xi wħud minnhom b’qassisin’? (ċ) Min kienu xi Kristjani midlukin li kienu involuti fil-​ġbir taʼ ħuthom spiritwali? (Ara l-​kaxxa f’din il-​paġna.)

¹⁴ Qiegħda din il-​profezija titwettaq fi żmienna? Iva, tabilħaqq. Wara l-​Ewwel Gwerra Dinjija, il-​qaddejja midlukin taʼ Jehovah għarfu mill-​Iskrittura li s-​Saltna t’Alla kienet ġiet stabbilita fis-​sema fl-​1914. Permezz taʼ studju bir-​reqqa mill-​Bibbja, saru jafu li kellhom jinġabru ‘aħwa,’ jew werrieta, oħrajn tas-​Saltna. Ministri qalbenin ivvjaġġaw “sa truf l-​art” b’kull mezz taʼ trasport biex  ifittxu membri prospettivi tal-​fdal midluk, li l-​biċċa l-​kbira minnhom ħarġu mill-​knejjes tal-​Kristjaneżmu. Meta kienu jinstabu, kienu jinġiebu bħala offerta lil Jehovah.—Atti 1:8.

¹⁵ Il-​midlukin li nġabru fis-​snin tal-​bidu ma stennewx li Jehovah se jaċċettahom kif kienu qabel ma waslu għal għarfien dwar il-​verità tal-​Bibbja. Huma ħadu passi biex jindafu minn tinġis spiritwali u morali sabiex setgħu jiġu preżentati bħala ‘offerta f’ġarra nadifa,’ jew bħalma qal l-​appostlu Pawlu, bħal ‘xebba safja mressqa quddiem Kristu.’ (2 Korintin 11:2) Minbarra li jiċħdu duttrini żbaljati, il-​midlukin kellhom jitgħallmu kif jibqgħu newtrali b’mod assolut fil-​kwistjonijiet politiċi taʼ din id-​dinja. Fl-​1931, meta l-​qaddejja tiegħu kienu tnaddfu sal-​punt li setgħu jkunu aċċettabbli, Jehovah b’qalb tajba tahom il-​privileġġ li jġorru ismu bħala Xhieda taʼ Jehovah. (Isaija 43:10-12) Iżda, Jehovah b’liema mod ‘ħa lil xi wħud minnhom b’qassisin’? Bħala grupp, dawn il-​midlukin saru parti minn “saċerdozju rjali, nazzjon qaddis,” u offrew sagrifiċċji taʼ tifħir lil Alla.—1 Pietru 2:9; Isaija 54:1; Lhud 13:15.

Il-​Ġbir Ikompli

16, 17. Min hu “nisilkom” wara l-​Ewwel Gwerra Dinjija?

¹⁶ In-​numru sħiħ taʼ dak is-​“saċerdozju rjali” huwa 144,000, u maż-​żmien, il-​ġbir tagħhom tlesta. (Apokalissi 7:1-8; 14:1) Kien dan it-​tmiem tax-​xogħol tal-​ġbir? Le. Il-​profezija taʼ Isaija tkompli: “‘Bħalma jibqgħu quddiemi s-​smewwiet ġodda, u l-​art ġdida li jiena nagħmel,’ jgħid il-​Mulej, ‘hekk jibqaʼ nisilkom u isimkom.’” (Isaija 66:22) Fl-​ewwel twettiq taʼ dan il-​kliem, il-​Lhud li jirritornaw mill-​jasar f’Babilonja se jibdew irabbu t-​tfal. B’hekk, il-​fdal Lhudi li rritorna, “l-​art ġdida,” taħt l-​amministrazzjoni  Lhudija l-​ġdida, “is-​smewwiet ġodda,” se jkun stabbilit fis-​sod. Madankollu, il-​profezija kellha twettiq mill-​iktar notevoli fi żmienna.

¹⁷ ‘In-​nisel’ li l-​ġens t’aħwa spiritwali jipproduċi huwa l-​“kotra kbira,” li għandha t-​tama taʼ ħajja taʼ dejjem fuq l-​art. Dawn jiġu “minn kull ġens u tribù, minn kull poplu u lsien,” u huma weqfin “quddiem it-​tron u quddiem il-​Ħaruf.” Dawn ‘ħaslu l-​ilbiesi tagħhom u bajduhom fid-​demm tal-​Ħaruf.’ (Apokalissi 7:9-14; 22:17) Illum il-​membri tal-​“kotra kbira” qegħdin joħorġu mid-​dlam spiritwali għad-​dawl li jipprovdi Jehovah. Huma jeżerċitaw fidi f’Ġesù Kristu, u bħal ħuthom il-​midlukin, jistinkaw  biex jibqgħu nodfa spiritwalment u moralment. Bħala grupp huma jkomplu jaqdu taħt id-​direzzjoni taʼ Kristu u se ‘jibqgħu weqfin’ għal dejjem!—Salm 37:11, 29.

18. (a) Il-​membri tal-​kotra kbira kif aġixxew bħal ħuthom il-​midlukin? (b) Il-​midlukin u sħabhom kif iqimu lil Jehovah “minn xahar għal xahar, u minn Sibt għal Sibt”?

¹⁸ Dawn l-​irġiel u n-​nisa li jaħdmu iebes u li għandhom it-​tama li jgħixu fuq l-​art jafu li waqt li huwa vitali li jibqgħu nodfa moralment u spiritwalment, hemm iktar involut biex wieħed jogħġob lil Jehovah. Ix-​xogħol tal-​ġbir qiegħed fl-​aqwa tiegħu, u huma jridu li jkollhom sehem fih. Il-​ktieb taʼ l-​Apokalissi jipprofetizza dwarhom: “Jinsabu quddiem it-​tron taʼ Alla, lejl u nhar jaqduh fit-​tempju tiegħu.” (Apokalissi 7:15) Dan il-​kliem ifakkarna fit-​tieni vers mill-​aħħar fil-​profezija taʼ Isaija: “‘Jiġri li minn xahar għal xahar, u minn Sibt għal Sibt, kulħadd jiġi jinxteħet quddiemi,’ jgħid il-​Mulej.” (Isaija 66:23) Dan qed iseħħ illum. “Minn xahar għal xahar, u minn Sibt għal Sibt”—jiġifieri, regolarment, kull ġimgħa taʼ kull xahar—il-​Kristjani midlukin u sħabhom, il-​kotra kbira, jiltaqgħu flimkien biex iqimu lil Jehovah. Dan jagħmluh billi, fost affarijiet oħrajn, jattendu l-​laqgħat Kristjani u jieħdu sehem fil-​ministeru pubbliku. Int wieħed minn dawk li regolarment ‘jiġu jinxteħtu quddiem Jehovah’? In-​nies taʼ Jehovah jsibu ferħ kbir f’li jagħmlu dan, u dawk tal-​kotra kbira jħarsu ’l quddiem lejn iż-​żmien meta “kulħadd”—il-​bnedmin ħajjin kollha—se jaqdi lil Jehovah “minn xahar għal xahar, u minn Sibt għal Sibt” għall-​eternità kollha.

It-​Tmiem Finali taʼ l-​Għedewwa t’Alla

19, 20. Geħenna għal xiex kienet isservi fi żminijiet Bibliċi, u x’tissimbolizza?

¹⁹ Vers wieħed baqaʼ fl-​istudju tagħna mill-​profezija taʼ  Isaija. Il-​ktieb jikkonkludi b’dan il-​kliem: “Meta joħorġu, jaraw l-​iġsma tan-​nies li xxewwxu kontrija. Id-​dud tagħhom ma jmutx, lanqas jintefa n-​nar tagħhom, u kulħadd jistmellhom.” (Isaija 66:24) Ġesù Kristu x’aktarx li kellu din il-​profezija f’moħħu meta inkuraġġixxa lid-​dixxipli tiegħu biex jissimplifikaw ħajjithom u jpoġġu l-​interessi tas-​Saltna l-​ewwel. Hu qal: “Jekk għajnek hi għalik okkażjoni taʼ dnub, aqlagħha barra; jaħbatlek aħjar li tidħol b’għajn waħda fis-​Saltna taʼ Alla milli tinxteħet b’għajnejk it-​tnejn [“f’Geħenna,” NW], fejn id-​dud tagħhom ma jmutx u fejn in-​nar ma jintefiex.”—Mark 9:47, 48; Mattew 5:29, 30; 6:33.

²⁰ X’inhu dan il-​post imsejjaħ Geħenna? Sekli ilu, l-​istudjuż Lhudi David Kimhi kiteb: “Huwa post . . . imiss maʼ Ġerusalemm, u huwa post moqżież, u fih jitfgħu affarijiet imniġġsin u iġsma mejtin. Kien hemm ukoll nar kontinwu hemmhekk biex jaħraq l-​affarijiet imniġġsin u l-​għadam taʼ l-​iġsma mejtin. Għaldaqstant, il-​ġudizzju tal-​ħżiena jissejjaħ simbolikament Geħinnom.” Jekk, bħalma jissuġġerixxi dan l-​istudjuż Lhudi, Geħenna kienet tintuża biex jintremew fiha ż-​żibel u l-​iġsma mejtin taʼ dawk li kienu jitqiesu indenji li jindifnu, in-​nar kien ikun mezz addattat biex jiġi eliminat dan l-​iskart. Dak li ma kienx jiġi konsmat min-​nar, kien jikkonsmah id-​dud. Xi stampa xierqa tat-​tmiem finali taʼ l-​għedewwa kollha t’Alla! b

21. Il-​ktieb taʼ Isaija għal min jikkonkludi fuq nota pożittiva, u għala?

²¹ B’referenza bħal din għal katavri, nar, u dud, m’huwiex minnu li l-​profezija kommoventi taʼ Isaija tikkonkludi fuq nota tal-​waħx? Bla dubju, l-​għedewwa akkaniti t’Alla hekk jaħsbu. Imma għall-​ħbieb t’Alla huwa  inkuraġġanti ferm il-​mod kif Isaija jiddeskrivi l-​qerda taʼ dejjem taʼ dawk li huma mill-​agħar. In-​nies taʼ Jehovah għandhom bżonnha din l-​assiguranza li l-​għedewwa tagħhom qatt ma se jerġaʼ jkollhom il-​kontroll f’idejhom. Dawn l-​għedewwa, li tant nikktu lill-​adoraturi t’Alla u tant ġabu tmaqdir fuq ismu, se jinqerdu għal dejjem. Imbagħad, “in-​niket mhux se jqum it-​tieni darba.”—Naħum 1:9, NW.

22, 23. (a) Spjega kif ibbenefikajt mill-​istudju tiegħek mill-​ktieb taʼ Isaija. (b) Issa li studjajt il-​ktieb taʼ Isaija, x’inhi d-​determinazzjoni tiegħek, u x’inhi t-​tama tiegħek?

²² Hekk kif nikkonkludu l-​istudju tagħna mill-​ktieb taʼ Isaija, ċertament li napprezzaw li dan il-​ktieb Bibliku m’huwiex sempliċement storja antika. Għal kuntrarju, għandu messaġġ għalina llum. Meta nirriflettu fuq iż-​żminijiet mudlama li kien jgħix fihom Isaija, nistgħu naraw ix-​xebh li hemm bejn dak il-​perijodu u żmienna. It-​taqlib fil-​qasam politiku, l-​ipokrisija fost in-​nies reliġjużi, il-​korruzzjoni fis-​sistema ġudizzjarja, u l-​moħqrija taʼ dawk li huma leali u foqra kienu karatteristika taʼ żmien Isaija, u huma karatteristika taʼ żmienna. Il-​Lhud leali fis-​sitt seklu Q.E.K. bilfors li kienu grati għall-​profezija taʼ Isaija, u aħna llum niġu mfarrġin hekk kif nistudjawha.

²³ F’dawn iż-​żminijiet kritiċi meta d-​dlam jiksi l-​art u l-​ġnus mgħottijin bi sħab iswed, ilkoll kemm aħna ninsabu grati profondament li Jehovah, permezz taʼ Isaija, ipprovda dawl għall-​bnedmin kollha! Dan id-​dawl spiritwali ma jfisser xejn inqas minn ħajja taʼ dejjem għal dawk kollha li jaċċettawh b’qalbhom kollha, hi x’inhi l-​oriġini nazzjonali jew l-​isfond etniku tagħhom. (Atti 10:34, 35) Għalhekk, jalla nkomplu mexjin fid-​dawl tal-​Kelma t’Alla, naqrawha kuljum, nimmeditaw fuqha, u ngħożżu l-​messaġġ li fiha. Dan se jkun għalina taʼ barka eterna u se jġib tifħir fuq l-​isem qaddis taʼ Jehovah!

[Noti taʼ taħt]

[Mistoqsijiet taʼ Studju]

[Kaxxa f’paġna 409]

Offerti għal Jehovah taʼ Midlukin mill-​Ġnus Kollha

Fl-​1920, Juan Muñiz telaq mill-​Istati Uniti biex imur Spanja u mbagħad ivvjaġġa lejn l-​Arġentina, fejn organizza kongregazzjonijiet taʼ wħud midlukin. Mill-​1923 ’il quddiem, id-​dawl tal-​verità idda fuq nies taʼ qalb onesta fl-​Afrika tal-​Punent meta l-​missjunarju William R. Brown (spiss imsejjaħ Bible Brown) irħielha lejn postijiet bħalma huma Sierra Leone, il-​Gana, il-​Liberja, Il-​Gambja, u n-​Niġerja biex jippriedka l-​messaġġ tas-​Saltna. Dik l-​istess sena l-​Kanadiż George Young niżel il-​Brażil u mbagħad ivvjaġġa lejn l-​Arġentina, il-​Kosta Rika, il-​Panama, il-​Venezwela, u saħansitra l-​Unjoni Sovjetika. Madwar l-​istess żmien, Edwin Skinner baħħar mill-​Ingilterra lejn l-​Indja, fejn ħadem għal ħafna snin fix-​xogħol tal-​ħsad.

[Stampa f’paġna 411]

Xi Lhud f’Pentekoste kienu ‘aħwa li nġiebu minn kull ġens’

 [Stampa taʼ paġna sħiħa f’paġna 413]